San Juan 9 - LEQUIL ACH' C'OP

Ja' li' yaloj ti ijam sat ti much'u ma'sat i'ayane

¹ Ti c'alal iloc' ech'el ti Jesuse, tey iyil jun vinic ti ma'sat ayaneme.

² Ti yajchanc'optaque isjac'beic ti Jesuse: —Jchanubtasvanej, ¿c'uyu'un ti ma'sat i'ayan li vinic le'e? ¿Mi ta smul stuc, o mi ta smul stot sme'? ―Xutic.

³ Itac'batic yu'un ti Jesuse: —Mu ta smuluc stuc, mi ja'uc ta smul stot sme'; ti ma'sat i'ayane, ja' yo' xvinaj o slequilal syu'elal ti Rioxe.

⁴ Lavi sac to osile persa ta jpasbetic yabtel ti much'u li stac tale; yu'un mi i'och ac'ubale, mu xa much'u xu' ch-abtej.

⁵ Lavi li'on to ta sba balamile, vo'on luz c'otemon li' ta balamile. ―X'utatic yu'un ti Jesuse.

⁶ C'alal laj yal chac taje, ti Jesuse istubta balamil, ispas jset' ach'el ja' o isjaxbe ta xcha'p'ejel sat ti ma'sate.

⁷ Ti c'alal ilaje ja' yech iyalbe chac li'i: —Ba poco lasate yo' bu li tanqueal vo' Siloee ―xut. (Li Siloee: «tacbil»). —Xi smelol. Li ma'sate ba spoc li sate, c'alal isute, xil xa osil yu'un ijam ti sate.

⁸ Ti slac'nataque xchi'uc ti much'utic yilojic onox ti tsc'an limoxnae, ja' yech lic yalbe sbaic chac li'i: ―¿Mi ma'uc ti q'uex tey chotol tsc'an limoxna le'e? ―Xut sbaic.

⁹ Li jlome ja' yech iyalic chac li'i: —Ja', —xiic. Pero li yantique xi iyalique: —Ma'uc, ja' no'ox ti xco'olaj satique. ―Xiic. Pero li stuque ja' yech iyal chac li'i: ―Vo'on ―xi.

¹⁰ Yech'o uc, isjac'beic ¿C'uxi ijam lasate? ―Xutic.

¹¹ Itac'av li vinique: —Ja' li vinic ti Jesús sbie, ispas jset' ach'el ja' lisjaxbe ta xcha'p'ejel li jsate, ja' yech li yalbe chac li'i: “Batan, ba poco lasate yo' bu li tanqueal vo' Siloee.” —Xiyut. Ay jpoc, c'alal laj jpoque ijam li jsate. ―X'utatic.

¹² Xi isjac'beique: —¿Bu ma li vinic taje? ―Xutic. Itac'av li vinique: ―Mu jna' bu ibat ―xi.

Ja' li' yaloj ti isjac'ulanbeic li jfariseoetique ti c'uxi ijam sat li ma'sate

¹³ Ti c'alal ispas ach'el ti Jesuse c'alal isjambe sat ti ma'sate ja' o ta sc'ac'alil ta xcuxic.

¹⁴ Yech'o un iyiq'uic ech'el ta stojol jfariseoetic li vinic ti ma'sat to'oxe,

¹⁵ ti jfariseoetique isjac'beic c'uxi ijam li sate. Itac'av li vinique: ―Lisjaxbe ach'el ta xcha'p'ejel li jsate, ts'acal ay jpoc, lavie chquil xa osil. ―Xi ti vinique.

¹⁶ ―Oy jayvo' jfariseoetic ja' yech iyalic chac li'i: —Ti much'u yech ispas chac taje ma'uc ta scuenta Riox yu'un mu xich' ta muc' li sc'ac'alil ta jcuxtique. —Xiic. Pero li jlome ja' yech iyalic chac li'i: —¿C'u ono'ox xi chac' ta ilel slequilal syu'elal ti jmulaviluque? —Xiic. Tey lic xch'aculansbaic stuquic yu'un mu co'oluc ti c'usi tsnopique.

¹⁷ Isjac'beic noxtoc ti ma'sat to'oxe: ―Lavi la sjambe la sat une, ¿c'usi chaval ta scuenta li vinique? —Xutic. Itac'av li vinique: ―Chcal vo'one, ja' yaj'alc'op Riox. ―Xi.

¹⁸ Pero ti jurioetique mu xch'unic ti ja' ti ma'sat to'oxe, ti ja' to ijam li sate, ja'to ti c'alal istacbeic ta iq'uel ti stot sme'e,

¹⁹ xi isjac'beique: —¿Mi ja' acremic li'i? ¿Mi xu' chavalboticotic mi yech ti ma'sat i'ayane? ¿C'uxi ijam li sat lavi chil xa osile? ―Xutic.

