San Juan 15 - LEQUIL ACH' C'OP

Ja' li' yaloj ti ja' smuc'ul yoc uva ya'el ti Jesuse

¹ Vo'on li bats'i smuc'ta aq'uil uva c'otemone, ti Jtote ti much'u tsq'uel chabtelan li uvae.

² Scotol li c'ob uva ti li'ic ta jtojole, ti mu satine, ta sboj loq'uel; ti mi lec tsatine, ta stuch'be li staqui c'obtaque, ta xch'uba lec, yo' satin o mase.

³ Li vo'oxuque lecubemoxuc xa ta scuenta li jc'op ti lacalbeique.

⁴ Nap'lanic o ta jtojol, chac c'u cha'al li'on o ta atojolic li vo'one. Li c'ob uvae mu satin ta stuc no'ox, ja' to ti mi tsacal ta smuc'ta aq'uile; ja' no'ox yech li vo'oxuque, mu xa satinic ya'el uc mi muc'bu j'ech'el nap'aloxuc o ta jtojole.

⁵ »Vo'on li smuc'ta aq'uilon ya'ele, vo'oxuc sc'obtacoxuc. Ti much'u nap'al o ta jtojole, mi teyon ta stojol li vo'on uque, ep chac' sat; yan ti mi ch'acaloxuc ta jtojole mu c'usi spas avu'unic.

⁶ Ti much'u muc' bu nap'al o ta jtojole, ta xich' jipel loq'uel chac c'u cha'al li c'ob uva ti mu satine, ta xtaquij, ts'acal to chich' tsobel, chich' chiq'uel.

⁷ »Mi li' nap'aloxuc o ta jtojole, mi chapasic li c'usitic cha jchanubtasic oe, c'anic ti c'usitic chac'anique cha'ac'batic.

⁸ Ti jtote ja' ichbil ta muc' chc'ot o mi ep cha satinique, ja' chvinaj o ti vo'oxuc cajchanc'opoxuc ta melele.

⁹ Li vo'one jc'anojoxuc chac c'u cha'al sc'anojon ti jtote; ja' me nap'lanic o ta jtojol ti jc'anojoxuque.

¹⁰ Mi chach'unic li jmantaltaque, j'ech'el jc'anojoxuc o, ja' c'u cha'al li vo'one, ta jch'unbe scotol li smantaltac ti Jtote, ja' sc'anojon o.

¹¹ »Ti x'elan chacalbeique, ja' yo' junuc o avo'onic chac c'u cha'al jun co'on li vo'one, yo' j'ech'el junuc o avo'onique.

¹² Li jmantale ja' li'i: C'ano me abaic chac c'u cha'al jc'anojoxuque.

¹³ Ti much'u sna' xc'anvane, ja' ti much'u chac' sba ta milel ta scoj ti much'u lec sc'opone.

¹⁴ Li vo'otique lec xa xquiljbatic mi chapasic li c'usitic chacalbeique.

¹⁵ Mu xa bu chacalbeic ti j'abteloxuc no'oxe, yu'un li jun j'abtele mu sna' li c'usi tspas li yajvale. Li vo'oxuque lec xa xquil jbatic yu'un la calbe xa ava'iic ti c'usitic yalojbon ti Jtote.

¹⁶ Mu vo'oticoxuc at'ujicon, vo'on lajt'ujic, lacac'be avabtelic ti ac'u ba satinanique, ti c'u yepal cha satinique, mu xch'ay o sc'oplal. Ja' chayac'beic o scotol ti c'usitic ta jbi chac'anbeic ti Jtote.

¹⁷ Li jmantal chacalbeique: Ja' ti co'ol co'ol xa c'an abaique.

Ja' li' yaloj ti i'albatic yu'un ti Jesuse ti chopol ch-ileic yu'un li crixchanoetique

¹⁸ »Mi chopol chayilic li crixchanoetique, na'ic me ti vo'on ba'yi chopol liyilique.

¹⁹ Ti chopoluc to li c'usitic chapasique, lec chayilic chac c'u cha'al lec chil sbaic li stuquique. Pero vo'on la jt'ujic loq'uel tal yo' bu li crixchanoetic ti ja' no'ox tspasic li c'usitic scuenta sba balamile, yech'o ti chopol chayilique, ja' ti ma'uc xa chapasic li c'usitic chopole.

²⁰ Na'ic me ti ja' onox yech lacalbeique: “Mi junuc ti much'u chtun no'oxe ti más tsots yabtel chac c'u cha'al li yajvale.” Xa cutic ono'ox. Mi chquich' ilbajinel li vo'one, ja' no'ox yech chavich'ic ilbajinel uc; ti mi chich'ic ta muc' li c'usi icale, ja' no'ox yech ta xich'ic ta muc' ti c'usitic chavalic uque.

²¹ Ja' yech cha pasbatic uc lavi avich'ojicon ta muq'ue, yu'un mu xojtiquinic ti much'u li stac tale.

²² »Ti manchuc tal jc'oponique mu c'usi smulic ti yechuque. Pero lavie mu xu chalic ti ch'abal smulique;

²³ yu'un ti much'utic chopol chiyilique, chopol chilic ti Jtot uque.

²⁴ Ti manchuc icac' ta ilel ta stojolic ti c'usitic muc' much'u yan yech spasoje, mu c'usi smulic ti yechuque; pero lavie iyilic xa, ac'u mi iyilic un, pero chopol chiyilic xchi'uc ti jtote.

²⁵ Ti x'elan chopol chiyilique, yu'un persa chc'ot ta pasel ti c'u ono'ox x'elan ts'ibabil jc'oplal ta mantaletic yu'unique: “Yech no'ox ti chopol chiyilique.” Xi onox ts'ibabil.

²⁶ »Pero ti c'alal xtal li jpojvanej ti vo'on ta jtac tal ta scuenta ti Jtote, ja' li Espíritu ti ja melele, ti tey ta xlic tal ta stojol ti Jtote, ja' cajrextico ta xc'ot.

²⁷ Li vo'oxuque ja' cajrextico chac'otic uc, yu'un tey ono'ox achi'uquicon tal ta sliqueb.