Dan. 4 - Alkitab bahasa Luang

Nebukatnesar na'uli-nawedi Uplerlawna totpena riy honona rat niohora Uplerlawna inponni

¹ Ray Nebukatnesar nalgota titni la'a riy honona la mak kwatiawua lodna-hairi, noh pa'etu-rai piatatra, leta-leta ror wut nieka wniareini-wniahaurnu, de honona mak kden la lyanti nayanni. Niwra: “Kalwieda-paitiota la miy hononmi!

² Agiwra wuahaur nohor memna hihi'a-yapyap miak kamehi-kayona maka Uplerlawna Makdella Tutullu-Lolo'oni Nhi'a mai a'u.

³ Hihi'ini-yapyapni de riy takeni rpar nana. Yoma inponni narehi-nalawan memna. E nanpena ed makla' Ray pa nodia pa la nodi liarni. E' ed maka ktorna-kraut pa nahor tiuwu.”

Nebukatnesar nakot nohora mi'ini la re'eni wornu

⁴ “Mitlina! Adien nek la a kruwun ge'nu di pa a'una-gemun to'ola la'a hya' maka tiemna ga' to'ola. Amuori-diar lia re'a-tnia'ru pripanni-fa'anni wawannu.

⁵ Mere la mela ida ne a'g e mui' nana umkek nana hadom de nhi' nana ihru teplu mai a'u.

^6-7 Dewade a puolg awoka riy maka nhi'inde katu kakwie'eta mi'a-lo'a, makatu khi'a ukru-rehera, maka kat niohora lira-yatu nohkerna me mak kala' talla la' Babel, totpena rakot nohora a mi'u de, nnia'eratni. Mere la'pa makatu re honona rmai pia ratlin nana awuahawur nohora a mi'u de la' ira, de riy id mana edonna rat niohora nnia'eratni.

⁸ Hohoni dewade Daniel nmai. Daniel di maka agal nana pa nwawa Baltsasar nlernohor uplera-upmati mak apuesiaya de nanni. Mere e' pesiayni nhiwni lululli nhu'ru-ralma e'a. Pede a'ukot nohora a mi'u de la e'a. A'ukot la giwra:

⁹ “Ei, Baltsasar maka khi' o'ta-mata la makatu re honona. A'g e gatga de o' di nanpena o pesiaymu nhiw lululli e nhu'ru-ralma o'a pede hya' maka etla yawunamnu mana o muatga. Mutlina a mi'u di ne mukota nnia'eratni de mai a'u!

¹⁰ La'pa a'unina'u noma amui' nana au-ona tullu ida nmor die naniohor la noha letgara-mneneheni.

¹¹ Au die nmor pia natullu memna me onni petna me ndildila. Au die tutnu nla nkokar meman la lyanti pa nhi'nande riy makden la nohkerna wawannu ramkek nan momuoga.

¹² Tawni honona rmotmota me na'unu-nayeh nohora wo'oni pede riy makden la nohkeran di wawannu mana ra'an la ha wo'oni. Nhiuri-wnia'ana, makpora-kdawra mana, rahniu'ru lia au die tawni maka kpoti-kadwua mak karinin de nayanni me onu-ma'nu rapuon wutwut lia tutnu-akni. Ne hamormiori ror wut nieka rimormiori ho'mana ra'ana ha wo'oni.

¹³ Ne la'pa a'g e umkek rer mia'ta de, noma a'g e umkek nana Uplerlawna lili'irnu-hopopanni nwatiawua Ilyamou-Watyatoha pa nerun la yawa de tamkek la de emeknekama e natiaktiaka.

¹⁴ Nhaun pa niwra: Mietan doinia au diella me mdiawar doinia tutnu-akni re, mkiur doini momuoga tawni re honona, me mriurg'amdierna wo'oni re. Miwohor doinia nhiuri-wnia'ana makpora-kdawra la'a nayanni me onu-ma'nu mak kapuon la au die tutnu-akni.

¹⁵ Mere mial targa ga'ar onni. Miala tal rianti mnotna me pi'ra tnieri mia mput tiarga pa nden la la'a wewan rai mtatna wawannu. Miolin doinia pa nden la howna-kgara ralamni, totpena nora nhiuri-wnia'ana pora-dawra rden wutu la ruwnu-ahla ralamni.

