Sáaŋ 14 - Nomaande

Yésus áŋa ohónyí wú ɔcɔba né Síkíne

¹ Yésus ɔsɛ : « Cíínú ɛtɛ́má tɛ bɛ́nyíáka. Ánɔ hákɛ́na mɔŋɔlɛ́ na ná Bandɔ́mɛsɛ́, na náámɛ tɔ́na.

² Bɛhaála bí olímekine áŋa biéŋí o ooki ú ciamɛ Síkíne. Mbɔ́kɔ yiíyi tɛ́ka aáná, keyé ɛ́ ma mɛ́ banɔ́ láana. Míɔ cɔba, yá ka mɛ́ banɔ́ tábɔ́nákɛ́na haála.

³ Ɛkákɛ́la ɛ́ ma mɛ́ cɔba, míɔ banɔ́ tábɔ́nákɛ́na haála, ɛ ká kaá mɛ hálɔ́mɔ́na ɔ ɔ kɔɔ́ banɔ́ híite, núó ko límekine aámɛ a maabána, anyía banɔ́ tɔ́na núɔ́ bá haála ahá ya mɛ́ŋa.

⁴ Nu ŋe nú ményi haála ahá míɔ cɔba ; nu ŋe nú menyi tɔ́na ohónyí. »

⁵ Mbá Tɔ́mas ɔsɛ : « Otéŋí a Waáŋá, tu ti ŋé sú ményi ta haála ahá wɔ́ cɔba, anyána tua sɔ́ŋa tu omenyi ohónyí e ? »

⁶ Yésus ŋá bɛ́káma ɔsɛ : « Yaŋɔ́ ya mɛ́ŋa ohónyí ; ya mɛ́ŋa taaká, ya mɛ́ŋa olíhe. Ohónyí ú etémbí tɛ a bá awɔ́ ɔɔcɔ áŋa wu ɔkandɛna, yɔ́ kɔɔ́háma né Síkíne, ɛ́ tɛ ŋáa bá hú náámɛ.

⁷ Mbɔ́kɔ nuenú mi menyukune, keyé nu ŋe nú ményi tɔ́na ciamɛ Síkíne. Mbá o otúme aámbáya, nú me nú wuúci menyi ; ɔmuátá nú me nú wuúci lɛcaka tɔ́na. »

⁸ Mbá Fílib ɔsɛ : « Otéŋí a Waáŋá, ɔ́ɔ basɔ́ tóŋínyi hú Síkíne, ɔmanɔ́ ! »

⁹ Yésus ŋá bɛ́káma ɔsɛ : « Fílib, feeké yámɛ báka na banɔ́, e ti mi menyi e ? Ɔɔcɔ awɔ́ á mɛ́ lɛca ma lɛ́ca ciamɛ Síkíne. Anyána asɛ : “Basɔ́ tóŋínyi Síkíne” e ?

¹⁰ O ti ŋó lumitinine anyía ya mɛ́ŋa né Síkíne, Síkíne tɔ́na náámɛ e ? Mehúnyi ma nyiámɛ nyuúté ti ŋé húle náámɛ. Síkíne, a wá báka náámɛ, u ŋo nyióyísínyi bíáyɛ́ bɛsana bɛ́ bɛ́muátá.

¹¹ Énu lumítíníne ekúlú ayɛ́ ɛ ŋa mɛ́ banɔ́ láana ɛsɛ́ : Ya mɛ́ŋa né Síkíne, Síkíne tɔ́na náámɛ. Mbɔ́kɔ nu ŋé nú kíne olumitinine úúmi ɔtáŋa, enú lumítíníne aná te hú a máámɛ monyiókínyí bɛ́muátá.

¹² Ɛ ŋa mɛ́ banɔ́ láana aá taaká ɛsɛ́ : Ɔɔcɔ awɔ́ u ŋaá háya mɔŋɔlɛ́ náámɛ káá kɛ́laka tɔ́na monyiókínyí amɔ́ ɛ ŋa mɛ́ kɛla. U ké túné á kɛ́laka te eeme a mɔ́ á hɔ́la, anyía míɔ cɔba a maabána ma ciamɛ Síkíne.

¹³ Aáná ɛ ká mɛ́ kɛlaka bɔkɔ bukime abɔ́ nu ká nɔ́ hɔ́lɛna náámɛ ɔ ɔbata anyía yaŋɔ́ Ɔɔ́nɔ́, yémi tóŋínyi baacɔ buáŋá bɔ́ ciamɛ Síkíne.

¹⁴ Mbɔ́kɔ nu ŋá nɔ́ kándɛ́na náámɛ ɔ ɔbata bɔkɔ, i ké mí buúbu kɛlaka.

Yésus ma bɛ́tánɛ́na baacɔ Efúúménénú yí Elilé

¹⁵ Mbɔ́kɔ nu ŋe nú mi léne, ánɔ látákɛ́na úúmi ɔtáŋa.

¹⁶ Ɛ ká mɛ́ bata Síkíne, wá banɔ́ tɔ́mɛ́na Muɔ́lɔ mú etémbí; mu ke límékíne buúse bukime náánɔ́.

