San Juan 6 - LEQUIL ACH' C'OP

Ja' li' yaloj ti ismac'lin vo'mil viniquetic ti Jesuse

¹ Ts'acal to ibat ta jech nab ta Galilea ti Jesuse, Tibérias li yan sbie.

² Ep tajmec crixchanoetic nap'alic ech'el, ja' ti iyilic ti iyet'esbe xchamelic ti much'utic ipe.

³ Ti Jesuse imuy ech'el ta vits ichoti xchi'uc li yajchanc'optaque.

⁴ Po'ot xa'ox li q'uin coltaele, ja' li sq'uinic ti jurioetique.

⁵ C'alal iyil ti Jesuse ti más xa ep ta stsob sba tal li crixchanoetic yo' bu chotole ―¿Bu chba jmantic tal pan ti chcac'betic sve' li crixchanoetic li' lamalique? ―X'utat ti Felipee.

⁶ Ti x'elan isjaq'ue, naca no'ox tsq'uel c'uxi chtac'av ti Felipee, ti Jesuse sna'oj onox ti c'usi tspase.

⁷ Itac'av ti Felipee: —Mi ja'uc ta doscientos denario jtaq'uintic jmantic o li pane, mu ono'ox xloq'uic o jset'uc jujun ―xi.

⁸ Ti Andrese ja' li jun yajchanc'op ti Jesuse ja' yits'in ti Simone, xi iyale:

⁹ ―Oy li' jun c'ox creme yich'oj tal vo'p'ej pan pasbil ta cebada xchi'uc cha'cot choy; pero, ¿mi chloc' o li yepal crixchanoetic une? ―Xi.

¹⁰ Itac'av ti Jesuse: —Albeic li crixchanoetique ac'u chotlicuc scotolic. ―Xi. Yu'un ti yo' buyique ta stentejtic, tey ichotiic. Oy nan vo'miluc ti viniquetique.

¹¹ Ti Jesuse ixch'am ti pane ti c'alal laj yalbe coliyal ti Rioxe, ja'o ixch'acbe li crixchanoetic tey chotajtique. Ja' no'ox yech ispas noxtoc ta scuenta li choye, iyac'be ti c'u yepal isc'anic ti crixchanoetique.

¹² Ti c'alal inojique, ti Jesuse xi iyalbe ti yajchanc'optaque: —Tsobic scotol li sovrae, yo' mu yechuc x'ixtalaje ―xi.

¹³ Istsobic scotol, inoj lajcheb moch ti sovra vo'p'ej pan ti pasbil ta cebadae.

¹⁴ Ti crixchanoetique c'alal iyilic ti c'u x'elan iyac' ta ilel sq'uelobil syu'el ti Jesuse, ja' yech iyalic chac li'i: ―Ta melel ja' xa li yaj'alc'op Rioxe ti sc'oplal onox chtale. ―Xiic.

¹⁵ Ti Jesuse iyac' cuenta ti ta ox x'iq'ue ech'el ta persae, yu'un ta xtiq'ue ta reyal, yech'o un isq'uej sba loq'uel stuc, imuy ech'el ta vits.

Ja' li' yaloj ti ixanav ta yoc ta ba nab ti Jesuse

¹⁶ Ti c'alal po'ot xa'ox x'ic'ube, li yajchanc'optac ti Jesuse iyalic ech'el ta ti' nab,

¹⁷ imuyic ta canova, istuch'ic jelavel li nabe yu'un chbatic ta Capernaúm. Ic' xa ox osil, ti Jesuse mu to'ox bu sutem tal.

¹⁸ Ja' o xyuc'yon liquel tajmec li nabe, yu'un ital tsots ic'.

¹⁹ Ti c'alal ixanavic xa'ox jun reva xchi'uc o'lol ta nabe, iyilic ti tey chanav tal ta yoc ta ba nab ti Jesuse, inopoj tal yo' bu li scanovaique, ixi'ic tajmec.

