Sáaŋ 20 - Nomaande

Eenyie áŋa etémbí

¹ Buɔ́sɛ́ bɔ́ sɔ́ndɛ, ne nutuétúé, Malíi, itónyi cɛ Makatala, ŋa hátɔ́na, yɔ́ cɔ́ba e eenyie yí Yésus, u ŋá lɛca anyía bé me fúŋulisi nyɛndányɛ́ nyí nyiofíníne nyí eenyie.

² Ahɛ́ u ŋa lɛ́cá aáná, u ŋá cabákɛ́na ɔ ɔkɔkúana ne Símon Bíel na *muákɔ́nɛ́na a mumɔtɛ́, sɔ́ɔ́kɔ́ ewú Yésus ŋaá bá wé lénéke, mbá ɔsɛ náábɔ́ : « Bɔ́ mɔ sɔ́mɔ Otéŋí a Waáŋá e eenyie. Tu ti ŋé sú ményi haála ehé bé meé wuúci háya. »

³ Ne Bíel na muákɔ́nɛ́na eémú ŋa bɔ́ hátɔ́na, bá ŋá cɔba e eenyie.

⁴ Bá ŋa bɔ́ bá bábɔ́ cábakɛna ɔlɔŋɔ, mbá muákɔ́nɛ́na a mɔ́mɔtɛ́ eémú ŋa cábákɛ́na, muó síke Bíel, muɔ́ cáŋa kaáháma e eenyie.

⁵ Mu ŋó nyóŋímínyi, mu ŋá lɛca bikéti bɛ́ ɔmbɔ́mɔ́ aáhá, mbá muúmu te owoofine e eenyie.

⁶ E eéyé elime Símon Bíel ŋe síke kaáháma, u ŋé oofíne e eenyie ; u ŋá lɛcá bikéti bɛ́ ɔmbɔ́mɔ́ bɛsámbíánɔ́ aáhá,

⁷ na ɛmɔ́má a cɛ́ ŋaá bá a aatɔ́ yí Yésus. Ɛmɔ́má eécí tɛ ɔ́mɔ́ bá haála hɔ́mɔtɛ́ ne bikéti bɛ́ ɔmbɔ́mɔ́ ; cɛ ŋaá bá ɛbɔŋɔ́kɔ́nɔ́, sámbíá náányia.

⁸ E ekúlú eéyé sɔ́ɔ́kɔ́ muákɔ́nɛ́na, ooci awɔ́ u ŋaá cáŋa ɔkɔɔ́háma, u ŋo yóófíne tɔ́na e eenyie. Yɔ́ lɛ́caka, nyilumitinine eényí.

⁹ Ɔ ɔkɔɔ́háma a yaátɛ́ ekúlú, *baákɔ́nɛ́na ŋa bɔ́ bá ɛ́cɛ bá tɛ́ ŋa bɔ́ lɔ́kɔ́ma bɔmbányɛ bɔmbányɛ Ciɔɔ́ŋɛ́ cɛ́ Bandɔ́mɛsɛ́ a cɛ́ ŋa kɔ́ɔna anyía Yésus ŋá nyɛ́mána wu owé, yɔ́ háanyua e biwéewé.

¹⁰ Baákɔ́nɛ́na eébé béfendí ŋé bú éélúé.

Yésus me bítóŋínyi ná Malíi, itónyi cɛ Makatala

¹¹ Malíi ŋaá bá ɔtálɛ́mánánɔ́ a maabána me eenyie, waá lɛ́laka. Wuúci aáná a malɛlá, u ŋó nyoŋímínyi anyía waá lɛcá eenyie noómi.

¹² Nyɛlɛca eényí bililé bɛ́ bɔsɔ́ma bɛ́ Bandɔ́mɛsɛ́ bífendí biliménénú haála ehé bé ŋe fiényínyi omime ú Yésus, eeye a aháŋá yɛ́ aatɔ́, eeye a yɛ́mɔtɛ́ a aháŋá yɛ́ akɔlɔ́. Bí ŋaá bá bɛlaŋábákánɔ́ bɛlaŋa e bifúlúndúndúé.

