Sáaŋ 3 - Nomaande

Yoólóko yí ne Yésus ne Nikotɛ́mɛ

¹ Ɔɔcɔ ŋaá bá ɔɔ́ hiɔ́bɔ hɛ́ *Bafalisiɛ́ŋ, nyiínyi ɛ́cɛ Nikotɛ́mɛ ; u ŋaá bá tɔ́na ɔmɔtɛ́ u betéŋínyi *Besuif.

² U ŋaá cɔba o okowoóloko né Yésus buutú a búmɔtɛ́, yó wuúci laana ɔsɛ : « Láábi, tu ŋe sú menyi anyía kuɔŋɔ́ Bandɔ́mɛsɛ́ ŋaá tɔ́má ɔ ɔkɔɔ́ basɔ́ éékúnyíki. Ɔɔcɔ tɛ á bá wu ɔkɛlaka bikéki bí tubílícínyínyí háyɛ eebi, mbɔ́kɔ Bandɔ́mɛsɛ́ tɛ á bá nááyá. »

³ Yésus ŋeé wuúci bɛ́káma ɔsɛ : « Aá taaká ɛ ŋɔ mɛ́ ɔ laana anyía ɔɔcɔ tɛ á bá wu owoofine e *Butéŋí bɔ́ Bandɔ́mɛsɛ́, wuúci tɛ́ka o obíbíénútúne. »

⁴ Nikotɛ́mɛ ŋa báta Yésus ɔsɛ : « Anyána ɔɔcɔ áŋa wu obíbíénútúne e ? Mbá wáŋa wu ɔhálɔ́mɔ́na a tɔɔna tú iinyí, yó bíbíénútúne e ? »

⁵ Mbá Yésus ɔsɛ : « Aá taaká ɛ ŋa mɛ́ ɔ laana anyía ɔɔcɔ tɛ á bá wu owoofine e Butéŋí bɔ́ Bandɔ́mɛsɛ́ wuúci tɛ́ka o obíbíénútúne ne e menyífé ne e *Efúúménénú yí Elilé.

⁶ Awɔ́ ɔɔcɔ u imehú é bíéne áŋa ɔɔcɔ u bɛnamá ; ewú Efúúménénú yí Elilé é bíéne áŋa ɔɔcɔ u Elilé.

⁷ Eti kékéke anyía ɛ́ ma mɛ́ ɔ laana ɛsɛ́ : Okime ŋa nyɛmána wu obíbíénútúne.

⁸ Ehúne ŋeé húne haála ehé yí ŋe léne ohúne ; a lɔ́kɔ́máka háyɛ yí ŋeé húne, mbá e ti menyí ta haála ehé yí ŋeé húlíne, ta haála ahá yɛ́ ŋa cɔ́bɛna. Híáná tɔ́na, yɛ́ ŋaá bɛ́kɛ́la ɔ ɔɔcɔ okime ewú Efúúménénú yí Elilé é bíéne. »

⁹ Ɛ́makɛ́la Nikotɛ́mɛ á lɔ́kɔ́máka ɔtáŋa ú Yésus, u ŋé wuúci batá ɔsɛ : « Anyána búáŋa bú ɔbɛ́kɛ́láka aná e ? »

¹⁰ Mbá Yésus ɔsɛ : « Anyána o ti ŋó menyi bɛsana eebi, yiíyi anyía ɔ ɔ́ŋa woómóomo e beékúnyi aaha e Islayɛ́l e ?

¹¹ Ɛ ŋa mɛ́ ɔ laana aá taaká anyía basɔ́, tu ŋe sú hémbule bɛsana ebí tu ŋe sú ményi, tu hákɛ́na ɛmbasɔ́ e eebi abɛ́ tú ma sɔ́ lɛ́caka na cáásɔ́ eése, mbá banɔ́, nu ti ŋé nú lumitine úúsú ɔtáŋa.

¹² Mbɔ́kɔ nu ti ŋé nú mi lumitinine ekúlú ayɛ́ ɛ ŋá mɛ́ banɔ́ láana bɛsana bɛ́ ɔmɛsɛ́, mbá anyána aná na bɛ́ Ɔmuaná e ?

