Dan. 12 - Alkitab bahasa Luang

La'awa lera noha niatni

¹ Uplerlawna lili'irnu-hopopanni de nhar owa'ana lirni pa niwra: “La'awa la ler de Mikail, Uplerlawna lili'irnu-hopopanni mak nhi'inde natiak reria makden Israel miy hota nmai. Mikhai de ed mak kla' o'ta lawanni id la Uplerlawna lili'irnu-hopopanni re korni. Hota nmai pia natiak reria riy Israel yoma hota rler la kropna-krieutu, nniahora-nniala'a, yamuki-yama'ala maka makden la lodna-hairi edonna ramkek ma'ta. Mere hota Daniel o nohwalmu riy Israel maka nanni er rhorat targa la'a Uplerlawna pukni de hota rlernan mormiori-lewlewna.

² Rimormiorni liawanni maka rmati olekwa mana hota rmori owa'ana. Hota dom de rlernan mormiori plalahwa pa nodi liarni me korni re rlernan mola-ma'a pa nodi liarni. Tamkek ir de tmatiti'ira.

³ La'a riy maka katu kwarora-kwalai niohora Uplerlawna talan plollola de hota liplipa-kamka'ma emeknekama lyanti lipni-ka'mani. De he' ed maka kwatutu-kwaye'a rimormior wiali la kalwiedni-paitiotni de hota yamkekni de emeknekama liplipa-kamka'ma makden la lyanti pa nodi liarni.”

⁴ Noma lili'iru-hopopan de nakot owa'an niwra: “Mere Daniel e, la dodo'on diwa mtiutwua puk de pleini totpena yan naphyari, la'pa rweiya lera hohoni. Mere lera hohoni edon ntutu-nte' ma'ta de hota rirahu rla'a-rmai pia rwahak talan totpena rat niohora hare honona nnia'eratni.”

⁵ Lili'iru-hopopan de naltier pa nhorwua noma Daniel a'u, a'g e umkeka muanu woru. La' riy id de, e naprir lia la'a gerlawna aratni mai handi, me la' riy id de ntutrier lia gerlawna aratni walli hande.

⁶ La' riy id de natiana mak kaprir lia' gerlawna o'tani, de la' riy mak knairia naniairia koka mnunuhru de, pa niwra: “Oi! Hota la'a hya' ler nanpena hihi'a-yapyap miaka khi' mati'ira ri rhoru?”

⁷ Dewade mak knairia koka mnurnuhru de nran limni rrora la lyanit marna pa nwet la Uplerlawna-Mempulwatnu nanni, totpa naplol nohora e lirni. Yoma Uplerlawna-Mempulwatnu ed mak kden la Ilyamou-Watyatoha Ilwo'itu-Dar Wonema (Sorga) ne E' ed mak kodi plolli pa nodi liarni. Noma maka knairia koka mnurnuhru de niwra: “Plol toto' meman de mahnekni de anni wotel rehenu. De la'a ler maka ha radunti-rawetria Uplerlawna rimormiorni pa nhorwua, na'nama hare honona maka khi' mati'ira ri, rhoru wual wia.”

⁸ Maka ha nakota re honona de a'utlin nan momuoga, mere a'g upling nnia'eratni. Noma a'utiana giwra: “Tuna, hari honona rhorwua de hota emkameni?”

⁹ Noma nwalol ma'u niwra: “Mlia'awa dodo'on diwa, Daniel! Yoma lira-tunu ri de hota rayamoini me edonna rakot genni la'pa nte' meman la' lera hohoni.

¹⁰ Hota Uplerlawna Nta'u riy harahu pa emolmolla riy mak khuri-kwewal maha totpa nker doinia mah wawahra kdeheni. Emkade pede Uplerlawna Namou-nawitna E rimormiorni mere riy yatyata-halala hota edonna rna'erit nana hari honona, pede rhi' neka yatyatni-halalli pa nodi liarni. Mak katu kna'erit nan hare de enekneka riy makatu katiak reri inonni la yatyata-halala ralamni.

¹¹ La'pa nmai wia ler maka riy yatyata de nlarna pa yana riy rala nhiurliwtu-wnialodwa himima-rere'a la Uplerlawna roma kreini pa la'pa nsampe la' ler maka riy yatyata de nhopan pa rariria hadom mak khi' akdeha-aktiahlia gen lululi la Uplerlawna roma kreini ralamni narieiniande Uplerlawna Nawenna, de lera riwnu ida rahu woru terampwosiewa (1,290 hari).

¹² Mere hota hameni mak klernohor reria Uplerlawna lirni-tunnu pa nla nte'ela lera riwnu ida rahu wotelu terampwotelu wehrani wolima (1,335 hari) de hota ir er mak klernan unut lawna.

¹³ Mere Daniel o'a, mlia'awa dodo'on diwa, me yana mpuadur oo! La'pa nte'ela lerni-melli hota o mmuati mere mmuori owa'ana totpena mliernan ha samomuounu maka Uplerlawna Nwahi' targa pa hota mliernana la' lera noha niatni la lera hohoni de.”