Joannostir 4 - Joannostir Svencono lačopheniben 1933 (Latvia)

Džeļ, 4.

¹ Kedi Iisusos dolija džinel so dogija ko fariseji šuniben, so Jov butir sikļaibnangīren dolela te bolela, nasir Ioannos.

² (Hai Iisusos Kokoro naboldža, ne feņu Leskīre sikļaibnangīre):

³ Togi mukša Judengīri phu, te gija noko ane Galileja.

⁴ Jaudžapes Leske pšedžal druhe Samārija.

⁵ Te jake javela Jov ane Samārakīro foros, denas goli Sihar, paše ke do šmatos phu, dīno Jakovostir peskīre čhāveske Iosifoske,

⁶ Doi isis Jakovoskīri hāning. Iisusos, khino dromestir, bešča ke hāning. Isis ke šovto štunda.

⁷ Javela džūli Samarijatir phērel pāņing. Iisusos phenela lake: de Man pjav.

⁸ (Ne Leskīre sikļaibnangīre gīne ano foros kinen hāben.)

⁹ Samarijakīri džūli rakirla Leske: sir Tu, Judos javindoi, mangesa pjes mandir, Samarjanatir? hai Judi Samarjanensa nazadžanapen.

¹⁰ Iisusos phendža lake ano otpheniben: keļi tu do Davleskīro žāļuma džindžanas so Jov dela, te kon tuke phenela: de Man pjav, keļi tu dava džindžanas, togi tu kokori mangjanas Lestir, te Jov tuke dijasis džīdo pāņing.

¹¹ Džūli rakirla Leske: Raija! tuke nāni sosa phēres, hai hāning hor: karīg tuke džīdo paņing?

¹² Hobi tu bāredīr māre dādestir Jakovostir, savo dija menge da hāning, te kokoro latir pija, te leskīre čhāve, te leskīre bidli?

¹³ Iisusos phendža lake ano otpheniben: svako, pibnaskīro da pāņing, kamela noko;

¹⁴ Ne kon pjela pāņing, savo Me dava leske, dova nakamela pjel ņigdi; ne pāņing, savo Me dava leske, kērlapes an leske pāņingali krenicake, savo thadela ano džīben bekonkoskīro.

¹⁵ Džūli phenela Leske: Raija! de man da pāņing, sobi mange nakamelpes pjav te najāl mange javav dai phērav.

¹⁶ Iisusos phenela lake: dža, te khēr tīre romes, te jov dārīg.

¹⁷ Džūli phendža ano otpheniben: mange nāņi rom. Iisusos phenela lake: tu čačo phendžan, so tuke nāni rom:

¹⁸ Hai tuke isis pandž roma, te dova, savo kana tuke isi, dova nāni tīro rom; dava čačipen tu phendžan.

¹⁹ Džūli phenela Leske: Raija! dikhava, so Tu isam prorokos.

²⁰ Māre dāda kloninenapen pe da berga; ne tume phenena, so štetos, kai čhebi kloninenpes, isi ane Ijerusaļima.

²¹ Iisusos lake phenela: pača Man, so javela brīža, kedi na pe da berga, te na ane Ijerusaļima pokloninena tumen Dādeske.

²² Tume nadžinen, koneske kloninenatumen; ne me džinas, koneske, sir kloninasamen: rakhiben bidatir isi Judendir.

²³ Ne javela brīža, te uze javdža, kedi lašņa poklonibnaskīre pokloninenapen Dādeske ano duhos te lašņuma; hai dasajen poklonibnaskīren Dād rodela Peske.

²⁴ Devēl isi duhos: te poklonibnaskīrenge Leske čhebi pokloninenpen Leske ano duhos te lašņuma.

²⁵ Džūli phenela Leske: džinav, so jāvela Messija, dova isi Hristos; kedi Jov jāvela, togi sāro phenēla menge.

²⁶ Iisusos phenēla lake: dova Me, Savo rakirava tusa.

²⁷ An da brīža jāvdle Leskīre sikļaibnangīre, te dživindepen, so Jov rakirdža džuļasa; ne nijek naphendža: so Tuke čhebi? vai: sostir rakieresa lasa?

