Sáaŋ 1 - Nomaande

Buhúnyi e bú ŋé yiínjíéne ne eese ne olíhe

¹ E nyitúme, ekúlú ayɛ́ *Bandɔ́mɛsɛ́ ŋaá bɔ́ta na ɔmɛsɛ́ na ɔmuaná, Buhúnyi ŋaá bá búá yáaŋa hɔ́á ; Ooci a wáŋa nyiínyi anyía Buhúnyi ŋaá bá na Bandɔ́mɛsɛ́, wuúci Bandɔ́mɛsɛ́.

² Ɛ́cɛ anyía wuúci u ŋaá bá e nyitúme na Bandɔ́mɛsɛ́.

³ Ne wuúci Bandɔ́mɛsɛ́ ŋaá bɔ́táká bɛnyɛ́ma bikime. A bɛnyɛ́ma bikime, ta bɔkɔ tɛ ɔ́mɔ bɛ́bɔ́ta tɛ́ka ne wuúci.

⁴ Wuúci ú ŋaá bá indíné ci olíhe ; waáta olíhe ú iínjíékíne baacɔ eese.

⁵ Eese ŋaá sána i ibíne noómi, mbá ibíne te o yiíyi bémbi.

⁶ Bandɔ́mɛsɛ́ nyɛtɔ́mɛ́na baacɔ eényí ɔɔcɔ a wɔmɔtɛ́ ; nyiínyi ɛ́cɛ Sáaŋ.

⁷ U ŋaá faáya háyɛ ɔmbasɔ́mbásɔ ɔ ɔkɔháyɛ́na eese ɛmbasɔ́. U ŋaá faáya anyía eeyé e elime baacɔ bekime á hákɛ́na mɔŋɔlɛ́ e Buhúnyi.

⁸ Wuúci bɛ́muátá u tɛ ɔ́mɔ́ bá eese ; u ŋaá bá yáaŋa ɔmbasɔ́mbásɔ, u ŋaá faáya anyía wá ka táŋáka asana yí eese.

⁹ Yaátɛ́ eese ŋaá bá bímuócí taaká taaká ci eese a yá báka ɔ ɔmɛsɛ́, yɛ́ nɔ́maka a baacɔ bekime.

¹⁰ Ɔɔcɔ oócí a wáŋa Buhúnyi ŋaá faáya ɔ ɔmɛsɛ́. Ne wuúci Bandɔ́mɛsɛ́ ŋaá bɔ́ta na ɔmɛsɛ́ na ɔmuaná ; mbá ta híáná, baacɔ bá ɔmɛsɛ́ ŋe bú wuúci bínéŋítíkínyi.

¹¹ U ŋaá faáya aá buayá, buayá búó wuúci kine.

¹² Ta híáná, bɔ́mɔtɛ́ baacɔ ŋe bú wuúci káha bɔmbányɛ, bɔ́ hákɛ́na mɔŋɔlɛ́ nááyá. Yaátɛ́ asana u ŋeé beébe iínjié makɛ́nda ma ɔbámɔ́kɔ́nɛ́na baáná bá Bandɔ́mɛsɛ́.

¹³ Bé ti ómó bú bíbíéne háyɛ baacɔ náŋa bébú bíbíénéke, ɛ́cɛ anyía tɛ́ cáŋa e nyiléne nyɛ́ baacɔ, mbá Bandɔ́mɛsɛ́ bɛ́muátá u ŋeé beébe ceŋísíki bááyɛ́ baáná.

¹⁴ Buhúnyi ŋa bɛ́cáŋa ɔɔcɔ, ɔɔcɔ oócí ŋé limékíne aasɔ́ ɛ ɛkatɛ́katɛ́ na yááyɛ́ yaála yí nuubo ekime ; u basɔ́ tóŋgínyi taaká ikime, tu lɛcaka búáyɛ́ buáŋá, buáŋá e bú ŋé húle né Síkíne.

¹⁵ Sáaŋ ŋaá hákɛ́ná ɛmbasɔ́ a asana yɛ́ waáta ɔɔcɔ, yɔ́ kɔ́ɔnaka okelú ɔ ɔmuaná ɔsɛ : « Ooci awɔ́ ú ŋa fáaya eémi e elime áŋa waáŋá ɔ ɔ mɛ hɔla anyía u ŋa cáŋacáŋa ɔbá feeké, ɛ́cɛ ɛ tɛ ŋáá mɛ bá. »

¹⁶ Wáŋa onyíóyónó na yaála yí nuubo hú mbiɔ́kɛ ; ɛ́ɛhɛ́ aá basɔ́ bekime, u ŋo sólikinyi bɛsaya a bɛsaya.

