Joannostir 7 - Joannostir Svencono lačopheniben 1933 (Latvia)

Džeļ, 7.

¹ Pašļi dava Iisusos gija pire Galilejakīri phu; pire Judengīri phu nakamdža džal, vašo dova so Judi rodīne domāren Les.

² Judengo svenkos isi paše: opre kēriben kuščei.

³ Togi pšala Leskīre phendle Leske: vidža darig te dža ane Judengīri phu, sobi sikļaibnangīre Tīre dikhen buča, saje Tu kēresa.

⁴ Hai nikon nakērla biļiso čorahanes, te rodela kokoro jāl džindlo. Keļi Tu kēresa dasaj buča, togi sikav Tut svetoske.

⁵ Hai pšala nin Leskīre napačandīne an Leske.

⁶ Pe dava Iisusos phendža lenge: Mīri brīža oščo najavdža; ne vaš trunegne isi sajek brīža.

⁷ Tumen svetos našti naiedikhel, ne Man naiedikhela; vašo dova so Me švatkinava lestir, so buča leskīre hinde.

⁸ Tume džan pe da svenkos; ne Me oščo nadžava pe da svenkos; vašo dova so Mīri brīža oščo navijavdžapes.

⁹ Dava pheni lenge, jača ane Galileja.

¹⁰ Ne kedi javdle pšala Leskīre, togi Jov nin javdža po svenkos, na jake sir dikhen, ne sir čorahanes.

¹¹ Judi rodīne Les po svenkos te rakirdle: kai Jov?

¹² Te būt rakirbena isis vaš Leske maškir mānušenge; saje rakirdle, so Jov lačo; ne vāvir rakirdle: na, Jov dohohavela mānušen.

¹³ Ne šmales nikon narakirdža agilo jakha, strahandoi Judendir.

¹⁴ Ne uže ano pāš svenkos Iisusos zagija ane khangīri, te sikļakirdža.

¹⁵ Te dživindepen Judi, rakirindoi: sir Jov džinel čhinibena, na sikļakirindopes?

¹⁶ Iisusos, otphenindoi lenge, phendža: Mīro sikļakirben — nāni Mīro, ne doleskīro Sav Man bičadža.

¹⁷ Kon kamela kērel voļa Leskīri, dova dodžinela da sikļakirbnastir, Davlestir jov, vai Me Kokoro Mandir rakirava.

¹⁸ Rakirbnaskīro kokoro pestir rodela slava peske; ne Kon rodela slava Bičaibnaskīreske Les, Dova isi lašņo, te nāni načačipen an Leske.

¹⁹ Hobi nadija Moisejos tumenge dophenibena? te nikon tumendir po dopheniben nakērla. Vasoske rodena domāren Man?

²⁰ Mānuša phendle ano otpheniben: nāni feņu beng an Tuke? kon rodela domārel Tut?

²¹ Iisusos, rakīben rikirindoi, duredīr phendža lenge: jek kēriben kērdžom Me, te tume sāre dživinenatumen.

²² Moisejos dija tumenge občhiniben (jov nāni Moisejostir, ne, dīno dādendir); te ano kurko Tume občhinena mānušes.

²³ Keļi ano kurko mānuš dolela občhiniben, sobi najāl obšeļipume Moisejosko dopheniben: pe Mange hobi tume nahoļinena vašo dova, so Me sāre mānušes visačkirdžom ano kurko?

²⁴ Nasendinen avratunestir, ne sendinen čačune sendosa.

²⁵ Doi saje Ijerusaļimakirendir rakirdle: nāni Dava, feņu Dova, Sajes rodena domāren?

²⁶ Dik, Jov rakirla angilo jakha, te niso naphenena Leske: nadojavdle feņu anglatune, so Jov lašņes Hristos?

²⁷ Ne me džinas Les, kārig Jov; kedi Hristos javela, nikon nadžinela, kārig Jov.

²⁸ Iisusos dija goli ane khangīri, sikļakirindoi te rakirindoi: džinen Man, te džinen, kārig Me; te Me javdžom na Kokoro Mandir, ne lašņo Dova Kon Man bičadža, Sajes tume nadžinen.

²⁹ Me džinav Les, vašo dova so Me Lestir, te Jov bičadža Man.

³⁰ Te rodīne Les den capla; ne nikon načhudža pe Leske vasta, vašo dova so oščo najavdža Leskīri štunda.

³¹ Būt mānušendir pačandīne an Leske, te rakirdle: kedi javela Hristos, hobi butir dživitka znaki kērla, būt Dava kērdža?

³² Šundle fariseji dasaje rakirbena Lestir maškir mānušenge, te fariseji te rašange bāredīra bičadle slugen meden caplam Les.

³³ Iisusos phendža lenge: oščo na hāra jāvav Mange tumensa, togi džava ke Dova Kon. Man bičadža.

³⁴ Tume Man rodena, te nalathena; te kai Me jāvava, doi tume naštuvena jāven.

³⁵ Ke dava Judi rakirde maškir penge: kai Jov kamela džal, jake šo me Les nalathasa? nakamela feņu Jov džal ke dola, saje isi rozthurdīne maškir Grieķenge te sikļakirel Grieķen?

³⁶ So značinena da lava, saje Jov phendža: tume Man rodena, te nalathena; te kai Me java, doi tume naštuvena javen?

³⁷ Te an do statno bāro svenkosko dīves Iisusos tardija, te goli dija, rakirindoi: koneske fardes kamelapes pjel, jov ke Me te pi.

³⁸ Kon pačala an Mange, doleske, jake isi phendlo ano čhinibena, masendir thadena reki paņinga džīde (Iisaija 12, 3. Ioiļ 3, 18).

³⁹ Dava Jov phendža do Duhostir, Savo lenge jāla dolenge saje pačana an Leske: hai oščo pe lenge naisis Svencono Duhos, vašo dova so Iisusos oščo naisis obšvatlume.

⁴⁰ Būt mānušendir, saje šundle da lava, rakirde: Jov čačo prorokos.

⁴¹ Vār rakirde: dava Hristos. Ne vār rakirde: hobi Galilejatir jāvela Hristos?

⁴² Hobi nāni phendlo ano čhinibena, so Hristos javela Dāvidoskīre koroņostir, te Vifļijematir, do štetostir, kārig isis Dāvidos?

⁴³ Te jake hadijapes gola vaš Leske maškīr mānušenge.

⁴⁴ Vār lendir kamdle den capla Les; ne nikon pe Leske vasta načhudža.

⁴⁵ Te jake slugi rišine pālē ko rašange bāredīra te ko fariseji, te dala phendle lenge: vasoske tume najandle Les?

⁴⁶ Slugi otphendle: ņigdi mānuš narakirdža jake, sir da mānuš.

⁴⁷ Fariseji phendle lenge: hobi te tume nin isan pšelīne Lestir?

⁴⁸ Hobi pačandīne an Leske kon bāredīrendir te farisejendir.

⁴⁹ Ne da mānuša kon dopheniben nadžinen, jone isi kērde armaņi.

⁵⁰ Nikodīmos, kon rati javdža ke Jov, jek jedženo lendir, phenela lenge:

⁵¹ Sendini hobi māro dopheniben mānušes, keli vāgo navišunena les te nauzdžinena, so jov kērla?

⁵² Pe dava phendle leske: te i tu nasan feņu Gaļilejatir? rozdik, togi dikhesa, so Galilejatir najāvēla prorokos.

⁵³ Te rozgīne sāre khēre.