Sáaŋ 6 - Nomaande

Yésus me túkéke bɔnɔnja bɔ́ baacɔ

¹ E elime eécí, Yésus ŋé súéte e eyinyíé asálá yɛ́ nuɔmɔ́ nɔ́ *Kalilé anɔ́ bɔ́ ŋɔ lɔ́ŋɔ tɔ́na báyɛ nú Tibeliátɛ.

² Yaandándá yí etúte yɛ́ baacɔ ŋaá bá yé wuúci látákɛ́na, anyía bá ŋaá bá bábɔ́ lɛ́caka bikéki bí tubílícínyínyí abɛ́ u ŋaá bá waá kɛ́laka ná bɔkɔnɔ́kɔ́nɔ.

³ Yésus ŋaá báátá a nɔkɔndɔ, u ŋé límine hɔ́á na bááyɛ́ *baákɔ́nɛ́na.

⁴ *Basíka, bɔŋanda a búmɔtɛ́ bú *Besuif, ŋaá bá ciá yáaŋa hoóhi.

⁵ Yésus ŋaá tɔ́ma eése, yɔ́ lɛ́ca anyía yaandándá yí etúte yɛ́ baacɔ ŋeé wuúci látɛ́na, mbá ɔsɛ né Fílib : « Háányɛ́ tua sɔ́ŋa tú ɔbɔ́ŋgɔ́na bɛnyɛ́ma bɛ́ ɔnyíá anyía túásɔ́ ɔɔ́ndɔ́kɔ o otúkékíne eeye etúte yɛ́ baacɔ e ? »

⁶ U ŋaá bátá aáná anyía wá lɔ́kɔ́ma nyibíkéti nyí Fílib, mbá wuúci, u ŋaá bá we ményukune aátɛ́ yɔ́ cɔ́ba ɔ ɔkɛlaka.

⁷ Fílib ŋá bɛ́káma Yésus ɔsɛ : « Ta mɔɔnyɛ́ etíne cɔ́ɔ́hátá tɛ á bá mɔ ɔnyɛmana ɔ ɔwɔɔ́ndɔ́kɛ́na a bɛnyɛ́ma anyía ɔɔcɔ okime ɔ́ bɔ́ŋɔ ta hú hɛbákɛ. »

⁸ Aáná *muákɔ́nɛ́na a mumɔtɛ́, *Andɛlɛ́, onyíinyí u Símon Bíel, ŋaá táŋɛ́tá ɔsɛ :

⁹ « Ɔɔ́nɔmbɔ́ áŋa aaha a wáŋa ne biléti bɛ́táánɔ na tuɔfɔ́ɔ́fɔ́ túfendí. Mbá bɛ́áŋa bɛ́ ɔkɛla aátɛ́ na ɔmbana ɔ́ baacɔ ooci e ? »

¹⁰ Mbá Yésus ɔsɛ : « Énu limísíkínyi baacɔ bekime e bihuti. » Bihuti ŋaá bá aá haála hekime. Baacɔ ŋé limékíne. Banɔ́mɔcɔ́ ŋaá bá hoóhi tɔ́sɛ́na ɛ́táánɔ.

¹¹ Yésus ŋeé hiíte biléti, u ŋa cáŋa owiínjie Bandɔ́mɛsɛ́ bitéŋíti, nyɛafakɛna baacɔ eényí, u ŋé beébe íínjíékíne tɔ́na tuɔfɔ́ a nyɛnamá nyikime anyɛ́ ɔɔcɔ ŋaá bá weé lénéke ɔnyíá.

¹² Ɛ́makɛ́la bébú eécéke beébe bekime, mbá Yésus ɔsɛ ná bááyɛ́ baákɔ́nɛ́na : « Ánɔ bándáka bikélékéti a bɛ́ mɔ́ lɔ́bɔ́kɔ, anyía ta bɔkɔ tɛ caŋɛ́á. »

¹³ Bé ŋeé biíbi bándáka, bé ŋé nyióyísíki tɔnjatɛ́ túɔ́hátá ne túfendí.

