Dan. 5 - Alkitab bahasa Luang

Ray Belsyasar, Nebukatnesar upni-a'nani de, namkeka riy lima ida e nhorta-nlai

¹ La'pa la'awa la lera id wa dewade ray Belsyasar npolg awoka o'ta-mata riy riwnu ida pa rma ra'ana-remun la la'a e meini.

² La'pa rtepartarlia ya'ana me niemnia anggur turnu, dewade Belsyasar nal titni pa rla rala lar klas miaha-pera maka amni Nebukatnesar ha nwarui-nwate'la nan oleka la Uplerlawna roma kreini ralamni la Yerusalem pa rodi oleka la noha Babel di. Ray Belsyasar wniarorni totpena nora o'ta-mat lalawna, ror wutga ray hawni, me hawa liahunu honona rhota-rram la la'a klas miaha-pera ri honona.

³ Rla' pa rodia klas miaha re pa rmai wia noma rnairia pa remnia anggur turnu.

⁴ La'pa ra'ana-remun wa dewade ra'uli-rawedia ir uplerni-upmatni maka ha rakoki-rayap niana la maha, pera, pi'ru tnieri, mnotna me au-watu.

⁵ Dewade plinu-plinanama ramkek de riy lima ida e nhorta-nlai hadomdom la ray likatni rupni (tembokni) mak kapalia wa'dgai (wa'du) lelerni pede ray namkek tertehra lim maka e ntulsi de.

⁶ Dewade ray nhedu pua gaini nwahra taru ma ne torni re rdiwra-rda'ala la genni me nakleh ruri.

⁷ Noma nhaun pa npol lia makhi'a ukru-rehera, makalla' talla, totpa rmai pia rhi'a reher la'a mak ha namkek nande. La'pa honona re rmai wia noma ray nakot la re niwra: “La'pa he' ed maka kakwiet nana maka ha rhorta-rlai nian de nakot momuoga mai a'u nanpena hota gala naniaria rain lawna hor ponpona (ungu) emeknekama nhi'inde ray lodna-hairni rnairia me wui miaha mak ktutga yatota-yawawa. La' walia hota ariana pa namtatan la gen miaka kodi plolli totpena nhi' o'ta-mat makla' wotellu la lodna-hair di.”

⁸ Makatu khi' ukru-rehera re rmai wia mere ta'eni rpaik nana maka ha rhorat tar die me la' walia takeni rakwiet nana ha nnia'eratni pa rakota la ray.

⁹ Yeher to'ama ray Belsyasar namta'ata pa gaini lakputputi la' walia o'ta-mat lalawna re emeka komu-kamua re.

¹⁰ La'pa ray inni natlin nana ray nora o'ta-mat lalawna re polpuolu-hawuawnia noma nmai pia nler la gen miaka ha ra'ana-remun la ralamni de, na'nama nakot la re niwra: “Mmuomiori aplahwa ra'yu ne! Yana ralammu worworga me gaimu mana yana nwahra

¹¹ yoma la'a tun ray lodna-hairni di de muanu ida etla maka nhi'inde ntulan la ammu. Maka riy die ha npesiaya de nhiw lululli nhu'ru ralam reria. La'a lerni la tuna amni nodi plolli, de amamkek memna muan die kirkira-ralma-riorni wniarorni-wnialaini samomuou pa edonna nparei-npahal etlia la'a uplera-upmat miaka itsoi-ttania de. Ammu ray Nebukatnesar nran olek hade pa nhi' o'tani la makatu khi'a ukru-rehera la' handi.

¹² La'a mi'a-lo'a, wniarora-wnialai maka takeni takwiet nan nnia'eratni me la'a hya' to' maka edon rakot nohora ma'ta, de muan die nat momuog oleka! Nanni Daniel mere ammu npolga la Baltsasar. Pede la'pa ompuayow de rpol nieka wa. Hota hya' maka ha mumkeka la riy lim de e ntulsi, de hota Daniel natga re pa nwe'er nnia'eratni la tuna.”

Daniel nwe'er nohora nhiorta-lie'u die nnia'eratni

¹³ Dewade rodia Daniel pa rla' ray de. Noma ray nakot la niwra: “Mak ha riwra Daniel o inhatti? O' di de maka a' a'mu naliria'nu la riy Yehuda (Israel) miaka ha rhopliala la' Babel di?

¹⁴ A'g e ultina de maka ompuesiaya de nhiw lululli e nhu'ru ralam reri o'a, pede nhi'inde o muatu mpuarora-mpualai me o wniarormu npoklihira-npoknai.

¹⁵ Makhi'a ukru-rehera honona, e rta'g oleka pniaik la'a maka ha rhorat tar di totpa rakota nnia'eratni mai a'u. Mere id mana edonna nlola.

¹⁶ Pede la' ler di na'nama agatga de o' nanpena ed maka kwe'era lira-tun muaka katniomna, me muatu mpualol nohora kolie'u-kokailli. Ne la'pa omuatu mpue'er nana maka ha rhorat tar di, pa omukota nnia'eratni mai a'u, de hota agala naniairi rain plalahwa mak hor ponpona id tiy o'a nor wut wualia wui miaha pa agala utota-uwaw o'a. Me hota rian wali o' pa omdiella gen tiutulu mak wotellu la'a lodna-hai'ru di.”

