San Juan 14 - LEQUIL ACH' C'OP

Ja' li' yaloj ti ja' no'ox chiyic'otic ech'el ta vinajel ti Jesucristoe

¹ «Mu me xavat avo'onic. Pat avo'onic ta stojol ti Rioxe, pat avo'onic ta jtojol uc.

² Yo' bu sna ti jtote oy ep ti bu xu' chanaquiique; ti manchuc yeche, muc'bu lacalbeic ti yechuc ti chba jchapan ti bu chac'otique.

³ Ti mi libate, mi ichap cu'un ti bu chac'otique, chi cha'sutal noxtoc, chtal quic'oxuc ech'el, yo' ti tey xabatic o uc yo' bu chibate.

⁴ Li vo'oxuque ana'ojic xa ti bu chibate, ana'ojic xa buy li sbelele.» ―X'utatic.

⁵ Ti Tomase xi iyalbe ti Jesuse: ―Cajval, mu jna'ticotic ti bu chabate. ¿C'uxi ta jna'ticotic bu li bee? ―Xut.

⁶ Itac'av ti Jesuse: —Vo'on li beone, vo'on li melelone, vo'on li cuxlejalone. Ja no'ox ta jcuenta vo'on xu' chac'otic yo' bu ti Jtotic Rioxe.

⁷ Mi avojtiquinicon li vo'one, ja' no'ox yech xavojtiquinic xa ti Jtot uque; lavie avojtiquinic xa yu'un oy xa sc'ac'alil lic avilic tal. ―X'utatic yu'un ti Jesuse.

⁸ Ti Felipee ja' yech iya chac li'i: —Cajval, ac'bon cojtiquinticotic ti Jtotic Rioxe, mi iquicticotique, mu xa c'usi yan ta jc'anticotic un bi. ―Xut.

⁹ Itac'av ti Jesuse: ―Felipe, jal xa li' jchi'ucoxuque, ¿mi mu to xa vojtiquinon ya'el? Ti much'u liyil xae, co'ol xchi'uc iyil xa ti Jtotic Riox uque; ¿c'u yu'un ti chac'an cha cac'be ivil ti Jtotic Rioxe?

¹⁰ ¿Mi mu xach'un ti junoticotic xchi'uc ti Jtotic Rioxe? Li c'usitic chacalbeique, muc bu jyulesoj ta jol jtuc. Ti jtotic Riox ti li' ta jtojole, ja' tspas stuc ti c'usitic ta jpase.

¹¹ Ch'unbecon ti junoticotic xchi'uc ti Jtotic Rioxe; mi mu xa ch'unic o li c'usi chacalbeique, ja' ch'unic o ti c'usitic ta jpas chavilique.

¹² Ta melel chacalbeic, ti much'u chi xch'une, tspas yu'unic li c'usitic ta jpas uque; más to muc'tic c'usi xu' spas yu'unic chac c'u cha'al ta jpase, yu'un li vo'one chibat yo' bu ti Jtotic Rioxe.

¹³ Scotol ti c'usitic chac'anic ta jbi vo'one, ta jpas scotol, yo' ti ta scuenta li Ch'amalile, ich'bil ta muc' chc'ot ti Jtotic Rioxe.

¹⁴ C'usiuc no'ox ti chac'anique, ta jpas scotol ti mi ta jbi chac'anique.

Ja' li' yaloj ti iyal ti Jesuse ti chtal xchi'inelic yu'un ti Ch'ul Espiritue

¹⁵ »Mi ac'anojicone, chach'unic li jmantaltaque.

¹⁶ Li vo'one, ta jc'anbe ti jtotic Rioxe, ti ac'u stacboxuc tal otro jun jpat-o'onile, ja' ti Ch'ul Espiritu ti chac' ana'ic li c'usitic melele, yo' xtal xchi'inoxuc o ta jmoje.

¹⁷ Ti much'utic mu xich'ic ta muc' Riox li' ta sba balamile, mu x'och ta yo'onic, yu'un mu xilic xchi'uc mu xojtiquinic; yan li vo'oxuque xa vojtiquinic yu'un tey xchi'inojoxuc o, yu'un tey o ta avo'onic.

¹⁸ «Muc'bu me'on cha jcomtsanic chac c'u cha'al ti much'u ch'aval stot sme'e, yu'un chtal jchi'inoxuc.

¹⁹ Mu xa jaluc li'one, li crixchanoetic ti mu xich'ic ta muc' Riox li' ta sba balamile, mu xa bu chiyilic; yan li vo'oxuque chavilicon, chacuxiic yu'un li vo'one cuxulon o.

²⁰ Ti c'alal sta sc'ac'alile, li vo'oxuque ta to xavilic ti junon xchi'uc ti Jtote, ja' no'ox yech li vo'oxuc uque junotic xa, teyon xa o ta atojolic.

²¹ Ti much'u chac' ta yo'on li jmantale. Mi ta xch'une, ja' chvinaj o ti sc'anojon ta melele. Ti Jtote sc'anoj ti much'u chi sc'ane, ja' no'ox yech li vo'one, ta jc'an uc xchi'uc ta xcac' jba ta ilel ta stojol.» ―X'utatic yu'un ti Jesuse.

²² Ti Judase, (ma'uc ti Judas Iscariotee) isjac'be ti Jesuse: ―Cajval, ¿c'u yu'un ti jtucticotic no'ox chavac' aba ta ilel ta jtojolticotique, ti mu xavac' aba ta ilel ta stojol li crixchanoetic li' ta sba balamile? ―Xut.

²³ Itac'av ti Jesuse: ―Ti much'u sc'anojone, ta xch'un li c'usi chcale; c'anbil yu'un ti Jtote, li Jtote xchi'uc li vo'one, chtal jchi'inticotic ta naclej.

²⁴ Ti much'u mu xi sc'ane, mu xch'un li jc'ope. Li jc'op ti yolel chava'iique ma'uc jc'op jtuc, ja' sc'op ti Jtote, ja' ti much'u li stac tale.

²⁵ »Lavi li'on toe chacalbeic scotol chac taje;

²⁶ pero li jpojvaneje, ja' ti Ch'ul Espiritue ti ta jbi vo'on ta stac tal ti Jtote, ja' chayalbeic scotol, ja' cha syulesbe ta ajolic scotol ti c'usitic lacalbeique.

²⁷ »Ta xcac' comel ta atojolic li jun o'onale, Chacac'beic li jun o'onal ti ja' cu'une, pero ma'uc yech chac c'u cha'al chac' li crixchanoetic li' ta sba balamile. Mu me xavat avo'onic, mu me xaxi'ic.

²⁸ Ava'iic xa ti ical ti chibate xchi'uc ti chtal jchi'inoxuc noxtoque. Ti ac'anojicucone, xamuyubajic xa yechuc ti c'alal ava'iic ti chisut ech'el yo' bu ti jtote, yu'un li stuque más to c'u cha'al li vo'one.

²⁹ Ti x'elan ba'yi la calbeique, ja' yo' xa ch'unic o ti mi ic'o ta pasele.

³⁰ »Mu xa bu jal chajc'oponic yu'un po'ot xa xtal ti much'u li' tspas mantal ta sba balamile, ja' ti pucuje. Pero mu c'u xu' yu'un chixcha'le,

³¹ Yu'un persa ta xc'ot yech, yo' xilic o scotol li crixchanoetic li' ta sba balamile ti jc'anoj ti Jtote, ti ta jpas ti c'usi chiyalbee. »Va'lanic. Loc'cotic xa ech'el. —X'utatic yu'un ti Jesuse.