Sáaŋ 10 - Nomaande

Ɛnjaba ci musókóbi bitúké

¹ Yésus ŋe beébe laána ɔsɛ : « Aá taaká ɛ ŋa mɛ́ banɔ́ láana isíʼo : Ɔɔcɔ é kíne owoofine e ehenyi yɛ́ hɛkáká hí bitúké, yɔ́ hɔ́lɛna haála hé etémbí o owoofine, wáŋa weébi, wuúci tɔ́na ocónjólóŋó.

² Mbá ɔɔcɔ á hɔ́lɛ́na e ehenyi wáŋa musókóbi bitúké.

³ Mutáta ehenyi ŋeé wuúci kuunine ehenyi, bitúké tɔ́na ŋaá tákɛ́na eetú eeyé eé nyiónyi ; u ŋɔɔ́ lɔ́ŋɛ́na bitúké e bí ŋé wuúci bɛ́lɔ́kɔ́mɛ́na a cáábɔ́ eénye, mbá u biíbi hámákánána.

⁴ Ekúlú eyí ú me hémúkúnyi bíáyɛ́ bitúké bikime, u ŋe búeke eé buúse, bitúké wuúci látákɛ́na anyía bí ŋe menyi nyíáyɛ́ nyiónyi.

⁵ Bɛ́ tɛ́ káá láta okenyí mbá, bí kéé wuúci cabakɛna haaca, anyía bí ti ŋéé menyi nyiónyi nyí okenyí. »

⁶ Yésus ŋeé beébe túmíne ɛnjaba eécí, mbá bɔ́ tɛ ɔ́mɔ́ bɔ́ lɔ́kɔ́ma asana ayɛ́ u ŋaá bá waá táŋáka.

Yésus áŋa ambányɛ yí musókóbi bitúké

⁷ Yésus ŋeé beébe laána tɔ́na ɔsɛ : « Aá taaká ɛ ŋá mɛ banɔ́ laána, isíʼo : Ya mɛ́ŋa ehenyi yɛ́ hɛkáká hí bitúké.

⁸ Bɔsɔ́ɔ́kɔ́ bekime a bá ŋa bɔ́ cáŋa ɔfaaya na yaŋɔ́ ŋa bɔ́ bá beébi, beébe tɔ́na bicónjólóŋó ; mbá bitúké ti ómó beébe tákɛ́na eetú.

⁹ Ya mɛ́ŋa ehenyi. Mbɔ́kɔ ɔɔcɔ ŋó yoófíníne náámɛ, u kɔ́ɔ́ nɔ́hɔ ; u ké búle ó yóofine, u hámɔ́kɔ́na, u bɔ́ŋgɔ́na tɔ́na bɛnyɛ́ma bɛ́ ɔnyíá.

¹⁰ Weébi ŋaá fáaya hú o okoówéébe, ɔ ɔkɔɔ́wɔɔ́nɔ, ɔ ɔkɔcáŋɛna. Yaŋɔ́, ya mɛ́ŋa ɔfaayánɔ́ anyía mbá bitúké á bámɔ́kɔ́na ne olíhe, biíbi ne wuúci hú mbiɔ́kɛ.

¹¹ Ya mɛ́ŋa ambányɛ yí musókóbi bitúké. Ambányɛ yí musókóbi bitúké ŋe fiiye úúyé olíhe a asana na bíáyɛ́ bitúké.

¹² Mbá munyiɔnɔ, ɛ́cɛ ɔɔcɔ ooci awɔ́ u tɛ á bá musókóbi, ooci tɔ́na ewú bitúké tɛ á bá bíáyɛ́, wá lɛ́ca ɛbála á fáakɔna, u ŋe síké ná bɛ́yúáta bitúké, yɔ́ cábakɛna. Ú ma cábakɛna aáná, ɛbála ŋe síké á hátɛakɛna bitúké a bɛ́mɔtɛ́, yɔ́ sásaka a bɛ́mɔtɛ́ tɔ́na.

¹³ Munyiɔnɔ ŋaá cábɛna anyía tɛ́ cáŋa bíáyɛ́ bitúké bíáŋa, anyía asana yí bitúké ti ŋéé muúmu lɛca.

¹⁴ Ya mɛ́ŋa ambányɛ yí musókóbi bitúké. I ŋe mí menyi bíámɛ bitúké, bí mí menyukune tɔ́na,

¹⁵ i iŋetí acɛ́ ciamɛ Síkíne ŋé mi menyi, yaŋɔ́ tɔ́na i wuúci menyukune. Híáná i ŋe mí fiiye úúmi olíhe a asana yɛ́ bíámɛ bitúké.

