Matío 20 - Nomaande

Ɛnjaba cɛ bɔnyiɔnɔ bé bikúlú bikúlú

¹ « *Butéŋí bɔ́ Ɔmuaná ŋaá hɔ́á muútí esíéné a wɔmɔtɛ́ awɔ́ u ŋaá hámá tútútú nɔɔ́nɔyá a cɛ́mɔtɛ́ ɔ ɔkɔwáamba baacɔ bá ɔkɔnyíɔkɔ a yááyɛ́ esíéné.

² Ayɛ́ u ŋeé beébe bɔ́ŋɔ́, bá ŋá lɔ́kɔ́mákána anyía u káá námaka hú náányɛ́ bɛnamá a bɛ́ bá náŋa bá námaka munyiɔnɔ buólí mukime a buɔ́sɛ́ bukimekime. E elime eécí, u ŋé beébe tɔ́mɔ́kɔ́na ɔ ɔkɔɔ́nyiɔ eeyé e esíéné.

³ Aáná, i injéŋí ɛnámanyɛ́ nɔ́mɔ, ɔɔcɔ oócí ŋá háná cɔbá ɔ ɔkɔwáamba bɔnyiɔnɔ bé etémbí ; yɔ́ lɛca baacɔ a bɔ́mɔtɛ́ talɛ́mákɛ́na a kɛbalɛ, bá tɛ kɛla ta bɔkɔ.

⁴ Mbá ɔsɛ náábɔ́ : “Ánɔ cɔba banɔ́ tɔ́na ɔ ɔkɔɔ́nyiɔ eémí e esíéné, ɛ ká mɛ́ banɔ́ námaka háyɛ yɛ́ ŋaá bɛ́ámba.”

⁵ Bá ŋa bɔ́ cɔba ɔ ɔkɔɔ́nyiɔ e esíéné. Muútí esíéné eémú ŋa háná cɔ́ba ɔ ɔkɔwáamba bɔnyiɔnɔ ne e túefi, ne i injéŋí ɛ́tátɔ́ ; u ŋé cíkílíékéne ne beébe háyɛ na bɔsɔ́ɔ́kɔ́ a bɔ́mɔtɛ́.

⁶ E elime, hoóhi ne injéŋí ɛ́táánɔ cɛ nanyiɔ́fɔ́, u ŋá háná cɔ́ba ɔ ɔkɔwáamba bɔnyiɔnɔ bé etémbí ; yɔ́ lɛca baacɔ a bɔ́mɔtɛ́ tɔ́na tálɛ́mákɛ́na a kɛbalɛ. U ŋé beébe bata ɔsɛ : “Anyíatɛ́ nú ŋe nú húlísi buɔ́sɛ́ bukimekime talɛ́mákɛ́na aáhá, nu tɛ nyiɔ buólí e ?”

⁷ Mbá báyɛ nááyá : “Yááŋa anyía ta ɔɔcɔ tɛ ɔ́mɔɔ́ basɔ́ híite e buólí.” Mbá ɔsɛ náábɔ́ : “Banɔ́ tɔ́na, ánɔ kɔ nyiɔ́kɔ eémí e esíéné.”

⁸ Nanyiɔ́fɔ́, muútí esíéné ŋá laana múáyɛ́ mutákɛ́na bɔnɔ́mɛ ɔsɛ : “Lɔ́ŋɔ́kɔ bɔnyiɔnɔ bekime, beébe namáka hú náányɛ́ bɛnamá bɛ́ buɔ́sɛ́ bú buólí. Túmíne ɔnama bɔsɔ́ɔ́kɔ́ e bébú bíóndísínyi okutimine buólí, mbá e bíondísínyi ɔnama bɔsɔ́ɔ́kɔ́ a bábɔ́ cáŋa okutimine.”

⁹ Aáná bɔnyiɔnɔ e bé ŋge bú síé i injéŋí ɛ́táánɔ cɛ nanyiɔ́fɔ́ ŋa bɔ́ faáya ; bɔ́ námaka hú náányɛ́ bɛnamá a bá naŋa bá námaka munyiɔnɔ a buɔ́sɛ́ bú buólí bukimekime.

