Dan. 11 - Alkitab bahasa Luang

¹ Noka Uplerlawna lili'irnu-hopopanni de nakot owa'an mai Daniel, a'u, de niwra: “Ne a wal pia ed mak ktulan la Mikail totpena ntutrieri kdeded la genni. Aghi' emkade la' anni yanullu maka Darius, ray Media de, ha nodi plolli.

² Mere la' dodo'ondi de amuai lla Daniel, o'a me la'a hya' maka agiwra ukot tiy o'a di, ha raplola momuou. De hota ray wotel owa'an maka kodi plolli la Persia, noma ray miaka klernohor pa wogatni, hota e' ed maka kre'a-ktar lia korni re. La'pa re'eni-tniarnu nhi'nande tnioranni-riautnu naruri dewade ntekal reria totpena riy harahu nora lodna-hairi Yunani ra'ara.

³ Nhorwua noma ray ida nmai die npenpuen niohor memna rurni-laini. Hota e' ed maka kodi plolli la'a lodna-hair lalawna, me nhi'a hya' de plolli nek la e ralamni ha la' nana.

⁴ Mere la'pa la'awa plolli-mneheni rurni-laini na'itar la me pripanni-fa'an maka ha nlernana re narehi-nalawna dewade lodna-hairni de nhakre'era la'a nhiakra wogata. Ray-ray miaka e duratni-waitni atia' mana hota rwaga pa rodi plolli, mere rurni-laini ematia' e'a.

⁵ Ray makodi plolli la wali tranna, de ray Mesir hade, hota rurni-laini na'ititar rer lia. Mere la'a mak ktutrier lia'a ahu namni (panglima perang) id la e lodanni-hairni, de hota rurni narehia pede hota ed maka nwaga ray Mesir de pa nhi'a ray mak kodi plolli la'a lodna-hair pa nareh miemna owa'ana.

⁶ La'pa la'awa anni wo'ir wa dewade ray Mesir de niwra nhi' awutga enora ray Siria makden la wali ra'i die, pede namehlima a'nani pata nora ray walli ra'i die totpa lodna-hairi wor die edon ra'ara owa'an wa. Mere yawok wut die totpa plolli-mneheni naruri-nalai edonna nodia pa la nhoru, yoma hota rwunu-rwenna ray a'na patni de nor wutga hawni-a'nani rora mak kre'ela klidan-ktaur nohora.

⁷ La'pa edon nalo'on wali ne ray a'na patni de rimormiorni id hota nhi' ray la Mesir. Hota e nor maka'arni re rtiwru-rgora ray Siria la wali ra'i de kekni-rautnu (tentara) pa nlunni-nwerna ir lutur yaro'wa genni (benteng) pa rhokra-rlaiya kekni-rautnu re.

⁸ La'pa enawalia la' Mesir hota enodia makden Siria atiehrani re maka ha na'nana la arwalli genni me nod wiut wualia hya' to' maka ha rhi' nana la leli-maha mak nhi'inde rnairi totpa rhoi-rtania la ir uplerni-upmati. La'pa anni wo'ir owa'an wa dewade hota e' edonna nora ray Siria la wali ra'i re ra'ar wa.

⁹ Nhorwua noma ray Siria la wali ra'i hota nla targho'a totpa niwra nwalerna ray Mesir la wali tranna, mere hota nmeh'a nawalia la'a genni-tienni.

¹⁰ Ne hota ray Siria upni-a'nani rwahi'a-rwayodi makodi keki-rautu harahu memna totpa rla ra'ara. La'a makodi keki-rautu re rler la ga' pa rwatipna-rwahewar de arwalli id mana edon nlewna, emeknekama ger wawau mak kodi meranni. Pede rwatipna-rwahewar pa rodi liarni pa rla' meman la arwalli lutur yaro'wa genni.

¹¹ Noma ray Mesir nawenan pa hota nler la wunu-ara ralamni pa nora ray Siria ra'ara. Hota ray Mesir kekni-rautnu er maka ka'untu pa raru'u-ratowra keki-rautu Siria harahu rehi re mak karur lia la'a wunu-ar lawna.

¹² Hota la' hade pede la'a e wniarorni de e narehi olek la hare honona wa yoma na'unut nan oleka wunu-ara, la' walia ntipna-nhewra oleka rirahu, mere hota edonna nodi plolli pa nodi liarni.

