Joannostir 8 - Joannostir Svencono lačopheniben 1933 (Latvia)

Džeļ, 8.

¹ Iisusos gija pe Jeleonakīri berga.

² Ne tašarlatir noko jāvdža ane khangīri, te sāre mānuša gīne ke Jov. Jov bešča, te sikļaikirdža len.

³ Doi lilengīre te fariseji dolidžīne ke Jov džūļa, dojāvdli ano lubnāruma, te, tčudle la maškirāl,

⁴ Phendle Leske: sikļakirbnaskīro! da džūli dojavdli ano lubnāruma.

⁵ Moisejos ano dopheniben dophendža menge domāras dasajen barensa: Tu so phenesa?

⁶ Dava rakirde, Les čipindoi, sobi lačen sočimoņi Les ke bang. Ne Iisusos, dobandžija telle, čhindža palcosa pe phu, nariškirindoi pe lenge nisav haļipen.

⁷ Kedi līne dūredīr phučen Les, Jov, poušča, te phendža lenge: kon tumendir begrehoskīro, pšeršo thurde pe lake bar.

⁸ Te noko, bandžija telle, čhindža pe phu.

⁹ Te jone, šunindoi dova te obdžinindoi pengo dži, līne džan jek pal vavreske, phuredīrendir žin ko statno; te jača jek Iisusos te džūli tardindoi maškiral.

¹⁰ Iisusos, poušča te nadikša nikones, sir feņu džūļa saji isis tardi maskiral, te phendža lake: džūļi! kai tīre sendipnaskīre nikon nasendžakirdža tut?

¹¹ Ioi otpendža: nikon, Raija, Iisusos phendža lake: te Me nin nasendinava tut; dža, te angil nagrehini.

¹² Noko rakirdža Iisusos ko mānuša, te phendža lenge: Me švatluma svetoskīro: kon jāvela pal mange, doleske najāla džal ano čemņuma, ne jāla leske džībnasko švatluma.

¹³ Togi fariseji phendle Leske: Tu Kokoro Tutir švatkinesa; švatkuma Tīro nāni lašņo.

¹⁴ Iisusos phendža lenge ano otpheniben: keļi Me nin Kokoro Mandir švatkinava, švatkuma Mīro lašņo; vašo dova so Me džinav, kārig jāvdžom te kai džāva; ne tume nadžinen, kārig Me, te kai džava.

¹⁵ Tume sendinena palomasa; Me nasendinava ni kones.

¹⁶ Te keļi Me sendinava, togi sendos Mīro lašņo; vašo dova so Me naison jek, ne Me te Dād, Kon bičadža Man.

¹⁷ Te ano dopheniben tumāro isi čhindlo nin, so dui mānušengo švatkuma isi lašņo (5. Mois. 17, 6. 19, 15).

¹⁸ Me Kokoro švatkina Mandir, te švatkini Mandir Dād, Kon bičadža Man.

¹⁹ Togi phendle Leske: kai Tīro Dād? Iisusos otphendža: tume nadžinen ni Man, ni Mīre Dādes; keļi tume džindlesis Man, togi džindlesis Mīre Dādes.

²⁰ Da lava rakirdža Iisusos ke Davleske rakhibnaskīri kedi sikļaikirdža ane khangīri; te nikon nalija Les, vašo dova so oščo najavdža Leskīri štunda.

²¹ Noko phendža lenge Iisusos: Me otdžava, te tume rodena Man; te mērena an tumāro grehos. Kai Me džava, doi tume našti dojaven.

²² Doi Judi rakirdle: hobi Jov domarla Kokoro Pes, so rakirla: kai Me džava, doi tume našti dojaven?

²³ Jov phendža lenge: tume isan talatunestir, Me isom aprotunestir; tume isan da svetostir, Me na da svetostir.

²⁴ Vašo dova Me tumenge phendžom, so tume merna an tumāre grehi: keļi napačana, so Me dava isom, togi merna an tumāre grehi.

²⁵ Togi phendle Leske: kon Tu? Iisusos phendža lenge: samo pšersumastir, sir rakirava tumenge.

²⁶ Mange būt te rakirav te sendinav tumendir; ne bičaibnaskīro Man isi lašņo, te so Me sundžom Lestir, dova rakirava svetoske.

²⁷ Na halīne, so Jov rakirdža lenge Dādestir.

²⁸ Te jake Iisusos phendža lenge: kedi tume pohučakirna mānušeskīre Čhāves, togi tume uzdžinena, so dava Me te so niso nakērava Mandir: ne, sir sikļakirdža Man Dād Mīro, jake rakirava.

²⁹ Bičaibnaskīro Mīro isi Mansa; Dād namukša Man jedženes; Me sajek kerava dova, so Leske kamelapes.

