Joannostir 1 - Joannostir Svencono lačopheniben 1933 (Latvia)

Džeļ, 1.

¹ Ano pšeršuma isis lav, te lav isis ko Dēvel, te lav isis Dēvel.

² Jov isis ano pšeršuma ko Dēvel.

³ Sāro druh Leske lija jāl, te be Leskīro niso nalija jāl, so lija jāl.

⁴ An Leske isis džīben, te džīben isis mānušengo švatluma.

⁵ Te švatluma ano čemnuma švatlini, te čemnuma naoblija les.

⁶ Isis mānuš, bičado Davlestir; lav leske Ioannos.

⁷ Jov javdža vašo švatkuma, sobi svatkinel švatlumastir, mepačan sāre druh leske.

⁸ Jov nasis švatluma: ne isis bičado, sobi švatkinel vašo švatluma.

⁹ Isis lašņo Švatluma, Sav obšvatlini svakone mānušes, sav javela ano svetos.

¹⁰ Ano svetos isis, te svetos druh Leske lija jāl, te svetos Les napinčkirdža.

¹¹ Javdža ke peskīre, te peskīre, Les nadolīne.

¹² Ne dolenge, saje dolīne Les, pačaibnangīrenge an Lesko lav, dija moca jān Davleskīre čhāvenge.

¹³ Saje na ratendir, ni masengīre kamibnastir, ni muršeskīre kamibnastir, ne Davlestir ločīne.

¹⁴ Te lav jača masenge, te lodija mensa, pherdo žaļumasa te lašņumasa; te me dikšam slava Leskēri, slava sir jek ločīneskīri Dādestir.

¹⁵ Ioannos švatkini Lestir te goli dijindoi rakirla: Dava isi Dova, Konestir me phendžom, so javibnaskīro pal mange isi angil mange, vašo dova so isis vāgo mandir.

¹⁶ Te Leskīre pherdipnastir, sāre me dolijam žaļuma pe žaļumaske.

¹⁷ Dopheniben dīno druh Moisejoske; žaļuma te lašņuma vijavdža druh Iisuske Hristoske.

¹⁸ Davles nadikša nikon ņigdi; jek ločino Čhāvo, ane Davleskīri angaļa Jov kerdža džinibnaskīro.

¹⁹ Te dik Ioannoskīro švatkuma, kedi Judi bičadle Jerusaļimatir rašan te leviten phučen lestir: kon tu?

²⁰ Jov viphendža, te nadijapes bohostir, te viphendža, so me naisom Hristos.

²¹ Te phučle lestir: so? tu Ilija? Jov phendža: na. Prorokos? Jov otphendža: na

²² Phendle leske: kon tu? sobi menge jāl das atpheniben māre bičaibnaskīrenge: so tu phenesa kokoro tutir?

²³ Jov phendža: me gloss golidibnaskīri ane čuči phu: vikēren drom Raske, sir phendža prorokos Isaija (Isaija 40, 3).

²⁴ Bičade isis farisejendir;

²⁵ Te jone phučle lestir: so tu bolesa, keļi tu naisan Hristos, ni Ilijos, ni prorokos?

²⁶ Ioannos phendža lenge otpheniben: me bola ano paņing; ne maškir tumenge Sav, isi tardo, Sajes tume nadžinen.

²⁷ Jov dova javibnaskīro pal mange, ne Jov isi angil mange. Me naisom godno otkērav simirji Leskīre čhivikenge.

²⁸ Dova isis ane Vifavara, ke Iordāna, kai boldža Ioannos.

²⁹ Ano vār dīves dikhela Ioannos javibnaskīres ke jov Iisusos, te rakirla: dik Davlesko Jerhos, Sav lela pe Peske svetoskīre grehi.

³⁰ Dava isi, Sajestir me phendžom: pal mange javela Muršs, Sav isis angil mange; vašo dova so Jov isis vāgo mandir.

³¹ Me nadžindžom Les; ne vašo dova javdžom bolav ano paņing, sobi Jov jāl džindlo Izraiļenge.

³² Te švatkindža Ioannos, rakirindoi: me dikšom Duhos, so javela bolibnastir, sir golubkos, te jačindoi pe Leske.

³³ Me nadžindžom Les; ne Bičaibnaskīro man mebolav ano paņing, phendža mange: pe Koneske dikhesa do Duhos nomukhindoipes te jačhindoipes pe Leske, Dova isi bolibnaskīro Svencono Duhosa.

³⁴ Te me dikšom, te švatkindžom, so Dava isi Davlesko Čhāvo.

³⁵ Ano vār dīves noko tardija Ioannos te dui leskīre sikļaibnangīrendir.

³⁶ Te dikhindoi so javela Iisusos, phenddža: dik Davlesko Jerhos.

³⁷ Šunindoi lestir da lava, sāre dui sikļaibnangīre gīne pale Iisuske.

³⁸ Iisusos abrišindoi te dikhindoi len so javena, rakirla lenge: so tumenge čhebi? Jone phendle Leske: Ravvi! (so značini: sikļakirbnaskīro) kai dživesa?

³⁹ Rakirla lenge! javen, te dikhena, Jone gīne, te dikhle, kai Jov dživela; te ke Jov jačle do dīves. Isis žvonos sav deš.

⁴⁰ Jek dujendir, šunindoi Ioannostir vaše Iisuske gibnangīrendir pal Leske, isis Andrejos, pšal Simonoskīro Petriskīro.

⁴¹ Jov pšeršo lathela peskīre pšales Simonos, te rakirla leske: me lačam Messija, so značini: Hristos.

⁴² Te jandža les ko Iisusos. Iisusos, dikša pe leske, te phendža: tu — Simonos, čhāvo Ioņinoskīro; tu desatut goli Kifa, so značini bar (Petris).

⁴³ Ano vār dīves Iisusos zakambža džal ane Gaļileja, te lača Fiļipos, te phenela leske jov pal Mange.

⁴⁴ Fiļipos isis Vifsaidatir, jeke forostir Andrejosa te Petrisa.

⁴⁵ Fiļipos lačel Nafanailos, te rakirla leske: me lačam Doles, Konestir čhinenas Moisejos ano dopheniben te proroki, Iisusos, Josifoskīre čhāves, Nazaretatir.

⁴⁶ Ne Nafanailos phendža leske: Nazaretatir vasti nin jāl so lāčo? Filipos rakirla leske: jov te podik.

⁴⁷ Iisusos, dikhindoi javibnaskīres ke Jov Nafanailos, rakirla lestir: dik jek Izraiļķanos, an koneske frotaruma nāni.

⁴⁸ Nafanailos rakirla Leske: pe so Tu džines man? Iisusos phendža leske otpheniben: angil dava sir kherdža tut Filipos, kedi tu isanas tale smokovņica, Me dikšom tut.

⁴⁹ Nafanailos otphendža Leske: Ravvi! Tu Davlesko Čhāvo. Tu Izraiļengo Kraļi.

⁵⁰ Iisusos phendža leske otpheniben: tu pačasa, vašo dova so Me tuke phendžom: Me dikšom tut tale smokovnica; dikhesa butir dalestir.

⁵¹ Te rakirla leske: lašņes, lašņes rakirava tumenge: damolostir tume dikhena boliben otpširado te Davleskīre Jaņolen opre džana te tele javena ke mānušesko Čhāvo.