Dan. 10 - Alkitab bahasa Luang

Daniel yamkekni la'a gerlawna Tigris aratni

^1-3 La'pa anni wotel lia ray Koresy nodi plolli la Persia, de Daniel a'u maka ha rwet wali a lia Beltsasar aliernan nnio' id mak kwatiawua Uplerlawna. La'a nnio' de de hota plola, mere nnia'eratni de tsakomu-tsakam niohora. La' ler de awuaror la'a-maiya mere auplin niohora ma'ta nnio'a de nnia'eratni. Pede a ralmu nmawal doin la krei wotel rialamni. La'a ler penpuenu re de a'g edonna una-gemnia mikmikarni-lamliamni, la'pa ha'anna onde anggur turnu me nhiola-knia'ata a mortu nek de edonan wali. La' hohoni aliernan nnio' de nnia'eratni la'a yamkeka id ralamni de emkadile:

⁴ La'pa la'awa lera-melli terampworu weh'rani wogata la' wolan yanulu la' anin de, de a'g e tiutrier lia' gerlawna Tigris aratni de.

⁵ Plin-plinnianamde a'umkek nana riy id de nnairia naniaria koka mnurnuhru, me rewa maha molanni.

⁶ Inonni liplipa-kamka'ma pa emeknekama wat mi'na permata. Gaini reparni emeknekama hita-tlena me matni lomarni-dayani emeknekama ai mormiori. Limni-lakni pihrani, de nmo'a-nmar pa emolmolla pi'ra tnieri maka kmomuou muemna me nhar lirni de emeknekama rirahu lirni.

⁷ Amuemeh'a ed maka kamkek nan to' yamkek de. Riy mak kor a'u, la riy id mana edonna namkek nana de mere rawlar momuou pua rade' inonni yoma ramta'at wenna.

⁸ Ne nal tar amueh'a pa umkek reria yamkek maka hedhedga riy ihranu ralamni de. A ino'nu nmatlawar ne a ga'yu lakputputi.

⁹ La'pa utlin lirni dewade ga'yu nmokal pa uplinga halolola. A'upru'wu tar lia yaw de a'ukow lia tani wawannu.

¹⁰ Noma u'eram reria riy lima ida e nlok la ino'nu, na'nama nhi' a' pua umat de awualtior a li'mu-la'ku la e gaini ralamni.

¹¹ Dewade Uplerlawna hopopanni-lili'irnu de nakot ma'u niwra: “Daniel, Uplerlawna Ensayn reri o'a. Mumat pa muprir dioin la me mtia'wa tlinmu la a li'ru-tu'nu ri yoma Uplerlawna Nhopan pa amua ukot nohora hadi tiy o'a.” La'pa nakot lir de, de a'g e tiutrier niekpa diwra-dia'ala.

¹² Noma nakot mai a'u niwra: “Daniel, yan mumta'ata. Yoma Uplerlawna Nheri tlinni-nwali matni la o sniumbainmu la'a lera yanullu maka omhu'ru-mhelma lol yawa pa mutatahan lara me ompuak la E'a totpena E Nhi' o ralma-riormu pa naphyari. Pede a'g e muai di, totpena a'ukot nohora hya' maka ompuaka re.

¹³ Maka ha riwra noha utnu-liannu (roh jahat) makodi plolli la Persia lodna-hairni de nhi' yawuhi-yawe'et la mai a'u la lera terampworu wehrani id ralamni. Noma Mikail maka khi' o'ta lawanni id la Uplerlawna lili'irnu-hopopanni re nmai pia ntulan la mai a'u. Ntulan mai a'u noma agaltarga e la' Persia nor wutga makodi plolli la' hande, na'nama amuai.

¹⁴ Amuai die agodia nnia'erti la o'a, la'a hya' maka o hair wialmu hota rlernana. Yoma yamkek di de nakot nohora la'a lera-mela maka kmai nieka.”

¹⁵ La'pa nakot nohor hade, de awualtiora-wualtieman la e'a mere a lirta'a-wawta'a.

¹⁶ Nhor nioma lili'ru-hopopan id maka emeknekama rimormiori nalgot limni pa nheik la a niwtu. Noma ukot la agiwra: “Tune, yamkek di de nhi'nande a ralmu nmaduka-nmadak rehia la'pa aruple'a ntai a' pua a' ino'nu nakleh et miemna ruri-lai.

¹⁷ Aghi' emkameni totpena agora tuna matlieri?! Yoma a'g emolmolla ata-wa'ar maka ktutrier lia upni matromni gaini ralamni. A ru'ru-la'yu rhorwua me a arnu la a' irnu mana tututg oleka wa.”

¹⁸ Noma nheiki owa'an la a' ino'nu dewade u'eram reria a ru'ru-la'yu na'itar la.

¹⁹ Noma nakot ma'u niwra: “O' ed mak Uplerlawna Nsayn reri o'a, pa yan ihramu nteplu onde mumta'ato! Mutehra ralammu! Murur wia pena!” La'pa nakotkot rer mia'ta lirni de, dewade a'ueram reria a ru'ru-la'yu yeher to'ama na'itar la pede ukot la giwra: “Awuaka pa multieri tuna! Yoma tuna nal oleka ruri-lai mai a'u.”

^20-21 Noma nwalol ma'u niwra: “Omuatga de hya' ed mak kariei piede amuai o dina? Amuai die totpena ukot nohora hya' ed maka ha rhorat targa la' puka la'a hare honona maka plol tot'a pa hota rtutu-rte'ewa. Nhor diewade a'uwal wia totpena agora maka ha riwra noha utnu-liannu (roh-roh jahat) makodi plolli la Persia lodna-hairni ama'ara. La'pa nhorwua demade maka ha riwra noha utnu-liannu makodi plolli la Yunani hota nmai pa agora ma'ara wali. Eneknek to'ama Mikail Uplerlawna lili'rnu-hopopanni maka katiak reria o hairmu Israel de ed mak ktulan la mai a'u.”