¹³ Yoma la' re'eni id owa'ana de ray Siria hota nhi' owa'an mak ka'ara pa ra'itar la, de liawan rehi owa'an la' mak kala'ulu re. La'pa anni ida-woru rlardoinla de hota nwaleran pa nla de nodi makodi keki-rautu liawanni nor wut nieka kekni-rautnu hya' to'a de nod muomuouga.

¹⁴ La' ler de de hota rira liawanni rmalawna ray Mesir de. Me Daniel ee, la o hair wialmu makden Israel re mana riy kaplialiahana riy wo'ira erla, maka hota rmalawan wali ray die emekto'ama hya' maka riy ramkek oleka la yamkek id ralamni. Mere hota rmalawan emkade ho'mana, ral nek ir la yawa.

¹⁵ Nhorwua noma ray Siria nora kekni-rautnu re hota rle'lu nana leta ida nor wutga lutur lawanni, na'nama rariria lutru yaro'wa genni totpa ra'unut nana let de. Pede ray Mesir kekni-rautnu hota edonna rpar nana, nhi'nande kekni-rautnu mak ha rwalir nian de, ir mana orloi-orta'ar targa (nakleh ruri).

¹⁶ Ray Siria nhi' to'a hya' maka e nwaror nana. Ne arwalli re rru' rieri-rtowar rer tio'owa. Hota e' ed maka kodi plolli la noha-rai Israel, de gen miaka riy rapili-rahniaria (tempat terpilih). La'pa niwra nweyata-nwauwu gen die plolli nek la e'a.

¹⁷ Nhorwua noma ray Siria nwahi' owa'ana rurni-laini honona totpa rokria owa'an la ray Mesir la' wali tranna. Noma ray Siria nala e a'nani pata pa nora ray Mesir de rmehlima, yoma ray Siria ralma-riorni de totpena hota la' talan emkade pede e nodi plolli la Mesir honona, mere hota la'awa honi de hya' maka e niwra nhi'a de nwalia la hamamuamua.

¹⁸ Hota la'pa nhorwua noma ray Siria nal targho'ola noha-rai makden la en hu'ula-ga' laini (enni wawannu) re, ne liawanni takeni rpar nana pa rla' yawa. Mere emkade ho'mana hota makodi ahu namni makwatiawua lodna-hairi dom to'a nma nalernia ray Siria la' yawa nhi'nande ray Siria edon npo'on olek wa. Yoma nhi'inde ray Siria de nhi' riy makden la' e nohoni-raini atia' re pa rmola-rma'a, ne la'pa ntutu-nte'ela la' ler de e' nmeh'a neka nlernan emkade walia.

¹⁹ Dewade ray Siria de nawallia lutru-lutru yaro'wa yatiak genni la'a e let wamueheni. La' ho'mana hota nla yawa, ne nakleha tui wia.

²⁰ Hota ray id owa'ana nhernu-nwaga ray Siria dewade ray die nhopna mak kheli-kpapna e'a mak kapliahana ida totpa nawoka-nale'ga rira blastenni de narehi-nalawna, totpena na'itra ray re'eni-tniarni la'a lodna-hair de. Hota edonna napre'et wali ne rwenna ray die de rtota pa rwuri-rgalmua mtielte'ela. Edonna rwunu-rwenna la ar ralma.”

Ray makden la Siria maka yatyata-halala

²¹ Noma lili'iru-hopopan de nakot owa'ana niwra: “Hota riy miak kmai pia nhernu-nwaga ray Siria, de riy yatyata id hade, me marna atia' wali hade pa taken niana nla' ray Siria. Mere nwarora de makden Siria lodna-hairni re de edon rworworga la hadomdoma pede nmai pia nnairia nur mi'na me pudi-akla pa nleretniekla rwayow pa nla' ray lia ira.

²² Arwalli kekni-rautnu liawanni re honona, ror wut wualia imam o'ta lawanni nekde ray die ntipna-nhewra me nkuhi-nho'ora re.

²³ E nora lodna-hairi dom to'a rhi'a nkohlima (janji) ida mere nwaldioinia pa nwatei-nwahapra kniohlim de owa'ana. Ne hota riy mak ktulan la' e' totpa nhi'a ray die riy dom rmeh'a, mere emkade ho'mana rurni-laini de na'ititar rerlia.