¹⁶ Emkadella totpena wniarora-wnialai nhioli-lieta rimormiorni nwallia wniarora-wnialai nhioli-lieta nhiuri-wnia'ana la'a anni wo'itu.

¹⁷ Am di de Uplerlawna hopopanni-lili'irnu. Am di mak katiaktiak reri. Ne Uplerlawna Nhopan doin am pia ama makot tit di totpena rimormior la' meni to'a de rwayow nana Uplerlawna Makden la Tutullu-Lolo'oni, riwra la' E' nampena ed maka kodi plolli la lodna-hairi rimormiori, ne E' ed mak kala lodna hairi la'a he'a-he' to'a maka E ralamni ha nala. La' ler dom de Enala lodna-hairi la riy mak kla' ta'eni-kmai ta'eni totpa rodi plolli.””

Rakot nohora mi' la' re'eni woru die nnia'eratni

¹⁸ Dewade a'ukot la Daniel giwra: “A mi'u edadi! Pa dodo'ondi de, Baltsasar (Daniel), mukot nohor teka nnia'eratni mai a'u! Mai a lodna-hairu di eneknek o' nanpena ed mak katu kakot nohora de, yoma o pesiaymu de nhiw lululli nhu'ru ralm o'a.”

¹⁹ Dewade Daniel, maka ha rwet walia nanni la Baltsasar, de natlin nana a mi'u de dewade nhe'duma ne ralma-riorni de edon namtemna. Mere a'ukot la agiwra: “Baltsasar! Yan mumta'at la' la'a a mi'u de nora nnia'eratni.” Noma Baltsasar nwalolla niwra: “Tune! Awuak de mi' maka tuna ha nmi' de nnia'eratni hota ntai tuna arwalli ne yana ntai tuna.

²⁰ La'a au tutul liawan maka nkokar la lyanti pa tuna ha namkeka me rimormior noha wawannu mana rtakar rer wialia.

²¹ Tawni rmota-rkaulu me na'unu-nayeh nohora wo'oni pede riy mormioria makden la noha wawannu hota yehi yawrala ya'anni. Hamormiori pora-dawra mana rahniur lia nayanni, me onu-ma'nu mana puonni ranie'erla la'a tutnu-akni hananni.

²² O! Tuna, au tiutulu maka kdildil de de tuna inhata. O inponmu hota na'itar la pa nkokar la lyanti, pa omuodi plolli la noha-rai la'pa lodna-hairi la' meni-meni to'a la' nohkeran di wawannu honona.

²³ Ne tuna namkek nan walia Uplerlawna hopopanni nerun la Ilyamou-Watyatoha pa niwra: “Mietan doinia au diella me mpiakoha-mpianannia, mere mpien tiarga ga'ar onni pa nden la tani ralamni. Miala tali ranti mnotna nora pi'ra tnieri mia mpiut tiarga la'a wewan makden la rai mtatanni. Nden la hande pa howna-kgara nkamaha me nora hamormiori rden wutu niek la'a me'eta-anni wo'itu.”

²⁴ Tuna, la' mi'imu ralamni de Uplerlawna Makdella Tutullu-Lolo'oni Ntutga totpa hota Nukmua tuna emkadi:

²⁵ de hota rhokar doinia tuna pa edonna nden wut lia rimormiori mutnu mere tuna nden wut tio'ola hamormiori pora-dawra la wo'ora-kawru. La'pa tuna nden nek la hande pa na'an nana wewna la anni wo'itu pa emekwalima hayori pa nden nek la howna-kgara ralamni. La'pa hade nhor nia'nama tuna ralamni na'aw niana Uplerlawna Makdella Tutullu-Lolo'oni, de E' ed mak kodi plolli la lodna-hairi rimormiori nohkeran di wawannu honona, me E orgahani ed maka kmeha kala lodna-hairi la'a he'a-he' to'a maka E ralamni ha nala totpena ir rodi plolli la.

²⁶ Ne Uplerlawna hopopanni-li'irnu ed makhopan pa rwen tiarga au ga'ar on de pa nden la tani ralamni. Hade nnia'eratni de hota tuna nhi' owa'an ray yoma tuna ralamni na'aw nian oleka Uplerlawna, yoma la E' nanpena ed maka kodi plolli la la' nohkeran di wawannu.