¹⁴ Ahɛ́ baacɔ ŋa bɔ́ lɛ́cá *ekéki yí hibílícínyínyí eéyé, báyɛ : « Aá taaká, ɔɔcɔ ooci áŋa *muhémúnyi bɛsana mɔ Bandɔ́mɛsɛ́ amɔ́, basɔ́ Besuif, tu báka tuasɔ́ tátáka. »

¹⁵ Mbá Yésus me menyi anyía bá ŋa yáamba o wuúci hátɛ́na, bó wuúci bééti otéŋí a makɛ́nda ; nyinyímíne baacɔ eényí, u ŋe súéte hú wááyá a nɔkɔndɔ.

Ɔkanda ú Yésus e menyífé ɔ ɔmuaná

¹⁶ Nanyiɔ́fɔ́, bááyɛ́ *baákɔ́nɛ́na ŋa bɔ́ lɔɔ́kɔ nɔkɔndɔ, bá ŋga hámá a asálá yɛ́ nuɔmɔ́.

¹⁷ Ahɛ́ bá ŋga bɔ́ hámá hɔ́á, bé ŋé oofókíne ɔ ɔkɔkɔ́ anyía bébú súéte a Kabɛlnawum, a asálá a yɛ́mɔtɛ́. Ibíne ŋaá kuá, Yésus tɛ́ka ne okoó beébe bɛ́láta.

¹⁸ Ehúne ŋaá bá yé húnéke na makɛ́nda, nuɔmɔ́ bínyíekinyi buéŋí.

¹⁹ Ɛ́makɛ́la bábɔ́ kɛ́ndákɛ́nda okendi ɔkɔkɔ́, bɔ́ bá e kilomɛ́ta hoóhi ɛ́táánɔ ta anyía ítíndétú, bá ŋá lɛ́ca Yésus húle á fáakɔna na akɔlɔ́ e menyífé ma nuɔmɔ́ ɔ ɔmuaná. Manɔ́ŋɔ́ ŋé beébe kátɛ́á.

²⁰ Mbá ɔsɛ náábɔ́ : « Yaŋɔ́ ya mɛ́ŋaʼo ; nuti líkíméke ! »

²¹ Bá ŋa sɛ́ bébú wuúci hiíte ɔ ɔkɔkɔ́ noómi, bé ŋé síké ébú bítéme ɛ́cɛ ɔkɔkɔ́ á yáaŋa a asálá, haála ahá bá ŋa bɔ́ bá bábɔ́ áambaka ɔháma hɔ́á.

Baacɔ ŋa bɔ́ áamba Yésus

²² A buɔ́sɛ́ bɔ́ ɔláta, baacɔ a bá ŋa bɔ́ lɔ́bɔ e eyinyíé asálá yɛ́ nuɔmɔ́ ŋa bɔ́ lɛ́cá anyía ɔkɔkɔ́ áŋa hú ɔ́mɔtɛ́ a asálá yɛ́ nuɔmɔ́. Bá ŋá bɛ́táá tɔ́na anyía bá tɛ́ ɔ́mɔ́ bɔ́ lɛ́ca Yésus ɔ ɔkɔkɔ́ ɔlɔŋɔ na bááyɛ́ *baákɔ́nɛ́na ; bé ŋe bú súété hú wáábɔ́.

²³ Ta híáná, bɛkɔkɔ́ bí etémbí ŋaá bá aá haála ahá bá ŋa bɔ́ nyíáka biléti ebí Yésus ŋeé beébe aafákɛ́na ɛ́cɛ ú ma cáŋa owiínjie Bandɔ́mɛsɛ́ bitéŋíti. Bɛkɔkɔ́ eébí ŋaá bá bíé húlúkúne a Tibeliátɛ.

²⁴ Ahɛ́ baacɔ ŋa bɔ́ lɛ́ca anyía te Yésus, ta bááyɛ́ baákɔ́nɛ́na tɛ ábɔ́ bá tɔ́na aá haála, bé ŋé oofókíne a biátɛ́ bɛkɔkɔ́, bé ŋé súéte a Kabɛlnawum o okoó wuúci aamba hɔ́á.