¹³ Ɔɔcɔ tɛ́ ŋaá bááta ɔ Ɔmuaná, ɛ tɛ ŋáa bá Ɔɔ́nɔ́ u ɔɔcɔ bímuócí ewú u ŋeé húle ɔ Ɔmuaná.

¹⁴ Bá ŋá nyɛmána bé obééti Ɔɔ́nɔ́ u ɔɔcɔ bɔkɔ búmɔtɛ́ háyɛ *Moyís ŋeé bééti ciɔ́hɔ ci eléŋú i iisí cɛ ɔsɛ́bɛ́á noómi,

¹⁵ ɔ ɔkɛla anyía okime awɔ́ u káá háya mɔŋɔlɛ́ nááyá á bá na yɔɔ́sɔɔ́sɔ yí olíhe yí ekúlú ekime. »

¹⁶ Yááŋa anyía Bandɔ́mɛsɛ́ ŋeé lénéke baacɔ bekime e nyiwééné, yó wíínjie hííyé hɛkɔŋɔ́ hɛ́ Ɔɔ́nɔ́, ɔkɛla anyía ɔɔcɔ okime awɔ́ u káá háya mɔŋɔlɛ́ nááyá ti nyíme, mbá wá bá na yɔɔ́sɔɔ́sɔ yí olíhe yí ekúlú ekime.

¹⁷ Bandɔ́mɛsɛ́ tɛ ɔ́mɔ́ tɔ́ma uuyé Ɔɔ́nɔ́ ɔ ɔmɛsɛ́ anyía wé ke kélísíki baacɔ, mbá u ŋaá hɔ́lɛ́na nááyá o o beébe nohiki.

¹⁸ Bé ti ŋée télímínyi a nyɛkála okime awɔ́ á háya mɔŋɔlɛ́ ná Ɔɔ́nɔ́, mbá ɔɔcɔ awɔ́ u tɛ ŋá háya mɔŋɔlɛ́ nááyá á yáaŋa ɔkuánɔ́ nyɛkála anyía u tɛ ŋá háya mɔŋɔlɛ́ ná hɛkɔŋɔ́ hɛ́ Ɔɔ́nɔ́ hɛ́ Bandɔ́mɛsɛ́.

¹⁹ Hɛkɔma ahɛ́ Bandɔ́mɛsɛ́ ŋeé beébe íínjííne nyɛkua áŋa anyía eese ŋaá faáya ɔ ɔmɛsɛ́, mbá baacɔ bó lénéke ibíne ɔ ɔhɔla eese, anyía nyíábɔ́ nyɛbɛ́kɛ́lɛ́na áŋa nyɛɛbɛ́.

²⁰ Ɔɔcɔ awɔ́ ú ŋa kɛla bɔɔbɛ́ ŋe líŋine eese, u tɛ á bá wu ɔfaaya haála ehé eese áŋa ; u ŋe líkíme eese anyía yááyɛ́ aabɛ́ yɛ́ nyɛbɛ́kɛ́lɛ́na tɛ háma a miányɛ́.

²¹ Mbá ɔɔcɔ awɔ́ u ŋa látɛ́na taaká ŋa fáaya e eese anyía baacɔ ébú menyi ɔlɛca anyía u ŋa kɛla bɛsana bikime a nyɛlɔ́kɔ́mána na Bandɔ́mɛsɛ́.

Ne Yésus na Sáaŋ

²² E elime eécí, Yésus ŋeé súéte ɔlɔŋɔ na bááyɛ́ *baákɔ́nɛ́na i iisí ci *Yuté. U ŋé limékíne ne beébe hɔ́á, u ŋé ootókíne baacɔ.

²³ Sáaŋ tɔ́na ŋaá bá we yóotokine baacɔ a bunɔŋɔ bú Enon, hoóhi na Salim, anyía menyífé ŋaá bá meéŋí a bunɔŋɔ eébú. Baacɔ ŋaá bá bábɔ́ fáakɔna nááyá, u beébe ootokine.

²⁴ Yááŋa anyía, bá ŋaá bá ɛ́cɛ bá tɛ́ ŋaá háyá Sáaŋ eé ciíbe cɛ ɛcaná.