¹⁷ Bandɔ́mɛsɛ́ ŋaá basɔ́ húlínyi yááyɛ́ okotí né *Moyís, mbá na yaála yí nuubo na taaká ŋaá basɔ́ húlíne né *Yésus *Kilís.

¹⁸ Ɔɔcɔ tɛ́ ŋa lɛ́cá Bandɔ́mɛsɛ́, ta buɔ́sɛ́ ; mbá hɛkɔŋɔ́ hɛ́ Ɔɔ́nɔ́ a wáŋa Bandɔ́mɛsɛ́, wuúci u ŋeé wuúci lɛca. U ŋe límine a maabána me Síkíne, wuúci u ŋaá kɛ́la anyía baacɔ ebú menyi Bandɔ́mɛsɛ́.

Ɛsɔ́ma acɛ́ Sáaŋ Batis ŋaá bá weé húlikinyi baacɔ

¹⁹ Ánɔ lɔ́kɔ́ma ɛmbasɔ́ acɛ́ Sáaŋ ŋaá háya ekúlú eyí betéŋínyi *Besuif bé *Yelúsalɛm ŋa bɔ́ tɔ́ma ne *beluli nyiínjie na *bɔnyɛ Léfi o o wuúci batá báyɛ : « Aányɛ́ ɔ ɔ́ŋa e ? »

²⁰ U ti ómo kíne ɔbɛ́káma, yó beébe cálɔ́nɛ́na ɔsɛ : « Ɛ tɛ ámɛ bá *Mesíi. »

²¹ Mbá báyɛ : « Aányɛ́ ɔ ɔ́ŋa e ? Ɔ ɔ́ŋa Éli e ? » Ɔsɛ : « Eéʼeé. Ɛ tɛ á mɛ bá Éli. » Báyɛ : « Ɔ ɔ́ŋa muátɛ́ muhémúnyi bɛsana mɔ Bandɔ́mɛsɛ́ e ? » Mbá ɔsɛ : « Buaka. »

²² Ɛ́ɛhɛ́ bá ŋa háná ebú wuúci batá báyɛ : « Ɔ́ɔ basɔ́ laána, aányɛ́ ɔ ɔ́ŋa, anyía mbá túésú menyí obíkétíkínyi baacɔ a bábɔ́ basɔ́ tɔ́ma. Ɔɔ́ ciɔ́wɔ injiŋé, o ŋoó bíkéti anyía aányɛ́ ɔ ɔ́ŋa e ? »

²³ Ɛ ɛmbataka eécí, Sáaŋ ŋaá bɛ́káma ne mehúnyi emé *muhémúnyi bɛsana mɔ Bandɔ́mɛsɛ́ *Ɛsayí ŋaá kɔ́ɔ́náka, ɔsɛ : « Ya mɛ́ŋa ɔɔcɔ ewú u ŋo sóbi okelú ɔ ɔmuaná i iisí cɛ ɔsɛ́bɛ́á ɔsɛ : “Énu nyimíkínyi ohónyí ú Otéŋí a Waáŋá.” »

²⁴ Bɔ́mɔtɛ́ bɔsɔ́ɔ́kɔ́ ɔ ɔlɔŋɔ ú baacɔ abá bá ŋaá tɔ́mɛ́na Sáaŋ ŋa bɔ́ bá *Bafalisiɛ́ŋ.

²⁵ Beébe, bá ŋa háná ebú wuúci báta báyɛ : « Asɛ ɔ tɛ ɔ́ bá te Mesíi, ta anyía Éli, mbá ta muátɛ́ muhémúnyi bɛsana mɔ Bandɔ́mɛsɛ́, mbá a asana a yaátɛ́ o ŋoó wootine baacɔ aná e ? »

²⁶ Mbá ɔsɛ : « Yaŋɔ́, i ŋe mí ootíne baacɔ ne menyífé, mbá ɔɔcɔ áŋa hɔ́á aanɔ́ ɛ ɛkatɛ́katɛ́ ewú nú tí ŋe nú ményi.

²⁷ Wuúci oócí kokóokó eémi e elime. Ɛ tɛ ŋá mɛ́ nyɛmana ooci a wáŋa wu ohembuleke tukolí tɔ́ bíáyɛ́ bɛkandɛ́na. »

²⁸ Bɛsana eébí ŋaá bɛ́kɛ́láka a Bɛtani, e eyinyíé asálá yí nuúci nú Sulutɛ́ŋ a aháŋá yɛ́ nyɛháma nyɛ́ ɔɔ́cɔ́, haála ahá Sáaŋ ŋaá bá we yóotokine baacɔ.