²⁴ Pa hota plin-plinnianama e nora makodi kekni-rautnu rla' pa rwalerna la geni-tien maka ya'ana-yemnu mak kaniutni-kamdierna, mak kre'a-ktaru narehi-nalawan memna totpena hota nodi plolli la. Hota hihi'ini-yapyapni de narehelia hya' maka e upni-tgarni rhi'a. Yohya' liawanni maka ray die nwarui-nwate'la nana la ar ralma, de hota nhakra yohya' rella' riy maka kodnian e'a. Hota nahak talan pa nweyata-nwaniawua noha-rai dom to'a lutur yaro'wa genni, mere hihi'ini-yapyapni re edon nodi liarni.

²⁵ Hota nwahi' owa'ana makodi kekni-rautnu pa liawanni ra'itra totpena nodi paran pia nora ray Mesir ra'ara. Ray Mesir di nwahi' targ olek walia mak ka'ara totpa natutga ira de nnairia makodi keki-rautu mak karur miemna me liawanni lawan rehi owa'ana. Mere ray Mesir hota edonna na'unut nana yoma hota e nohwalli rlol walli pa rna'ohma yatyatni la e'a.

²⁶ Makano'a-ka'atg e'a mak ha npesiay memna hota ir er maka kalerun targ e'a. E kekni-rautnu liawanni hota rmat lia ar ralma yoma edonna rlewan la tera tutnu-wehla gaini.

²⁷ La'awa honi noma ray rora re rewre'wa pa rhapeta mei pa ra'ana totpena rna'ohma yatyatni, mere rora edonna rla'a ralmida ne idma nalahar ida. Hya' ed maka ha rwarora-rwalai niana re edon rwalia la hadomdoma yoma Uplerlawna lerni-melli edon ntutu-nte' ma'ta.

²⁸ Nhor nioma ray Siria hota npolan la nohoni-raini de nod miemna-nal memna re'a-tniar muaka rwarui-rwate'la nan olekwa. La'pa e' ed ma't la talla ralamni de nakota la ralamni de hota enwatei-nwahapra Uplerlawna lirni-tunnu deulu-tatarni maka E rimormiorni rlernohora reria. Hota nhi' momuoga hare honona nampena nawalia la e nohoni.

²⁹ La' ler maka Uplerlawna ha Nwalir niana de hota ray Siria nler temna makden la Mesir owa'ana, mere hota to' owa'ana la mak ululu.

³⁰ Yoma makden la Roma hota rodia kapalli pa rma rwaleran la ray Siria la' hande, nhi'nande ray Siria namta'at wenna. Hade pede ray Siria de nodi hankerna-ralmha'arni pa nla' targho'ola Yerusalem pa nla nwatei-nwahapra Uplerlawna rimormiorni mak klernohor reria Uplerlawna lirni-tunnu deulu-tatarni. Noma la' riy mak kwayow nohora pa rhoitio'or doinia ir Uplerlawanni nnio'oni-niatnu de, ray Siria ntulan la ira.

³¹ Noma hota na'enyatga makodi keki-rautu pa rma rhi' akdieha-aktiahli la Uplerlawna roma kreini, de makden Israel yaro'wa genni. De nlarna pa yana riy rala nhiurliwtu-wnialodwa himima-rere'a la Uplerlawna roma kreini maka nhi'inde irala la lera-lera, ne nhopan pa rariria la' hya' mak khi' akdeha-aktiahlia gen lululi la Uplerlawna roma kreini ralamni, nhi'nande Uplerlawna Nawenna.

³² Ray die nnairia oh'pani-laharni pa nawewla riy mak khoitio'or doin Uplerlawna nnio'oni-niatnu re. Mere la'pa hameni maka kdenrerlia ir Uplerlawanni de hota edon ratlina-ratailla ray die yawewalli.

³³ Makden hande maka ka'ota-kriahlu hota rhi' rira liawanni pa o'tani rahniari. Mere hota la lera-mela wo'ir maka Uplerlawna Neti olek wa, de la' riy dom la ira, de pala matia yoma la ya'ara onde la ai lomar nana, me la' riy dom pal die hota rtoran nana me hyo'oni-hyanni rwarui-rwate'la nana.

³⁴ La'pa rler la nniahora-nniala'a kropna-krietnu wniunu-wnienna ri honona de Uplerlawna rimormiorni hota rlernan tniulla-sniayni himima-rere'a la riy' oke'a. Mere hota rirahu rtotpa rmai pia rler wut lia ira re mere la' plollolli de ra'ohpa-ralahara.

