San Lucas 17 - LEQUIL ACH' C'OP

Ja' li' yaloj ti toj xi'el sba li mulile

¹ Ti Jesuse ja' yech iyalbe li yajchanc'optac chac li'i: «Persa ono'ox oy ti c'usi chac' asa' amulique; pero ¡más toj abol sba ti much'u chac'be sa' smul li xchi'iltaque!

² Ja' más lec ti ac'u yich' chucbel jp'ejuc tanal molino ta snuq'ue, ti ac'u yich' jipel ochel ta mare, ja chopol mi li' no'ox chac'be sa' smul junuc li c'oxetic li'i.

³ ¡Cuentaanic me che'e! »Mi oy bu ista smul junuc lachi'ile, tsots xataq'ui; mi isutes yo'one ac'o ta pertonal.

⁴ Ac'u mi oy tsta smul ta atojol vuc-ech'eluc ta jun c'ac'al, ti mi “mu xa bu ta jpas yech” mi xayutilan svuc-ech'elale, ac'o ta pertonal.» ―X'utatic yu'un ti Jesuse.

Ja' li' yaloj ti tsc'an ta xch'unic más ti oy syu'el Jesús ti apoxtoletique

⁵ Ti apoxtoletique ja' yech isc'anbeic Cajvaltic chac li'i: —Coltaoticotic más ta xch'unel, —xutic.

⁶ Itac'av ti Cajvaltique: ―Ti oyuc xch'unojel avo'onic jp'ejuc ta bec' mustisyae, xu' chavalbeic li jtec' te' li'i: “Loc'an ech'el li'toe ba tec'lan ta mar”, mi xavutique, cha xch'unbeic. —X'utatic yu'un ti Jesuse.

Ja' li' yaloj ti c'usi tsc'an tspas li jun abtele

⁷ »Mi oy junuc li vo'oxuque, ti oy yaj'abtele, ti c'alal tsutal ta voc'-osile, o mi ta chabivacaxe, ti ja' yech chalbe chac li'i: ¿Ochan tal, la' chotlan, ve'an ti xute”?

⁸ Ma'uc yech, yu'un ja' yech chalbe chac li'i: Meltsanbon tal jve'el, paso to ti c'usi tsc'an pasel c'alal yolel chive' chcuch' vo'e, ja' to xa ve' xa xavuch' vo' ti mi laj ve'icone.” Chut.

⁹ Mi ja'uc chalbe colaval ti c'alal xlaj spas scotol li c'usitic iyalbee.

¹⁰ Ja' no'ox yech li vo'oxuc uque, mi ach'unic li c'usitic chayalbeic ti Rioxe, ja' no'ox yech xavalic chac li'i: “Mu c'u xitunoticotic o, yu'un mu c'usi ep ijpasticotic ja' no'ox ijpasticotic li cabtelticotique.” Chianic me ―x'utatic yu'un ti Jesuse.

Ja' li' yaloj ti i'ech' xchamelic lajunvo' viniquetic ti ipic ta leprae

¹¹ Ti c'alal ibat ta Jerusalén ti Jesuse, tey i'ech' ta sts'ac yosilal Samaria xchi'uc yosilal Galilea.

¹² Tey ic'ot ta jun parajel, tal snupel ta be yu'un lajunvo' viniquetic, nom isva'an sbaic yu'un ipic ta lepra.

¹³ I'avanic: ―¡Jesús, jchanubtasvanej, c'uxubinoticotic! ―Xiic.

¹⁴ Ti c'alal iyil li viniquetic ti Jesuse, ja' yech iyalbe chac li'i: —Batanic, ba ac' abaic iluc ta stojol li paleetique ―x'utatic. Ti c'alal ibatique, i'ech' ti xchamelique.

¹⁵ C'alal iyil ti lec xa ti june, isut tal, x'avet xa tal, iyalbe slequilal syu'elal ti Rioxe,

¹⁶ Isquejan sba ta stojol ti Jesuse, ja'o isnijan sba ta balamil yu'un iyalbe colaval ti Jesuse. Li vinic taje liquem tal ta Samaria.

¹⁷ Ti Jesuse ja' yech iyal chac li'i: —¿Mi mu lajunvo'uc (10) ti i'ech' xchamelique? ¿Bu ma ti balunvo'e (9)?