Yésus áŋa bɛnyɛ́ma bɛ́ ɔnyíá bí olíhe

²⁵ Bá ŋga bɔ́ kuána Yésus e eyinyíé asálá yɛ́ nuɔmɔ́, mbá báyɛ nááyá : « Láábi, nyíényí ɔ́ mɔ́ kɔɔ́ háma aaha e ? »

²⁶ Yésus ɔsɛ : « Aá taaká taaká, ɛ ŋa mɛ́ banɔ́ láana : Nu ŋa nɔ́ mɛ́ aamba, tɛ́ cáŋa anyía nú ŋa nɔ́ lɔ́kɔ́ma injibí ci bikéki bí tubílícínyínyí abɛ́ ɛ ŋa mɛ́ kɛla, mbá nu ŋa nɔ́ mɛ́ aamba anyía nu ŋá nɔ́ nyíáka biléti a nyɛnamá nyikime anyɛ́ ɔɔcɔ ŋeé lénéke ɔnyíá.

²⁷ Nuti bíínjíékíne e buólí bɔ́ bɛnyɛ́ma bɛ́ ɔnyíá a bɛ́ ŋa cáŋɛa, mbá énu bíínjíékíne e buólí bɔ́ bɛnyɛ́ma bɛ́ ɔnyíá e bí ŋé líhe ɔ ɔkɔɔ́háma ɔ yɔɔ́sɔɔ́sɔ yí olíhe yí ekúlú ekime. Yaŋɔ́ Ɔɔ́nɔ́ u ɔɔcɔ, ɛ ká mɛ́ banɔ́ íínjíékíne biátɛ́ bɛnyɛ́ma bɛ́ ɔnyíá anyía Síkíne Bandɔ́mɛsɛ́ áŋa o mi bílícínyínyi na mááyɛ́ makɛ́nda. »

²⁸ Ɛ́ɛhɛ́ bé ŋe bú wuúci batá báyɛ : « Aátɛ́ túásɔ́ nyɛ́mana tú ɔkɛlaka o onyíóyísínyi buólí abɔ́ Bandɔ́mɛsɛ́ ŋa yáamba anyía túásɔ́ nyiɔ́kɔ e ? »

²⁹ Mbá ɔsɛ : « Buólí abɔ́ Bandɔ́mɛsɛ́ ŋa yáamba anyía núánɔ́ nyiɔ́kɔ áŋa anyía : Núánɔ́ hákɛ́na mɔŋɔlɛ́ náámɛ, yaŋɔ́ ooci awɔ́ u ŋaá tɔ́má. »

³⁰ Báyɛ : « Ekéki yí hibílícínyínyí yɛ́ yaátɛ́ wɔ́ɔ cɔba ɔ ɔkɛla aná, mbá tuásɔ́ hákɛ́na mɔŋɔlɛ́ nɔ́ɔ́wɔ e ? Aátɛ́ wɔ́ɔ cɔba ɔ ɔkɛla aaha aámbáya e ?

³¹ I iisí cɛ ɔsɛ́bɛ́á, cíísú sɔ́kɔ́nɔ́ ŋaá nyíáka bɛnyɛ́ma bɛ́ ɔnyíá abɛ́ bá ŋaá bá bábɔ́ lɔ́ŋɔ́kɔ báyɛ máana, háyɛ Ciɔɔ́ŋɛ́ cɛ́ Bandɔ́mɛsɛ́ ŋá kɔ́ɔna cɛ́sɛ : “U ŋeé beébe aafɛ́na bɛnyɛ́ma bɛ́ ɔnyíá bɛ́ Ɔmuaná.” »

³² Mbá Yésus ɔsɛ náábɔ́ : « Ɛ ŋa mɛ́ banɔ́ láana, aá taaká taaká anyía : Tɛ́ cáŋa *Moyís u ŋaá banɔ́ ááfákɛ́na bɛnyɛ́ma bí ohúlúkúne ɔ Ɔmuaná, mbá ciamɛ Síkíne u ŋaá banɔ́ ááfákɛ́na taaká cɛ́ bɛnyɛ́ma cɛ́ Ɔmuaná.