¹⁶ Ya mɛ́ŋa tɔ́na na bɛ́mɔtɛ́ bitúké a bɛ́ tɛ́ ŋáá bá a hɛkáká eehi noómi. Ɛ ŋá mɛ́ nyɛmána wu o biíbi oofikinyi tɔ́na. Bɛ́ káá lɔ́kɔ́máka nyiámɛ nyiónyi, bɛ́ɔ bɛ́látáka hikuté hɛ́mɔtɛ́, mukendi mumɔtɛ́.

¹⁷ Ciamɛ Síkíne ŋeé mi léne anyía i ŋeé mí fiiye úúmi olíhe, míɔ háná síké híítutune.

¹⁸ Ɔɔcɔ tɛ ŋá mɛ́ hɔɔnɔ olíhe, mbá i ŋeé mi wuúci fiiye háyɛ i ŋé mi léne ; ya mɛ́ŋa na makɛ́nda me ofiiye úúmi olíhe, yaŋɔ́ tɔ́na na makɛ́nda me o wuúci hiitutune. Aáná ciamɛ Síkíne ŋaá kɔɔ́na anyía yámɛ kɛláka. »

¹⁹ A asana na ɔtáŋa oócí, *Besuif ŋa háná ábɔ́ bá eété náányíá náányia.

²⁰ Baacɔ beéŋí eé beébe ŋa bɔ́ bá bábɔ́ kɔ́ɔnaka báyɛ : « Aabɛ́ yí elilé ŋe kéndisi ɔɔcɔ ooci. Wáŋa yaála. Nɔtɛ lɔ́kɔ́máka úúyé ɔtáŋa. »

²¹ Bɔ́mɔtɛ́ tɔ́na báyɛ : « Ɔtáŋa oócí tɛ á bá ɔtáŋa ú ɔɔcɔ awɔ́ *aabɛ́ yí elilé ŋé kéndisi. Mbá aabɛ́ yí elilé áŋa yí oweéŋúnyísíki bendíméndíme e ? »

Betéŋínyi Besuif ŋa bɔ́ fɔ́la ɔtáŋa ú Yésus

²² Yɛ́ ŋaá bá ekúlú yí buume. Baacɔ ŋaá bá a bɔŋanda abɔ́ bá ŋaá bá bá nyíáka ɔ ɔbɛ́tááka nyikuunutune nyí *Ciíbe cɛ Bandɔ́mɛsɛ́ eé Yelúsalɛm.

²³ Yésus ŋaá bá waá kándaka eé Ciíbe cɛ Bandɔ́mɛsɛ́ noómi a yaalɛ ayɛ́ bá ŋaá lɔ́á anyía yaalɛ yɛ́ *Sálɔmɔn.

²⁴ *Besuif ŋe bú wuúci bɔŋɔ́lɛ́na, bó wuúci bata báyɛ : « Ɔ kɔ́ɔ́ basɔ́ tétísíki ɔ ɔkɔɔ́háma nyíényí e ? Mbɔ́kɔ ɔ ɔ́ŋa *Mesíi, basɔ́ cálɔ́nɛ́na. »

²⁵ Mbá ɔsɛ : « Ɛ́ ma cáŋa amɛ́ banɔ́ láana, núó kiné olumitinine. Maamɛ monyiókínyí, ciamɛ Síkíne ú ŋeé mi iínjie makɛ́nda me o meéme nyiɔkɔ. Monyiókínyí eémé má ŋaá mɛ háyɛ́na ɛmbasɔ́.

²⁶ Nu ti ŋé nú lúmitinine anyía nu tɛ anɔ́ bá ɔ ɔlɔŋɔ ú báámɛ baacɔ.

²⁷ Báámɛ baacɔ ŋa bɔ́ lɔ́kɔ́ma nyiámɛ nyiónyi háyɛ bíámɛ bitúké ŋaa lɔ́kɔ́ma nyiónyi nyɛ́ yáábɔ́ ambányɛ yí musókóbi ; i ŋe mí biíbi menyi, bɛ́ ŋaá mɛ látɛ́na.

²⁸ I ŋe mí biíbi iínjie yɔɔ́sɔɔ́sɔ yí olíhe yí ekúlú ekime ; aáná mbá bí tí ké nyíme, ta buɔ́sɛ́. Ta ɔɔcɔ ti kéé mi biíbi hɔɔ́nɔ.

²⁹ Ciamɛ Síkíne e cí ŋeé mi biíbi iínjie áŋa waáŋá ɔ ɔhɔla bɛnyɛ́ma bikime ; ɔɔcɔ tɛ á bá tɔ́na wu ɔhɔɔnɔ ciamɛ Síkíne bɔkɔ.