¹⁰ Ɛ́makɛ́la bɔnyiɔnɔ e bé ŋe bú síé nɔɔ́nɔyá a ká bɔ́ hámá o ohiite bíábɔ́ bɛnamá, bé kétiki báyɛ bíábɔ́ bɛnamá ŋa cɔba ɔ ɔhɔla bɛ́ bɔsɔ́ɔ́kɔ́ ; mbá bé ŋé beébe iínjíékíne hú náányɛ́ bɛnamá a bá naŋa bá námaka buólí bɔ́ buɔ́sɛ́ bukimekime.

¹¹ Ɛ́makɛ́la bébú híítéke bɛnamá, bé ŋé túme obícúcúlíne muútí esíéné,

¹² báyɛ : “Bɔnyiɔnɔ bé elime eebe ŋá bɔ́ nyíɔ́kɔ hú onjéŋí ɔ́mɔtɛ́, ó moó beébe namaka bɔkɔ búmɔtɛ́ na basɔ́ ebé tú me sú eéhínyínyi na ɔtɔmbɔ na ɔɔ́cɔ́ ú buɔ́sɛ́ bukimekime.”

¹³ Aáná ɔɔcɔ oócí ŋaá bɛ́káma ɔɔcɔ ɔmɔtɛ́ a baacɔ eébé ɔsɛ : “Aláamɛ, ɛ tɛ ɔ́mɔɔ́ kuɔŋɔ́ kɛ́lɛna aabɛ́ yɛ́ ɔtɛ́má a yɛ́mɔtɛ́. Yaŋɔ́ ɛsɛ tua sɔ́ŋa balɔ́kɔ́mákánánɔ́ na kuɔŋɔ́ anyía ɛ ŋa mɛ́ ɔ namaka bɛnamá bɛ́ buɔ́sɛ́ bú buólí bukimekime e ?

¹⁴ Hiíte aná bíɔ́wɔ bɛnamá, á hatɔ́na eémi e buúse. Yaŋɔ́, yémi lénéke ɔnama munyiɔnɔ e mú e bíóndísínyi osíé bɔkɔ búmɔtɛ́ háyɛ kuɔŋɔ́.

¹⁵ Yááŋa anyía ɛ tɛ ámɛ bá wu ɔbɛ́kɛ́lákɛ́na búámɛ bɔnɔ́mɛ háyɛ bú ŋeé mi bíléníne, ta anyía ɔ ŋɔɔ́ lɔ́kɔ́ma bɔɔbɛ́ na yáámɛ ambányɛ yɛ́ ɔtɛ́má e ?”

¹⁶ Ɛ́ɛhɛ́ yááŋa anyía baacɔ bé elime ká bɔ́ bámɔ́kɔ́na baacɔ bé buúse ; bé buúse bɔ́ hálɔ́mɔ́kɔ́na baacɔ bé elime. »

Yésus ŋa háná é bíkétínyi baacɔ úúyé owé

¹⁷ Ekúlú eyí Yésus ŋaá bá waá báátáka eé Yelúsalɛm, u ŋeé bísúétíne bááyɛ́ *baákɔ́nɛ́na bɔ́ɔ́hátá ne béfendí a mafákálɛ́ana, bábɔ́ kandaka o ohónyí, mbá ɔsɛ náábɔ́ :

¹⁸ « Ɛ́náʼo, aámbáya basɔ́ eebe tua sɔáŋa ɔ ɔbááta eé Yelúsalɛm ; hɔ́á bé kéé mí fiimbie né ne betéŋínyi *beluli nyiínjie ne *beékúnyi bikotí, yaŋɔ́ Ɔɔ́nɔ́ u ɔɔcɔ. Bá ká bɔ́ sɔ́mbɔ́tɔ́na anyía bá mɛ ɔ́ɔ́nɔ́.

¹⁹ Bó mi fiimbie né be-ti-menyí Bandɔ́mɛsɛ́ ; baacɔ eébé ká bɔ́ mɛ ɔɔ́mbɔ́náka, bó mi súbéke ne mesue, bɔ́ mɛ aátákɛ́na ɔ ɔmbásá. Mbá a matátɔ́, míɔ haanyua o owé. »

Oónyí u Sebeté ŋaá bátɛ́na baáná elimíné né Yésus

²⁰ Aáná oónyí u Sebeté ŋeé bíkósíti né Yésus ɔlɔŋɔ na bááyɛ́ baáná ; u ŋé túmíne Yésus eŋéndu o o wuúci bata bɔkɔ.

