Matío 7 - Nomaande

Nuti túméke bɔsɔ́ɔ́kɔ́ tɔkɔma

¹ « Nuti túméke bɔsɔ́ɔ́kɔ́ tɔkɔma, aáná Bandɔ́mɛsɛ́ tɛ ká banɔ́ túméke tɔkɔma ;

² yááŋa anyía u káá banɔ́ túméke tɔkɔma bɔkɔ búmɔtɛ́ háyɛ nu ŋe nú túme bɔsɔ́ɔ́kɔ́ tɔkɔma. Aáná u káá banɔ́ kɛlaka bɔkɔ búmɔtɛ́ háyɛ nɔ naŋa nuanɔ́ kɛ́laka bɔsɔ́ɔ́kɔ́.

³ Huúúʼ ! Anyána ɔ ŋɔɔ́ lɛca efumbú a yááŋa eé nyiíse nyɛ́ sɔ́ɔ́kɔ́, a tɛ lɛca bɔɔtɛ́ a búáŋa a nyiɔ́wɔ e ?

⁴ Ta anyía anyána ɔ ŋɔɔ́ laana sɔ́ɔ́kɔ́ asɛ : “Ɔ́ɔ́kɔ, yámɛ ɔ waáŋía efumbú eé nyiíse”, yiíyi anyía bɔɔtɛ́ áŋa a nyiɔ́wɔ e ?

⁵ Kuɔŋɔ́, ɔɔcɔ u tɔbɛ́mbɛ túfendí, caŋácáŋa ɔbɛ́áŋía bɔɔtɛ́ a búáŋa oówo eé nyiíse, mbá é menyi ɔlɛca efumbú a yááŋa eé nyiíse nyɛ́ sɔ́ɔ́kɔ́.

⁶ Nuti íínjíékíne bɛnyɛ́ma e bifúúménénú ná ɛɛbɔ́, keyé cɛ́ káá banɔ́ bɛ́kɔ́ŋɔ́nɛ́na cɛ́ɔ banɔ́ nɔ́máka ; híáná tɔ́na, nɔtɛ aahákɛ́nɛ́na ɛŋɔnáfá bíánɔ́ bɛnyɛ́ma bɛ́ nyɛnɔ́kɔ́, keyé cí kéé biíbi eéndéke. »

Ánɔ kɔ́ŋgɛ́na, ánɔ aambáka, énu kitéke ehenyi

⁷ « Ánɔ kɔ́ŋgɛ́na, mbá bá káá banɔ́ iínjíékíne ; ánɔ aambáka, mbá nu ká nɔ́ bɔŋgɔ́na ; énu kitéke e ehenyi, mbá bá káá banɔ́ kúunine.

⁸ Yááŋa anyía ɔ ɔɔcɔ okime awɔ́ u ŋɔ kɔŋɛna, bé ké yíínjie ; okime awɔ́ u ŋa yáamba kɔ́ɔ́ bɔ́ŋɔ. Bé kéé kúunine ehenyi né ooci ewú u ŋé kíte.

⁹ Aányɛ́ síkíne cɛ baáná aanɔ́ ɛ ɛkatɛ́katɛ́ áŋa wu owiínjie uúyé ɔɔ́nɔ́ nyɛndányɛ́, mbɔ́kɔ ɔɔ́nɔ́ ŋeé wuúci kɔ́ŋɛ́na bɔkɔ bɔ́ ɔnyíá e ?

¹⁰ Ta anyía ɔɔ́nɔ́ é wuúci kɔ́ŋɛ́na hiɔfɔ́, yó wuúci íínjie yeéménéméné e ?

¹¹ Hú banɔ́ abá nua nɔ́ŋa bɛɛbɛ́ bɛ́ baacɔ, nu ŋe nú menyi owiínjie báánɔ́ baáná bɛmbányɛ bɛ́ bɛnyɛ́ma. Mbá anyána aná na cianɔ́ Síkíne cɛ Ɔmuaná e ? U kéé yiínjíékíne bɛmbányɛ bɛ́ bɛnyɛ́ma ɔ ɔhɔla a baacɔ e bé ŋe bú wuúci kɔŋɛna.

¹² Aáná bɔkɔ bukime ebú nu ŋe nú léne anyía bɔsɔ́ɔ́kɔ́ ábɔ́ banɔ́ kɛlaka, banɔ́ tɔ́na énu beébe kɛlákɛ́na híáná. Yááŋa anyía aáná ne *bikotí bí *Moyís ne tufule tú *behémúnyi bɛsana bá Bandɔ́mɛsɛ́ ŋé yeékúnyi anyía nuanɔ́ kɛlákaʼo. »

Ehenyi a yɛsákɛ́nánɔ́

¹³ « Ánɔ hɔ́lákɛ́na e ehenyi a yɛsákɛ́nánɔ́, anyía ne ehenyi a yɛbásɛ́mánɔ́ ne ohónyí a waáŋánáŋána ŋa cɔ́bana baacɔ e bunyímé noómi. Aáná baacɔ beéŋí ŋa bɔ́ hɔ́lɛna hɔ́á.

¹⁴ Ɛ́ɛhɛ́ ánɔ hɔlákɛ́na e ehenyi a yɛsákɛ́nánɔ́, anyía ne ehenyi eéyé na ɔbɔ́bɔ yí ohónyí ŋa cɔ́bana baacɔ o olíhe noómi. Aáná ɔmbana ú baacɔ otíkítíki ŋa hɔ́lɛna hɔ́á. »

Na atɔ́kɔ́ na bíáyɛ́ bɛtámá

¹⁵ « Énu bíkékényíki *behémúnyi bɛsana bá bɛfala. Bá ŋa bɔ́ faaya náánɔ́ ne meleŋébínyí ma ɛtɔ́mbá aá cɛɛ́tɔ, yiíyi anyía ɛ ɛtɛ́má noómi bá ŋa bɔ́ sáama háyɛ mɔmɔ́ndá.