¹⁷ Noma Daniel nwalolla niwra: “Tuna, awuak pa tuna yan nal neka limtutu rella mai a'u. Limtutu re pena tuna nmeh'a nlernana onde tuna nal neka la'a riy dom to'a. Mere la' hya' ed maka ha rhorat taru re pena apuaikia totpa tuna natlina, me pena a'ukot nohora nnia'eratni la tuna.

¹⁸ Uplerlawna Makden la Tutullu-Lolo'oni ed mak khi'a tuna amni Nebukatnesar pa nla'a ray miemeha me nal walia pa nmeh'a inponni mai noheri-woru mai lyanti nayanni nhi' nande riy honona rhu'ru-rhelma me rwetweta la nanni.

¹⁹ La inponni de pede riy honona mak kwatiawua lodna-hairi, noh pa'etu-rai piatatra, leta-leta ror wut nieka wniareini-wniahaurnu, honona re rdiwra-da'ala nayanni. La' pa niwra nwenan rira, de nden nek la e wa. Me la'pa niwra nalewan rira, de la' e nek wa. Ne la'pa niwra nrana riy id la la'a gen tiutulu onde naliernia de ho'mana nden nek la e' nek wa.

²⁰ Mere la'pa tuna amni natulu-napetna pa nhi' o'ta-watu me ntutga maranni-wuhurni pede ema rwakloliernia la'a liwangeni-mtatangenni la lodna-hairni pede preheni-mkaini la'a kota-nana mana onanwa.

²¹ Lima-rora la'a e tnioranni-riautnu rla'a ralm id pa rhorgota ammu Nebukatnesar la' genni-tienni me o'ta kriahlanu la ralma-riorni nwal tiargho'ola nhiuri-wnia'ana ralma-riorni. Nhi'inde nor to'a hamormiori pora-dawra re rhol wiutu ne nre'ela hayori-orpau pa na'an wewan kerna-atiaw miota me nanina-namat la howna-kgara ralamni. Mormiorni emkade pa la' pa ntutu-nte'ela la' ler maka eramni nawalia temni na'nama natga de Uplerlawna Makden la Tutullu-Lolo'oni ed maka kodi plolli la'a lodna-hairi makden la nohkerna wawannu di honona pa Uplerlawna ed makodi plolli, ne Nala la'a he' to'a maka E ralamni ha nala totpa ir rodi plolli la.

²² Mere la'pa e' a'nani tuna o'a, omuat niohora oleka hare honona ho'mana, mhueria plinu-mpual tiemna. O' edon mpuatut lia hare honona mere e mhi' targho'ola pa mtiutga tulu-petanmu lawan rehia.

²³ Tuna e nhi' oleka Orgahi-Orha'a Makdella Ilyamou-Watyatoha pa Nwallia tuna arwalli, yoma tuna nparan pia nhopna rla ra'ala Uplerlawna larni pa rodi rmai pia tuna nnairia. Ne la' dodo'ondi de o muora tniutmu-nhianmu nhielmu-liakmu mior wutga hapmu me hapmu liah'umu pa miemun la lari (klasi) re! Noka Uplerlawna larni re, mniairia pa mi'uli-miwed reria tuna uplerni-upmatni maka ha rhuri-rlewur nana la maha-pera, pi'ra tnieri, mnotna me ha rawte'ta-raprahni nana la watu-au. Mere uplermi-upmatmi re raplinu-raplo'a pa rakleha o'ta kriahlu la' walia edonna ratlina me edon ramkeka haneknek wawannu. La' talan emkade pede tuna nakleha ya'una-yamta'at la Uplerlawna-Mempulwatnu mak ktoran reria rimormiori aranni totpa hota rmormiori onde hota rmati. Tuna ha nlolola-lala'a nek de Uplerlawna ed maka kat niohora.

²⁴ Hade ed mak kariei piede Uplerlawna Nhi' totpa mimkek nana riy lima ida nhorta-nle'ge nnio'a de.

²⁵ Emkadilla nhiorat de: Rwarekna-rwarekna, rwataili-rwahakra.

²⁶ Hade nnia'eratni emkadila: Rwarekna: La' lerni la tuna ntorna-nka'a, de Uplerlawna Nwarekan nohor oleka palo'onni nor pletni pa dodo'ondi de Nalern oleka o'owa.

²⁷ Rtailia nnia'eratni de emkadila: La'pa rtailia tuna de weratni edonna la' walia hadoma.

²⁸ Rwahakra nnia'eratni: Tuna lodanni-hairni hota rwahakra la riy makden Media rora riy makden Persia.”

²⁹ Edon nalo'on wali ne Belsyasar nal tita pa rma rohga raini plalahwa hor ponpona (ungu) la Daniel inonni me ruin walia wui miaha la tiernu, na'nama nrana Daniel pa nla'a gen tiutulu mak wotellu la'a lodna-hairni.

³⁰ La' mel de nekpa plin-plianama arwalli rma pa rwenan nana Belsyasar makhi'a ray lia la Babel de!