¹³ Bililé bɛ́ bɔsɔ́ma bɛ́ Bandɔ́mɛsɛ́ eébí ŋé wuúci batá bɛ́sɛ : « Meemé, anyíatɛ́ ɔ́ ŋɔɔ́ lɛla e ? » Mbá ɔsɛ : « Bɔ́ mɔ sɔ́mɔ uumi Otéŋí e eenyie, mbá i ti ŋé menyi haála ahá bááŋa bé ke wuúci háyánɔ́. »

¹⁴ Ɛ́makɛ́la wá mána ɔtáŋa ooci, u ŋá bɛ́kúálɛ́ta, u ŋá lɛcá Yésus ɔtálɛ́mánánɔ́ aáhá, mbá u ti ményi anyía Yésus wáŋa.

¹⁵ Mbá Yésus ɔsɛ : « Meemé, anyíatɛ́ ɔ ŋɔɔ́ lɛla e ? Aányɛ́ ɔ ŋɔɔ́ waamba e ? » Malíi ŋe kéti anyía munyiɔ esíéné muáŋa, ɛ́ɛhɛ́ ú ŋeé wuúci bɛ́káma ɔsɛ : « Taatá, cɔ́kɔ́lɛ, mbɔ́kɔ kuɔŋɔ́ ɔ ɔ́ŋa o wuúci sɔmɔ́nɔ́, ɔ́ɔ mɛ laána haála ahá ɔ ɔ́ŋa oko wuúci bátɛ́nánɔ́ ; ɛ ŋa mɛ́ cɔba, yé ké mí wuúci hiíte. »

¹⁶ Yésus ɔsɛ nááyá : « Ééʼ, Malíi ! » Malíi ŋá bɛ́kɔ́ŋɔ́na, mbá ɔsɛ ne *nuebélé : « Ééʼ, Labuni ! » (Ɛ́cɛ anyía « Muékúnyi ».)

¹⁷ Mbá Yésus ɔsɛ : « Eti mi yeényísi, anyía ɛ tɛ ŋá mɛ́ bááta ɔ Ɔmuaná ná ciamɛ́ Síkíne. Cɔbá, ká ká laána báámɛ benyíinyí anyía míɔ bááta ɔ Ɔmuaná né Síkíne a wáŋa cianɔ́ Síkíne ; wáŋa ciamɛ Bandɔ́mɛsɛ́, wuúci tɔ́na cianɔ́ Bandɔ́mɛsɛ́. »

¹⁸ Aáná Malíi, itónyi cɛ Makatala, ŋaá hálɔ́mɔ́ná, yɔ́ kɔ láana *baákɔ́nɛ́na ɔsɛ : « Ɛ́ ma mɛ́ lɛca Otéŋí a Waáŋá ! » Nyi beébe hulikinyi ɔtáŋa u Otéŋí eényí.

Yésus me bítóŋínyi ná bááyɛ́ baákɔ́nɛ́na

¹⁹ Ɔ nyiɔ́fɔ́ nyɛ́ buátɛ́ buɔ́sɛ́ bɔ́ sɔ́ndɛ *baákɔ́nɛ́na ŋa bɔ́ bá babɛ́bándákánɔ́ eé ciíbe isimínénú, anyía bá ŋa bɔ́ bá bébú líkíméke betéŋínyi *Besuif. Bé ŋe síké ébú bítéme Yésus maá háma hú huasɛ ɔtálɛ́mánánɔ́ aabɔ́ ɛ ɛkatɛ́katɛ́, mbá ɔsɛ náábɔ́ : « Mbuumu á bá náánɔ́. »

²⁰ Ɛ́makɛ́la wáa kɔɔna aáná, u ŋé beébe tóŋgínyi na cááyɛ́ aabá, na yááyɛ́ aháŋá yɛ́ nɔkɛndá. Obíléne ŋé nyíóyo baákɔ́nɛ́na ɛ ɛtɛ́má ɔ ɔlɛca awɔ́ bá ŋa bɔ́ lɛca Otéŋí a Waáŋá.

²¹ Yésus ŋá háná beébe laana ɔsɛ : « Mbuumu á bá náánɔ́. Háyɛ Síkíne ŋaá mɛ tɔ́má, yaŋɔ́ tɔ́na ooci míɔ banɔ́ tɔ́ma. »

²² Waá mánɔkɔna ɔtáŋa aáná, nyi beébe fuumitine mehúne eényí, mbá ɔsɛ náábɔ́ : « Ánɔ bámɔ́kɔ́na ne *Efúúménénú yí Elilé.

