Joannostir 10 - Joannostir Svencono lačopheniben 1933 (Latvia)

Džeļ, 10.

¹ Lašņes, lašņes rakirava tumenge: kon nadžala druh udār ane bakrenge hļiva, ne ližini varthal, andre, dova isi čhor te rozboiņikos.

² Ne kon džala druh udār dova bakrengo pastuhos.

³ Leske udaresko rakhibnaskīro otkērla, te bakre šunena leskīri glos, te jov dela goli peskīre bakren po lav, te vilidžala len,

⁴ Te kedi vilidžala peskīre bakren, džala angil lenge; ne bakre pal leske džana, vašo dova so džinen glos leskīri.

⁵ Pal cudzoneske nadžana, ne našēna lestir, vašo dova so napinškirna cudzoneske glos.

⁶ Da dolidžipen phendža lenge Iisusos; ne jone nahalīne, so Jov dasav lenge rakirdža.

⁷ Te jake noko Iisusos phendža lenge: lašņes, lašņes rakirava tumenge, so Me udār isom bakrenge.

⁸ Sāre, kon angil Mange jāvdle, dola sāre čhora te rozboiņiki; ne bakre nakandīne len.

⁹ Me isom udār: kon druh Mange zadžala, dova virakhelapes, te zadžala, te vidžala, te paščakirben lathela.

¹⁰ Čhor jāvela feņu vašo dova, sobi čhorel, domārel te zgiņakirel. Me jāvdžom vašo dova, sobi dolenge jāl džīben te sāro‐so.

¹¹ Me isom pastuhos lačo: lačo pastuhos dela pesko džīben vaše bakrenge.

¹² Zarakirdo pastuhos, lašņo nāni, koneske bakre nāni peskīre, te dikhela so jāvela ruv, te mukhela bakren, te nāšēla; te ruv rozšņikakirla bakren, te roztrādela len.

¹³ Ne zarakirdo pastuhos nāšela, vašo dova šo jov feņu zarakirdo, te narado vaš bakrenge.

¹⁴ Me isom pastuhos lačo; te džinav Mīren, te Mīre džinen Man.

¹⁵ Sir Dād dzinel Man, jake Me džinav Dādes; te džīben Mīro dava vaše bakrenge.

¹⁶ Isi Mange var bakre, dola nāni da hļivatir; te nin dolen Mange čhebi dojanav: te jone šunena glos Mīri, te jāla jek bakrengo gajos te jek pastuhos.

¹⁷ Wašo dova miļini Man Dād, so Me otdava džīben Mīro, sobi noko lav les.

¹⁸ Nikon naotlela Mandir les; ne Me Kokoro otdava les. Mange moca isi otdav les, te moca isi noko lav les. Da dopheniben Me dolijom Mīre Dādestir.

¹⁹ Da lavendir noko maškir Iudenge vigija gola.

²⁰ Būt lendir rakirdle: Jov pšelīno bengestir te begodžakīro; šo šunena Les?

²¹ Wār rakirdle: ?da lava nāni bengatuneskīre: hobi vašti beng kororenge jakha otkērel?

²² Ane Ijerusaļima isis khangirjako svencumasko svenkos, te isis žima.

²³ Te pširdža Iisusos ane khangīri, ane Solomonosko khangīrjako anglatuno.

²⁴ Doi Judi obtardīne Les, te rakirdle Leske: hāra Tuke men rikires ano nadžinipen? keļi Tu Hristos, phen menge lašņes.

²⁵ Iisusos otphendža lenge: Me phendžom tumenge, te napačana; buča, saje Me kērava an Mīre Dādesko lav, jone švatkinena vaš Mange.

²⁶ Ne tume napačana; hai tume nasan Mīre bakrendir, sir Me phendžom tumenge.

²⁷ Bakre Mīre šunena glos Mīri, te Me džinav len, te jone javena pal Mange.

²⁸ Te Me dava lenge džīben bekoncoskīro, te nazgiņinena ņigdi; te nikon naviļela len Mīre vastendir.

²⁹ Dād Mīro, Sav len Man dija, barēdīr sarēndir te nikon našti vilel len Mīre Dādeskīre vastendir.

³⁰ Met te Dād isam — jek.

³¹ Doi noko Judi dīne caplam bara, sobi domāren Les.

³² Iisusos otphendža lenge: būt lače buča Me posikadžom tumenge Mīre Dādestir; vaš saje lendir kamena domāren Man barensa.

³³ Judi phendle Leske ano otpheniben: na vaše lači būtin kamasa domāres Tut barensa, ne vašo Davlesko tellečhuviben te vašo dova, so Tu, isan mānuš, ne kēresa Tut Davleske.

³⁴ Iisusos otphendža lenge: te nāni hobi čhindlo an tumāro dopheniben: Me phendžom: tume Dēvela? (David. gili 82, 6.).

³⁵ Keļi jake Jov dija goli delenge dolen, ke saje isis Davlesko lav, te našti zgiņinel čhiniben.

³⁶ Hobi Doleske, Sajes Dād svenčakirdža te bičadža ano svetos, tume rakirna: davles tellečhuvesa, vašodova so Me phendžom: Me isom Davlesko Čhāvo?

³⁷ Ja Me nakēra Mīri Dādeskīri butin, napačan Mange;

³⁸ Ne ja Me kēra, togi, keļi napačana Mange, pačan Mīre bučenge, sobi džinen te pačan, so Dād an Mange te Me an Leske.

³⁹ Togi noko rodīne capladen Les; ne Jov norišija lengīre vastendir.

⁴⁰ Te gija noko pe korīg Iordana, pe do štetos, kai vāgo boldža Ioannos; te jača doi.

⁴¹ Būt jāvdle ke Jov, te rakirdle, so Ioannos nakērdža nisavo dživos; ne sāro, so phendža Ioannos Lestir, isis lašņes.

⁴² Te būt doi pačandīne an Leske.