Failimon 1 - Kara

^1-2 Nenia na Pol: ne mataa vipis si Krais Yesus, xuvul pa Timoti aava na titaara, maame lisan a lagasai aanabe' xe siim, Failimon, ka fesing aava no fuuna faisok faagut xuvul pamaame e xe si vasaamaame lapaa Krais, na Afia e xe si Arkipus aava faisok lapaa Krais malaan sena mataa ina rawen e xe siri aava ri naangus la lifu siim.

³ Ne vubuk rao a Piran Tamataara e na Memai Yesus Krais re taa tavai nami pana xakaavangan xatam e a luaian.

Na Pol A Kuus Faasiroxo E Fenung Xe Sina Piran

⁴ Layaan ne fenung xe sina Piran ne fuuna lamon nano e ne kuus faasiroxo

⁵ senaso ne fo langai a namkaian siim se Memai Yesus e malaafaa no vubuxan xasingit a mu rabuna fatak.

⁶ E ne fenung o no taa faxalit a namkaian siim lana faisok e ferawaian siim talo no taa masam xapiak pana maana mo roxo aava na Krais fo tavai netaara pana.

⁷ Ka fesing, a vubuxan xasingitan siim a fasavat a faamamaasan molava la xunus iga senaso no fo xavang faxavesan a mu rabuna fatak sina Piran.

Na Pol A Fenung Pa Onisimas

⁸ Sena vubuxan xasingitan aanabe' ne buk nung nano pana saxa mo. Nenia, ne saxa yaamut si Krais e ne fexaxaas sena fasei faagutan nano pana,

⁹ taasaxa ne bai vil malaane. Taare fesing e ne buk rao no taa vile sena vubuxan xasingitan mon. Nenia na Pol, ne mataa vaiak naboxo e ne taxa waan la bina ina vipisan sena namkaian se Krais Yesus.

¹⁰ Taasaxa lana waanan siak nabe' ne fo xavang na Onisimas pana namkaian sina e naboxo nane malaan sena lak siak.

¹¹ Paamua nane a mataa palau e pife fexaxaas sena xavang nano, taasaxa naboxo a fexaxaas sena xavang netaare xapiak.

¹² Naboxo, ne taxa feng fa'ulie xe siim, taasaxa layaan nane pife waan iau xena xavangau a malaan se' ne taxa put tapin a pamamuaan siak.

¹³ Ne vubuk rao i taa waan xuvul paga la nobina siim xena xavangau layaan ne taxa vipis sena Lagasai Roxo.

¹⁴ Taasaxa ne bai vil a mo aava no pife turoxo pana. Ne vubuk rao no taa turoxo pana fenungan siak sena vubuxanan siim xa.

¹⁵ Naak a mo roxo name Onisimas fo waan patak famodak senaso naboxo me taa waan xuvul vulai.

¹⁶ E nane pife yaasok palau naboxo, piau, nane ve na tiam lapaa Krais. Nane a molava lana toyan siak, taasaxa nane a molava piis xe siim senaso naboxo nane a yaasok roxo siim e vaxa na tiam lapaa Krais.

¹⁷ E voxo tamo no lamon o taare taxa faisok xuvul, kas a lifu siim xe sina malaan se' no vile sega.

¹⁸ Tamo nane fo vil a saat xe siim o siak palou a xasa mo siim, ne taa maraane.

¹⁹ Nenia na Pol, ne taxa kala pana maak, ne taa maraane. Ne taa falamon fa'uli nano o ne fo faxalit nano vaxa pana vilaana ina toyan fa'ui.

²⁰ Ka fesing, xavangau pana mo aanabe'. No taa vile pa Krais e i taa fafaamamaasau sait.

²¹ Ne lamon tuuna o no taa langaiau. E ne lamon o a faisok siim i tafe molava sena fiaian siak.

²² Saxa mo fulaa: faigotan a nobina ina matef xaanak. No fo fenung xe sina Piran paga e ne lamon rao ne taa fe waan xuvul pama.

²³ Na Epafras aava vipis se Krais Yesus xuvul paga, a fasisi nami.

²⁴ E nari aava ri faisok xuvul paga; na Maak, Eristukus, Demas e na Luuk, ri fasisi nami sait.

²⁵ A maana roxoyan sina Memai Yesus Krais ri taa waan xuvul pama.