Marcos 8 - LEQUIL ACH' C'OP

Ja' li' yaloj ti ismac'lin chanmil (4,000) viniquetic ti Jesuse

¹ Ti j'ech'ele ep tajmec crixchanoetic istsob sbaic noxtoc yo' bu ti Jesuse, mu xa c'u slajesic. Ti Jesuse iyic'tal li yajchanc'optaque, ja yech iyalbe chac li'i:

² ―Toj abol sbaic chquil li crixchanoetic li'i yu'un yoxibal xa c'ac'al li' jchi'uctique, mu xa c'u slajesic.

³ Ti mi ta jtac ech'el ta snaic lavi muc' bu ve'emique, yic'al xlubtsajic ta be yu'un nom liquemic tal li jlome ―x'utatic yu'un ti Jesuse.

⁴ ―Itac'avic li yajchanc'optaque: —¿Bu ta jtaticotic ep pan li' ta xocol balamile ti ta jmac'linticotic oe? ―Xutic.

⁵ Ijac'batic yu'un ti Jesuse: —¿Jayp'ej to pan oy avu'unic li vo'oxuque? ―X'utatic. ―Vucp'ej ―xiic.

⁶ Ti Jesuse iyalbe li crixchanoetique ti ac'u chotlicuque. Ixch'am li vucp'ej pane, “colaval”, xut ti Rioxe. Ja'o ixut li pane, ja' iyac'be li yajchanc'optaque, ja' xa ispucbeic ech'el li crixchanoetique.

⁷ Oy jaycot sc'ox choyic noxtoc. Ti Jesuse “colaval” xut noxtoc ti Rioxe, ja' o iyalbe li yajchanc'optaque ti ac'u spucbeic li crixchanoetique.

⁸ Ive' scotolic, lec inojic. Istsobic ti c'u yepal muc' xlaj yu'un ti crixchanoetique, inoj to vucub moch li sovrae.

⁹ Oy nan chanmiluc ti ive'ique. Ti c'alal laj ve'icuque ―Batanic xa un ―x'utatic yu'un ti Jesuse,

¹⁰ Ti Jesuse i'och ta canova xchi'uc li yajchanc'optaque, ibat ta yosilal Dalmanuta.

Ja' li' yaloj ti ja' no'ox tsc'an tsq'uelbeic mi oy syu'el Jesús li jfariseoetique

¹¹ Tey ic'otic jayvo' jfariseoetic, oy c'usi isjac'beic ti Jesuse yo' stabeic o smul ti yalojique. Isc'anbeic ti ac'u yac' iluc señail syu'el ta vinajel yo' xilic o ti tacbil tal yu'un ti Rioxe.

¹² Ti Jesuse isjic' yo'on, ja' yech iyal chac li'i: —¿C'u yu'un ti ja' no'ox tsc'a chisq'uelbecon jyu'el li crixchanoetic li'e? Ta melel chacalbeic, lavie mu xcac' avilic ti oy jyu'ele ―x'utatic yu'un ti Jesuse.

¹³ Ti Jesuse tey iscomtsan ti jfariseoetique, i'och ta canova, ibatic ta jech nab.

Ja' li' yaloj ti i'albatic ti p'ijicuc me, ti mu me ya'uc xch'unic ti c'usi chalic ti jfariseoetique

¹⁴ Li yajchanc'optaque ich'ay xa'i ech'el spanic. C'ajomal xa jp'ej pan tey ta scanovaique.

¹⁵ Ti Jesuse tsots iyalbe li yajchanc'optaque: —Q'uelo me abaic ta svuquesobil xch'ut span li jfariseoetique xchi'uc li Erodese ―x'utatic yu'un ti Jesuse.

¹⁶ Li yajchanc'optaque xalxalbe xa sbaic: Ti x'elan chale, ja' nan ti muc' jna'tic tal li jpantique ―xut xa sbaic.

¹⁷ Ti Jesuse sna'oj ti c'usi chalbe sbaique, yech'o un ja yech i'albatic chac li'i: ―¿C'u yu'un ti xavalvalbe abaic ti ch'abal apanique? Mi mu to xa ch'unic ta jmec, mi mu xa vaq'uic cuenta ya'el ti c'usi chacalbeique? ¿Mi mu to xava'ibeic smelol taj mec?

¹⁸ Oy asatic pero mu xavilic. Oy achiquinic pero mu xava'iic. ¿Mi ich'ay xa xava'iic ti c'usitic ijpase?

¹⁹ Ti c'alal ijxutilan ti vo'p'ej pane c'alal ijmac'lintic ti vo'mil viniquetique, ¿jayib moch inoj ti sovrae? ―X'utatic. ―Itac'av li yajchanc'optaque: Lajcheb ―xutic.

²⁰ ―Ti c'alal ijxutilan li vucp'ej pane c'alal ijmac'lin ti chanmile, ¿jayib moch inoj ti sovrae? ―X'utatic. Itac'avic noxtoc: ―Vucub ―xutic.