³⁰ Kedi Jov rakirdža dava, būt pačandīne an Leske.

³¹ Togi phendža Iisusos dova Judenge kon pačandīne an Leske: keļi tume jačena an Mīro lav, togi tume lašņes Mīre siklaibnangīre.

³² Te dodžinena so isi lašņuma, te lašņuma kerla tumen voļnonen.

³³ Leske otphendle: me isam Abraamoskīro rodos te nasamas bučkīrde ņigdi ni koneske; sir Tu rakiresa: kernatumen voļnonenge?

³⁴ Iisusos otphendža lenge: lašņes, lašņes rakirava tumenge: svako, kon kerla grehos, isi bučkirdo grehoske,

³⁵ Ne bučkirdo najačela ano khēr mužīges čhāvo jačela mužīges.

³⁶ Te jake, keļi Čhāvo kerla tumen voļnonen, togi lašņes voļna jāna.

³⁷ Džinav so tume Abraamoskīro rodos: ne tume rodena domaren Man, vašo dova so Mīro lav najačela an tumenge.

³⁸ Me rakirava dova, so dikšom ke Mīro Dād; ne tume kerna dova, so dikhle ke tumaro dād.

³⁹ Phendle Leske ano otpheniben: dād māro isi Abraamos. Iisusos phendža: keļi tume jān Abraamoskīre čhāve, togi kerībena kernas Abraamoskīre.

⁴⁰ Ne kana rodena domāren Man, mānušes, kon phenela tumenge lašņuma, savo šundžom Davlestir: Abraamos dava nakērdža.

⁴¹ Tume kērna buča tumāre dādeskīre Pe dava phendle Leske: me nasam ano lubnaruma ločīne; jek Dād menge isi, Dēvel.

⁴² Iisusos phendža lenge: keļi Dēvel jāl Dād tumāro, togi tume Man miļinenas, vašo dova so Me Davlestir vijavdžom te javdžom: hai Me na Mandir javdžom, ne Jov Man bičadža.

⁴³ Wasoske tume nahaļona Mīro rakirben? vašo dova so našti šunen lava Mīre.

⁴⁴ Tumāro dād beng; te tume kamena phečkiren tumāre dādesko kamiben, Jov isis mānušego domāribnaskīro pšeršumastir, te nanotardija ano lašņuma; hai an leske nāni lašņuma. Kedi rakirla jov frotaruma, rakirla peskīro; hai jov frotaris te frotarumasko dād.

⁴⁵ Ne sir Me lašņuma rakirava, togi napačana Mange.

⁴⁶ Kon tumendir dosikavela Man ano načačipen? keļi Me rakirava lašņuma, vassoske tume napačana Mange?

⁴⁷ Kon Davlestir, dova šunela Davleskīre lava, Tume vašo dova našunena, so tume nasan Davlestir.

⁴⁸ Pe dava Judi otphendle te rakirdle Leske: te načačo hobi me rakirasa, so Tu samarāņinos te so beng an Tuke?

⁴⁹ Iisusos otphendža: an Mange beng nāni; ne Me važina Mīre Dādes; ne tume Man nočhuvena.

⁵⁰ Ne Me naroda Mīri slava; ne isi Rodipnaskīro te Sendipnaskīro.

⁵¹ Lašņes, lašņes rakirava tumenge: kon rakhela Mīro lav, dova nadikhela šmerč ņigdi.

⁵² Judi phendle Leske: kana uzdžindžam me, so beng an Tuke. Abraamos meija te proroki; ne Tu rakiresa: „kon rakhela lav Mīro, dova šmerč nahaļola ņigdi“.

⁵³ Hobi Tu bāredīr māre dādestir Abraamostir, sav mēja? te proroki mēnē: koneske Tu kēresa Tut.

⁵⁴ Iisusos otphendža: keļi Me Man Kokoro slavinava, togi slava Mīri niso. Man slavini Dād Mīro, Saijestir tume rakirna, so Jov Devēl tumāro.

⁵⁵ Te tume nauzdžindle Les; ne Me dzinav Les; te keļi phenava, so nadžinav Les, togi javava dasav sai tume hohāne. Ne Me džinav Les te rakhava lav Leskīro.

⁵⁶ Abraamos dād tumāro rado isis dikhel dīves Mīro; te dikša, te radidžapes.

⁵⁷ Pe dava phendle Leske Judi: Tuke nāni oščo pandžvardeš berš, — te Tu dikšan Abraamos?

⁵⁸ Iisusos phendža lenge: lašņes, lašņes rakirava tumenge: vago sir isis Abraamos, Me isomas.

⁵⁹ Togi līne bara, sobi thurden pe Leske; ne Iisusos garūdžapes, te vigija khangirjatir, te vigija maškīr lenge; te gija durēdīr.