²⁰ Xi i'albatic yu'un ti Jesuse: ¡Mu me xa xi'ic, vo'on me! ―X'utatic.

²¹ Xmuyubajic xa, iyiq'uic ochel ta canova. Ora ic'otic ta ti' nab yo' chbatique.

Ja' li' yaloj ti isa'ic tajmec Jesús ti crixchanoetique

²² Ta yoc'omal, ti crixchanoetic tey icomic ta jech nabe, iyaq'uic cuenta ti slajeb xa jc'ot canova i'ochic o ech'el li yajchanc'optaque, xchi'uc ti muc'bu tey co'ol ibatic xchi'uquic ti Jesuse.

²³ Ja' o tey ic'ot yan canovaetic ti ilic tal ta jteclum Tiberiase, tey i'ech' yo' bu isve'ic pan li crixchanoetique ti c'alal colaval xut Riox ti Cajvaltique.

²⁴ C'alal iyilic ti mu xa bu tey ti Jesuse xchi'uc ti yajchanc'optaque, ti crixchanoetique imuyic ech'el ta canova uc, ibatic ta Capernaúm yu'un ba sa'ic ti Jesuse.

Ja' li' yaloj ti co'ol xchi'uc pan scuenta cuxlejal ti Jesuse

²⁵ C'alal ic'otic ta jech nabe, tey xa c'ot staic ti Jesuse, xi c'ot sjac'beique: ―Jchanubtasvanej, ¿c'usi ora layul li'toe? ―Xutic.

²⁶ Itac'av ti Jesuse: —Ta melel chacalbeic, ti tal asa'icone, ja' ti lec inoj ach'utic cu'une, ma'uc ja' tal asa'icon o ti yu'un ava'ibeic smelol ti icac' iluc li jlequilal jyu'elale.

²⁷ Mu me ja'uc no'ox ta avo'onic ta sa'el la ve'elic ti sna' xlaje, ja' tsc'an cha sa'ic li ve'lil mu sna' xlaje, ti chacuxiic o ta sbatel osile. Li ve'lil chacalbeique, vo'on chacac'beic ti Xch'amal crixchano li c'ote, yu'un ja' yech iyac' ta ilel ti jtotic Rioxe ti vo'on quich'oj cabtele. ―X'utatic yu'un ti Jesuse.

²⁸ Isjac'beic ti Jesuse: ―¿C'usi tsc'an ta jpasticotic yo' xc'ot o ta pasel cu'unticotic ti c'usi tsc'an ti Rioxe? ―Xutic ti Jesuse.

²⁹ Itac'av ti Jesuse: —Ti c'usi tsc'an Riox chapasique, ja' tsc'an chach'unic ti much'u stacoj tale ―x'utatic.

³⁰ Ja yech isjaq'uic noxtoc chac li'i: —¿C'usi seña chavac' quilticotic yo' jch'unticotic o ti c'usi chavale? ¿C'usitic ti avabtel chapase?

³¹ Ti jmuc'tatoticotic ta vo'nee, isve'ic maná ta xocol balamil chac c'u cha'al chal li sc'op Rioxe: “Iyac'be sve'ic pan ti talem ta vinajele.” —Xi.

³² Itac'av ti Jesuse: ―Ta melel chacalbeic, ma'uc Moisés la yac'beic li pan ti talem ta vinajele, ja' ti Jtote, yu'un ja' chayac'beic li bats'i pan ta vinajele.

³³ Li pan chac' ti Rioxe, ja' ti yalem tal ta vinajele, ja' chac'be xcuxlejal li crixchanoetic ta balamile. —X'utatic.

³⁴ Xi itac'avique: —Cajval, ac'boticotic scotol c'ac'al li pan chavale. ―Xiic.

³⁵ Ti Jesuse ja' yech iyal chac li'i: ―Vo'on li panon ti chcac' cuxlejale. Ti much'u ta xtal ta jtojole, muc'bu cha'iic o vi'nal; ti much'u chixch'unone, mu xa bu cha'i taquiti'il.

