Sáaŋ 17 - Nomaande

¹ Ɛ́makɛ́la Yésus á táŋáka aáná, u ŋé bééti eése ɔ ɔmuaná, mbá ɔsɛ : « Taatá, ekúlú ma nyɛ́mana. Tóŋínyi baacɔ búámɛ buáŋá, yaŋɔ́ uuwe Ɔɔ́nɔ́, mbá yaŋɔ́ yémi beébe tóŋínyi tɔ́na búɔ́wɔ buáŋá.

² O ŋoó mi iínjíé makɛ́nda me otéŋgínyi baacɔ bekime anyía mbá i ké mi iínjíékíne bekime ebé o ŋo mí cuméke yɔɔ́sɔɔ́sɔ yí olíhe yí ekúlú ekime.

³ Náábɔ́, yɔɔ́sɔɔ́sɔ yí olíhe yí ekúlú ekime áŋa ɔ kuɔŋɔ́ ményi, kuɔŋɔ́ bímuócí, taaká cɛ Bandɔ́mɛsɛ́ ; bó ményi tɔ́na Yésus *Kilís awɔ́ ɔ́ ŋɔɔ́ tɔ́ma.

⁴ I ŋeé mi tóŋgínyi baacɔ búɔ́wɔ buáŋá aaha ɔ ɔmɛsɛ́, mío nyióyísíkínyi masɔ́ma amá ɔ ŋɔɔ́ mɛ tɔ́má ɔ ɔkɔkɛla.

⁵ Aámbáya aná, Síkíne, kɛlá anyía yé túné ke mí limine nɔ́ɔ́wɔ e nyilimíné nyí nuúmi anyɛ́ ɛ́ ŋa cáŋa ámɛ bá eé nyiínyi ɛ́cɛ ɔ tɛ ŋɔɔ́ bɔ́tá na ɔmɛsɛ́ na ɔmuaná.

⁶ Baacɔ abá ɔ ŋɔɔ́ táfáká ɔ ɔmɛsɛ́, wó mi beébe cumeke, ɛ ŋa mɛ́ kɛlá anyía bébú o menyí. Bá ŋa bɔ́ bá bɔ́ɔ́wɔ, wó mi beébe cumeke, bá ŋa bɔ́ látɛ́na úúwe ɔtáŋa.

⁷ Aámbáya bá bɔ́áŋa bemenyínyí anyía bɔkɔ bukime ebú ó ŋo mí cuméke ŋeé húle nɔ́ɔ́wɔ,

⁸ anyía i ŋe mí beébe laakɛ́na úúwu ɔtáŋa, bɔ́ lɔ́kɔ́máka na cáábɔ́ eetú ekime, bó menyi anyía i ŋeé mi húlé taaká taaká nɔ́ɔ́wɔ, bó lúmitinine anyía kuɔŋɔ́ ɔ ŋɔɔ́ mɛ tɔ́má.

⁹ A yáábɔ́ asana ɛ ŋa mɛ́ ɔ bɛ́cɔ́kɔ́lɛ́na ; tɛ́ cáŋa a asana na baacɔ bá ɔmɛsɛ́ ooci mbá a asana yɛ́ baacɔ ebé o ŋo mí cuméke ɛ ŋa mɛ́ ɔ bɛ́cɔ́kɔ́lɛ́na, anyía bá bɔ́ŋa bɔ́ɔ́wɔ.

¹⁰ Bɔkɔ bukime abɔ́ ya mɛ́ŋa ne buúbu áŋa búɔ́wɔ ; a búáŋa búɔ́wɔ áŋa búámɛ. A nyɛnamá eényí baacɔ ebé o ŋo mí cuméke ŋá bɔ́ lɛ́cá búámɛ buáŋá náábɔ́.

¹¹ O otúme aámbáya, míɔ cɔba nɔ́ɔ́wɔ. Ɛ tɛ á mɛ bá tɔ́na ɔ ɔmɛsɛ́, mbá beébe bá búánáŋa ɔ ɔmɛsɛ́. Ééʼ, Taatá, kuɔŋɔ́ Ofúúménénú, beébe tétényíki na makɛ́nda ma nyiɔ́wɔ nyiínyi, nyiínyi enyí ó ŋoó mi íínjíé, ɔ ɔkɛla anyía bábɔ́ bámɔ́kɔ́na ɔɔcɔ ɔmɔtɛ́ háyɛ basɔ́ tua sɔ́ŋa ɔɔcɔ ɔmɔtɛ́.

¹² Ekúlú ayɛ́ ɛ ŋaá mɛ́ bá ne beébe, yaŋɔ́ ɛ ŋaá mɛ bá yemí beébe tétényíki na makɛ́nda ma nyíɔ́wɔ nyiínyi, eenyi enyí o ŋoó mi íínjíé. I ŋe mí beébe kekényíki, ɔɔcɔ ta ɔmɔtɛ́ aabɔ́ ɛ ɛkatɛ́katɛ́ ti ómoó nyíme, ɛ́ tɛ ŋáa bá ooci awɔ́ u ŋa nyɛ́mána wu onyíme anyía Ciɔɔ́ŋɛ́ é bínyíóyísínyi.

¹³ Mbá aámbáya, míɔ cɔba nɔ́ɔ́wɔ, ɛ́ɛhɛ́ ɛ ŋa mɛ́ ɔ bɛ́cɔ́kɔ́lɛ́na ekúlú ayɛ́ ya mɛ́ánáŋa ɔ ɔmɛsɛ́, anyía bá bámɔ́kɔ́na ne obíléne háyɛ ooci a wáŋa náámɛ, ɛ́cɛ anyía hú obíléne ne obíléne.