¹⁶ Banɔ́ bɛ́muátá nu ké nú beébe menyukune a maabɔ́ mekilíkínyí. Yááŋa anyíaʼo, bá naŋa bá tɛ á káta tɔlɔndɔ a yaanda yɛ́ ɛsándá, te bitoli a nyɛliaŋɛ.

¹⁷ Ambányɛ yɛ́ atɔ́kɔ́ ekime ŋaá háá bɛmbányɛ bɛ́ bɛtámá, aabɛ́ yɛ́ atɔ́kɔ́ ekime hááka bɛɛbɛ́ bɛ́ bɛtámá.

¹⁸ Aáná ambányɛ yɛ́ atɔ́kɔ́ tɛ á bá yɛ́ ɔhááka bɛɛbɛ́ bɛ́ bɛtámá ta buɔ́sɛ́ ; ta aabɛ́ yɛ́ atɔ́kɔ́ tɛ háá bɛmbányɛ bɛ́ bɛtámá ta buɔ́sɛ́.

¹⁹ Yááŋa anyía a atɔ́kɔ́ ekime a yɛ́ tɛ ŋáa háá bɛmbányɛ bɛ́ bɛtámá, ɛ naŋa bé yiíyi kuusi, bɔ́ tɛ́ábákɛ́na e tuúnyi tú oocó.

²⁰ Ɛ́ɛhɛ́ banɔ́ bɛ́muátá nu ké nú ményukune behémúnyi bɛsana bá bɛfala a maabɔ́ mekilíkínyí.

²¹ Tɛ́ cáŋa baacɔ bekime e bé ŋe bú mi cienyi anyía “Otéŋí a Waáŋá, Otéŋí a Waáŋá” bá ká bɔ́ bámɔ́kɔ́nɛ́na ɔ ɔlɔŋɔ ú baacɔ abá Bandɔ́mɛsɛ́ ŋeé téŋínyi ; mbá hú baacɔ a bá ŋa bɔ́ kɛla bɛsana abɛ́ ciamɛ Síkíne cɛ Ɔmuaná ŋeé léne anyía bá kɛláka.

²² Ekúlú ayɛ́ ɛ ká mɛ́ faaya o okokélísi baacɔ, baacɔ beéŋí ká bɔ́ mɛ́ laakɛna báyɛ : “Otéŋí a Waáŋá, Otéŋí a Waáŋá ! Tɛ́ka ɔ nyíɔ́wɔ nyiínyi tu ŋe sú hémúkúnyi baacɔ bɛsana e ? Tɛ́ka ɔ nyíɔ́wɔ nyiínyi tu ŋa sɔ́ bá tu húlé ésú hémúkúnyi *bɛɛbɛ́ bí bililé a baacɔ e ? Tɛ́ka ɔ nyíɔ́wɔ nyiínyi tɔ́na tu ŋa sɔ́ kɛ́láka *bikéki bɛ́ bɛsana biéŋí e ?”

²³ Mbá yaŋɔ́, i ké mí beébe bɛ́kámáka ɛsɛ́ : “Ánɔ mɛ hatɔ́kɔ́nɛ́na eé buúse. Ɛ́ tɛ ŋá mɛ́ banɔ́ ményi buúse bukime, banɔ́ bakɛla maabɛ́ eebe.” »

Ɛnjaba ci betúme meébe

²⁴ « Ɛ́ɛhɛ́ ɛ ŋa mɛ́ banɔ́ láana ɛsɛ́ ɔɔcɔ okime awɔ́ u ŋa lɔ́kɔ́ma ɔtáŋa ooci, u látákɛ́na bɛsana abɛ́ ɛ ŋa mɛ́ kɔɔna anyía wá látákɛ́na, káá hɔ́áka ɔɔcɔ u injiŋé ewú u ŋe túméké ciayɛ́ ciíbe a nyɛndányɛ́ ɔ ɔmuaná.

²⁵ Ekúlú eyí ehúne ŋeé húnékíne ciíbe, nɔbɔ́lá núɔ́ náakɛnɛna, bihéŋélumé bɛ́ɔ cákáka ciíbe eécí ; ci ti ómó bínyíétínyi te butíkítíki, anyía cɛ ŋaá bá itúmékénú a nyɛndányɛ́ ɔ ɔmuaná.

²⁶ Mbá ɔɔcɔ okime awɔ́ u ŋaá lɔ́kɔ́ma bíámɛ bɛsana eebi, u ti biíbi látɛ́na, káá hɔ́áka ɔɔcɔ u kɛlá injiŋé a aatɔ́ ewú u ŋe túméké ciayɛ́ ciíbe ɔ ɔsɛ́bɛ́á ɔ ɔmuaná.

²⁷ Ekúlú eyí ehúne ŋeé húnékíne ciíbe, nɔbɔ́lá núɔ́ náakɛnɛna, bihéŋélumé bɛ́ɔ cákáka ciíbe eécí ; cɛ ŋá kúakɔ́na búlukutukutu ! Nyɛkatɛaka eényí hú ikime. »

Yésus ŋe yeékúnyi na bɔɔcɔ

²⁸ Ɛ́makɛ́la Yésus á mana ɔtáŋa oócí, baacɔ bekime ŋé kékéke buéŋí a asana na nyíáyɛ́ nyɛnamá nyí oweékúnyi baacɔ bɛsana.

²⁹ Yááŋa anyía u ŋaá bá we yeékúnyíki na bɔɔcɔ bukime ; tɛ́ cáŋa a nyɛnamá nyɛ́ báábɔ́ *beékúnyi bikotí.