³⁶ Ja' c'ucha'al lacalbeic xae, ac'u mi avilicon xa li vo'oxuque, pero mu xa ch'unic.

³⁷ Scotol ti much'utic chiyac'be ti Jtote ta xtalic ta jtojol; ti much'utic ta xtalic ta jtojole, muc bu ta jip loq'uel.

³⁸ Yu'un li vo'one ma'uc tal jpas ti c'usi tsc'an co'on jtuque, ja' tal jpas ti c'usi tsc'an yo'on ti Jtote yu'un ja' listac tal.

³⁹ Ti c'usi oy ta yo'on ti much'u listac tale, ja' ti mu me xch'ay cu'un junuc ti much'utic liyac'bee, ja' ti ac'u jcha'cuxesic ta slajeb c'ac'ale.

⁴⁰ Yu'un ti c'usi oy ta yo'on ti jtote, ja' ti scotol ti much'utic chojtiquinic li xch'amal Rioxe xchi'uc ti ch-ch'unique, ta sta scuxlejalic ta sbatel osil; vo'on ta jcha'cuxesic ta slajeb c'ac'al. ―X'utatic yu'un ti Jesuse.

⁴¹ Ti jurioetique xmixlajetic xa ta stojol ti Jesuse, yu'un iyal: «Vo'on li pan ti liquemon tal ta vinajele.» —Xi.

⁴² ―Ja' yech iyalbe sbaic chac li'i: ¿Mi mu ja' xch'amal José li Jesús li'e? Li vo'otique xcojtiquinbetic li stot sme'e. ¿C'u yu'un ti chal ti yalem tal ta vinajele? ―Xut sbaic.

⁴³ Xi i'albatic yu'un ti Jesuse: ―Mu xa xamixmixc'opojic.

⁴⁴ Muc' much'u xu' chtal ta jtojol mi ma'uc ch-iq'ue tal yu'un ti Jtote, ti ja' stacojon tale; vo'on ta jcha'cuxes ta slajeb c'ac'al.

⁴⁵ Ta svun ti j'alc'opetique ja' yech chal chac li'i: “Ta xchanubtasatic yu'un ti Rioxe.” —Xi. Yech'o un ti much'utic cha'iic ti c'usi chal ti Jtote, mi cha'ibeic lec smelol ti c'usi ta x'albatique, ta xtalic ta jtojol.

⁴⁶ «Muc' much'u yiloj ti Jtote; ja' no'ox ti much'u tey talem ta stojol ti Rioxe.

⁴⁷ Ta melel chacalbeic, ti much'u ta xch'une ta xcuxi ta sbatel osil.

⁴⁸ Vo'on panon ti chcac' cuxlejale.

⁴⁹ Ti amuc'tatotic ta vo'nee isve'ic li maná ta xocol balamile, pero muc' xcuxiic o, ichamic ono'ox;

⁵⁰ pero li vo'one ja' chcalbe sc'oplal li pan chyal tal ta vinajele; ti much'u ta sve'e mu xcham.

⁵¹ Vo'on panon ti cuxule, ti yalem tal ta vinajele; ti much'u ta sve'e, chcuxi ta sbatel osil. Li pan ti chcaq'ue ja' li jbec'tal jtacupal jtuque. Ta xcac' ta scuenta scuxlejal li crixchanoetic li' ta sba balamile.» ―X'utatic yu'un ti Jesuse.

⁵² Ti Jurioetique ilic sc'ac'al yo'onic xal xalbe xa sbaic liquel: —¿C'uxi chac' jlajesbetic li sbec'tal stacupal stuque? ―Xut sbaic.

⁵³ I'albatic yu'un ti Jesuse: ―Ta melel chacalbeic, mi mu xa ve'ic li jbec'tal jtacupal vo'on ti Xch'amal crixchano li c'ote, mi mu xavuch'ic li jch'ich'ele, mu xacuxiic ta sbatel osil.

