Joannostir 12 - Joannostir Svencono lačopheniben 1933 (Latvia)

Džeļ, 12.

¹ Šov dīvesenge angil Patradžin javdža Iisusos ane Vifaņija, kai isis Lazaros, mēno, sajes Jov džangadža opre mūlendir.

² Doi gotovidle Leske beļveļakīro, te Marfa angil lenge saro so kērdža, te Lazaros isis jek dolendir kon Lesa ko skamin bešča.

³ Marija, lel hadipen fardes kuč čista nardakīre miri, maksa Iisuskīre pīre, te khošča peskīre balensa Leskīre pīre; te khēr pherdandija lače khaņasa mirendir.

⁴ Togi jek Leskīre sikļaibnangīrendir, Jūda Simonosko čhāvo Iskariotos, savo kamdža Les pšedel, phendža:

⁵ Te soske nabiknen da mīri vašo trin šel dinarije te narozden bogenge?

⁶ Phendža jov dava na vašo dova, sobi rikirelpes vaše bogenge, ne vašo dova so isis čhor. Leske isis te ke pe lovengīri tiknori te lidžalas so doi andre mukhenas.

⁷ Iisusos phendža: den la pokoino; joi dava garudža po Mīro mohilkengo dīves.

⁸ Hai bogi isi sajek tumensa, ne Me na sajek.

⁹ Būt Judendir dolīne džinen, so Jov doi: te javdle na feņu vaše Iisuske, ne sobi dikhen Lazaros nin, sajes Jov džangadža opre mūlendir.

¹⁰ Rašangīre bāredīra nokērdle Lazaros nin domāren;

¹¹ Vašodova so vaš leske būt Judendir javdle te pačandīne an Iisuske.

¹² An var dīves būt mānuša, saj javdle po svenki, dolīne šunen, so Iisusos javela ane Ijerusaļima,

¹³ Līne palmake kašteskīre zari, vijavdle angil Leske, te dīne goli: Osianna! švenčume javibnaskīro ano Rasko lav, Kraļis Izraiļengīro!

¹⁴ Iisusos, lača tarne oslos, bešča pe leske, sir isi čhindlo:

¹⁵ Nastrahadžu, Sionnakīri čhai! da, Kraļis tīro javela, bešindoi pe tarne osloske (Zaharija 9, 9).

¹⁶ Sikļaibnangīre Leskīre vago nahalīne dava; ne, kedi proslavindžapes Iisusos, togi lipirdle, so jake isis vaš Leske čhindlo, te dava kērdle Leske.

¹⁷ Mānuša, sai isis vago Lesa, švatkindle, so Jov vidija goli grobostir Lazaros te džangadža les opre mūlendīr.

¹⁸ Vašo dova gīne angil Leske mānuša; hai šundle, so Jov kērdža da dživos.

¹⁹ Fariseji rakirdle maškir penge: dikhena tume, so tume našti niso? sāro svetos džala pal Leske,

²⁰ Javibnangīrendir po poklonuma saje javdle po svenkos isis saje Jeļini.

²¹ Jone gīne ko Fiļipos, savo isis Galileiskakīri Vifsaidatir, te mangle les, rakirindoi: Raija! menge kamelapes dikhas Iisusos.

²² Filipos jāvela te phenela dolestir Andrejoske; te togi Andrejos te Filipos phenena dolestir Iisusoske.

²³ Iisusos phenela lenge otpheniben: jāvdža štunda teslavinelpes ane laska mānušeskīre Čhāveske.

²⁴ Lašņes, lašņes rakirava tumenge: keļi pšeņicako graudos, sav peija ane phu, namerla, togi jačela jedženo; ne keļi merla, togi janela būt bārino.

²⁵ Kon pesko džiben miļini zginakirla les; ne kon naiedikhela, an da svetos pesko džīben dova gāruvela les ano džīben bekoncoskīro.

²⁶ Kon Mange slugini, mejavel pal Mange: te kai Me, doi Mīro slugos jāla. Te kon Mange slugini, doles Mīro Dād rožini.

²⁷ Kana Mīro duhos isi nognečume; te so mange phenav? Dād! vile Man da štundatir! ne pe da štunda Me nin jāvdžom.

²⁸ Dād! proslavini lav Tīro. Togi jāvdža bolibnastir glos: te proslavidžom, te oščo proslavinava.

²⁹ Mānuša, tardindoi te šunindoi dova, rakirdle: dava grumos. Ne vār rakirdle: Iaņolos rakirdža Leske.

³⁰ Iisusos pe dava phendža: na vaš Mange isis da glos, ne vaš mānušenge.

³¹ Kana isi da svetosko sendos; kana da svetosko kraļis jāla avri trādīno.

³² Te kedi Me oprejāndlo javava phujatir, sāren tirdava ke Me.

³³ Dava rakirdža Jov, haļakirindoi, sai šmerčasa Jov merla.

³⁴ Mānuša otphendle Leske: me šundžam dophenibnastir, so Hristos jačela, sajek: sir Tu rakiresa so čhebi, jāl opre jandlo mānušeskīre Čhāveske? kon dava mānušesko čhāvo?

³⁵ Togi Iisusos phendža lenge: oščo pe tikni brīža švatluma isi tumensa; džan, poskil isi švatluma, sobi naoblel tumen čemnuma: ne kon džāla ano čemnuma dova nadžinel, kai džala.

³⁶ Poskil švatluma isi tumensa, pačan anda švatluma, švatlumaske čhāve mejān tume. Kedi phendža dava, Iisusos otgija te garūdžapes lendir.

³⁷ Te jake būt džīvi kērdža Iov angil lenge; te jone napačandīne an Leske,

³⁸ Mejāl pšečkirdo prorokosko Isaijakīro lav: Raija! kon pačandija šunibnaske mendir? te koneske sikadžapes Raskīri moca? (Isaija 53, 1.)

³⁹ Wašodova naštandīne jone pačan, so oščo sir phendža Isaija.

⁴⁰ Da mānuša kērde pengīre jakha korore, te pengīre džija barune, jakhensa menadikhen, te džesa menahaļon, te naotrišona, sobi Me sačkirav len (Isaija 6, 10).

⁴¹ Dava phendža Isaija, kedi dikša slava Leskīri te rakirdža Lestir.

⁴² Ne nin anglatunengīrendir būt pačandīne an Leske; ne vaše farisejenge naisphendlepen, sobi najān otčhudle sinogogatir.

⁴³ Hai zakamdle miles slava mānušengīri būtir, nasir slava Davleskīri.

⁴⁴ Iisusos zadija goli te phendža: pačaibnaskīro an Mange na an Mange pačala, ne an Doleske Kon Man bičadža.

⁴⁵ Te kon Man dikhela dikhela Mīre Bičaibnaskīres.

⁴⁶ Me švatluma jāvdžom ano svetos, sobi svako pačaibnaskīro an Mange najačeļ ando čemnuma.

⁴⁷ Te keļi kon šunela Mīre lava te napačala, Me nasendina les; hai Me jāvdžom te nasendinav svetos, ne vilav svetos hindipnastir.

⁴⁸ Kon Man otčuvela te nadolela Mīre lava doleske isi sendipnaskīro: lav savo Me rakirdžom, jov les sendini ano statno dīves.

⁴⁹ Me rakirdžom na Mandir; ne Dād Sav Man bičadža, Jov Mange dophendža, so phenav te so rakirav.

⁵⁰ Te Me džināv, so dopheniben Leskīro isi džīben sajek. Te jake, so Me rakirava, rakirava sir phendža Mange Dād.