Sáaŋ 16 - Nomaande

¹ « Ɛ ŋa mɛ́ banɔ́ láana ɔtáŋa ooci anyía ɛkákɛ́la nua núáŋa ɔ ɔlɛca indekese, nɔtɛ tabálɛ́ta.

² Bá káá banɔ́ búleke a *bɛndaŋía bɛ́ ɔbɛ́cɔ́kɔ́lɛ́na bí *Besuif. Ɔmuátá, ekúlú káá faáya, a yɛ́ káá bá anyía ɔɔcɔ á banɔ́ ɔ́ɔ́nɔ́, yó kéti anyía ú mɔɔ́ nyiɔ́kɛna Bandɔ́mɛsɛ́ ambányɛ yí buólí.

³ Bá ká bɔ́ bɛ́kɛ́lákɛ́na a nyɛnamá eényí anyía bé ti ómó bú ményi te Síkíne ta yaŋɔ́.

⁴ Ɛ ŋa mɛ́ banɔ́ láana ɔtáŋa ooci anyía ɛkákɛ́la ekúlú á kaá háma, ekúlú yáábɔ́ yɛ́ ɔbɛ́kɛ́lákɛ́na a nyɛnamá eényí, núɔ́ bɛ́táá anyía ɛ́ ŋá mɛ caŋácáŋa ɔ banɔ́ láakɛna aáná. Ɛ tɛ ɔ́mɔ́ cáŋacaŋa ɔ banɔ́ láana bɛsana eebi hí e nyitúméke anyía ɛ́ ŋá mɛ bá ɔlɔŋɔ na banɔ́.

Bɛsana ebí Efúúménénú yí Elilé ŋá kɛ́la

⁵ Mbá aámbáya ɛ ŋa mɛ́ banɔ́ biíbi laana anyía mío súéte a maabána ma Mu-mɛ-tɔ́ma, mbá ta ɔɔcɔ aanɔ́ ɛ ɛkatɛ́katɛ́ tɛ ŋá mɛ bata ɔsɛ : “Háányɛ́ wóo súéte e ?”

⁶ Mbá ɔtɛ́má ɔnua maá banɔ́ hɔ́la anyía ɛ́ ma mɛ́ banɔ́ láakɛna aáná.

⁷ Yiíyi anyía ɛ ŋa mɛ́ banɔ́ láana taaká cɛ asana anyía : Yááŋa ambányɛ náánɔ́ anyía yémi súéte ; mbɔ́kɔ i ti ŋé mi súéte, Mu-banɔ́-ɔ́ɔ́lɔ tɛ káá fáaya náánɔ́ ; mbá, mbɔ́kɔ i ŋé mi súéte, i ké mí muúmu banɔ́ tɔ́mɛ́na.

⁸ Ekúlú ayɛ́ mu káá fáaya, mu kóó tóŋgínyi baacɔ bá ɔmɛsɛ́ ooci anyía bá bɔ́ŋa na anana na a aháŋá na búábɔ́ bɔɔbɛ́, na a aháŋá ne ohónyí ú bɛsana a bɛtálɛ́mánánɔ́, na a aháŋá ne nyikélísi anyɛ́ Bandɔ́mɛsɛ́ kéé beébe kélísíki.

⁹ Bá bɔ́ŋa na nyɛnana na a aháŋá na búábɔ́ bɔɔbɛ́ anyía bá tɛ ŋá bɔ́ háya mɔŋɔlɛ́ náámɛ,

¹⁰ na a aháŋá ne ohónyí ú bɛsana a bɛtálɛ́mánánɔ́ anyía mío súéte a maabána me Síkíne mbá nú tɛ́ ká háná ánɔ́ mɛ lɛca,

¹¹ na a aháŋá ne nyikélísi anyɛ́ Bandɔ́mɛsɛ́ kéé kélísíki baacɔ anyía ú me kélísíki otéŋí u baacɔ bá ɔmɛsɛ́ ooci.

¹² Ya mɛ́ánáŋa na bɛsana biéŋí bɛ́ ɔ banɔ́ láakɛna, mbá aámbáya eeci nu tɛ ŋá nɔ́ bá nú o cényí o biíbi lɔ́kɔ́ma bɔmbányɛ.