²³ Baacɔ abá nu ká nɔ́ nyɛ́anakɛnɛna máábɔ́ maabɛ́, beébe bá ká bɔ́ bá na nyɛnyɛanɛnɛna nyɛ́ máábɔ́ maabɛ́. Bɔsɔ́ɔ́kɔ́ ebé nu ké nú ómóko ɔnyɛanɛnɛna ú máábɔ́ maabɛ́ tɛ́ ká bɔ́ bá na nyɛnyɛanɛnɛna. »

Yésus me bítóŋínyi ná Tɔ́mas

²⁴ Ekúlú eyí Yésus ŋe keé bítóŋínyi ná bááyɛ́ *baákɔ́nɛ́na, Tɔ́mas, ɔmɔtɛ́ a baákɔ́nɛ́na bɔ́ɔ́hátá ne béfendí awɔ́ bá ŋaá bá bɔ́ lɔ́ŋɔ́kɔ anyía « Ɔɔ́nɔ́ u nyɛhása », wuúci ú tɛ ɔ́mɔ́ bá.

²⁵ Bɔsɔ́ɔ́kɔ́ ŋé síké ebú wuúci laána báyɛ : « Tú ma sɔ́ lɛ́caka Otéŋí a Waáŋá ! » Mbá Tɔ́mas ŋé beébe bɛ́káma ɔsɛ : « Mbɔ́kɔ ɛ tɛ ŋá mɛ lɛca bihenyi bɛ́ ɛmbáŋɔ́na a cááyɛ́ aabá ; mbɔ́kɔ ɛ tɛ ŋá mɛ háya híími hɛnɔɔ́nɔ́ e bihenyi abɛ́ ɛmbáŋɔ́na ŋaá bá hɔ́á ; mbɔ́kɔ tɔ́na ɛ tɛ ŋá mɛ háya úúmi ɔɔbɔ́ a yááyɛ́ aháŋáháŋa yɛ́ tɔkɛndá a yɛ́mɔtɛ́ noómi, ɛ tɛ ámɛ bá wu olumitinine. »

²⁶ Sɔ́ndɛ ɛ́mɔtɛ́ ŋa hɔ́la. Baákɔ́nɛ́na bé Yésus ŋe túné ábɔ́ bá babɛ́bándákánɔ́ eé ciíbe noómi, Tɔ́mas ɔ ɔlɔŋɔ. Bihenyi ŋaá bá bisimékínénú. Bé ŋe síké ébú bítéme Yésus maá háma hú huasɛ ɔtálɛ́mánánɔ́ aabɔ́ ɛ ɛkatɛ́katɛ́, ɔsɛ : « Mbuumu á bá náánɔ́ ! »

²⁷ Mbá ɔsɛ ná Tɔ́mas : « Kosíti hɛnɔɔ́nɔ́ aaha, mbá a lɛca cáámɛ aabá ; kosíti ɔɔbɔ́, wuúci oofínyi aámɛ a aháŋá yɛ́ tɔkɛndá eeye. Nyɛána isuŋí, lumítíníneʼo ! »

²⁸ Tɔ́mas ɔsɛ : « Uumi Otéŋí a Waáŋá, ciamɛ Bandɔ́mɛsɛ́ ! »

²⁹ Yésus ɔsɛ : « Ɔ́kɔ, tɛ́ka anyía ɔ́ mɔɔ́ mɛ lɛca, ɛ́ɛhɛ́ ó moó lumitinine e ? Bɔmbányɛ né eebe e bé ŋe bú lumitinine, beébe tɛ́ka na ɔ mɛ lɛca. »

Injibí cɛ asana ayɛ́ Sáaŋ ŋɔ yɔɔ́ŋɔ́kɛ́ná nufule eenu

³⁰ Yésus ŋe túné a kɛ́laka bikéki bí tubílícínyínyí biéŋí e eése cá bááyɛ́ *baákɔ́nɛ́na. Bɛ́ tɛ á bá bɛɔ́ŋɔ́kɔ́nɔ́ e nufule eenu.

³¹ Mbá bɛsana eebi a bɛ́áŋa bɛɔ́ŋɔ́kɔ́nɔ́ e nufule eenu áŋa anyía núénú lumítíníne anyía Yésus áŋa *Mesíi, Ɔɔ́nɔ́ u Bandɔ́mɛsɛ́. Mbɔ́kɔ nu ŋá nɔ́ háya mɔŋɔlɛ́ nááyá, nááyá nu ká nɔ́ kándɛna, núɔ́ bámɔ́kɔ́na ne olíhe.