Joannostir 11 - Joannostir Svencono lačopheniben 1933 (Latvia)

Džeļ, 11.

¹ Isis nasvalo jek sav Lāzaros Wifanijatir, foricostir, kai džīvelas Marija te Marfa, phen lakīri.

² Marija, sajako pšal Lāzaros isis nasvalo, isis doja, saji makša Ras mirensa te nokhošča Leskīre pīre peskīre balensa.

³ Pheņa bičadle phenen Leske: Raija! dik, kones Tu miļinesa, isi nasvalo.

⁴ Kedi Iisusos šundža dova, togi phendža: da nasvalipen na ke šmerč, ne ke slava Davleskīre, me proslavinelpes druh dava Davlesko Čhāvo.

⁵ Iisusos miļidža Marfa, te lakīre pheņa, te Lazaros.

⁶ Kedi šundža, so jov nasvalo, togi jača dui dīvesa pe do štetos, kai isis.

⁷ Pošļi dova phendža sikļaibnangīrenge: jāven noko ane Jūdejā,

⁸ Sikļaibnangīre phendle Leske: Ravvi! hāra hobi so Judi rodīne domāren Tut barensa; te Tu noko džasa doi?

⁹ Iisusos otphendža: hobi ano dīves nāni dešodui štundi? kon džala dīvese, dova nadodaužinipes, vāšo dova so dikhela da svetosko švatluma.

¹⁰ Ne kon džala rati, dodaužinipes, vašo dova so nāni lesa švatluma.

¹¹ Kedi dava rakirdža, togi phenela lenge: Lazaros, māro pšečeļos pašija; ne Me džāva džangavav les.

¹² Sikļaibnangīre Leskīre phendle: Raija! keļi pašija, togi visaščola.

¹³ Iisusos rakirdža leskīre šmerčatir; ne jone dufidle, so Iov rakirla dasai saj sajek isi lindra.

¹⁴ Togi Iisusos phendža lenge lašņes: Lazaros meija.

¹⁵ Radinaman vaš tumenge, so Me naisomas doi, sobi tume mepačan; ne javen ke jov.

¹⁶ Togi Foma, varčanes dīno goli Dvoikos, phendža sikļaibnangīrenge: jāven te me nin mēras lesa.

¹⁷ Iisusos jāvdža, lača, so jov uže štār dīvesa ano grobos.

¹⁸ Wifanija isis paše ke Ijerusaļima, staģiji despadž.

¹⁹ Te būt Judendir jāvdle ke Marfa te Marija — hotņakiren len ane tuga vaš lengīre pšaleske.

²⁰ Kedi Marfa šundža so javela Iisusos, gija angil Leske; Marija bešča khēre.

²¹ Togi Marfa phendža Iisuske: Raija! keļi Tu javdžanas dai, nameijasis mīro pšal.

²² Nete kana džīnav, sir so Tu mangesa Davles, Dēvel dela Tuke.

²³ Iisusos phenela lake: opreuštela tīro pšal.

²⁴ Marfa phenela Leske: džinav, so opre uštela ano stano, opreuštibnasko dīves.

²⁵ Iisusos phendža lake: Me isom opreuštiben te džīben; pačaibnaskīro an Mange, keļi te mērel, otdžīdžola.

²⁶ Te svako, kon džīvela te pačala an Mange, namērla ņigdi. Pačasa feņu tu daleske?

²⁷ Joi phenela Leske: jake, Raija! me pačava, so Tu Hristos, Davlesko Čhāvo koneske isis javel ano svetos.

²⁸ Kedi phendža dava, gija te čorahanes dija goli peskīre pheņa Marija, phenindoi: Sikļaikirbanaskīro isi dai te kherla tut.

²⁹ Sig joi šundža zaras ušča, te gija ke Jov.

³⁰ (Iisusos oščo nazagija ano foricos, ne isis pe do štetos, kai lača Les Marfa.)

