Sáaŋ 21 - Nomaande

Yésus me bítóŋínyi ná bááyɛ́ baákɔ́nɛ́na bétíndétú nɔ́mɔ

¹ E elime eécí, Yésus ŋe túné e bítóŋínyi ná bááyɛ́ *baákɔ́nɛ́na a asálá yɛ́ nuɔmɔ́ nú Tibeliátɛ. Ɛ́ná háyɛ asana ŋaá bɛ́kɛ́láka :

² Ne Símon Bíel na Tɔ́mas awɔ́ bá ŋaá bá bɔ́ lɔ́ŋɔ́kɔ báyɛ « Ɔɔ́nɔ́ u nyɛhása », na Nataniɛl, ɔɔcɔ u Kána i iisí ci *Kalilé, na baáná bé Sebeté, na baákɔ́nɛ́na a bɔ́mɔtɛ́ béfendí, baacɔ eébé bekime ŋa bɔ́ bá ɔlɔŋɔ.

³ Símon Bíel ŋá laána bɔsɔ́ɔ́kɔ́ ɔsɛ : « Mío súéte o olumbe. » Mbá beébe báyɛ : « Basɔ́ tɔ́na túó súéte na kuɔŋɔ́. » Bé ŋé súéte, bé ŋge óófókíne ɔ ɔkɔkɔ́. Buutú eébú bukime bɔ́ tɛ ɔ́mɔ́ bɔ́ hátɛ́na ta bɔkɔ.

⁴ A alalɛ yɛ́ ɔyá, Yésus ŋaá bá ɔtálɛ́mánánɔ́ a asálá yɛ́ nuɔmɔ́, mbá baákɔ́nɛ́na ti ómó bú ményi anyía Yésus wáŋa.

⁵ Mbá Yésus ɔsɛ : « Báámɛ baáná e ! Nú ma nɔ́ hátɛakɛna tuɔfɔ́ e ? » Báyɛ : « Ta bɔkɔʼo. »

⁶ Mbá ɔsɛ : « Ánɔ aahákɛ́na mɔhɔ́tɔ́ a aháŋá yɛ́ ɔɔbɔ́ ú manɔ́mɛ yɛ́ ɔkɔkɔ́ ; nu ŋa nɔ́ bɔ́ŋgɔ́nɔ. » Bá ŋá aahákɛ́na mɔhɔ́tɔ́. Bó ti ómó bú cényi o meéme kɔ́kɔ anyía tuɔfɔ́ ŋaa hɔ́lá ɔbá tuéŋí noómi.

⁷ Eéyé ekúlú *muákɔ́nɛ́na emú Yésus ŋaá bá wé lénéke ŋaá laana Bíel ɔsɛ : « Otéŋí a Waáŋá wáŋa ! » Ɛ́makɛ́la Símon Bíel á lɔ́kɔ́ma aáná, u ŋá bɛ́háya bɔlaka a cɛɛ́tɔ, anyía u ŋaá bɛ́láŋɔ́náká. E elime eécí u ŋaá bɛ́áhɛ́na e menyífé.

⁸ Bɔsɔ́ɔ́kɔ́ ŋa bɔ́ halɔ́mɔ́na a asálá ɔ ɔkɔkɔ́, bé húle kɔ́kɔ́kɔ mɔhɔ́tɔ́ monyióyókónú na tuɔfɔ́. Ɔkanda ŋaá bá hoóhi mɛ́ta etíne atáánɔ ɔ ɔkɔɔ́háma a asálá yɛ́ nuɔmɔ́, bá ŋá hámɔ́kɔ́na ɔ ɔkɔkɔ́.

⁹ Ahɛ́ bá ŋa bɔ́ hámɔ́kɔ́ná, bá ŋá lɛcá bɛánáka, tuɔfɔ́ a bɛánáka eébí ɔ ɔmuaná. Bá ŋá lɛcá tɔ́na biléti.

¹⁰ Yésus ŋé beébe laána ɔsɛ : « Énu héléne tuɔfɔ́ a tɔ́mɔtɛ́ atɔ́ nú ma nɔ́ hátɛakɛna. »

¹¹ Aáná Símon Bíel ŋo yoófíne ɔ ɔkɔkɔ́, u ŋɔ́ kɔ́kɛ́ta mɔhɔ́tɔ́ ɔ ɔmɛsɛ́, monyióyónú na bɛandándá bɛ́ tuɔfɔ́, tuútu etíne étíndétú nɔ́mɔ ne imbuke cíɔ́hátá na ɛ́tátɔ́. Ta háyɛ tuɔfɔ́ ŋaá bá nyɛnamá eényí, mɔhɔ́tɔ́ tɛ ɔ́mɔ́ láhɛa.

¹² Mbá Yésus ɔsɛ náábɔ́ : « Ánɔ faáya ɔ ɔnyíá. » Mbá ta muákɔ́nɛ́na mumɔtɛ́ ti ómó weéhínyínyi o wuúci batá anyía : « Kuɔŋɔ́ ɛ́cɛ aányɛ́ e », anyía bé ŋe bú wuúci ményútúne.

¹³ Yésus ŋé bíkósíti, u ŋé hiíte ne eléti na tuɔfɔ́ áyá, u ŋé beébe íínjíékíne, bá ŋá nyíáka.

¹⁴ Bikúlú bɛ́tátɔ́ eébí ebí Yésus ŋeé bítóŋínyi ná bááyɛ́ baákɔ́nɛ́na o otúme ekúlú ayɛ́ ú ŋa háányúá e biwéewé.