¹⁴ I ŋe mí beébe hulíkínyi úúwe ɔtáŋa, baacɔ bá ɔmɛsɛ́ ooci ŋe bú beébe liŋékíne anyía bá tɛ ábɔ́ bá bá ɔmɛsɛ́ ooci, bɔkɔ búmɔtɛ́ háyɛ yaŋɔ́ ɛ tɛ amɛ́ bá u ɔmɛsɛ́ ooci.

¹⁵ Ɛ tɛ ŋá mɛ́ ɔ́ɔ bɛ́cɔ́kɔ́lɛ́na anyía óo beébe aáŋíá ɔ ɔmɛsɛ́ ooci, mbá ɛ ŋa mɛ́ ɔ bɛ́cɔ́kɔ́lɛ́na anyía óo beébe tétényíki, Ɔŋána ti beébe bítíse.

¹⁶ Bá tɛ ábɔ́ bá bá ɔmɛsɛ́ ooci, háyɛ yaŋɔ́, ɛ tɛ amɛ́ bá u ɔmɛsɛ́ ooci.

¹⁷ Ɔ ciɔwɔ taaká, kɛlá anyía bébú bíínjíe nɔ́ɔ́wɔ bekimekime ; úúwu ɔtáŋa áŋa taaká.

¹⁸ Ya mɛ́ŋa o beébe tɔ́mánɔ́ ná baacɔ bá ɔmɛsɛ́ ooci, háyɛ ɔ ŋɔɔ́ mɛ tɔ́má ná baacɔ bá ɔmɛsɛ́ ooci.

¹⁹ I meé mi bíínjie yaŋɔ́ okimekime nɔ́ɔ́wɔ a yáábɔ́ asana anyía, ɔ ciɔwɔ taaká ɔ ɔkɛla anyía beébe tɔ́na bébú bíínjíe nɔ́ɔ́wɔ.

²⁰ Tɛ́ cáŋa hú a yáábɔ́ asana ɛ ŋa mɛ́ ɔ bɛ́cɔ́kɔ́lɛ́na, mbá tɔ́na a asana yɛ́ bɔsɔ́ɔ́kɔ́ a bá ká bɔ́ lɔ́kɔ́máka úúbú ɔtáŋa, bɔ́ hákɛ́na mɔŋɔlɛ́ náámɛ.

²¹ Ɛ ŋa mɛ́ ɔ bɛ́cɔ́kɔ́lɛ́na anyía beébe bekime bábɔ́ bámɔ́kɔ́na ɔɔcɔ ɔmɔtɛ́ háyɛ kuɔŋɔ́, Síkíne, ɔ ɔ́ŋa e nyimónjóló na yaŋɔ́, yaŋɔ́ e nyimónjóló na kuɔŋɔ́. Bábɔ́ bámɔ́kɔ́na ɔɔcɔ ɔmɔtɛ́ na basɔ́ e nyimónjóló, ɔ ɔkɛla anyía baacɔ ébú lúmítíníne anyía kuɔŋɔ́, ɔ́ ŋɔɔ́ mɛ tɔ́má.

²² I ŋe mí beébe íínjie nuúmi enú ó ŋoó mi iínjíé anyía bábɔ́ bámɔ́kɔ́na ɔɔcɔ ɔmɔtɛ́ háyɛ na yaŋɔ́ na kuɔŋɔ́ tua sɔ́ŋa ɔɔcɔ ɔmɔtɛ́ :

²³ Yaŋɔ́ e nyimónjóló na kuɔŋɔ́, kuɔŋɔ́ e nyimónjóló na yaŋɔ́, anyía bábɔ́ bámɔ́kɔ́na taaká ɔɔcɔ ɔmɔtɛ́, aáná baacɔ bekime ké bú ményi anyía kuɔŋɔ́ ɔ́ ŋɔɔ́ mɛ tɔ́ma, bó ményi tɔ́na anyía o ŋoó beébe léne háyɛ o ŋoó mi léne.

²⁴ Taatá, ó ŋo mí beébe cuméke, ɛ́ɛhɛ́ ɛ ŋa mɛ́ aamba anyía bá bámɔ́kɔ́na na yaŋɔ́ haála ahá ɛ ká mɛ́ bámɔ́kɔ́na, aáná bá ká bɔ́ lɛ́caka núámɛ́ nuúmi, nuúmi enú ó ŋoó mi iínjíé. O ŋoó túme o mi léne ɛ́cɛ ɔ tɛ ŋɔɔ́ bɔ́tá na ɔmɛsɛ́ na ɔmuaná, a yaátɛ́ asana ó ŋo mí nuúnu iínjíé.

²⁵ Taatá, kuɔŋɔ́ awɔ́ ɔ ɔ́ŋa ɔtálɛ́mánánɔ́, baacɔ bá ɔmɛsɛ́ ooci ti ŋé bú o menyi, mbá yaŋɔ́, i ŋo mí o menyi ; eebe baacɔ tɔ́na ŋe bú menyi anyía kuɔŋɔ́, ɔ́ ŋɔɔ́ mɛ tɔ́má.

²⁶ Ɛ ŋa mɛ́ kɛláka anyía bébú o menyi ; i ké búle ámɛ kɛla híáná. Aáná nulénéne enú ɔ ɔ́ŋa ne nuúnu náámɛ káá bá náábɔ́, yaŋɔ́ bɛ́muátá míɔ bá tɔ́na náábɔ́. »