²⁸ Togi džūli mukša peskīre paņiņgengīre janibnangīre, te gija ano foros, te rakirla mānušenge:

²⁹ Javen, dikhen mānušes, savo phendža mange sāro, so me kērdžom: nāni feņu Jov Hristos?

³⁰ Jone javdle forostir, te gīne ke Jov.

³¹ An do brīža sikļaibnangīre mangle Les phenindoi: Ravvi! ha.

³² Ne Jov phendža lenge: Mange isi hāben, savo tume nadžinen.

³³ Vaša dava sikļaibnangīre rakirdle maškir penge: hobi kon jandža Leske hal?

³⁴ Iisusos rakirla lenge: Mīro hāben isi kērav voļa Doleskīri kon Man bičadža pokērav Leskīri butin.

³⁵ Narakirna hobe tume, oščo štār čhona, te jāvēla žbožako čhiniben? ne Me rakirava tumenge: haden tumāre jakha opre te dikhen po māro, sir jov poparņandīja te iejavdžapes ko čhiniben.

³⁶ Čhinibnaskīro dolela pleskirben te zalela bārīno ano sajek džīben, jake so sējejos te čhinibnaskīro khetane hotņakirnapen

³⁷ Hai an dasav molos čača virakirdo: jek sējini, ne vār čhinela.

³⁸ Me tumen bičadžom mečhinen dova, pe so tume nasan butin kēri: vār robindle, ne tume gīne an lengīri robiņ.

³⁹ Būt Samārjaņi do forostir pačandīne an Leske pe do džūlakire lava, joi švatkidža, so Jov phendža lake sāro, so joi kerdža.

⁴⁰ Te vašo dova kedi javdle ke Jov Samārjaņi, togi mangle Les mejačel ke jone; te Jov jača doi dui dīvesa.

⁴¹ Te oščo butir giniben pačandīne pe Lesko lav.

⁴² Te do džūļake rakirdle: kana uže na pe tīre phenibena pačasa; ne uže kokore kana šundžam te dodžindžam, so Jov lašņes svetosko rakhinaskīro, Hristos.

⁴³ Kedi vigīne dui dīvesa, Jov vigija dorīg, te gija ane Gaļileja.

⁴⁴ Hai Kokoro Iisusas švatkindža, so prorokos an peskīri dādeskīri phu nāni rožume,

⁴⁵ Kedi Jov javdža ane Gaļileja, togi Gaļijaņe Les dolīne, vašo dova so dikhindoi sāro, so Jov kerdža ane Ierusaļima po svenkos, hai jone nin gīne po svenkos.

⁴⁶ Te jake Iisusos noko jāvdža ane Kānā Galilejakīri, kai kērdža paņing vinoske. Ane Kapernauma isis jek kraļisko slugos, koneske isis raklo nasvalo.

⁴⁷ Jov šundža, so Iisusos jāvdža Judenge phujatir ane Galilejakīri, jāvdža ke Jov, te mangja Les mejāvel te mesačkirel leskīre čhāves, savo isi ke šmerč.

⁴⁸ Iisusos leske phendža: tume napačana, keļi nadikhena znaki te dživi.

⁴⁹ Kraļisko slugos Leske rakirla: Raija! jov, poskil nameija mo čhāvo.

⁵⁰ Iisusos phenela leske: dža, čhāvo tīro isi sasto. Jov pačandija laveske savo phendža leske Iisusos, te gija.

⁵¹ Po drom lačne les slugi leskīre, te phendle: čhāvo tīro sasto.

⁵² Jov phuča lendir: an saij štunda jača leske lokedīr? leske phendle: taša ane eftato štunda izdrāni les otmukša.

⁵³ Dolestir dād džindža, so dava isis do štunda, an saiji Iisusos phendža leske: čhāvo tīro sasto, te pačandija kokoro te sāro leskīro khēr.

⁵⁴ Dava vār dživos kērdža Iisusos pālē rišindoi Judengīri phujatir ane Galilejakīri phu.