²⁰ Itac'av li stot sme'e: —Ta melel ja' jcremticotic ti ma'sat i'ayane; —xiic

²¹ pero mu jna'ticotic c'uxi ijam li sate, xchi'uc ti much'u ijambon li sate. Jac'beic stuc; yu'un staoj xa sjabilal, ja xu' chayalbeic stuc ―xiic.

²² Ti x'elan iyal ti stot sme'e, ta sc'oj xi'el, yu'un ti jurioetique yalojic xa ti ta sloq'uesic ta templo ti much'u chal ti ja' tacbil tal yu'un Riox ti Jesuse.

²³ Yech'o ti yalic li stot sme'e, ti «jac'beic stuc yu'un staoj xa sjabilal» ti xiique.

²⁴ Ti jurioetique istaquic ta iq'uel noxtoc ti ma'sat to'oxe, ja' yech iyalbeic chac li'i: ― Alboticotic ta jamal ta sba ta sat ti Rioxe. Yu'un li vo'oticotique jna'ojticotic ti ja jun jmulavil li vinic le'e. ―Xutic.

²⁵ Itac'av li vinique: —Li vo'one mu jna' mi jmulavil. Ja' no'ox jna'oj ti ma'saton to'oxe, pero lavie xquil xa osil. ―Xi.

²⁶ Ixcha'jac'beic noxtoc: ― ¿C'usi la xcha'le? ¿C'uxi isjam lasate? ―Xutic.

²⁷ Itac'av li vinique: —Lacalbeic xa, pero mu xa ch'unbecon. ¿C'u yu'un ti chac'anic ti ta jcha'ale? ¿Mi chac'an cha ochic ta yajchanc'op uc? ―X'utatic.

²⁸ ―Islabanic, ja' yech iyalbeic chac li'i: —Li vo'ote ja nan yajchanc'opot; yan li vo'oticotique, ja' yajchanc'opoticotic ti Moisese.

²⁹ Yu'un jna'ojticotic ti isc'opon sbaic xchi'uc Riox ti Moisese, pero li much'u chavale mu jna'ticotic bu iloc'tal. ―Xiic.

³⁰ Itac'av ti vinique: ¡Xch'ayet o co'on chca'i li c'usi chavalique! Li vo'oxuque chavalic ti mu xana'ic ti bu iloc' tale, yan li vo'one li sjambe xa li jsate.

³¹ Jna'ojtic ti mu xich'be ta muc' c'usi chal jmulaviletic ti Rioxe; ja' no'ox cha'ibe sc'op ti much'utic chich' ta muq'ue, xchi'uc ti much'utic tspasic ti c'usitic tsc'ane.

³² Ta spasel balamil mu onox bu xca'itic mi oy much'u chjam yu'un sat ti much'u ma'sat i'ayane.

³³ Ti manchuc tacbil tal yu'un Riox li vinic chcale, mu c'u xu' spas ti yechuque. ―X'utatic.

³⁴ Ja' yech iyalbeic chac li'i: —Li vo'ote mu albajuc amul ti c'alal la ayane, ¿mi vo'ot chachanubtasoticotic ti avaloje? —Xutic. Ja' o isnutsic loq'uel ta c'ox templo yo bu stsobob-bailique.

Ja' li' yaloj ti iyal ti Jesuse ti tspasatic ta ma'sat ya'el ti much'utic lec c'usitic tspasic ti yalojique

³⁵ Ti Jesuse iya'i ti inutse loq'uel ta c'ox templo ti ma'sat to'oxe; ti c'alal ista ta ilele, ja' yech isjac'be chac li'i: ―¿Mi ach'unoj ti talem xa li much'u xch'amal crixchano ic'ote? ―X'utat.

³⁶ Itac'av li vinique: —Totic, ¿albon much'u yo' jch'un oe? —Xi.

³⁷ Ti Jesuse istac'be li vinique: —Li' xa aq'uelojbe sate: Vo'on ti li' chajc'opone. ―Xi.

³⁸ Yech'o un ti vinique, isquejan sba ta stojol ti Jesuse, ja' yech iyalbe chac li'i: ―Cajval, ta jch'un ―Xut.

³⁹ Ti Jesuse ja' yech iyal chac li'i: —Ti lital li' ta sba balamile, ja' ta scuenta yo' xcac' vinajuc o c'u x'elan yo'on li crixchanoetique, yo' xjam o sat li ma'satetique, yo' spasic o ta ma'sat ti much'utic jamal satique. —X'utatic.

⁴⁰ Oy jlom jfariseoetic ti tey xchi'uquic ti Jesuse, c'alal iya'iic ti x'elan iyale, ja' yech isjac'beic chac li'i: ―¿Min ma'satoticotic ti avaloje? ―Xutic.

⁴¹ Itac'av ti Jesuse: —Ti ma'saticoxuque, ch'abal amulic ti yechuque. Lavi chavalic ti jamal asatique, ja' oy o amulic. —X'utatic.