³⁰ Na yaŋɔ́ na ciamɛ Síkíne tua sɔ́ŋa ɔɔcɔ ɔmɔtɛ́. »

³¹ Ɔ ɔtáŋa oócí, Besuif ŋé túné ábɔ́ kɔ́caka andányɛ́ ɔ ɔwɔɔ́nɔ Yésus ne ceéce.

³² Mbá u ŋeé beébe batá ɔsɛ : « Ya mɛ́ŋa ɔkɛlákánɔ́ bɛmbányɛ́kɛ́ bɛ́ bɛsana biéŋí a makɛ́nda ma ciamɛ Síkíne, mío biíbi banɔ́ tóŋgínyi. A asana ayɛ́ háányɛ́ nu ŋa nɔ́ áamba ɔ mɛ ɔ́ɔ́nɔ na andányɛ́ e ? »

³³ Báyɛ : « Tɛ́ cáŋa a asana a yambányɛ tu ŋa sɔ́ áamba ɔ kuɔŋɔ́ ɔ́ɔ́nɔ na andányɛ́, mbá a asana eyí o ŋoó féníne Bandɔ́mɛsɛ́. Kuɔŋɔ́, ɔ ɔ́ŋa ɔɔcɔ háyɛ basɔ́, ɔ ŋɔɔ́ waamba obíkéti na Bandɔ́mɛsɛ́ ! »

³⁴ Yésus ɔsɛ : « Tɛ́ka cíínú Ciɔɔ́ŋɛ́ ŋa kɔɔna anyía Bandɔ́mɛsɛ́ ɔsɛ : “Nua nɔ́ŋa bɛbandɔ́mɛsɛ́” e ?

³⁵ Baacɔ abá u ŋaá bá waá táŋgɛ́na, beébe u ŋɔɔ́ lɔ́ŋɛ́ta anyía bɛbandɔ́mɛsɛ́. Tu ŋe sú menyi anyía tu tɛ asɔ́ bá tú otémbúsi ɔtáŋa a wáŋa ɔ Ciɔɔ́ŋɛ́ cɛ́ Bandɔ́mɛsɛ́.

³⁶ Ɛ́ɛhɛ́ yaŋɔ́, Bandɔ́mɛsɛ́ ŋaá mɛ lɔ́tɔ, yɔ́ mɛ tɔ́ma ɔ ɔmɛsɛ́. I ti ŋé mi menyi anyána nua nɔ́ŋa nú ɔkɔɔna anyía i ŋe mí féníne Bandɔ́mɛsɛ́ ekúlú ayɛ́ ɛ́ maá mɛ kɔɔna anyía ya mɛ́ŋa Ɔɔ́nɔ́ u Bandɔ́mɛsɛ́.

³⁷ Mbɔ́kɔ ɛ tɛ ŋá mɛ́ nyiɔ monyiókínyí ma ciamɛ Síkíne, nɔtɛ hákɛ́na mɔŋɔlɛ́ náámɛ.

³⁸ Mbá, mbɔ́kɔ i ŋe mí meéme nyiɔ, ta yɛ́ caŋa á bá anyía nu tɛ anɔ́ bá nú ɔhákɛ́na mɔŋɔlɛ́ náámɛ, énu lumitinine aná ta hú máámɛ monyiókínyí, mbá nu menyi ekúlú ɔ́mɔtɛ́ e bikúlú bikime anyía na yaŋɔ́ na ciamɛ Síkíne, tua sɔ́ŋa ɔɔcɔ ɔmɔtɛ́. »

³⁹ Bé ŋe túné abɔ́ áambaka o o wuúci hatɛ́na, mbá u ŋé beébe bɛ́hɔ́ɔ́nɔ.

⁴⁰ Yésus ŋe túné é súéte e eyinyíé aháŋá yí nuúci nú Sulutɛ́ŋ, a haála ahá Sáaŋ ŋa caŋa á bá we yóotokine baacɔ, u ŋé limékíne hɔ́á.

⁴¹ Baacɔ beéŋí ŋa bɔ́ fáákɔ́na nááyá, báyɛ : « Sáaŋ tɛ ɔ́mɔ́ kɛ́la *ekéki yí hibílícínyínyí ta ɔ́mɔtɛ́, mbá úúyé ɔtáŋa okime a asana yɛ́ ɔɔcɔ oócí ŋaá bá taaká. »

⁴² A haátɛ́ haála, baacɔ beéŋí ŋa bɔ́ hákɛ́na mɔŋɔlɛ́ né Yésus.