Dan. 6 - Alkitab bahasa Luang

Rho'la targa Daniel la'a singa lienni

¹ Dewade ray Darius makden la Media de nwaga Belsyasar pa nhi'a ray. La' ler de Darius umurnu de teramponema wehrani woru.

² Ray Darius lodna-hairni de rhakre'era la propinsi rahu ida terampworu. Pede Darius ntutmuata-nkewra'a riy rahu ida teramporu totpena la'a propinsi id de rima-rima nodi plolli la gahani, emeka gubernura ida.

³ Ne Daniel nora riy wor wuali de rrana pa rodi plolli pa ramkek rer lia gubernur honona re totpena yana riy id mana rhi' arukia ray Darius.

⁴ Hota plol memna la'a Daniel kniarni, de samomuou nareh miemna la o'ta-mata re maka rkar wiutu rora gubernura re honona. La' hade pede ray wniarorni totpena nran owa'an Daniel pa nla'a makodi plolli la'a lodna-hair de tetema.

⁵ Mere o'ta-mata rora gubernura re honona rwahak talan pa rtota Daniel la'a tulanni-kniarni ralamni, ho'mana edonna rlernana talan la, yoma Daniel nhi' hadom de lol talanni. Edon nputra-npalka mere tulanni-knarni honona raplollol momuou pede riy rpesiaya.

⁶ La' hohoni dewade idma nakot la ida niwra: “Hota it edonna tlernan Daniel di halli. La' samomuounu de ittot e' pa nlernohora ray titni ne edon nlernohora Uplerlawanni deulu-tatarni. Mere plollolli de hota nahmena yoma pesiayni la' Uplerlawanni de naruri miemna. La' hade pede hota nlernana ray niukamnu.”

⁷ Dewade honnona rewre'wa rla'awa la' ray die pa rakot la ray riwra: “Tun ray Darius, mmuormiori plalahwa la mai nohkerna-rai kieran di wawannu.

⁸ A honnonami makla' maklina-kmat la tulla-kniari, mak kla'a gubernur la me makheli-kpapna gubernur ror wut niek a hononam di makodi plolli la' hair di de amla' olek lir id wa pa ama mpakla tuna totpena tuna nalgota horta-hairi panpahna ida, maka la riy id mana yana nwer wawni pa nakot nohora lirni la' horat maka tuna ha nalerun de! Tuna nakota la horat de totpena la'a lera terampwotel rialamni de edonna rwayow nohora riy id pa nwer nurnu onde napupu tartarma pa npolu-nwak la'a e pesiayni la'a hya'-hya' to'a maka ha nhu'ru-nhelma, onde la'a rimormiori hapessarna he' to'a. Eneknek to'a me rpolu-rwak la la tuna nmeh'a. La'pa he' ed mak edonna katlin la o titmu de, rkamit nana pa rrinia la'a singa lienni ralamni.

⁹ Ampak la tuna de orgahamu mtierna okarmu la horat de totpena rhi'a la deulu-tatra Media nor Persia totpena yana riy rwayotlia onde edonna ratlina-ratailla.”

¹⁰ Pede ray Darius nterna okarni la horat de pa rala pa nwewar noha.

¹¹ La'pa Daniel natlin nohora horat de dewade nla'awa romni nayanni, la'a gen nio' heyanna. La' e genni de, folla-folla re rapal rieria Yerusalem. La'pa e nwaltiora-nwaltieman la'a folla mak kaphyari re gaini ralamni pa e nsumbain la e Uplerlawanni me ena'uli-nawedia, de re'eni wotellia la lera id ralamni, nlernohora hya'a maka nhi'inde ha nhi'a.

¹² Makodi plolli re rla' rewre'wa pa ramkek nana Daniel ntepartarlia siumbaini pa nwaka tniulan la Uplerlawna.

¹³ Dewade honnona re rla rto'ona Daniel la'a ray. Rakot la ray riwra: “Tun ray, emkamenila horat maka omtiern oleka o' okarmu pa o' e mliarna yana riy rsumbain la pesiayni la'a hya'a-hya' to'a onde la'a rimormior miaka kapesarna maiya noha wawannu? Eneknek to'a me rpolu-rwakla la'a tuna nmeh'a toh?! Ne he' ed maka ktutg kapesaranni de rkamit nana pa rrinia la singa lienni ralamni.” Noma ray nakot la re niwra: “Plola tita la horta-hair de ha nwali olek la deulu-tatra mai Media nora Persia pa hota riy ta'enniana nwayotlia onde edonna natlina-natailla.”