¹³ Ekúlú eyí Elilé e yí ŋo tóŋínyi baacɔ taaká káá fáaya, yɛ́ káá banɔ́ tóŋgínyi ciátɛ́ taaká ikime. Yɛ́ tɛ káá táŋa hú a mááyɛ́ makɛ́nda ma bɛ́muátá, mbá yɛ́ káá banɔ́ láakɛna ɔtáŋa okime awɔ́ bá káá cáŋacaŋa o yiíyi laakɛna, yɔ́ banɔ́ láakɛna tɔ́na bɛsana a bɛ́ káá bɛ́kɛ́láka.

¹⁴ Yí kéé tóŋgínyi búámɛ buáŋá anyía ɔtáŋa awɔ́ yɛ́ káá banɔ́ láakɛna káá bá a yáámɛ asana.

¹⁵ Bɛsana bikime bí Síkíne áŋa tɔ́na bíámɛ. A asana eéyé ɛ́ ma mɛ́ kɔɔna anyía bá káá cáŋacaŋa ɔlaakɛna Muɔ́lɔ ɔtáŋa awɔ́ mu káá bá a yáámɛ asana, muɔ́ banɔ́ húlikinyi. »

Ɔtɛ́má ɔnua káá bɛ́cáŋa obíléne

¹⁶ « Hikúlúkúlú nu tɛ ká háná ánɔ́ mɛ́ lɛca, mbá e elime ci hikúlúkúlú a hɛ́mɔtɛ́ nu ká háná ánɔ́ mɛ lɛca. »

¹⁷ Bááyɛ́ *baákɔ́nɛ́na a bɔ́mɔtɛ́ ŋe bú túme ɔbɛ́báta báyɛ : « Aátɛ́ u ŋá kɔ́ɔna e ? Wáŋa ɔ ɔ basɔ́ láana ɔsɛ : “Hikúlúkúlú nu tɛ ká háná ánɔ́ mɛ lɛca, mbá e elime ci hikúlúkúlú a hɛ́mɔtɛ́ nu ká háná ánɔ́ mɛ lɛca.” U túné táŋáka ɔsɛ : “Yááŋa anyía mío súéte a maabána me Síkíne.”

¹⁸ Hikúlúkúlú ahɛ́ u ŋá táŋa ɛ́cɛ aátɛ́ e ? Tu ti ŋé sú menyi asana ayɛ́ u ŋaá táŋa. »

¹⁹ Yésus ŋe ményi anyía baákɔ́nɛ́na ŋa bɔ́ áamba o wuúci bícónyí asana ; mbá ɔsɛ náábɔ́ : « Ɛ ŋa mɛ́ banɔ́ láana ɛsɛ́ : Hikúlúkúlú nu tɛ ká háná ánɔ́ mɛ lɛca, mbá e elime ci hikúlúkúlú a hɛ́mɔtɛ́, nu ká háná ánɔ́ mɛ́ lɛca. Ɔ́kɔ, tɛ́ka nyihembule nyɛ́ ɔtáŋa oócí nú ŋá nɔ́ bɛ́báta e ?

²⁰ Ɛ ŋa mɛ́ banɔ́ láana aá taaká, ɛsɛ́ : Nu ká nɔ́ lɛ́láka, núɔ́ bɛ́cɔ́bɔ́kɔ, mbá baacɔ bá ɔmɛsɛ́ ooci ké bú bílénéke ; nu ká nɔ́ bá na ɔtɛ́má ɔnua, mbá úúnú ɔtɛ́má ɔnua oócí káá bɛ́cáŋa obíléne.

²¹ Ekúlú eyí oónjú a yáaŋa o onúmi, wáŋa na ɔtɛ́má ɔnua anyía yááyɛ́ ekúlú ma nyɛ́mana yɛ́ ɔlɔ́kɔ́máka ɔkála ; mbá ekúlú ayɛ́ ɔɔ́nɔ́ á yáaŋa obiénénú, iinyí ŋa bɛ́hɔ́ya ɔkála. Wáŋa ne obíléne anyía ɔɔcɔ me bíbíéne.

²² *Híáná yááŋa na banɔ́ : Aámbáya nu ŋa nɔ́ lɔ́kɔ́ma ɔtɛ́má ɔnua mbá, ɛ ká háná ámɛ́ banɔ́ lɛ́ca, ɛ́ɛhɛ́ nu ká nɔ́ bá hú obíléne ne obíléne. Nyɛnamá nyí obíléne eényí, ta ɔɔcɔ tɛ á bá wu ɔ banɔ́ nyiínyi aáŋía.

