Joannostir 5 - Joannostir Svencono lačopheniben 1933 (Latvia)

Džeļ, 5.

¹ Pošļi dava isis Judengo svenkos, Te jāvdža Iisusos ane Ijerusaļima.

² Iisi ane Ijerusaļima ke bakrengīri porta moribnaskīro, savo Juditkes denas goli Vifezda, ke saji isis pandž čhakirde andredžabnaskīre.

³ An lenge pašle bāro giniben nasvale, korore, langale, telešučine, žakirindoi paņingesko čhalaiben.

⁴ Hai Rasko Jaņolos po brīži nojāvelas ano moribnaskīro te začhalavelas paņing; te kon pšeršo nodžalas ano paņing pošļi paņingesko čhalaiben, dova visaščolas, mejalas sav nazvaliben javindoi.

⁵ Doi isis mānuš, ano nasvaliben lačapes trijanda te ohto berš.

⁶ Iisusos, dikhel les pašles te uzdžinindoi, so jov doi hāra pašlo, rakirla leske: kamesa jās sasto?

⁷ Nasvalo otphendža Leske: jake, Raija; ne mange nāni mānuš, savo andremukhel man an do moribnaskīro, kedi čhaladžolapes paņing, ne kedi me dojāvava, vār uže nogija angil mange.

⁸ Iisusos phenela leske: ūšti, le tīro čhiben te dža.

⁹ Te jov zāras jača sasto, te lija pesko čhīben, te gija. Isis dava ano kurkesko dīves.

¹⁰ Pe dava Judi phendle visačkirdeske: da dīves kurko; načhebi les tuke čhiben.

¹¹ Jov otphendža lenge: kon man saščakirdža, dova mange phendža: le tīro čhīben te dža.

¹² Lestīr phučle: kon dova dasav mānuš, savo phendža tuke: le čhiben tīro te dža?

¹³ Visačkirdo hai nadžindža, kon Jov: Iisusos zagija maškir do mānušenge, saje doi isis pe do štetos.

¹⁴ Pošļi dova Iisusos lača les ane khangīri te phendža leske: dik, tu visaščandijan; nagrehini butir, sobi najačel tusa so hindedīr.

¹⁵ Da mānuš gīja, te viphendža Judenge, so Iisusos dova isi, kon les kerdža sastes.

¹⁶ Te līne Judi goiņinen Iisusos, te rodīne domaren Les vašo dova, so Jov kerdža dasaj buti ano kurko.

¹⁷ Iisusos phendža lenge: Dād Mīro žin kana kerla, te Me kērava.

¹⁸ Te oščo butīr rodīne domāren Les Judi vašo dova, so Jov na feņu kurkesko dīves nasvenčini, ne Peskīre Dādeske dela goli Davles, te kērindoi Pes ravnes Devēlesa.

¹⁹ Pe dava Iisusos phendža: lašņes, lašņes phenava tumenge: Čhāvo niso našti kērel Kokoro Pestir, keļi nadikhela Dād so kerla: hai so kerla Jov, dova Čhāvo nin kerla.

²⁰ Hai Dād miļini Čhāves te sikavela Leske sāro, so kerla Kokoro; te sikavela Leske bāredīr buča dalendir, jake so tume dživinenatumen.

²¹ Hai sir Dād džangavela opre mūlen te džidžakirla, jake Čhāvo džīdžakirla, kones kamela.

²² Hai Dād te nasendini nikones, ne sāro senduma otdija Čhāveske,

²³ Sāre merožinen Čhāves, sir rožinena Dādes. Kon narožini Čhāves, dova narožini Dādes nin, kon Les bičadža.

²⁴ Lašņes, lašņes rakirava tumenge: kon Mīro lav šunela te pačala Doleske kon Man bičadža doleske isi sajek džīben; te po sendos najavela, ne pšegija šmerčatir ano sajek džīben.

²⁵ Lašņes, lašņes rakirava tumenge: javela brīža, te kana isi, kedi mūle šunena glos Davleske Čhāveskīri te, kedi šunena, džīdžona.

²⁶ Hai sir Dādeske isi džīben Kokoreske an Peske, te jake dija Čhāveske džīben Kokoreske an Peske.

²⁷ Te dija Leske moca vilidžal sendos nin, vašodova so Jov isi mānušano Čhāvo.

²⁸ Nadžīvinentumen vaša dava; hai javela brīža, an saji sāre, saje isi ano grobi, šunena glos Davleske Čhāveskīri.

²⁹ Te vidžana auri lačo kēribnaskīre ano opre uštiben po džīben, ne hindo kēribnaskīre — ano opre uštiben po senduma.

³⁰ Me niso našti kērav Kokoro Mandir. Sir šunava, jake sendinava; te sendos mīro isi čačo; te Me narodava Mīri voļa, ne voļa bičaibnaskīri Man Dādeskīri.

³¹ Keļi Me švatkina Kokoro Mandir, togi švatkuma Mīro nāni lašņo.

³² Isi vār, sav švatkini Mandir; te Me džinav, so lašņo do švatkuma, savo jov švatkini Mandir.

³³ Tume bičadle ko Ioannos; te jov švatkindža lašņumastir.

³⁴ Ne Me na mānušendir lava švatkuma; ne dava rakirava vašo dova, sobi virakhentumen hindipnastir.

³⁵ Jov isis aizhačkirdi švatlo momoli, švatlindoi; ne tume kamdle tikni brīža pohotņakirentumen ke lesko švatluma.

³⁶ Mange isi baredīr švatkuma Ioannoskīrestir; buča, saje Dād dija Mange mekērav, da kokore buča Mandir kerde, švatkinena Mandir, so Dād bičadža Man.

³⁷ Te bičaibnaskīro Man Dād Kokoro zašvatkidža Mandir. Ne tume ni glos Leskīri ņigdi našundle, ni Leskīre jakha nadikhle.

³⁸ Te nāni tumenge lava Leskīre jačhibnaskīre an tumenge; vašo dova so tume napačana Doleske, Sajes Jov bičadža.

³⁹ Viroden čhinibena: hai tume dufinena druh lenge dolen sajek džīben; ne jone švatkinena Mandir.

⁴⁰ Ne tume nakamena javen ke Me, sobi jāl tumenge džīben.

⁴¹ Nalava slava mānušendir;

⁴² Džinav tumen: tumenge nāni an kokorenge miluma ko Dēvel.

⁴³ Me jāvdžom an Mīre Dādesko lav, te nadolena tume Man; ne keļi vār jāvela an pesko kokoresko lav les tume dolena.

⁴⁴ Sir tume vašti pačan, kedi jek vavrestir dolena slava, ne slava, saji isi jeke Davlestir, na rodena?

⁴⁵ Nadufinen, so Me tumen dava, skarga āngil Dāvleske; isi pe tumenge skarga dibnaskīro Moisejos, pe koneske tume žakirna.

⁴⁶ Keļi tume pačandīnesis Moisejoske, togi pačandīnesis Mange nin; vašo dova so jov čhindža Mandir.

⁴⁷ Keļi leske čhinibnange napačana, sir pačana Mīre lavenge?