Joannostir 3 - Joannostir Svencono lačopheniben 1933 (Latvia)

Džeļ, 3.

¹ Maškir farisejenge sav isis, lavesa Nikodīmos, jek Judengo bāredīrendir.

² Jov javdža ko Iisusos rati, te phendža Leske: Ravvi! me džinas, so Tu sikļakirbnaskīro, javdlo Davlestir; hai dasai dživi, sai Tu kēresa, nikon našti kērel, keļi lesa najāla Devēl.

³ Iisusos phendža leske ano otpheniben: lašņes, lašņes rakirava tuke: keļi kon naločola opatunestir, našti dikhel Davleskīro kraļuma.

⁴ Nikodimos rakirla Leske: sir mānuš vašti ločol, kedi jov isi phūro? hobi vašti jov vār molos džāl an peskīre dakīre masa te meločol?

⁵ Iisusos atphendža: lašņes, lašņes rakirava tuke: keļi kon naločola paņingestir te Duhostir, našti džal an Devēleskīro kraļuma.

⁶ Ločīno masendir isi masa; ne ločīno Duhostir isi duhos.

⁷ Nadživintut pe dova, so Me phendžom tuke: čhebi tumenge ločon opratunestir.

⁸ Duhos phurdela, kai kamela, te glos leskīri šunesa, ne nadžines, karīg jāvela te kai džala; jake isi svakonesa, kon ločola Duhostir.

⁹ Nikodimos phendža Leske ano otpheniben: sir dava vašti jāl?

¹⁰ Iisusos otphendža te rakirla leske: tu Izraiļengo sikļakirbnaskīro, te dava nadžines?

¹¹ Lašņes, lašņes rakirva tuke: Me rakiras dolestir, so džinas, te švatkinasa dolestir, so dikšam; ne tume švatkuma Māro nakamena dolen.

¹² Keļi Me phendžom tumenge phujatir, te tume napačana: sir pačana, keļi phenava tumenge bolibnastir?

¹³ Nikon na zagija po boliben, sir feņu javibnaskīro bolibnastir mānušeskīro Čhāvo, sav isi ano boliben.

¹⁴ Te sir Moisejos hadija opre sapes ane čuči phu, jake čhebi jāl opre hadīna mānušeskīro Čhāvo,

¹⁵ Svako, pačaibnaskīro an Leske, me nazgiņinel, ne mejāl leske džīben bekoncoskīro.

¹⁶ Iake miļidža Dēvel svetos, so otdija Peskīres jek ločine Čhāves, sobi svako, pačaibnaskīro an Leske, menazgiņinel, ne mejāl leske džīben bekoncoskīro.

¹⁷ Nabičadža Devēl Peskīre Čhāves ano svetos, sobi sendines svetos, ne sobi svetos nazgiņinel te mejāl rakhlo druh Leske.

¹⁸ Pačaibnaskīro an Leske nasendinipes, ne napačaibnaskīro uže sendume, vašo dova so napačandija an Davleskiro jekločīno Čhāveskīro lav.

¹⁹ Senduma zatardžola an dova, so švatluma javdža ano svetos; ne mānuša butir miļidne čemnuma, nasir švatluma; vašo dova so buča lengīre isis hinde mirzona.

²⁰ Hai svako, hindo keribnaskīro, naiedikhela švatluma te najavela ko švatluma, sobi najān čhingardīne leskīre buča, vašo dova so jone hinde — mirzona.

²¹ Kon čačipen kērla dova džala ko švatluma, mejān dikhle leskīre buča, vašo dova so jone isi kērde ane Davleske.

²² Pošļi dova lisusos javdža Peskīre sikļaibnangīrensa ane Judengīri phu, te doi lensa džividža, te boldža.

²³ Ioannos nin boldža ane Enona, paše ke Saļima, vašo dova so doi isis būt paņinga; te javenas doi, te bolenas pen.

²⁴ Hai Ioannos oščo nasis čhudlo ano stārīben.

²⁵ Togi Ioannoskīre sikļaibnangīrenge vigija gola Judensa vašo rožuma.

²⁶ Te javdle ko Ioannos, te phendle leske: ravvi! Dova, Kon isis tusa ke Iordana te Konestir tu švatkindžan, Jov bolela, te sāre jāvena ke Jov.

²⁷ Ioannos phendža otpheniben: našti mānuš niso lel pe peske, keļi najāla dīno leske bolibnastir.

²⁸ Tume kokore mange švatki pe dova, so me phendžom: na me Hristos, ne me bičado angil Leske.

²⁹ Koneske mlodžikica dova isi mlodžikos; ne pšečeļos mlodžikoskīro, tardo te kandela Les, te radindoi radžakirlapes, šunindoi mlodžikoskīri gloss. Da raduma mīro pšečkirdžapes.

³⁰ Leske čhebi barjol, ne mange tikņuvav.

³¹ Kon jāvela opratunestir, dova isi bāredīr sārendir; kon phujatir phujakīro isi, te rakirla, sir pe phu pjujatir; jāvibnaskīro bolibnastir isi bāredīr sārendir.

³² Te so Jov dikhja te šundža, dolestir švatkini; te nikon nalela Leskīro švatkuma.

³³ Līno Leskīra švatkuma dolesa značakirlapes, so Dēvel isi lašņo.

³⁴ Hai dova, sajes bičardža Dēvel, rakirla Davleskīre lava; Dēvel nadela Duhos mērosa.

³⁵ Dād miļini Čhāves te sāro dija an Lesko vast.

³⁶ Pačandoi ane Čhāveske isi džīben sajek; ne napačandoi ane Čhāveske nadikhela džīben, ne Davleskīri holin jačhela pe leske.