⁵⁴ Ti much'u ta sve' li jbec'tale, ti chuch' li jch'ich'ele, ta xcuxi ta sbatel osil; li vo'one ta jcha'cuxes ta slajeb c'ac'al.

⁵⁵ Li jbec'tale ja li ve'lil ta melele, li jch'ich'ele ja' li vo' ta melele.

⁵⁶ Ti much'u ta sve' li jbec'tale, ti much'u ta xuch' li jch'ich'ele, li' xa o ta jtojole, li vo'one teyon xa o ta stojol uc.

⁵⁷ Ti Jtot ti listac tale cuxul, li vo'one cuxulon ta scuenta ti Jtote, ja' no'ox yech ti much'u chi sve'e, ja' ta jcuenta ti ta xcuxie.

⁵⁸ Li pan chcal talem ta vinajele. Mu xco'olaj xchi'uc li maná ti isve'ic ti amuc'tatotique, yu'un ichamic ono'ox; yan ti much'u ta sve' li pan chcale, ta xcuxi o ta sbatel osil. ―X'utatic yu'un ti Jesuse.

⁵⁹ Ja' yech iyal ti Jesuse ti c'alal ichanubtasvan ta templo ta Capernaume.

Ja' li' yaloj ti stuc no'ox chac' jcuxlejaltic ta sbatel osil ti Jesuse

⁶⁰ Ti c'alal iya'iic ti c'u x'elan ichanubtasvan ti Jesuse, ep ti much'utic snap'letaojique, ja' yech iyalic chac li'i: —Ti c'usi chal taje, toj tsots ta ch'unel; ¿much'u ono'ox ta xch'un yu'un? ―Xiic.

⁶¹ Ti Jesuse iyac' cuenta ti c'usi chalbe sbaic ta mucule, ja' yech ijac'batic chac li'i: ―¿Mi toj chopol chava'iic ti x'elan lacalbeique?

⁶² ¿C'usi nan chavalic mi avilic limuy ech'el yo' bu liquemon tal vo'on ti Xch'amal crixchano li c'ote?

⁶³ Li jch'uleltique ja' chac' cuxlicotic; li jbec'taltic li ta sba balamile mu c'usi stu. Ti c'usitic la calbeique, ja' scuenta ach'ulelic, ja' chacuxiic o.

⁶⁴ Pero oy to jayvo'oxuc ti mu xa ch'unique. Yu'un ti Jesuse sna'oj ono'ox ta sliquebal ti much'utic mu xch'unique xchi'uc ti much'u ta x'ac'on entrucale.

⁶⁵ Iyal noxtoc ti Jesuse: ―Lacalbeic onox ti muc' much'u xu' chtal ta jtojol ti mi ma'uc ch-iq'ue tal yu'un ti Jtote. ―Xi.

⁶⁶ Ep ti much'utic isnap'letaic to'ox ti Jesuse iyictaic o comel c'alal iya'iic chac taje, mu xa bu ixchi'inic o ech'el.

⁶⁷ Ti Jesuse isjac'be li lajchavo' yajchanc'optaque: —¿Mi chac'an chabatic uc? ―Xut.

⁶⁸ Itac'av ti Simon Pedroe: ―Cajval, ¿much'u xa chba jchi'inticotic? Yu'un li ac'ope ja cuxlejal ta sbatel osil.

⁶⁹ Li vo'oticotique jch'unojticotic xa, jna'ojticotic ti vo'ot Cristoote, ti xch'amalot ti Rioxe. ―Xut.

⁷⁰ Itac'batic yu'un ti Jesuse: —¿Mi mu vo'onicon la jt'uj alajchava'alic? Pero oy junoxuc ti cuentainbil yu'un ti pucuje. ―X'utatic.

⁷¹ Ti c'alal iyal yech ti Jesús chac taje, ja' iyalbe sc'oplal ti Judase, ti screm Simon Iscariotee, yu'un ja' i'ac'on o entrucal ta ts'acal, ac'u mi ja' slajchava'al o yajchanc'op ti Jesuse.