San Mateo 4 - LEQUIL ACH' C'OP

Ja' li' yaloj ti chlo'loat ox yu'un totil pucuj ti Jesuse

¹ Ti Jesuse, i'iq'ue ech'el ta xocol balamil yu'un ti ch'ul Espiritue yo' xq'uelbat o yo'on yu'un ti totil pucuje.

² Ti Jesuse, muc xve' cha'vinic (40) c'ac'al xchi'uc cha'vinic (40) ac'ubal. Lic vi'najuc.

³ Ja' o ic'ot ti totil pucuje, c'ot slo'lo ti yaloje. Ja' yech iyalbe chac li'i: —Ti mi yech ti vo'ot Xch'amalot ti Rioxe, albo li tonetic li'i ti ac'u c'atajuc ta pane. ―Xut.

⁴ Itac'av ti Jesuse: —Ts'ibabil ta sc'op Riox: “Ma'uc no'ox ta pan chcuxi li crixchanoe. Ja' ta xcuxi o noxtoc scotol li c'usi chloc' ta ye ti Rioxe.” ―Xi ti Jesuse.

⁵ Ti pucuje iyic' tal ta Jerusalén ti Jesuse. Isva'an ta jol templo yo' bu más to toyole.

⁶ Ja' yech iyalbe ti Jesuse: —Ti mi yech ti vo'ot Xch'amalot ti Rioxe, jipo aba yalel; ts'ibabil ta sc'op Riox: “Cha stacbe tal angeletic ti Rioxe yo' mu c'u xapas oe. Ja' stsacoj chac'ot, yo' mu xayayij o ta tone.”

⁷ Itac'av ti Jesuse: —Ts'ibabil noxtoc ta sc'op Riox: “Ti mu xu' xa q'uelbe yo'on ti Riox avu'une.”

⁸ Ti pucuje iyic' muyel ta jp'ej toyol vits noxtoc ti Jesuse. Tey iyac'be yil c'u x'elan tspas mantal li jyu'eletic ta sjunlej balamile, xchi'uc ti c'u x'elan ich'bilic ta muq'ue.

⁹ Ti pucuje xi iyalbe ti Jesuse: —Chacac'be acuentain scotol mi chavich'on ta muq'ue, mi chaquejletaone ―xut.

¹⁰ Itac'av ti Jesuse: —Batan, Satanás. Ts'ibabil ta sc'op Riox: “Stuc no'ox xavich'ic ta muc' ti Riox avu'unique, ja' no'ox xapasic li c'usi tsc'ane.” Xi.

¹¹ Ti pucuje ibat. Ja'o ital ta ora angeletic, tal scoltael ti Jesuse.

Ja' li' yaloj ti ta Galilea lic chanubtasvanuc ti Jesuse

¹² C'alal iya'i ti Jesuse ti itiq'ue ta chuquel ti Juane, isut ta Galilea.

¹³ Ja' iscomtsan li slumale, ja' li Nazarete, tey ba nacluc ta jteclum Capernaúm. Li Capernaume ta ti'nab yo' bu yosil ti Zabulone xchi'uc ti Neftalí ti ta vo'nee.

¹⁴ Ja' ic'ot ti c'usi iyal ti Isaías yaj'alc'op Riox ti ta vo'nee.

¹⁵ «Li yosil Zabulone xchi'uc li yosil Neftalie, chlic ta ti' mar: C'alal to jech uc'um Jordán, ja' li Galilea yo bu nacal li jyan lum crixchanoetique.

¹⁶ Li crixchanoetic ti nacajtic to'ox ta ic' osile iyilic xa sac osil; li much'u albil xa'ox sc'oplal chchamique xojoban xa luz ta stojolic.» —Xi ono'ox ti j'alc'op Isaiase.

¹⁷ Ti Jesuse ja'o lic yal: «Ictaic xa spasel li c'usitic chopole yu'un chlic xa cuentainvanuc ti Rioxe.» ―Xi.

Iyic' chanvo' jtsac choyetic ti Jesuse

¹⁸ Ti c'alal tey chanav ta ti'ti'nab ta Galilea ti Jesuse, tey iyil cha'vo' viniquetic sbanquil yits'in no'ox sbaic. Li june Simón sbi. Pedro li xcha'p'elel sbie. Li june Andrés sbi. Tey yolel tsjipic ta nab snuti'ic stsacobil xchoyic yu'un tsac-choy yabtelic.

¹⁹ Xi i'albatic yu'un ti Jesuse: —La' chi'inicon, chacac'be avabtelic, yu'un chba avic'becon tal crixchanoetic. ―X'utatic.

²⁰ Ora iyictaic o li tsac-choye, ja' ba xchi'inic ti Jesuse.

²¹ C'alal ijelav xa'ox ech'el c'uc snatil ti Jesuse. Tey iyil otro cha'vo' viniquetic, sbanquil yits'in no'ox sbaic uc: Ja' scremotic ti Zebedeoe, li june Jacobo sbi, li otro june Juan sbi, tic'ajtic ta canova xchi'uc stotic, yolel ta sts'is snuti'ic stsacobil choyic yu'un jatem. La' chi'inicon ―x'utatic yu'un ti Jesuse,

²² tey iscomtsanic li stotique xchi'uc li scanovaique, ja' ba xchi'inic ti Jesuse.

Ja' li' yaloj ti ichanubtasvan xchi'uc iscolta jchameletic ti Jesuse

²³ Ti Jesuse ixanav ta sjunlej Galilea; ichanubtasvan ta jujun nail tsobob-bailetic yu'unic. Ja' iyalbe sc'oplal li lequil ach' c'op ta scuenta ti ic'ot xa yora ta xcuentainvan ti Rioxe. Iscolta ep jchameletic c'usuc no'ox ipic o ti crixchanoetique.

²⁴ Ivinaj ta sjunlej Siria ti icol yu'un ep jchameletique. Iyiq'uic tal ti much'utic ipique. Ep ta tos chamel cha'iic. Jlom oy c'usi c'ux cha'iic, jlom ochem pucuj ta yo'onic. Oy jtup'-iq'uetic, oy much'utic ch'abal yip jun yoc sc'obic. Ti Jesuse icol yu'un scotol.

²⁵ Ep tajmec crixchanoetic ixchi'inic ech'el ti Jesuse. Ja' ti much'utic tey nacajtic ta Galileae, xchi'uc ta Decapolise, xchi'uc ta Jerusalene, xchi'uc ta yan jteclumetic li' ta Judeae, xchi'uc ti much'utic tey nacajtic ta jech uc'um Jordane.