Joannostir 6 - Joannostir Svencono lačopheniben 1933 (Latvia)

Džeļ, 6.

¹ Pošļi dava gīja lisusos pe dorīg Galileiskako moros, ane Tiveriadake rīg.

² Pal Leske gīne būt mānuša, vašo dova so dikhle dživi, saje Jov kērdža pe nasvalenge,

³ Iisusos gīja pe berga, te doi bešča Peskīre sikļaibnangīrensa.

⁴ Jāvdža Patradžin Judengo svenkos.

⁵ Iisusos, hadija jakha te dikša, so būt mānuša javena ke Jov, rakirla Filiposke: kai menge kinas māre, sobi len čhālakiras?

⁶ Rakirdža dava, sprobindoi les; hai Kokoro džindža, so kamdža kērel.

⁷ Filipos otphendža Leske: lenge po dui šel dinariji najāla doša māre, sobi svakoneske lendir resel nabūt.

⁸ Jek Leskīro sikļaibnangīrendir, Simonosko Petrisko pšal, Andreijos, phenela Leske:

⁹ Dai isi jeke rakloreske pandž ačmeņitka māre te dui māčore; ne so dava vaš jake būtenge?

¹⁰ Iisusos phendža: phenen lenge mebešen. Isis pe do štetos būt čharja. Te jake bešle mānuša giniben ko pandžvardeš šela.

¹¹ Iisusos, lel māre del porikirben, rozdija sikļaibnangīrenge, ne sikļaibnangīre bešibnangīrenge, te mače nin, ako cik, kon kamdža.

¹² Te kedi čhāline, togi phendža Peskīre sikļaibnangīrenge: zakeden otjačīne kuski, sobi niči nanašadžol.

¹³ Te zakedīne, te pherdžakirde dešodui korobki kuskensa pandž ačmeņitka mārendir, so jačīne dolendir, saje hāne.

¹⁴ Togi mānuša, saje dikhle dživos, kerdo Iisusosa, phendle: dava lašņes do prorokos, sajeske čhebi javel ano svetos.

¹⁵ Iisusos, halija; so kamena jāven, čorahanes len Les te kēren kraļiske, noko jedženo gija pe berga.

¹⁶ Kedi beļveļ jāvdža, togi Leskīre sikļaibnangīre gīne tele ko moros.

¹⁷ Te, zagīne ane laiva, te mukhlepen pe dorīg moros, ane Kapernauma. Jača čemno; ne Iisusos najavdža ke jone.

¹⁸ Phurdija zorali balval, te moros lija hadelpes.

¹⁹ Mukhindoipes žin ko bištepandž vai trijanda staģiji, jone dikhle so javela Iisusos piro moros te paše uže ke laiva, te vistrahandīne.

²⁰ Ne Jov phendža lenge: dava Me; nastrahadžon.

²¹ Jone kamdle len Les ane laiva; te zaras laiva dotardija ko bregos, kai mukhlepen.

²² Ano vār dīves mānuša, saje isis tarde pe dorīg moros, dikhle, so doi, butir jek laivatir, an saji zagīne Leskīre sikļaibnangīre, vār naisis, te so Iisusos nazagija ane laiva Peskīre sikļaibnangīrensa, ne otmukhlepen jedžene Leskīre sikļaibnangīre.

²³ Te jāvdle Tiveriadatir vār laivi paše ke do štetos, kai hāne māre saje švenčakirdža Raij.

²⁴ Te jake, kedi mānuša dikhle, so doi nāni Iisusos, ni Leskīre sikļabnangīre, togi gīne ano laivi, te dodīne plima ane Kapernauma, rodindoi Iisusos.

²⁵ Te, latle Les pe dorīg moros, te phendle Leske: Ravvi! kedi Tu dai jāvdžan?

²⁶ Iisusos phendža lenge otpheniben: lašņes, lašņes rakirava tumenge: tume rodena na vašo dova, so dikhle dživi, ne vašo dova, so hāne māro te čhālīne.

²⁷ Trādentumen na vaš do haben sav šņikini, ne vaš haben, sav jačela an sajek džīben, savo dela tumen mānušesko Čhāvo; hai pe Leske čhudža peskīri pečaķ. Dād, Dēvel.

²⁸ Te jake phendle Leske: so menge kēras, mejālas Davleskīri butin.

²⁹ Iisusos phendža lenge otpheniben: daja isi Davleskīri butin, sobi tume pačan an Doleske, Sajes Jov bičadža.

³⁰ Pe dava phendle Leske: savo Tu menge desa značuma, sobi me dikhas te pačas Tuke? so Tu kēresa?

³¹ Dāda māre hāne manna ane čuči phu, sir opre čhindlo: māro bolibnastir dija lenge han (Psal. 77, 24).

³² Iisusos phendža lenge: lašņes, lašņes rakirava tumenge: na Moisejos dija tumenge māro bolibnastir, ne Dād Mīro dela tumen čačuno māro bolibnastir.

³³ Hai Davlesko māro isi dova, savo jāvela bolibnastir te dela džīben svetoske.

³⁴ Pe dava phendle Leske: Raija! pode menge sajek dasav māro.

³⁵ Iisusos phendža lenge: Me isom džībnasko māro; jāvibnaskīro ke Me najāla ane bok, te pačaibnaskīro an Mange najāla slāpūšo ņigdi.