¹⁸ Mi c'ajom xa no'ox stuc isutal li jyanlum ti tal to yalbe coliyal ti Rioxe ―xi ti Jesuse.

¹⁹ Li vinique ja' yech iyalbe chac li'i: ―Va'lan, batan; yu'un ach'un ti oy jyu'ele, yech'o ti la cole. ―Xut.

Ja' li' yaloj ti c'alal xtal spas mantal li' ta sba balamil ti Cajvaltic Jesuse

²⁰ Ti jfariseoetique isjac'beic ti Jesuse ti c'u to ora chtal cuentainvanuc ti Rioxe, itac'av ti Jesuse: ―Ti c'alal chtal li cuentainel yu'un Rioxe mu xvinaj ta q'uelel.

²¹ Muc' much'u xu' chal chac li'i: “Li' xa tspas mantal ti Rioxe”, “le' xa tspas mantal ti Rioxe”; yu'un ti cuentainel yu'un ti Rioxe, li' xa ta atojolique ―x'utatic yu'un ti Jesuse.

²² Li yajchanc'optaque ja' yech iyalbe chac li'i: ―Ta to sta yora ti chac'an chaq'uelbeic sc'ac'alil ti c'usi ora chital vo'on ti Xch'amal crixchano li c'ote, pero muc' bu chavilic.

²³ Oy jlom chalic chac li'i: “Li' xae”, “taj xae”; —xiic, pero mu me xba aq'uelic, mu me xa nap'letaic.

²⁴ Ti c'alal xicha'sut tal vo'on ti Xch'amal crixchano li c'ote, co'ol xchi'uc chavuc ti c'alal xleb'luje, sac jaman chc'ot ta jujot li vinajele.

²⁵ Pero ba'yi chcac' tajmec jvocol yu'un mu xisc'anic li jq'uex crixchanoetic li'i.

²⁶ Ja' chac c'u cha'al ic'ot ti c'alal li' to'ox ti Noee, ja' no'ox yech chc'ot ta pasel ti c'alal sta yora chicha'sut tal, vo'on ti Xch'amal crixchano li c'ote.

²⁷ Li crixchanoetique, jun yo'on ive'ic, iyuch'ic vo', inupunic, pero ti c'alal ital ti nojele, c'alal i'och ta barco ti Noee, icham scotolic.

²⁸ Ja' no'ox yech ic'ot ta pasel ti c'alal li' to'ox ti Lote: Jun yo'on ive'ic, iyuch'ic vo', imanolajic, ichonolajic, i'ovolajic, ismeltsan snaic;

²⁹ ti c'alal iloc' ta Sodoma ti Lote, ja'o yal tal c'oc' xchi'uc azufre ta vinajel, icham scotolic.

³⁰ Ja' no'ox yech chc'ot ta pasel ti c'alal xicha'sut tal, vo'on ti Xch'amal crixchano li c'ote.

³¹ »Ti c'alal xc'ot yech ti c'u to orae, ti much'u tey ox ta sjol snae, mi oy to c'usuc yu'un ta yut snae, mu xa me xyal stam; ti much'u tey ox ta yosile, mu xa me sut ta sna.

³² Yuleso ta ajolic c'usi ispas ti yajnil Lote.

³³ Ti much'u mu sc'an xcham ti yaloje, ta xch'ay xcuxlejal; yan ti much'u muc' ta alel yu'un mi xchame, ja' ta xcuxi.

³⁴ »Chacalbe ava'iic ta yac'ubalil chac taje, mi oy much'u vayem cha'vo' ta jun no'ox teme, jun ta xich' iq'uel ech'el, jun ta xcom.

³⁵ Mi oy cha'vo' ants ti tsobol ta xjuch'unique, jun ta xich' iq'uel ech'el, jun ta xcom.» —X'utatic yu'un ti Jesuse.

³⁷ Ja' yech isjac'beic chac li'i: —¿Bu ma chc'ot ta pasel chac taj une, Cajval? ―Xutic. Itac'av ti Jesuse: ―Ja' chac c'u cha'al yo bu puch'ul ti c'usi chameme, ja' tey chba stsob sbaic li xulemetique ―x'utatic.