³³ Yááŋa anyía bɛnyɛ́ma bɛ́ ɔnyíá bɛ́ Bandɔ́mɛsɛ́ áŋa Ooci ewú u ŋe húle ɔ Ɔmuaná, u íínjíékíne baacɔ olíhe. »

³⁴ Báyɛ : « Taatá, búle basɔ́ biíbi íínjie. »

³⁵ Mbá Yésus ɔsɛ náábɔ́ : « Ya mɛ́ŋa bɛnyɛ́ma bɛ́ ɔnyíá bí olíhe. Ɛcaná tɛ ká háná á núana ɔɔcɔ awɔ́ u káá fáaya náámɛ ta buɔ́sɛ́ ; híáná tɔ́na, nyimóti tɛ ká háná á núana ɔɔcɔ awɔ́ u káá háya mɔŋɔlɛ́ náámɛ ta buɔ́sɛ́.

³⁶ Mbá ɛ́ ma mɛ́ banɔ́ láana ɛsɛ́ : Nú ma nɔ́ mɛ́ lɛcaka mbá ta híáná, nú me nú kíne olumitinine.

³⁷ Ɔɔcɔ okime awɔ́ Bandɔ́mɛsɛ́ é mi cuméke káá faáya náámɛ. Yaŋɔ́ tɔ́na, í tí ké mí wuúci oomboko ta buɔ́sɛ́,

³⁸ anyía i ŋeé mi húlé ɔ Ɔmuaná ɔ ɔkɔkɛ́la háyɛ Mu-mɛ-tɔ́ma ŋá yáamba, tɛ́ cáŋa háyɛ ɛ́ ŋa mɛ́ aamba.

³⁹ Aátɛ́ Mu-mɛ-tɔ́ma ŋa yáamba e ? Mu ŋa yáamba anyía i ti nyímísí ta ɔɔcɔ a baacɔ ebé mu ŋe mí cuméke, mbá yémi beébe heenyútúkúne o olíhe a buɔ́sɛ́ bɔ́ nyɛmana.

⁴⁰ Ciamɛ Síkíne ŋa yáamba anyía ɔɔcɔ okime awɔ́ á mɛ lɛca, yɔ́ háya mɔŋɔlɛ́ náámɛ, yaŋɔ́ Ɔɔ́nɔ́, wɔ́ bɔ́ŋɔ yɔɔ́sɔɔ́sɔ yí olíhe yí ekúlú ekime, mí o wuúci heenyutune o olíhe a buɔ́sɛ́ bɔ́ nyɛmana. »

⁴¹ *Besuif ŋe bú túme obícúcúlíne Yésus anyía u ŋaá táŋɛ́tá ɔsɛ : « Ya mɛ́ŋa bɛnyɛ́ma bɛ́ ɔnyíá bɛ́ Ɔmuaná. »

⁴² Báyɛ : « Tɛ́ cáŋa Yésus, ɔɔ́nɔ́ u Yɔ́sɛb wáŋa e ? Tu ŋe sú ményi ne iinyí ne síkíne. Anyána u ŋaa kɔ́ɔna aámbáya anyía u ŋeé húle ɔ Ɔmuaná e ? »

⁴³ Aáná Yésus ŋeé beébe laána ɔsɛ : « Nuti bícúcúléke.

⁴⁴ Ta ɔɔcɔ tɛ á bá wu ɔfaaya náámɛ, ɛ tɛ ŋáa bá anyía Síkíne, Mu-mɛ-tɔ́ma mué wuúci bísúétíne náámɛ ; ɛ́ɛhɛ́ yaŋɔ́, i ké mí wuúci heenyutune o olíhe a buɔ́sɛ́ bɔ́ nyɛmana.

⁴⁵ Behémúnyi bɛsana bá Bandɔ́mɛsɛ́ ŋa bɔ́ ɔ́ɔ́ŋɔ́kɔ́ báyɛ : “Bandɔ́mɛsɛ́ kéé beébe éékúnyíki, beébe bekime.” Aá yaátɛ́ asana, ɔɔcɔ awɔ́ á lɔ́kɔ́ma ɔtáŋa ú Síkíne, yó híite nyíáyɛ́ nyiékúnyi, ŋa fáaya náámɛ.

⁴⁶ Ta ɔɔcɔ tɛ́ ŋa caŋa á lɛ́ca Síkíne, ɛ tɛ ŋáa bá Ooci ewú u ŋeé húle nááyá ; hú wuúci bímuócí u ná maa lɛ́ca Síkíne.