¹⁷ Muáŋa Elilé e yí ŋo tóŋínyi taaká. Baacɔ bá ɔmɛsɛ́ ooci tɛ abɔ́ bá bé o yiíyi káha anyía bá tɛ́ abɔ́ bá bé o yiíyi lɛca buúse bukime, te o yiíyi menyi. Mbá banɔ́, nu ŋe nú yiíyi menyi anyía waá báka na banɔ́, yiíyi náánɔ́.

¹⁸ Ɛ tɛ ká mɛ́ banɔ́ síke cuuné. Ɛ ká ká mɛ hálɔ́mɔ́na náánɔ́.

¹⁹ Hikúlúkúlú, baacɔ bá ɔmɛsɛ́ ooci ti ké túné ábɔ́ mɛ lɛca, mbá banɔ́, nu ké búle anɔ́ mɛ́ lɛca anyía i ŋeé mi líhe. Híáná banɔ́ tɔ́na nu ké nú líhéke anyía i ŋeé mi líhe.

²⁰ Ahɛ́ buɔ́sɛ́ káá nyɛ́mana, nu ké nú ményi anyía ya mɛ́ŋa e nyimónjóló na ciamɛ Síkíne, banɔ́ e nyimónjóló na yaŋɔ́, yaŋɔ́ tɔ́na e nyimónjóló na banɔ́.

²¹ Ɔɔcɔ awɔ́ ú ŋa látɛ́na cíími ilébé, u ciíci lɔ́kɔ́mákɛ́na tɔ́na, wuúci wáŋa mu-mi-léne. Híáná ciamɛ Síkíne kéé muúmu lénéke ; yaŋɔ́ tɔ́na, i ké mí muúmu lénéke, mío bítóŋínyi nááyá. »

²² Mbá Yútas, tɛ́ cáŋa ooci u Iskaliót, ɔsɛ né Yésus : « Otéŋí a Waáŋá, anyána ɔ ɔ́ŋa we obítóŋínyi náásɔ́ ɔ ɔhɔla anyía óo bítóŋínyi ná baacɔ bá ɔmɛsɛ́ e ? »

²³ Yésus ɔsɛ : « Mu-mi-léne káá látákɛ́na úúmi ɔtáŋa. Ciamɛ Síkíne kéé muúmu lénéke. Na yaŋɔ́ na ciamɛ Síkíne, tu ká sɔ́ fáaya nááyá ; túó ko límékíne nááyá.

²⁴ Mbá, mu-ti-mi-léne tɛ ŋá látɛ́na úúmi ɔtáŋa. Ɔtáŋa awɔ́ ɛ ŋaá mɛ táŋa tɛ a bá úúmi ɔtáŋa, mbá ú ŋeé húle ná ciamɛ Síkíne, Mu-mɛ-tɔ́ma.

²⁵ Ɛ́ ma mɛ́ banɔ́ láakɛna ɔtáŋa ooci ekúlú ayɛ́ ya mɛ́ánáŋa na banɔ́.

²⁶ *Efúúménénú yí Elilé, Mu-banɔ́-ɔ́ɔ́lɔ, ɛ́cɛ muúmu amɔ́ ciamɛ Síkíne káá banɔ́ tɔ́mɛ́na eémi eé nyiínyi, muúmu mu kéé búle á banɔ́ éékúnyi, mu banɔ́ bítéésíki bɛsana bikime abɛ́ ɛ ŋa mɛ́ banɔ́ láákɛ́na.

²⁷ Mbuumu, ciíci ɛ́ ma mɛ́ banɔ́ síkíne ɛ ɛtɛ́má. Ciamɛ mbuumu cɛ bɛ́muátá ɛ́ ma mɛ́ banɔ́ hákɛ́na ɛ ɛtɛ́má. Ɛ tɛ ŋá mɛ banɔ́ háya mbuumu ɛ ɛtɛ́má háyɛ baacɔ bá ɔmɛsɛ́ ŋá bɔ́ háyána. Nɔtɛ hɔla ɔbɛ́ákɛ́na, nuti líkíméke.

²⁸ Nú ŋa nɔ́ lɔ́kɔ́máká yamɛ́ banɔ́ láákɛ́na ɛsɛ́ : “Mío súéte mbá, ɛ ká kaá mɛ hálɔ́mɔ́na náánɔ́. Mbɔ́kɔ nu ŋe nú mi lénéke, keyé nu ŋe nú bílénéke anyía mío súéte a maabána me Síkíne ; anyía Síkíne ŋa mɛ́ hɔla.”

²⁹ Ɛ́ ma mɛ́ caŋacaŋa ɔ banɔ́ láakɛna bɛsana eebi, biíbi tɛ́ka na ɔbɛ́kɛ́la, ɔ ɔkɛla anyía bɛ́ á bɛ́kɛ́láka, núó lumitinine.

³⁰ I ti ŋé túné ámɛ aásána buéŋí na banɔ́ anyía otéŋí u baacɔ bá ɔmɛsɛ́ ooci a yánaŋa. U tɛ a bá wu o mi téŋgínyi.

³¹ Mbá baacɔ bekime ŋá bɔ́ nyɛ́mána bé omenyi anyía i ŋeé mi léne ciamɛ Síkíne, bó ményi tɔ́na anyía ɛ ŋa mɛ́ kɛla bɛsana háyɛ ciamɛ Síkíne ŋa mɛ́ laána. Ánɔ hatɔ́na, túé súéte. »