Ne Yésus ne Bíel

¹⁵ Ahɛ́ *baákɔ́nɛ́na ŋa bɔ́ máná ɔnyíá, Yésus ŋá batá Símon Bíel ɔsɛ : « Símon, ɔɔ́nɔ́ u Sáaŋ, o ŋoó mi léne ɔ ɔhɔlaka bɔsɔ́ɔ́kɔ́ eebe e ? » Símon ɔsɛ : « Ɛ́ɛ, Otéŋí a Waáŋá. O ŋoó ményi anyía i ŋe mí o léne. » Mbá Yésus ɔsɛ : « Sókóbíki báámɛ baáná bá ɛtɔ́mbá. »

¹⁶ E bikúlú bífendí Yésus ɔsɛ : « Símon, ɔɔ́nɔ́ u Sáaŋ, o ŋoó mi léne e ? » Bíel ɔsɛ : « Ɛ́ɛ, Otéŋí a Waáŋá, o ŋoó menyi anyía i ŋe mí o léne. » Yésus ɔsɛ : « Kendísíki cíími ɛtɔ́mbá. »

¹⁷ U ŋá batɔ́tɔ́na e bikúlú bɛ́tátɔ́, ɔsɛ : « Símon, ɔɔ́nɔ́ u Sáaŋ, o ŋoó mi léne e ? » Bíel yɔ́ lɔ́kɔ́ma ɔtɛ́má ɔnua anyía Yésus meé wuúci bata ɛmbataka e bikúlú bɛ́tátɔ́ ɔsɛ : « O ŋoó mi léne e ? » Mbá ɔsɛ : « Otéŋí a Waáŋá, o ŋoó menyi bɛsana bikime ; o ŋoó menyi anyía i ŋe mí o léne. » Mbá Yésus ɔsɛ : « Sókóbíki cíími ɛtɔ́mbá.

¹⁸ Aá taaká ɛ ŋa mɛ́ ɔ laana ; ekúlú ayɛ́ ɔ́ ŋɔɔ́ bá ɔnɔ́kɔ́, ɔ ŋɔɔ́ bá o obísúŋéke kandá kuɔŋɔ́ bɛ́muátá, wó súéte haála ahá ɔ ŋɔɔ́ bá oó lénéke. Mbá ekúlú eyí o kóó lúne, ɔ kɔ́ɔ́ bá óo hetúnyi aabá, ɔɔcɔ u etémbí yɔ́ kuɔŋɔ́ súŋe kandá, yɔ́ kuɔŋɔ́ súéténe haála ehé o tí kó léne osúéte. »

¹⁹ U ŋaá táŋáká ɔtáŋa oócí o otóŋínyi nyɛnamá nyí owé enyí Bíel kéé wé. Owé oócí yó tóŋínyi buáŋá bɔ́ Bandɔ́mɛsɛ́. Mbá ɔsɛ né Bíel : « Mɛ látáka ».

Ne Yésus na muákɔ́nɛ́na amɔ́ u ŋaá bá we lénéke

²⁰ Bíel ŋaá bɛ́kúálɛ́ta, yɔ́ lɛ́ca *muákɔ́nɛ́na emú Yésus ŋaá bá weé lénéke. Muákɔ́nɛ́na eemu e mú ŋe yeékímínyi yááyɛ́ aatɔ́ a asasa yí Yésus, beébe ɔ ɔnyíá, múó wuúci bata ɔsɛ : « Otéŋí a Waáŋá, aányɛ́ ú ŋá cɔba ɔ ɔ kuɔŋɔ́ fiimbie e ? » Muátá muákɔ́nɛ́na ŋaá bá mu é beébe látáka.

²¹ Ɛŋakɛlá Bíel meé muúmu lɛca, u ŋá bata Yésus ɔsɛ : « Otéŋí a Waáŋá, ooci óoʼ, anyána yɛ́ káá bá nááyá e ? »

²² Yésus ɔsɛ : « Yémi lénéke anyía u ka hámɛ́na hú ahɛ́ ɛ ká ká mɛ hálɔ́mɔ́na, yɛ́ ŋɔ yɔ́ɔ lɛca e ? Kuɔŋɔ́, ɔ́ɔ mɛ látáka bɔ látáka. »

²³ Aáná bɛbáyɛ ŋaá sáásíaka ɛ ɛkatɛ́katɛ́ cɛ ɔlɔŋɔ ú benyíinyí bé olumitinine anyía muákɔ́nɛ́na eémú tí ké wé. Yiíyi anyía Yésus tɛ ɔ́mɔ́ láana Bíel anyía muákɔ́nɛ́na eémú tí ké wé mbá, u ŋaá kɔɔna ɔsɛ : « Yémi lénéke anyía u ka hámɛ́na hú ahɛ́ ɛ ká ka mɛ hálɔ́mɔ́na, yɛ́ ŋɔ yɔ́ɔ lɛca e ? »

²⁴ Muátá muákɔ́nɛ́na mú ŋé bíketi bɛsana eebi, múó biíbi ɔɔ́ŋɔ́kɔ e nufule ; ɛ́ɛhɛ́ basɔ́ tu ŋe sú ményi anyía ciayɛ́ ɛmbasɔ́ áŋa taaká.

Nyibíóndísínyi nyɛ́ asana

²⁵ Yésus ŋaá kɛ́láka tɔ́na bɛsana bí etémbí biéŋí. Mbɔ́kɔ bé é biíbi bíkétíki bikime, bó biíbi ɔɔ́ŋɔ́kɔ ɔ́mɔtɛ́ ɔ́mɔtɛ́, i ŋe mí keti anyía keyé ɔ ɔmɛsɛ́ okime, nyɛbátɛ́nɛ́na tɛ́ ká bɔ́ŋɛ́a e tufule tukime atɔ́ bɔ́ kɔ́ɔ́ yɔɔ́ŋɔ́kɔ.