²¹ ―¿Mi mu to xava'ibeic smelol li c'usi lacalbeique? ―X'utatic.

Ja' li' yaloj ti isjambe sat jun ma'sat ta Betsáida ti Jesuse

²² Ti Jesuse tey ic'ot ta jteclum Betsáida. Tey yic'ojbeic c'otel jun vinic, ma'sat. ―Abulajan, picbo sat li vinic li'i ―xutic ti Jesuse.

²³ Ti Jesuse istsacbe sc'ob ti ma'sate, isnit loq'uel ta ti' jteclum. Istubtabe ti sate, ispicbe ta xchibal sc'ob. Isjac'be mi xil xa osil.

²⁴ Li ma'sate isq'uel osil ja' yech iyal chac li'i: ―Chquil li crixchanoetique, pero co'ol xchi'uc te' ti chanavique ―xi.

²⁵ Ti Jesuse ispicbe noxtoc ti sate, li vinique isq'uel lec li osile, lec xa icom ti sate, lec xa xil scotol.

²⁶ Ti Jesuse istac sutel ta sna, ja' yech iyalbe chac li'i: ―Mu me xa'ech' ta yutil jteclume, mu me much'u xavalbe ya'i ―x'utat ech'el yu'un ti Jesuse.

Ja' li' yaloj ti jamal iyal ti Pedroe ti ja' tacbil tal yu'un Riox ti Jesuse

²⁷ Ti Jesuse iloc' ech'el xchi'uc li yajchanc'optaque, ibatic ta parajeletic ta yosilal Cesarea de Filipo. Ti c'alal chanavic ech'el ta bee, ti Jesuse isjac'be li yajchanc'optaque: ―¿Much'uon ti yalojic li crixchanoetique? ―X'utatic.

²⁸ Itac'av li yajchanc'optaque: —Jlom chalic ti vo'ot Juan j'ac'-ich'vo'ote. Jlom chalic ti vo'ot Elíasote. Jlom chalic ti vo'ot yaj'alc'opot Riox ti ta más vo'nee ―xutic.

²⁹ ―Li vo'oxuque ¿Much'uon xana'ic? ―X'utatic. Itac'av li Pedroe: ―Vo'ot ti Cristoote ―xut.

³⁰ ―Mu to me much'u xavalbeic ya'i ti vo'on li Cristoone ―x'utatic.

Ja' li' yaloj ti iyal ti Jesuse ti chmilee

³¹ Ti Jesuse lic xchanubtas noxtoc li yajchanc'optaque, vo'on ti Xch'amal crixchano li c'ote, persa ta xquich' ep jvocol, mu xiyich'ic ta muc' li moletique, xchi'uc li totil paleetique, xchi'uc li much'utic ta xchanubtasvanic ta smantal Rioxe. Ja' chiyaq'uic ta milel, chimuque, ta yoxibal c'ac'al chicha'cuxi ―x'utatic yu'un ti Jesuse.

³² Jamal iyal ti chmilee, yech'o un li Pedroe iyic' loq'uel ti Jesuse yu'un ta spajes ti yaloje.

³³ Ti Jesuse ijoyij, isq'uelbe sat scotol li yajchanc'optaque, tsots i'albat li Pedroe, xi i'albate: ―¡Loc'an ta jtojol satanas! Li vo'ote mu xa vil li c'usi chil ti Rioxe, ja' no'ox chavil li c'usitic chil li crixchanoetique ―x'utat yu'un ti Jesuse.

³⁴ C'alal laj yal chac taje, ti Jesuse iyic' tal li yajchanc'optaque xchi'uc li crixchanoetique, ja' yech iyalbe chac li'i: —Ti much'u tsc'an ch-och ta cajchanc'ope, mu me c'uxuc ta yo'on li spat xocone. Ac'u xcuch scruzal, ac'u snap'letaon.

³⁵ Ti much'u ta xi'o li milele, ta ono'ox xcham. Yan ti much'u muc' ta alel yu'un mi ja' ilaj o ta milel ta jcuenta li vo'one xchi'uc ti ta xch'un li lequil ach' c'ope, ta xcuxi.

³⁶ ¿C'usi bal o ti mi tsta scotol li c'usitic oy li' ta sba balamil li crixchanoe, ti ta ch'ayel ono'ox ta xbate?

³⁷ Xchi'uc noxtoc, ¿Mi oy c'usi xu' tsman o xcuxlejal li crixchanoe?

³⁸ Yu'un ti mi oy much'u ta xq'uexav ta jcuenta li vo'one, xchi'uc ta scuenta li jc'ope, xchi'uc ti chq'uexav o li crixchanoetic ti mu junuc yo'onic ta stojol ti Rioxe ti tsa' smulique, ja' no'ox yech vo'on ti Xch'amal crixchano li c'ote chiq'uexav ta scuenta uc ti c'alal xi tal xchi'uc xojobal ti Jtote xchi'uc ti ch'ul angeletique.