³⁵ Riy dom la' riy maka ka'o'ta-kakriahlu re rlernana nniahora-nniala'a wniunu-wnienna, mere hade emeknekama Uplerlawna Ntag' olek rimormiorni emolmolla mak khuri-kwewal maha e nker doinia mah wawahra kdeheni. Hota hade nek pa nodi liarni pa nla nte' meman la'a lera noha niatni maka Uplerlawna orgahani mak keti olek la wa.

³⁶ Ray die hota nhi' hadom de plolli nek la e wniaror wamueheni. Orgahi Nran inonni de tullu-petanni narehia uplera-upmati honona la'pa hya' to' maka riy rpesiaya onde rkola tieru-rawur nehla la de. La'pa nareh wial de e' mana e nareh' wiallia Uplerlawna makden la tutullu-lolo'oni me nalernu-naliella E kotni-nanni. Hota nhi' nek emkade pa nod liarni la'pa nte' meman la Uplerlawna hankeranni-ralmha'arni ntuin la e' de. Yoma hya' maka Uplerlawna Neti olek wa de plol toto' pa hota ntutu-nte'ewa.

³⁷ Ray die edonna na'unni-namta'ata uplera-upmati mak upni-tgarni ha rru'u-rtowar la de, la'pa uplera-upmati maka nhi'inde patke'a re rhoi-rtania nekane edonan wali. E' edonna nkil miat la hya'a maka rimormiori ha rkola tieru-rawur nehla la de. La' Uplerlawna nekde edonna, edon nha'wu nana, yoma ray die na'eram reria de e' inonni inponni la'a hare honona.

³⁸ E' ed maka khu'ru-khelam la uplera-upmati maka e upni-tgarni edonna rhu'ru-rhelam la. Mere nhu'ru-nhelam to'ola uplera-upmat ida mak nhi'inde katiak reria lutur yaro'wa geni re. Hota e' ed maka kala leli-maha permata me la' wali limtutnu mak wel wierwerta la'a uplera-upmat die.

³⁹ Hota e' nekpa nha'ar aranni la uplera-upmat die mak kwatiawua noha-rai dom to'a tultulanni-rere'eni totpena maka'arni re rwatipna-rwahewar la lutru-lutru maka'ara yaro'wa genni mak karuri-ka'orta. La'pa he' ed maka khu'ru-khelam la ray die, de nhi' ir pa rla' o'ta-mat la riy harahu, me nal nohanna-taniarta la' ira pa emeka ir wniahlani.

⁴⁰ La'a ler hohoni de, de hota ray wali tranna nler pa nwalern ray wali ra'i die. Mere ray wali ra'i nalla de nadodo'or memna. Hota nnairi kereta ya'ara, me kuda nor kapli-kapli harahu. Nler la ar ralam de emeknekama ger wawuau mak kluni-kwerna momuou. Emkade pede nla' noha-rai la meni-meni to'a pa nwarui niana leta-leta.

⁴¹ Me la' walia Uplerlawna nohoni-raini (Israel) maka riy rapili-rahniaria (tempat terpilih) de, de nwalerna pa rimormiori la lodna-hairi harahu hota edonna rlewan la tera tutnu-wehla gaini. Mere lodna-hairi Edom nor Moab me o'ta-mat Amon, riy ralewan nana re.

⁴² La lerni ray mak kwatiawua wali ra'i nwaleran la lodna-hairi re pa nal ir la yawa, de hota makden lodna-hairi Mesir mana nakleh olek talan pa rawlari.

⁴³ Hota ray die ed maka kwarui-kwate'la riy Mesir lelli-mahani me re'eni-tniarnu mak kalweli. Ne hota e nodi plolli la riy makden la noha-rai Libia ror wutga Etiopia

⁴⁴ Mere hota kota nwatiawu tipru me ra'i pa nmai die nodia ihru teplu la, pede hota nla ntotpa na'ar de nodia rur miatmata pa nwunu-nwenna rirahu.

⁴⁵ Hota ray nla ntotpa hota nora makden Sion ra'ara, pede nariria krahanni la'a wo'or Sion nora tahi' lawna rletni de. Wo'or de ed maka ha rapili-rahniaria (terpilih) me maka Uplerlawna roma kreini ndella de. Mere la'pa hohoni dewade hota ray die nmat die riy id mana edonna ntulan la.”