Joannostir 2 - Joannostir Svencono lačopheniben 1933 (Latvia)

Džeļ, 2.

¹ Ano trito dīves isis bjav ane Kāna Galilejakīri, daij Isuskīri isis doi.

² Isis nin kherdo Iisusos te sikļaibnangīre Leskīre po bjav.

³ Te sir narešča vinos, togi daij Iisuskīri rakirla Leske: viņos nāni lenge.

⁴ Iisusos phenela lake: so Mange te tuke, džūli? oščo najavdža štunda Mīri.

⁵ Daij Leskīri phendža slugenge: so phenela Jov tumenge, dova kēren.

⁶ Isis doi šov barune paņingenge janibnange kučika, tardžonas vaše ponoš čistuma Judengīri, kai zadžanas po dui po trin mēri.

⁷ Iisusos phenela lenge: pherdžakiren paņingengīre kučika paņingesa. Te pherdžakirde len žin opre.

⁸ Te rakirla lenge: kana pheren, te janen bjaveskīre bāredīreske. Te jandle.

⁹ Kedi bāredīr sprobidža paņing, savo kerdžapes vinoske (ne jov nadžindža, karīg da vinos; džindle feņu slugi, kon pherdle paņing): Togi bāredīr kherla mlodžikos.

¹⁰ Te phenela leske: svako mānuš podela vāgo lačo vinos, ne kedi dopjenapen, togi bededīr; ne tu lačo vinos garūdžan žin kana.

¹¹ Jake čhudža Iisusos pšeršuma dživenge ane Kāna Galilejakīri te sikadža slava Peskīri; te pačandīne an Leske sikļaibnangīre Leskīre.

¹² Pošļi dava javdža Jov ane Kapernauma, Kokoro te daij Leskīri, te pšala Leskīre, te sikļaidnangīre Leskīre; te doi jačle nabūt dīvesa.

¹³ Judenge Patradžiņ isis paše, te Iisusos javdža ane Ijerusaļima;

¹⁴ Te lača, so ane khangīri bikindle gurven, bakren te gulubken, te bešle lovenge parubnangīre,

¹⁵ Te kerdža čupni šelendir, te vitrādija khangirjatir sāren, te jake bakren te gurven; te love parubnangīrenge roztrušakirdža, te lenge skamina obthurdija.

¹⁶ Te phendža gulubkenge bikibnangīrenge: len dava darīg, te Mīro Dādesko khēr nakēren targoske khēreske.

¹⁷ Ke dava Leskīre sikļaibnangīre lipirde, so čhindlo isi: hačkirben vaš Tīro khēr Man hala, (David. gilli 68, 10).

¹⁸ Pe dava Judi phendle: sai znakensa Tu menge dosikavesa, sir isi Tuke voļa jake kēres?

¹⁹ Iisusos phendža lenge otpheniben: rozrāven da khangīri, te Me ano trin dīvesa hadava la.

²⁰ Pe dava Judi phendle: da khangīri kērdžapes štalvardeš te šov berš, te Tu ano trin dīvesa hadesa la?

²¹ Ne Jov rakirdža Peskīri maseengīri khangirjatir.

²² Kedi Jov ušča mulendir, togi sikļaibnangīre Leskīre lipirde, so Jov rakirdža dava, te pačandīne čhinibnange te laveske, savo rakirdža Iisusos.

²³ Te kedi Jov isis ane Ijerusaļima pe Patradžinako svenkos, togi būt, džīvi dikhindoi, saje Jov kerdža, pačandīne an Leskīro lav.

²⁴ Ne Kokoro Iisusos napačandija Pes lenge, vašo dova so džindža sāren,

²⁵ Te Leske načhebandija, sobi kon obšvatkinel vaše mānušeske; hai Jov Kokoro džindža, so ane mānušeske.