Dan. 1 - Alkitab bahasa Luang

Ray Nebukatnesar ntoran nana tuwari-laweru Yahudi makwatiawu Yehuda liewnu la'a Israel na'nama nodi ir la Babel

¹ La'pa ray Yoyakim nodi plolli la' Yehuda pa nsampe olek la anni wotellu la' ler maka nodi plolli de, dewade Nebukatnesar mak khi' ray lia' Babel nma pia nwalerna Yerusalem.

² Noma Orgahi-Orha'a Nhi' pa Nebukatnesar nala Yoyakim la yawa na'nama nrehyahru yohya' mak kalweli dom palia la'a Uplerlawna roma kreini ralamni pa rodia la'a Babel, la'a ir uplerni-upmatni roma kniola tieru-niawur nehla genni (kuil), na'nama rkenia la kamir maka rwahi'targ oleka pa rken tiarga yohya' mak kalweli.

³ La'pa nhorwua noma ray nhopan pa Aspenes mak khi' yanulnulu la ray kruwun genni (istanni) pa nwaliri-nwaloha tuwari-laweru Israel maka ha rtoran nan olekwa re totpa rkar lia ray. De nwalir nian riy maka genni-tienni de ray onde marna-wuhura,

⁴ me maka inonni kalwedwuedlu, me la mak kla' iskola totpena o'ta kriahlanu de rnairia la istana ralamni. Hare honona de Aspenas nwatutu-nwaye'a totpa rat niohora yawala Babel nora puka-puka Babel re nnia'eratni.

⁵ Ray netlia de (nhopan) pa ir ya'anni-yemannu mana emekwalima hya' maka ray nora hawni-a'nani ha ra'ana-remnia. La'pa rwatutu-rwaye' nana la anni wotel wa nanpena rla rre'ela rkar lia istana ralamni.

⁶ La'a tuwari-laweru re honona, de Daniel enor wali e nohwalli re de nanni Hanania, Misael, me Asaria. Ir honona de rwatiawua luwu-a'na Yehuda.

⁷ La' noma mak kla o'tani la ir honona la istan de nhernia ir nanni de pa rpolga la Baltasar, Sadrak, Mesak me Abednego.

^8-9 Uplerlawna Nkar lia Aspenes ralamni pede nsayn toto' memna Daniel. Daniel orgahi netlia pa hota edonna nlok la ya'ana-yemnu maka Uplerlawna Nlarn olekwa. Hade pede nwak la Aspenes pa rhi' e ya'anni-yemannu de totpena edon nora mutu korni re ra'ana-remnu de ramneneha.

¹⁰ La'pa nwak emkade noma Aspenes namta'at nande nakot la niwra: “La' hare honona de ray orgahani ed maka nala tita la'a hya' maka omuora tuwari-laweru mai istan di honona ha mi'ina-miemnu re. Pa la'pa aghi'a hya' maka ha mukota re de hota ray namkek o' de o munieni hota leretniekla nwen a wua.”

¹¹ Noma Daniel nla' pa nora riy id maka Aspenas nhopan pa nhi'inde nhoi-ntan reri yamanna totpa Daniel nora mutwualli re ra'ana-remnu. Nla' noma Daniel nakot la niwra:

¹² “Ampak pa mtia' teka am pia muala ortawi tniunu niahu nora ger momuou pa ama'ana-memun nana la' lera termida.

¹³ Pena ler termida rlardoinla de, mumkek teka amora tuwari korni maka nhi'ide ra'ana-remnia hya' maka ray na'ana-nemnu de hota he' ed mak inonni naruri? Nampena mukota o ralmu-riormu la o yamkekmu mai ami.”

¹⁴ Dewade mak khoi-ktan di nlernohora Daniel wakwakni de pa nta' niana la' lera termida.

¹⁵ La'pa nta' niana la lera termid wa, dewade yamkekni re de inonni re wedwedul memna, me tuwarwiari mak ka'ana-kemun ray ha na'ana-nemnu re de rlol to'a, me emeknekama rma punpuhuna.

¹⁶ Dewade mak khoi-ktan die edonna nhoi ya'ana-yemun maka ray ha nakota re pa Daniel nor talanwalli re ra'ana, mere nhoi-ntan tio'a ortawi niahu nora ger momuou pa ra'ana-remnu.

¹⁷ Uplerlawna Nala kirkira-ralma-rior samomuou totpa ir Daniel rat niohora puka-puka Babel nnia'eratni pa ir wogata ratu rtulla-rkar lia ray Babel kniarni. Uplerlawna Nal walia Daniel pa natu nakwieta mi'a-lo'a.

¹⁸ La'pa nte'ela anni wotel wua la'a ira iskolli, maka ray ha net tiar lia de noma Aspenes nodia tuwari-laweru re honona la ray Nebukatnesar.

¹⁹ La'pa ray nora tuwari-laweru honona re rwahauru dewade ray nat niohora la' tuwari-laweru re de Daniel, Hanania, Misael, me Asaria er maka rarehi-ralawan la lira-yatu hya' to'a la hare honona. Dewade ir wogata re rte'la la ira tulla-kniarni la'a ray kniarni ralamni.

²⁰ La'a lira-tunu hya' maka riy rwarora de werta, de ray natian ir wogata yoma ir mak katu pa rareh niana riy korni honona. Yoma ir rala kirkira-ralma-riora samomuou pa rwahla nana ray tianni, de rarehi-ralewan nana re'eni termida la'a riy rahu muaka nhi'inde katga lir marna, me maka knairia ukru-rehera ror wutga mak kala' talla la'a noha-rai Babel honona.

²¹ Daniel nkar niek la la'a ray Babel istanni de pa la'pa ray Koresy makden la Persia nhi'a ray la' hande.