Maak 1 - Kara

A Mataa I Taa Savat Paamuin A Yesus

¹ A Lagasai Roxo se Yesus Krais aava lak sina Piran, a tangpat malaan:

² na Aisaia, a saxa mataa ina kuus fatuxai sina Piran ti kavai a xalei a ferawaian sina Piran pa Yesus. “Langaiau, ne taa feng a mataa ina lisan a ferawaian siak, i taa savat paamuin nano e i taa faigotan a salan siim.

³ A ling ina mataa aave i taa kel pe la bina vingil, ‘Faigotan a salan xana Memai. Vil faxaradak a salan sina.” Mlk 3:1; Ais 40:3

⁴ Na Jon xo, a mataa ina fasufan, a savat pe la bina vingil e a xuus a mu rabuna o ri taa puk a xunus iri e a fasuf nari talo a Piran i taa lamon tapin a vilaana saat siri.

⁵ E a maana mu rabuna ti Judia e ti Jerusalem ri paan xe si Jon e ri fe kuusan fasavat a maana vilaana saat siri e nane fasuf nari lana Raarum Jordan.

⁶ Na Jon a mataa valagof e vesan a marapi sina pana fui ina ‘kaamel’. E nane pis nane xa pana yowang aava vesanan pana vipin ina ‘kaamel’ e fuuna ngan a sakawa e vevoi ti la latan.

⁷ Na Jon xo, a kuus famatavas malaan, “A toxan a mataa i taa filimaan lumui lamiak, a mataa aave a faagut sega e nenia vaxa ne suai faagut sena. Ne pife fexaxaas sena mulus a ‘slipa’ ti la kana.

⁸ Naboxo ne taxa fasuf nami pana raarum tuuna taasaxa nane, i taa fasuf nami pana Vovau Xaradak.”

A Fasufaan Na Yesus

⁹ Mui famodak na Yesus xo a savat ti la bina Nasaret pe Galili e na Jon a fasufe lana Raarum Jordan.

¹⁰ Layaan nane laakmaan ti la raarum a xalum a xunavata a talakas e a Vovau Xaradak, malaan sena vaalus, a sivi xuluna.

¹¹ E saxa ling aava savat ti pe laa'ui lana vata a kuus malaan: “Nano, no natuk, ne vubuxan xasingit nano, a xunus iga a roxoian nano!”

¹² E fataapus temasaat a Vovau Xaradak a feng na Yesus xe la bina vingil.

¹³ E nane waan pave fefexaxaas sena yaan sangafilu talafaat e na Setan a valame. A waan la palou ina mu vupung taasaxa mu angelo ri maa xavange.

Na Yesus A Tangpat Pana Faisok Sina Pe Galili

¹⁴ Na Jon fo vipis xo e na Yesus a paan xe pe Galili e fe kuusan fasavat a Lagasai Roxo sina Piran.

¹⁵ Nane kuus, “A yaan tuuna fo savat xong. A fatataganan sina Piran fo savat faasilak naboxo. Mi taa puk a xunus imi e mi taa namkai sena Lagasai Roxo.”

¹⁶ Saxa yaan na Yesus taxa lo sangas et la vangana Laman Galili e nane xalum na Saimon xuvul pa tina, na Endru. Narie, re taxa fati a vana pe la taas senaso re fuuna faasot pana din.

¹⁷ Na Yesus moxo, a xuus nare, “Usiau e nenia, ne taa fapiti name pana vilaana ina pataasaana rabuna.”

¹⁸ E fataapus re ta'ulan a vana sire e re usie.

¹⁹ E rutul falet famodak fulaa e na Yesus a xalum na Sebedi e a ro lak sina, na Jems e na tina na Jon. Narutul taxa nai lana xaati e rutul taxa faxaradak a vana sirutul.

²⁰ E nane xel nare e re ta'ulan na tamare lana xaati xuvul pana mu sisiak siri e re usi na Yesus.

²¹ E nari xapiak, ri falet xe la bina Kapanam. Layaan a Yaan ina Fangaafusan sina mu Juda a savat, na Yesus xuvul pana mu rabuna, ri laak xe la lifu ina faxuvulan sina mu Juda e nane fepitaa tapang.