³⁶ Ne Me phendžom tumenge, so tume dikhle Man, te napačana.

³⁷ Sāro, so dela Dād Mange, ke Me dojāvela; te jāvibnaskīres ke Me navitrādava avri.

³⁸ Hai Me jāvdžom telle bolibnastir na vaš dova, sobi kērav voļa Mīri, ne voļa bičaibnaskīreskīri Man Dādeskīri.

³⁹ Voļa bičaibnaskīreskīri Man Dādeskīri isi doja, sobi dolestir, so Jov Man dija, niso nazgiņakirav, ne sāro dova opre dzangavav ano statno dīves.

⁴⁰ Voļa bičaibnaskīreskīri Man isi doja, sobi svako, dikhibnaskīro Čhāves te pačaibnaskīro an Leske, mejāl leske džīben sajek; te Me les opre džangavava ano statno dīves.

⁴¹ Līne phučon pe Leske Judi vaš dova, so Jov phendža: Me isom māro, jāvibnaskīro bolibnastir.

⁴² Te rakirdle: na Iisusos hobi dava, Ijosifosko čhāvo, Koneskīres dādes te da me džinas? Sir‐že Jov rakirla: Me jāvdžom telle bolibnastir?

⁴³ Iisusos phendža lenge ano otpheniben: naphučon maškir tumenge.

⁴⁴ Nikon našti dojāvel ke Me, keļi nadotirdela les Dād, bičaibnaskīro Man; te Me opre džandava les ano statno dīves.

⁴⁵ Prorokende opre čhindlo: te jāna sāre andre sikļakirde Davlestir. Svako, šunindoi Dādestir te andre sikļakirindopes, jāvela ke Me (Isaija 54, 13).

⁴⁶ Dava na dova, sobi kon dikhjasis Dādes, sir feņu Dova, Kon isi Dādestir; Jov dikhja Dādes.

⁴⁷ Lašņes, lašņes rakirava tumenge: kon pačala an Mange doleske isi sajek džīben.

⁴⁸ Me isom džībnasko māro.

⁴⁹ Dāda tumāre hāne manna ane čuči phu, te mēne.

⁵⁰ Māro, sav jāvela telle bolibnastir, dasav isi, kon hala les namerla.

⁵¹ Me isom džīdo māro, sav javela telle bolibnastir; habnaskīro da māro jāla džīdo sajek; māro, sav Me dava, isi Mīre masa, saje Me otdava vaš svetosko džīben.

⁵² Togi Judi līne phučon maškir penge, rakirindoi; sir Jov vašti del menge has Peskīre masa?

⁵³ Iisusos phendža lenge: lašņes, lašņes rakirava tumenge: keļi tume nahana mānušeskīre Čhāveskīre masa te napjena Leskīre rata, togi džīben an tumenge najāla.

⁵⁴ Kon hala Mīro mas te pjela Mīre rata doleske isi džīben sajek; te Me doles džangava opre ano statno dīves.

⁵⁵ Hai Mīro mas čačo isi hāben, te Mīre rata isi čačo pīben.

⁵⁶ Kon hala Mīro mas te pjela Mīre rata jačela sajek an Mange, te Me an leske.

⁵⁷ Sir Man bičadža džīdo Dād, te Me džīva druh Dādeske, te jake kon Man hala džīdo jāla druh Mange.

⁵⁸ Dava isi māro, javdlo bolibnastir. Na jake, sir dāda tumāre hāne manna, te mēne: kon hala da māro džīdo jāla sajek.

⁵⁹ Dava Jov phendža ane khangīri, sikļakirindoi ane Kapernauma.

⁶⁰ Būt Leskīre sikļaibnangīrendir, šunindoi dova, rakirdle: sai vārčana lava! kon vašti dava šunel?

⁶¹ Ne Iisusos, džinindoi Kokoro an Peske, so sikļaibnangīre Leskīre pe dava phučona, phendža lenge: hobi dava tumen čipini?

⁶² So, keļi tume dikhena mānušeskīre Čhāves so džala opre doi, kai isis vāgo?

⁶³ Duhos džīdo kērla; masa niso nakērna lačo. Lava, saje rakirava Me tumenge, isi duhos te džīben.

⁶⁴ Ne isi tumendir vār napačaibnangīre. Hai Iisusos pšeršumastir džindža, kon isi napačaibnangīre te kon pšedela Les.

⁶⁵ Te phendža: vaš dava rakirdžom Me tumenge, so nikon našti javel ke Me, keļi najāla dova dīno leske Mīre Dādestir.

⁶⁶ Da brīžatir būt Leskīre siklaibnangīrendir otgīne Lestir, te nagīne Lesa.

⁶⁷ Togi Iisusos phendža dešodujenge: nakamena tume nin otdžan?

⁶⁸ Simonos Petris otphendža Leske: Raija! ke kon me džas? Tuke isi lava sajek džībnaskīre.

⁶⁹ Te me pačandijam te dodžindžam, so Tu Hristos, Čhāvo džīdo Davleskīro.

⁷⁰ Iisusos otphendža lenge: te hobi dešodujen tumen navidikšom Me? ne jek tumendir beng.

⁷¹ Dava rakirdža Jov Judostir Simonoskīre čhāvestir Iskariotostir; hai dava kamdža pšedel Les, jov isis jek dešodujendir.