⁴⁷ Ɛ ŋa mɛ́ banɔ́ láana aá taaká taaká, ɛsɛ́ : Ɔɔcɔ ewú é lúmitinine áŋa na yɔɔ́sɔɔ́sɔ yí olíhe yí ekúlú ekime.

⁴⁸ Ya mɛ́ŋa bɛnyɛ́ma bɛ́ ɔnyíá bí olíhe.

⁴⁹ Cíínú sɔ́kɔ́nɔ́ ŋaá nyíáká máana i iisí cɛ ɔsɛ́bɛ́á, mbá cí ŋeé wéékúne.

⁵⁰ Mbá bɛnyɛ́ma bɛ́ ɔnyíá bɛ́ Ɔmuaná áŋa nyɛnamá a nyɛ́áŋa anyía ɔɔcɔ ewú é biíbi nyíáka tí kéé wé ta buɔ́sɛ́.

⁵¹ Ya mɛ́ŋa bɛnyɛ́ma bɛ́ ɔnyíá bí olíhe. Bí ŋeé húle ɔ Ɔmuaná. Ɔɔcɔ é biíbi nyíáka, u kéé líhéke. Bɛnyɛ́ma bɛ́ ɔnyíá ebí i ké mí wuúci íínjie áŋa ciamɛ cɛɛ́tɔ. Ciíci i ké mí iínjie ɔ ɔkɛla anyía baacɔ ébú líhéke. »

⁵² Ɔ ɔtáŋa oócí, ɛsáká ŋaá kúá ɛ ɛkatɛ́katɛ́ cí Besuif, bá bɛ́bátáka báyɛ : « Anyána ɔɔcɔ ooci áŋa wu ɔ basɔ́ áafɛna ciayɛ́ cɛɛ́tɔ e ? »

⁵³ Yésus ɔsɛ náábɔ́ : « Ɛ ŋa mɛ́ banɔ́ láana aá taaká taaká ɛsɛ́ : Mbɔ́kɔ nú ŋe nú kíne ɔnyíá ciamɛ cɛɛ́tɔ, nuó kíne ɔmúáka maamɛ manɔ́ŋɔ́, nu tɛ ká nɔ́ bá ne olíhe.

⁵⁴ Ɔɔcɔ okime awɔ́ u káá nyíáka ciamɛ cɛɛ́tɔ, yɔ́ múáka maamɛ manɔ́ŋɔ́, káá bá na yɔɔ́sɔɔ́sɔ yí olíhe yí ekúlú ekime ; mí o wuúci heenyutune o olíhe a buɔ́sɛ́ bɔ́ nyɛmana.

⁵⁵ Yááŋa anyía ciamɛ cɛɛ́tɔ áŋa taaká cɛ ɔnyíá, maamɛ manɔ́ŋɔ́ taaká cɛ ɔmúána.

⁵⁶ Ɔɔcɔ okime awɔ́ á nyíáka ciamɛ cɛɛ́tɔ, yɔ́ múáka maamɛ manɔ́ŋɔ́, ŋee límine e nyimónjóló na yaŋɔ́, yaŋɔ́ tɔ́na e nyimónjóló ne wuúci.

⁵⁷ Síkíne a wáŋa wɔɔ́sɔ u ŋaá mɛ tɔ́má. Wuúci u ŋeé mi líhísi ; híáná tɔ́na, i ké mí líhísíki ɔɔcɔ okime awɔ́ u káá mɛ nyíáka. U kéé líhéke anyía i ŋeé mi líhe.

⁵⁸ Bɛátɛ́ bɛnyɛ́ma bɛ́ ɔnyíá bɛ́ Ɔmuaná eebi. Bɛ́ tɛ á bá háyɛ eebi ebí cíínú sɔ́kɔ́nɔ́ ŋaá nyíáká, mbá cío wéékúne. Aáná, okime awɔ́ u káá nyíáka bɛnyɛ́ma bɛ́ Ɔmuaná kéé líhéke ekúlú ekime. »

⁵⁹ Aáná Yésus ŋaá táŋáká, u éékúnyíki baacɔ a *andaŋía yɛ́ ɔbɛ́cɔ́kɔ́lɛ́na yí Besuif a Kabɛlnawum.