²⁵ Baákɔ́nɛ́na a bɔ́mɔtɛ́ bá Sáaŋ ŋe bú túme osuŋunyinyi na ɔɔcɔ u *Besuif a wɔmɔtɛ́ a asana ne obífúúmínyi.

²⁶ Aáná bá ŋga bɔ́ kúána Sáaŋ, báyɛ nááyá : « Láábi, tɛ́ka ɔ́ mɔɔ́ lɛca : Ɔɔcɔ awɔ́ u ŋaá bá na kuɔŋɔ́ e eyinyíé asálá yí nuúci nú Sulutɛ́ŋ, ooci awɔ́ ɔ́ ŋɔɔ́ háyɛ́na ɛmbasɔ́, ícíocí wá yáaŋa o owootonone ; baacɔ bekime cɔcɔbaka nááyá. »

²⁷ Sáaŋ ŋeé beébe bɛ́káma ɔsɛ : « Ɔɔcɔ tɛ á bá wu ɔbɔ́ŋɔ bɔkɔ, ɛ tɛ ŋáa bá anyía Bandɔ́mɛsɛ́ wé wuúci íínjie.

²⁸ Banɔ́ bɛ́muátá nua nɔ́ŋa nú ɔ mɛ háyɛ́na ɛmbasɔ́ anyía ɛ ŋa mɛ́ kɔɔ́na ɛsɛ́ : Ɛ tɛ ámɛ bá *Mesíi, mbá bá ŋaá mɛ tɔ́ma anyía yámɛ caŋácáŋa ɔfaaya eé buúse ne wuúci.

²⁹ Muútí oónjú áŋa ɔnɔ́mɛ, mbá aláayɛ́ áŋa hoóhi, u lɔ́kɔ́máka. Wáŋa ne obíléne weéŋí ekúlú ayɛ́ ú ŋa lɔ́kɔ́ma okelú ú ɔnɔ́mɛ. Ɛ́ɛhɛ́ obíléne meé mi nyíóyo ɔ ɔtɛ́má.

³⁰ Hííyé hinjoti ŋá nyɛmána hɛ́ ɔnɔmaka, híími nyímúkúne. »

Ewú u ŋe húle ɔ Ɔmuaná

³¹ Ɔɔcɔ ewú u ŋe húle ɔ Ɔmuaná áŋa waáŋá ɔ ɔhɔla baacɔ bekime. Ɔɔcɔ u ɔmɛsɛ́ áŋa hú ɔɔcɔ u ɔmɛsɛ́. U ŋaá táŋa tɔ́na hú bɛsana a bɛ́ ŋaa lɛ́ca ɔmɛsɛ́. Ooci ewú u ŋe húle ɔ Ɔmuaná áŋa waáŋá [ɔ ɔhɔla baacɔ bekime].

³² U ŋa kɔ́ɔna bɛsana na abɛ́ ú ŋaá lɛ́cáká na abɛ́ ú ŋaá lɔ́kɔ́máká, mbá ta ɔɔcɔ ti ómó lumitine ciayɛ́ ɛmbasɔ́.

³³ Ɔɔcɔ ewú u ŋe lumitine ciayɛ́ ɛmbasɔ́ ŋo tóŋínyi anyía Bandɔ́mɛsɛ́ áŋa taaká.

³⁴ Ɔɔcɔ awɔ́ Bandɔ́mɛsɛ́ ŋaá tɔ́má ŋa kɔ́ɔna mehúnyi ma Bandɔ́mɛsɛ́ anyía Bandɔ́mɛsɛ́ ŋe wuúci sukúníne *Efúúménénú yí Elilé.

³⁵ Síkíne ŋeé léne Ɔɔ́nɔ́ ; u ŋeé wuúci íínjíé makɛ́nda me otéŋgínyi bɛnyɛ́ma bikime.

³⁶ Ɔɔcɔ awɔ́ u ŋaá háya mɔŋɔlɛ́ ná Ɔɔ́nɔ́ áŋa na yɔɔ́sɔɔ́sɔ yí olíhe yí ekúlú ekime. Ooci ewú u ŋé kíne ɔháya mɔŋɔlɛ́ ná Ɔɔ́nɔ́ tɛ́ káá lɛ́ca olíhe ; Bandɔ́mɛsɛ́ ŋeé wuúci lóbísínyi.