³¹ Judi, saje isis lasa ano khēr te hotņakirdle la, kedi dikhle, sir Marija sig ušča te vigija, gīne pal lake, dufindle, so joi gija po grobos rovel doi.

³² Kedi Marija javdža doi, kai isis Iisusos, te kedi dikša Les, peija ke Leskīre pīre, te phendža Leske: Raija! ja Tu javdžanas dai, togi nameijasis mīro pšal.

³³ Kedi Iisusos, dikša so joi rovela te Judi saj lasa jevdle so rovena, togi kokoro jača smetno, duhosa zalīno.

³⁴ Te phendža: kai tume čhudle les? rakirna Leske: Raija! jov te dik.

³⁵ Iisusos rovdža.

³⁶ Togi Judi rakirdle: dik, sir Jov milindža les.

³⁷ Ne vār lendir phendle: naštandija Dava, Kon otkērdža jakha kororeske, kērel sobi dava namērel?

³⁸ Iisusos, noko smentno andratunestir, javela ko grobos. Doja isis jama, te bar pašija pe lake.

³⁹ Iisusos phenela: otlen bar. Mūleskīri phen, Marfa, phenela Leske: Raija! uže khandela; hai štār dīvesa, sir jov ano grobos.

⁴⁰ Iisusos phenela lake: naphendžom Me tuke, ja pačasa, dikhesa slava Davleskīri?

⁴¹ Te jake otlīne bar jamatir, kai isis mūlo. Iisusos hadija jakha ko boliben te phendža: Dād! porikirav Tut, so Tu kandijan Man.

⁴² Me džindžom, so Tu sajek kandesa Man, ne phendžom dava vaše mānušenge, kon dai tarde, sobi pačan, sir Tu bičandžan Man.

⁴³ Kedi phendža dava, Jov dija goli fardo glosasa: Lazaro! jov avri.

⁴⁴ Te mūlo jāvdža avri, zapačkirde vastensa te pīrensa garubnaske cerhensa, te mui leskīro isis obphandlo dikhloresa. Iisusos phenela lenge: rozphanden les, medžal.

⁴⁵ Togi būt Judendir, sai javdle ke Marija te kedi dikhle, so kērdža Iisusos, pačandīne an Leske.

⁴⁶ Ne vār lendir gīne ko fariseji te phendle lenge, so kērdža Iisusos.

⁴⁷ Togi rašange bāredīra te fariseji zakherdne godžvaren te rakirde: so menge kēras? da mānuš būt džīvi kērla.

⁴⁸ Keļi jake mukhasa Les, togi sāre pačana an Leske; te javena Rimļani, te otlena māri phu te mānušen.

⁴⁹ Jek lendir, savo to Kaiafa, jov do berš isis rašango bāredīr, phendža lenge: tume niso nadžinen.

⁵⁰ Te napomišļinena so fidīr menge, sobi jek mānuš mērel vaš mānušenge, nasir sāro rodos zgiņinel.

⁵¹ Dava jov phendža nakokoro pestir, ne jake, so do berš jov isis rašango bāredīr, rakirdža angīl paphenindoi, so Iisusos mērla vašo rodos.

⁵² Te na feņu vaš mānušenge, ne sobi do rozgīne Davleskīre čhāven zalel ano jek.

⁵³ Da dēvestir nočhudle domāren Les.

⁵⁴ Vaša dava Iisusos nagija šmales maškir Judenge, ne gija lenge rīgatir ane jek vār rīg paše ke čuči phu, ano foros goli dīno Jefraim, te doi jača Peskīre sikļaibnangīrensa.

⁵⁵ Isis nadūr Judenge Patradžin, te būt dorīgatir javdle ane Ijerusaļima angil patradžin, sobi otčistinenpen.

⁵⁶ Togi rodīne Iisusos, te rakirdle doi tardindoi ane khangīri jek vavreske: sir tume dufinena? najavela hobi Jov po svenkos?

⁵⁷ Rašangīre bāredīra te fariseji dīne avri dasav pokēriben, so, keļi kon uzdžinela, kai Jov jāla, pophenel, sobi len Les.