Ɔtáŋa ewú ú ŋé yiínjíéne yɔɔ́sɔɔ́sɔ yí olíhe yí ekúlú ekime

⁶⁰ Ɛ́makɛ́la *baákɔ́nɛ́na bé Yésus beéŋí ábɔ́ lɔ́kɔ́máka ɔtáŋa ú Yésus oócí, báyɛ : « Ɔtáŋa oócí ŋa náta. Ɔɔcɔ tɛ á bá wu o wuúci lɔ́kɔ́máka. »

⁶¹ Yésus ŋeé ményi e úúyé ɔtɛ́má anyía baákɔ́nɛ́na ŋe bú bícúcúlíne úúyé ɔtáŋa ; mbá ɔsɛ náábɔ́ : « Yɛ́ ŋaá banɔ́ núési ɔtɛ́má e ?

⁶² Mbɔ́kɔ nuánɔ́ lɛca Ɔɔ́nɔ́ u ɔɔcɔ á báátáka haála ahá u ŋa cáŋa á bámɛ́na oóoʼ ?

⁶³ *Efúúménénú yí Elilé yiíyi yí ŋe líhísínyi ; ɔɔcɔ wuúci ne wuúci tɛ á bá bɔkɔ. Ɔtáŋa awɔ́ ɛ́ ma mɛ́ banɔ́ láakɛna ŋé yíínjíéne ne Elilé ne olíhe.

⁶⁴ Mbá bɔ́mɔtɛ́ aanɔ́ ɛ ɛkatɛ́katɛ́ ti ŋé bú lúmitinine. » Yááŋa anyía Yésus ŋaá bá we ményukune feeké bɔsɔ́ɔ́kɔ́ a bá ŋaá bá bé ti ébú lúmítíníne, u ŋaá bá weé ményukune tɔ́na ooci ewú u kéé wuúci fiimbie.

⁶⁵ Aáná u ŋe túné a kɔ́ɔ́na ɔsɛ : « Yaátɛ́ asana ɛ́ ma mɛ́ banɔ́ láana anyía ɔɔcɔ tɛ á bá wu ɔfaaya náámɛ mbɔ́kɔ tɛ́ cáŋa Síkíne wé wuúci iínjíe makɛ́nda. »

⁶⁶ O otúme ekúlú eéyé baákɔ́nɛ́na bé Yésus beéŋí ŋa bɔ́ hɔ́láka, bé ti túné kéndinyi ne wuúci.

⁶⁷ E elime eécí, Yésus ŋaá batá bááyɛ́ baákɔ́nɛ́na bɔ́ɔ́hátá ne béfendí ɔsɛ : « Mbá banɔ́ oóoʼ ? Nu ti ŋé nú léne osúéte tɔ́na e ? »

⁶⁸ Símon Bíel ŋé wuúci bɛ́káma ɔsɛ : « Otéŋí a Waáŋá, ná aányɛ́ u etémbí tua sɔ́ŋa tú osúétéke e ? Ɔ ɔ́ŋa na ɔtáŋa ewú ú ŋe yiínjíéne yɔɔ́sɔɔ́sɔ yí olíhe yí ekúlú ekime.

⁶⁹ Tú ma sɔ́ hákɛ́na mɔŋɔlɛ́ nɔ́ɔ́wɔ, túó ményi tɔ́na anyía ɔ ɔ́ŋa Ofúúménénú u Bandɔ́mɛsɛ́. »

⁷⁰ Mbá Yésus ɔsɛ náábɔ́ : « Tɛ́ka yaŋɔ́, ɛ́ ŋa mɛ́ banɔ́ táfáká banɔ́ bɛɛtɔ́ bíɔ́hátá ne bífendí eebi e ? Ta híáná, ɔmɔtɛ́ aanɔ́ ɛ ɛkatɛ́katɛ́ áŋa elime ɛmɔtɛ́ na Musɔ́mɛ́na baacɔ ! »

⁷¹ U ŋaá bá waá kɔ́ɔnaka asana yɛ́ Yútas, ɔɔ́nɔ́ u Símon Iskaliót, anyía wuúci u kéé wuúci fiimbie, wuúci awɔ́ u ŋaá bá ɔ ɔlɔŋɔ ú bɔ́ɔ́hátá ne béfendí.