Ɔɔ́nɔ́ u Ɛtɔ́mbá u Bandɔ́mɛsɛ́

²⁹ Ɔ ɔyá ɔyá Sáaŋ ŋaá lɛ́cá Yésus á fáakɔna nááyá, mbá ɔsɛ : « Ɔɔ́nɔ́ ú Ɛtɔ́mbá ú Bandɔ́mɛsɛ́ ooci, wuúci u ŋa yááŋɛ́na baacɔ bá ɔmɛsɛ́ bɔɔbɛ́.

³⁰ Wuúci ɛ́ ŋa mɛ́ kɔɔ́na ɛsɛ́ kokóokó eémi e elime. Wáŋa waáŋá na yaŋɔ́ anyía wuúci u ŋa cáŋacáŋa ɔbá.

³¹ Yaŋɔ́, ɛ ŋaá mɛ bá i ti emí ményi anyía wuúci wáŋa, mbá owootine ewú i ŋe mí ootine baacɔ ne menyífé áŋa anyía baacɔ bé Islayɛ́l ébú wuúci menyi. »

³² Sáaŋ ŋaá háya ɛmbasɔ́ ɔsɛ : « Ɛ ŋá mɛ́ lɛcá *Efúúménénú yí Elilé á sɔ́ɔ́náka i ihúényínyí ci hibúbé, yí ŋé limíne nááyá.

³³ Aá taaká ɛ ŋaá mɛ bá i ti emí ményi buáyá aányɛ́ wáŋa. Mbá Bandɔ́mɛsɛ́ u ŋaá mɛ tɔ́má aaha anyía yémi ootókíne baacɔ ne menyífé, wuúci ú ŋaá mɛ́ laána ɔsɛ : “Awɔ́ ɔ́ kɔ́ɔ́ lɛca Elilé á sɔ́ɔ́náka, yó límine nááyá, wuúci u kó yóotokine baacɔ ne Efúúménénú yí Elilé.”

³⁴ Yaŋɔ́, ɛ ŋá mɛ́ lɛca anyía bɛsana eébí maá háma taaká. Buátɛ́ bɔkɔ ɛ ŋaá mɛ́ háya ɛmbasɔ́ anyía ɔɔcɔ ooci áŋa Ɔɔ́nɔ́ u Bandɔ́mɛsɛ́. »

Baákɔ́nɛ́na bé buúse bé Yésus

³⁵ Ɔ buɔ́sɛ́ bɔ́ ɔláta, Sáaŋ ŋa háná á bá a haátɛ́ haála ɔlɔŋɔ na bááyɛ́ *baákɔ́nɛ́na ɔ bɔ́mɔtɛ́ béfendí.

³⁶ Ahɛ́ u ŋa lɛ́ca Yésus á hɔ́laka, mbá ɔsɛ : « *Ɔɔ́nɔ́ u Ɛtɔ́mbá u Bandɔ́mɛsɛ́ ooci ! »

³⁷ Baákɔ́nɛ́na eébé béfendí ŋa bɔ́ lɔ́kɔ́ma háyɛ Sáaŋ ŋaá kɔ́ɔna ; bá ŋá láta Yésus.

³⁸ Yésus ŋaá bɛ́kúálɛ́ta, yɔ́ lɛ́ca anyía baacɔ ŋe bú wuúci látɛ́na, u ŋé beébe batá ɔsɛ : « Aátɛ́ nu ŋa nɔ́ aamba e ? » Báyɛ : « Láábi, háányɛ́ o ŋoó limine e ? » (« Láábi » ɛ́cɛ « Muékúnyi. »)

³⁹ Yésus ŋé beébe laána ɔsɛ : « Ánɔ faáya, nú ka lɛ́ca haátɛ́ haála. » Aáná bá ŋa bɔ́ cɔ́bá, bá ŋá lɛcá haála ehé Yésus ŋaá bá weé límekine ; yɛ́ ŋaá bá bɔkɔ bú injéŋí ínyíse cɛ́ nyiɔ́fɔ́. Bá ŋá bɔ́ aásánáka ne wuúci ɔ ɔkɔɔ́háma a nyɛmana nyɛ́ buɔ́sɛ́.