²⁷ La' hade pede awuak pa tuna nlernohora neka hya' maka a'uno'a-unatga la tuna! Tuna yana nhi' do'a-hal wa mere tuna nhi'a-nyapia kalwiedni-paitiotni, me nara'a-napalga a'na riy patyata. Yanpa hota la' hade nanpena tuna nler la kalwiedni-paitiotni pripanni-fa'anni.”

²⁸ Noma la'pa nte'ela lerni dewade honona maka Daniel nakota re rtuin tar lia ray Nebukatnesar. Pede Nebukatnesar tuini-wedni de emkadi:

²⁹ La' wolla termida wehrani woru nlardoinla noma nalala'a la a genni-tienni la Babel, la'a geni pidarni wawannu.

³⁰ Noka Nebukatnesar nran inonni pa niwra: “Oi! Mimkektek la let Babel di samuonu de! A'g ed maka kdotra-kweh'wa nana de nwallia la'a let inama mai a lodna-hai'ru di pa ntut muemna a plola-mneh'u me ru'ru-a la'yu maka karehi-kalawna.”

³¹ Naltier rer mia'ta dewade lir id mak kwatiawua lyanti niwra: “Ray Nebukatnesar mutlin hadille! La'pa O plolmu-mnehemu emeka ray, Uplerlawna Na' nan oleka la o wa.

³² Hota rhokar doin o'a la'a rimormiori mutlialawna genni, ne omuor wut lia hamormiori maka kden la wewan kerna wawannu, pa mdien wut lia re pa mu'una wewan nan la anin tetema wo'itu pa emekwalima hayori. La' hade na'nama O ralammu na'awniana Uplerlawna Makden la Tutullu-Lolo'oni de, ed maka kodi plolli la rimormiori lodani-hairni me E' ed mak kala lodna-hairi re la'a riy maka E ralamni ha nala.”

³³ La' ler de nek wal pia Daniel lirni re honona edonna nhal kuku' eti. Rleretniekla rhokar doinia Nebukatnesar la'a rimormior mutliawna wokni-le'enu pa nler teman la hayori wokni-le'enu pa rwarui niohora wewna ya'ani ne ntul nieka howna-kgara ne moratni emeknekama iha wullu plahwani me kuknu' ho' de edonna nparei-npahal etlia lakma kuku plahwa mak kwakarma.

Nebukatnesar na'uli-nawedia Uplerlawna

³⁴ La'pa nalo'on nana anni wo'itu pua rlardoin wa dewade nwatniar la heyanna ne nhioratni la'awa temni, pa na'uli-nawedia Uplerlawna Makden la Tutullu-Lolo'oni, ne nhimlolioi-nlakdardara (nran la heyanna) Uplerlawna mak kodi plolli pa nodi liarni, niwra: “Uplerlawna E' ed mak ktorna lodna-hairi pa nodi liarni pa la nhoru. E ed maka kodi plolli la'pa nahor tuwu.

³⁵ Uplerlawna Nmeh'a neka ed mak kodi plolli pa Nhopna hopopna-lili'ir makodi keki-rautu (tantara) la Ilyamou-Watyatoha nor wutga rimormiori nohkerna wawannu. La'pa riy id mana edonna nwallia hadomdoma la Uplerlawna yamkekni. Me la'pa hya' maka ha Nhi' nana de riy id mana edonna nparan pia natiana ha lolola.”

³⁶ Noka Nebukatnesar nakot owa'ana niwra: “La'pa a nhiortu la'awa a te'mu, dewade aliernan owa'an tu'lu-petnu tniornu-riautu emeka mak kla'a ina-am lalawna la'a geni-tiena tutulu. Makano'a-ka'atu me mak ktutu-khan a'u rtutulu-rlele'w owa'an a' pua uwallia la'a a lodna-hairu ne la'a a na'nu ho'mana yeher to'ama ndaitia la' noheri woru-lyanti nayanni de nrehi owa'an la' ululu.

³⁷ Pede la'pa dodo'ondi wa de Nebukatnesar a' di de u'uli-uwed reri Orgahi-Orha'a makla' Ray lia Ilyamou-Watyatoha yoma la E tulanni-kniarni nden rer lia'a plol wawannu me arian reri E nanni la' heyanna yoma E orgahani ed maka kalernia riy mak ksukni kran inonni la' heyanna.”