¹⁴ Noma rakot la ray riwra: “Daniel riy Yehuda (Israel) maka ha rhopliala mai Babel di ed maka edonna kwarei-kwadana tuna titni de. Entutga kapesaranni de pa ensumbain nan la e Uplerlawanni. La' lera id de nsumbain memna re'eni wotelu!”

¹⁵ La'pa ray natlin nana hade wa de ray ralamni ntuin doin la Daniel pede nahak meman talan totpena na nalewna Daniel. La'pa lera nmel wa mana ray e nwaror nohora ma'ta Daniel ha lolola.

¹⁶ La' noma o'ta-mata re rewre'wa pa rmai owa'an pa rakot la ray riwra: “Tuna nhoratreria lirni la horat de ralamni de ha nwali olek la deulu-tatra mai Media nora Persia pa taken niana riy rherun doinia la!”

¹⁷ Pede ray nal tita pa rla rtorna Daniel totpa rnaklia la singa lienni ralamni. Mere ray lirni la' Daniel niwra: “Daniel! Twak de o Uplerlawanmu maka omkola tieru-muawur nehla (omsiumbain rer lia) de pena Nalewna o la'a singa nurnu!”

¹⁸ La'pa ray npol tiar lia Daniel na'nama rala wat liawna id pa ra rherit targa lien de hu'ulli na'nama ray nala lodna-hairi capni nora o'ta-mata re capni wal pia rodi rcap watu makden la hu'ul de gaini totpena riy id mana taken niana ntota Daniel pa nalewna.

¹⁹ Dewade ray npolan la' kruwun genni. Ray edonna na'ana-nemnu me edon nwak pa rhi' hadom totpa rhi' e ralamni pa nahepru. Ta'enniana nanin matni la mela plahwani.

²⁰ La'pa repra rawria dewade ray namat doin pa pleta-plet pa nokria singa lienni.

²¹ La'pa ray nte'ela hande de ihranu ntepul wenna noma nhaun la Daniel niwra: “Daniel, Uplerlawna inhatta makodi plolli pa nodi liarni de, limni-rorni ne! Emkameni la o Uplerlawanmu maka omkiola tieru-muawur nehla de? Enodi plolli pa Entulan tiy o' me edonna?”

²² Noma natlin de Daniel lirni nwatiawua singa lienni ralamni pa nwalolla ray niwra: “Ee! Mmuormiori plalahwa tun rayee!

²³ Ee! A Uplerlawnu Nhopan doinia lili'irnu-hopopanni pa nma rolw apitga singa re nurnu pa id mana edonna nheik la a ino'nu. Uplerlawna Nalewn a'u, yoma a'g edon ghal nohora la E'a, me la' wali tuna nekde a'g e ukleha do'a-halla.”

²⁴ Ray nahepur nan de kaniha-kamalia noma nhopan pa ralgota Daniel la singa mno'oni de. Noma rlernohora ray titni pa ralgota Daniel la'a singa mno'oni, mere ramkek la Daniel inon de ulatni oke' mana singa edonna nlok et lia, yoma npesiaya Uplerlawanni.

²⁵ Dewade ray nhopan pa rla rtorna riy miaka kaklaka Daniel. Noma rkor nan momuoga mak kaklaka Daniel re ror wutga hawni-a'nani pa rnaklia la singa mno'oni de. La'pa rnaklia pa edonna rtai mia'ta yawa, dewade singa re rneh niohora la heyanan pa rlihir matmata-rhaw riarara me rautu mkoha-mnanna re.

²⁶ La' noma ray Darius na'enyatga horta-hairi la hairi-hairi me la'a noh pa'etu-rai piatatra nora leta-leta ror wut nieka wniareini-wniahaurnu, la'a riy honona la noheri woru-lyanti nayanni. La' horatni lirni de niwra: “Awuaka kalwieda-paitiota lawlawan tiy miy!

²⁷ Agala a ti'tu la'a a lodna-hairu liwna tatarni, totpena honnona rhu'ru-rhelma ra'unni-ramta'ata Uplerlawna maka nhi'inde Daniel ha nkola tieru-nawur nehla la de. E' ed mak kdenrer pia Nodi plolli pa nodi liarni. Ne hota lodanni-hairni edonna niata. Plolli-mnehenni hota edon nhoru.

²⁸ Hota E' ed maka kamori-kalewna rimormiori. E' ed maka khi'a hedu-wairi (mujizat) la'a lyanti me nohkerna wawannu totpa Entutga E rurni-laini. E' ed maka kamori-kalewna Daniel la'a singa nurnu.”

²⁹ Emkadela la Daniel liwangeni-mtatangenni maka tutulu ndenrer lia la'a lerni la ray Darius nodi plolli me la'a lerni ray Kores nodi plolli la lodna-hairi Persia de.