Marcos 16 - LEQUIL ACH' C'OP

Ja' li' yaloj ti icha'cuxi loq'uel ta smuquenal ti Jesuse

¹ Ti c'alal i'ech' xa'ox li sc'ac'alil ta xcuxique, li María liquem tal ta Magdalae, xchi'uc li Salomee, xchi'uc li otro jun Maríae li sme' Jacoboe, ismanic muil pox yu'un chba yac'beic ta spat xocon ti Jesuse.

² Sob ta primero c'ac'al xemanae, ti c'alal naca to'ox chloc' c'ac'ale, ibatic yo' bu smuquenal ti Jesuse.

³ Ja' yech iyalbe sbaic chac li'i: —¿Much'u chisetetinbotic loq'uel li ton tana ta ti' ch'ene? ―Xut sbaic.

⁴ Ti c'alal ic'otique, iyilic ti mu xa bu tey ta yav li muc'ta ton ti macbil o to'ox li ti'il ch'ene.

⁵ Ti c'alal i'ochic ta yut muquenale, iyilic tey chotol ta sbats'i c'obic jun vinic slapoj natil saquil c'u'ul. Li antsetique ixi'ic o,

⁶ ja' yech i'albatic chac li'i: —Mu me xaxi'ic. Jna'oj ti ja' cha sa'ic ti Jesus Nazaret ti isjoc'anic ta cruze. Icha'cuxi xa; mu xa bu li'i. Q'uelavilic yo' bu istelanic to'oxe.

⁷ Batanic ba albeic li yan yajchanc'optaque xchi'uc li Pedroe: “Ti tey xa chc'ot staic ta Galilea chac c'u cha'al albilic ono'oxe.” ―X'utatic li antsetique.

⁸ Li antsetique anil iloq'uic ta muquenale, Xt'eleletic xa, mu xa sna' c'usi tspasic. Muc' much'u iyalbeic yu'un xi'emic. [

Ja' li' yaloj ti iyac' sba iluc ta stojol María Magdala ti Jesuse

⁹ Ti c'alal cha'cuxiem xa'ox ta sob ta primero c'ac'al xemana ti Jesuse, ja' ba'yi iyac' sba iluc ta stojol ti María liquem tal ta Magdalae, ja' ti much'u iloq'uesbat vucvo' pucuj ta yo'one.

¹⁰ Ba yalbe ti much'utic ixchi'in to'ox ta xanbal ti Jesuse, tey chat yo'onic xchi'uc ch-oq'uic c'ot sta.

¹¹ C'alal iya'iic ti icha'cuxi xa ti Jesuse, ti iyil li Maríae, muc' xch'unic.

Ja' li' yaloj ti iyac' sba iluc ta stojol cha'vo' viniquetic ti Jesuse

¹² Ts'acal to iyac' sba iluc ta be ta stojol cha'vo' xchi'ilic ti c'alal chbatic ta yosilique, muc' xojtiquinic ta ora yu'un ma'uc iyilic.

¹³ Li cha'vo'e isutic tal, tal yalbeic li yantique, pero muc' xch'unbatic uc.

Ja' li' yaloj ti c'usi yabtel iyac'be comel li yajchanc'optaque

¹⁴ Slajeb xa iyac' sba iluc ta stojol li buluchvo' yajchanc'optaque, ja' o tey yolel chve'ic c'ot sta. Tsot iyich'ic utel ta scoj ti ch'abal xch'unojel yo'onique xchi'uc ti mu xa c'usi sc'an xch'unic o ta jmoje, ti ja' mu xa bu ixch'unbeic o ti much'utic iyalic ti yilojic ti cha'cuxiem xae.

¹⁵ I'albatic yu'un ti Jesuse: «Batanic ta sjunlej balamil, ba albeic scotol crixchanoetic li lequil ach'c'ope.

¹⁶ Ti much'utic ta xch'unique, mi chich'ic vo'e, ta chcuxiic ta sbatel osil. Yan ti much'utic mu xch'unique jmoj sc'oplal chba yich'ic castico.

¹⁷ Ti much'utic ta xch'unique ta xaq'uic iluc sq'uelobi chac li'i: Ta jbi ta sloq'uesic pucujetic, xchi'uc ta xc'opojic ta ach' c'op.

¹⁸ Ac'u mi stsac ta sc'obic quiletel chon, ac'u mi xuch'ic ti c'usi oy sbenenoale, mu c'usi tspasic o; ja' no'ox yech noxtoc mi chac' sc'obic ta sba ti much'utic ipique, ta xcol yu'unic.» ―X'utatic yu'un ti Jesuse.

Ja' li' yaloj ti ibat ta vinajel ti Jesuse

¹⁹ Ti c'alal laj c'oponaticuc comel yu'un ti Jesuse, ja'o i'ic'at muyel ta vinajel, tey ichoti ta sbats'i c'ob ti Rioxe.

²⁰ Li yajchanc'optaque iloq'uic ta yalel a'yuc ta buyuc no'ox li lequil ach' c'ope; icoltaatic yu'un ti Cajvaltique, ja' ivinaj o li lequil ach'c'ope ti iyaq'uic iluc slequilal syu'elal ti Rioxe.]