²³ Ahɛ́ ekúlú eéyé ká kaá háma, nu tɛ ká háná ánɔ́ mɛ́ bata ta bɔkɔ. Ɛ ŋa mɛ́ banɔ́ láana aá taaká, ɛsɛ́ : Síkíne káá banɔ́ iínjíékíne bɛnyɛ́ma bikime abɛ́ nu ká nɔ́ kándɛna náámɛ o o wuúci kɔŋɛna.

²⁴ Ɔ ɔkɔɔ́háma aámbáya nu tɛ́ ŋa nɔ́ kándɛna náámɛ ɔ ɔkɔŋɛna bɔkɔ. Ánɔ kɔŋɛ́na bɔkɔ ; nu ké nú buúbu bɔŋɔ, mbá nu ká nɔ́ bá hú obíléne ne obíléne.

Yésus maá yáka makɛ́nda ma bɔɔbɛ́

²⁵ Ɛ ŋá mɛ́ banɔ́ láákɛ́na bɛsana eebi bikime ɛ ɛnjaba. Ekúlú ká kaá háma ayɛ́ ɛ́ tɛ ká háná ámɛ́ banɔ́ táŋɛ́na ɛ ɛnjaba, mbá ekúlú eéyé ɛ ká mɛ́ banɔ́ hémbulekine ɔtáŋa okime awɔ́ ú ŋá lɛca Síkíne.

²⁶ Ahɛ́ yaátɛ́ ekúlú ká ká háma, nu ké búle anɔ́ kándɛna náámɛ ɔ ɔkɔŋɛna bɔkɔ né Síkíne ; mbá ɛ tɛ ŋá mɛ́ kɔɔna anyía yaŋɔ́ i ké búle amɛ́ banɔ́ bɛ́cɔ́kɔ́lɛ́nɛ́na Bandɔ́mɛsɛ́, eéʼeé !

²⁷ Síkíne bɛ́muátá ŋaá banɔ́ léne. U ŋaá banɔ́ léne anyía nu ŋe nú mi léne, nu lumitekinine anyía i ŋé mi húle ná Bandɔ́mɛsɛ́.

²⁸ Ahɛ́ í ŋeé mi húlé né Síkíne, míɔ kɔɔ́háma ɔ ɔmɛsɛ́. Aámbáya, míɔ hatɔ́na ɔ ɔmɛsɛ́, o okolímine a maabána me Síkíne. »

²⁹ Baákɔ́nɛ́na báyɛ : « Lɛcá, ɔ wáaŋa ɔ ɔ basɔ́ hémbuline ɔtáŋa aámbáya ; ɔ tɛ ŋɔ́ háná ɔ táŋa ɛ ɛnjaba.

³⁰ Aámbáya tu ŋe sú ményi anyía o ŋoó menyi bɛsana bikime ; ɔɔcɔ ŋe síke é húne nyuúté ɔ ɔ kuɔŋɔ́ bícónyi asana, ɛ́cɛ ɔ́ mɔ́ caŋacaŋa omenyi ciayɛ́ ɛmbataka. A asana eéyé tu ŋe sú ményi anyía o ŋoó húlé ná Bandɔ́mɛsɛ́. »

³¹ Mbá ɔsɛ náábɔ́ : « Ɛ́cɛ anyía aámbáya aná nú me nú lumitinine e ?

³² Ɛ́náʼo, ekúlú á yáaŋa ɔ ɔfaaya, mbá yá yáaŋa ɔmuátákáná anyɛmánánɔ́, eyí nú ké nú sémbényíkínyi, hú naányɛ́ yó hiíte úúyé ohónyí, núó mi síke hú wáámɛ. Eéʼeé, ɛ tɛ ámɛ bá hú wáámɛ aá taaká, anyía Síkíne áŋa na yaŋɔ́.

³³ Ɛ́ ma mɛ́ banɔ́ láakɛna bɛsana eébí bikime anyía mbá núá bá na ɔtɛ́má mbuumu a nyɛlatana nyí nyimónjóló a nyɛ́áŋa na yaŋɔ́ na banɔ́. Nu ká nɔ́ múáka indekese aaha ɔ ɔmɛsɛ́. Mbá énu ééhínyínyi ! Ya mɛ́ŋa ɔyákánɔ́ makɛ́nda ma bɔɔbɛ́ a mááŋa ɔ ɔmɛsɛ́ ooci. »