A Mataa Pana Vovau Saat

²² A mu rabuna ri langai a ferawaian sina e ri ipul senaso a ferawaian sina toxan a gutan, pife malaan sena fepitaian sina xasano rabuna aava ri masam pana vilaana si Moses.

²³ E monabe' mon ri ipul sena mataa pana vovau saat moxo, a laak saa la lifu ina faxuvulan e maa barak xuluri malaan,

²⁴ “Yesus ti Nasaret, no vubuk vil a so semaam? Naak no vubuk vil pengan nemaam! Ne texaas sema, nano, no Mataa Failai sina Piran.”

²⁵ Na Yesus moxo, a maraleiane e a kuus, “No waan kasam e no ta'ulan a mataa aanabe'.”

²⁶ E a vovau saat a vil faradakui a mataa e a kuup faagut e nane ta'ulane.

²⁷ E mui a mu rabuna pave, re ipulan na Yesus e ri fefiaian nari e ri kuus, “A so ta mo nabe'? A fepitaian fa'ui pana gutan, bo? A mataa aanabe' a farawei a mu vovau saat e ri langai sina.”

²⁸ Lavaxa, a lagasai pana vilaana si Yesus a falet fataapus xe la maana mu bina pe Galili.

Na Yesus A Vil Faroxoi A Rabuna Xaves

²⁹ Lumui na Yesus e mu fefeng sina, ri savat xe lamalei e ri fe paan xe la lifu si Saimon narie Endru. Na Jems e na Jon, re falet xuvul pari sait.

³⁰ Na imu Saimon i taxa mati xuluna ivin e toxan a giisan pana tana lalagaf. E fataapus ri xuus fatexaas na Yesus pana.

³¹ Na Yesus a paan xe sina e tao a mana e fatamasiaxe. A giisan sina a taxapus e nane tavai nari pana fanganan xari.

³² La leaaf layaan a ngaas a rul, a mu rabuna ti la bina, ri lisan a maana rabuna aava ri toxan a giisan xuvul pana maana rabuna ri toxan a vovau saat xe si Yesus.

³³ A mu rabuna xapiak ti la bina, ri faxuvul pe la matana lifu.

³⁴ E nane vil faroxoi a rabuna aava ri toxan a mu giisan e a gei tapin a mu vovau saat. A mu vovau saat xo, ri texaas sena taasaxa nane ti votan nari sena ferawai.

³⁵ La paanen lolof, nane tamasiak xe lamalei e fe paan xe la saxa nobina gof rao i fenung xe sina Piran.

³⁶ E na Saimon xuvul pana mu fefeng sina ri seng na Yesus.

³⁷ Ri fe tingin xo nane e ri xuuse, “A maana rabuna, ri taxa fiaian nano.”

³⁸ Taasaxa na Yesus a susuaa malaan, “Naapalaan, taara taa paan xe la saxano bina faasilak, rao ne ferawai pari. Nabe' a fufuna filimaanan siak.”

³⁹ Nane falet xe la maana mu bina pe Galili e a ferawai lana mu lifu ina faxuvulan e gei tapin a mu vovau saat la tana rabuna.

A Mataa Pana Tapak

⁴⁰ La saxa yaan, saxa mataa aava tana tapak, a savat si Yesus. Nane bukaak e fenung xe si Yesus e kuus malaan, “Tamo no vubuxane, no taa vil faroxoiau.”

⁴¹ Na Yesus xo muluk nane e tao a tana e xuuse, “Aang, ne vubuxane, naboxo a giisan siim a taxapus.”

⁴² E fataapus a tapak sina mataa aave a malit e nane fo roxo.

⁴³ Na Yesus a pebukan faagutane e feng fa'ulie.

⁴⁴ A xuuse malaan, “Muta kuus fepuk pana faroxoiaan nano. No taa falet e no fe faxalum a taam xe sina priis e no taa tavai a Piran pana tatavaian siim. A tatavaian aave i taa usi a vilaana si Moses.

⁴⁵ Taasaxa mataa aave a falet e kuusan fasavat a roxoiaana aava na Yesus fo vile. Pevoxo na Yesus pife fexaxaas sena laak la bina saxa ulaa rabuna ri tamaa fatagule. E voxo nane paan xe pe la xobingil e maana mu rabuna xaves ri taxa falet xe sina pave.