⁴⁰ A baákɔ́nɛ́na eébé béfendí a bá ŋa bɔ́ lɔ́kɔ́má ɔtáŋa ú Sáaŋ, bɔ́ látákɛ́na Yésus, ɔmɔtɛ́ ŋaá bá nyiínyi ɛ́cɛ *Andɛlɛ́, onyíinyí u Símon Bíel.

⁴¹ Ahɛ́ bé ŋe bú síke Yésus, Andɛlɛ́ ŋá cáŋa o tényí ka kuána uuyé onyíinyí Símon, mbá ɔsɛ nááyá : « Tú ma sɔ́ bɔ́ŋɔ *Mesíi », ɛ́cɛ « *Kilís ».

⁴² Aáná, u ŋeé wuúci cɔbána né Yésus. Ayɛ́ u ŋaá lɛcá Símon, mbá ɔsɛ : « Ɔ ɔ́ŋa Símon, ɔɔ́nɔ́ u Sáaŋ. Bé ké búle ɔ yɔ́ɔ lɔ́ŋɔ anyía Sɛfas », ɛ́cɛ « Bíel », ɛ́cɛ « nyɛndányɛ́ ».

Yésus ŋɔ lɔ́ŋɔ ne Fílib na Nataniɛl

⁴³ Ɔ ɔyá ɔyá, Yésus ŋaá bá weé súétéke i iisí cɛ *Kalilé. U ŋá kuána Fílib, mbá ɔsɛ nááyá : « Mɛ látá. »

⁴⁴ (Fílib oócí ŋaá bá u bunɔŋɔ bɔ́ Bɛtɛsɛ́ta, háyɛ na Andɛlɛ́ ne Bíel).

⁴⁵ Fílib ŋá kaá kuána Nataniɛl ; ɔsɛ nááyá : « Tua sɔáŋa na ɔɔcɔ ewú *Moyís ŋaá táŋáká yááyɛ́ asana e nufule nú bikotí; yááyɛ́ asana behémúnyi bɛsana bá Bandɔ́mɛsɛ́ ŋa bɔ́ bá bábɔ́ kɔ́ɔnaka tɔ́na. Nyíáyɛ́ nyiínyi ɛ́cɛ Yésus, ɔɔ́nɔ́ u Yɔ́sɛb, u bunɔŋɔ bɔ́ Násalɛt. »

⁴⁶ Nataniɛl ŋé wuúci batá ɔsɛ : « Aátɛ́ a yambányɛ yááŋa yí ohúle a Násalɛt e ? » Mbá Fílib ɔsɛ nááyá : « Faáya ká lɛcá. »

⁴⁷ Yésus ŋaá lɛcá Nataniɛl á fáakɔna nááyá, u ŋá kɔɔ́na a asana na waáta Nataniɛl ɔsɛ : « Taaká ci ebíényi yí *Islayɛ́l eeci, efule tɛ́ka. »

⁴⁸ Nataniɛl ŋe wuúci batá ɔsɛ : « Háányɛ́ o ŋo mí menyi e ? » Yésus ɔsɛ : « Ɛ ŋá mɛ caŋácáŋa ɔ kuɔŋɔ́ lɛ́ca ɛ́cɛ Fílib tɛ ŋɔ́ yɔ́ɔ lɔ́ŋɛ́ta, kuɔŋɔ́ i indíné ci bufikié. »

⁴⁹ Mbá Nataniɛl ɔsɛ : « Láábi, ɔ ɔ́ŋa Ɔɔ́nɔ́ u Bandɔ́mɛsɛ́, ɔ ɔ́ŋa Otéŋí u Islayɛ́l. »

⁵⁰ Yésus ɔsɛ nááyá : « Ɛ́ ma mɛ́ ɔ laana anyía ɛ ŋá mɛ ɔ lɛcá i indíné ci bufikié, yaátɛ́ asana ó moó lumitinine e ? Ɔ ŋɔɔ́ cɔba o o túné lɛ́caka biítíti bɛ́ bɛsana a bɛ́ á hɔ́la eeye. »

⁵¹ U ŋe túné á kɔ́ɔna ɔsɛ : « Aá taaká ɛ ŋa mɛ́ banɔ́ láana anyía nu ká nɔ́ lɛ́caka Ɔmuaná okuúnénú, *bililé bɛ́ masɔ́ma bɛ́ Bandɔ́mɛsɛ́ báátáka bɛ́ lɔ́ɔ́kɔ ná *Ɔɔ́nɔ́ u ɔɔcɔ. »