²¹ Yésus ŋeé wuúci batá ɔsɛ : « Aátɛ́ ɔ ŋɔɔ́ waamba e ? » Mbá oónjú ɔsɛ : « Mɛ bɛ́tánɛ́na anyía báámɛ baáná béfendí eebe ké ké bú límine ɔɔ́wɔ a maabána ; ooci e nyilimíné a aháŋá yí uúwu ɔɔbɔ́ ú manɔ́mɛ, ooci a wɔmɔtɛ́ e nyilimíné a aháŋá yí uúwu ɔɔbɔ́ ú meényi ekúlú ayɛ́ ɔ kɔ́ɔ́ bá o otéŋínyi baacɔ. »

²² Mbá Yésus ɔsɛ náábɔ́ : « Nu ti ŋé nú menyi asana ayɛ́ nu ŋa nɔ́ mɛ bata. Mbá nua nɔ́ŋa nu ɔnɔ́mátána ɔmúána nyɛnamá nyí hindeŋé hí indekese ahɛ́ míɔ cɔba ɔ ɔmúána e ? » Mbá báyɛ : « Ɛ́ɛ, tua sɔ́ŋa tu ɔnɔ́mátána ! »

²³ Mbá Yésus ɔsɛ : « Oo, yááŋa taaká anyía nu ká nɔ́ nɔ́mátána ɔmúána nyiámɛ nyɛnamá nyí indekese anyɛ́ míɔ cɔba ɔ ɔmúána, mbá a asana yí owiínjíékíne baacɔ elimíné aámɛ a maabána a aháŋá yɛ́ ɔɔbɔ́ ú manɔ́mɛ ta anyía a aháŋá yɛ́ ɔɔbɔ́ ú meényi, tɛ́ cáŋa yaŋɔ́ i ŋé mi ceéce iínjíéne. Mbá ciamɛ Síkíne bímuócí u ŋeé ceéce íínjie á baacɔ ebé u ŋe ceéce tábɔ́nákɛ́na. »

²⁴ Ahá bɔsɔ́ɔ́kɔ́ *baákɔ́nɛ́na bɔ́ɔ́hátá ŋa bɔ́ lɔ́kɔ́ma asana yí bífendí eébí, bé ŋé beébe lɔ́kɔ́mɛ́na bɔɔbɛ́.

²⁵ Aáná Yésus ŋeé beébe bánda bekime, mbá ɔsɛ náábɔ́ : « Nu ŋe nú menyi banɔ́ bɛ́muátá anyía betéŋínyi baacɔ, be-ti-menyí Bandɔ́mɛsɛ́, ŋe bú kéndi bɔsɔ́ɔ́kɔ́ ne mutibílíéne mukime, ta *baáŋá ŋe bú tékese baacɔ o otóŋínyi anyía bé ŋe bú téŋínyi.

²⁶ Mbá náánɔ́, bú tɛ ŋáa nyɛmana bú ɔbá aáná : Ɔɔcɔ okime náánɔ́ awɔ́ u ŋa yáamba ɔbámɛ́na waáŋá ŋá nyɛmána ɔbɛ́cáŋa munyiɔnɔ mɔ bɔsɔ́ɔ́kɔ́ bekime.

²⁷ Híáná tɔ́na, ɔɔcɔ okime náánɔ́ awɔ́ u ŋa yáamba ɔbámɛ́na mutálɛ́mɛ́na eé buúse ŋá nyɛmána ɔbɛ́cáŋa yáánɔ́ yɔɔ́lɛ́.

²⁸ Yááŋa anyíaʼo, yaŋɔ́ bɛ́muátá ooci, Ɔɔ́nɔ́ u ɔɔcɔ, ɛ ŋa mɛ́ faaya ɔ ɔmɛsɛ́ ooci tɛ́ cáŋa anyía bá mɛ nyiɔkɛ́na buólí, mbá anyía yámɛ nyiɔkɛ́na baacɔ, tɔ́na anyía yé ke mí wééné ɔ ɔháŋɔ́náka baacɔ beéŋí. »

Yésus me yeéŋúnyísi bendíméndíme béfendí

²⁹ Ɛŋakɛlá ne Yésus na bááyɛ́ *baákɔ́nɛ́na ábɔ́ hátɔ́na a bálɛ́ka ci Yéliko o osúéte, yaandándá yí etúte yɛ́ baacɔ ŋé wuúci látákɛ́na.

³⁰ Aáná bendíméndíme béfendí a bá ŋa bɔ́ bá bé ke bú límékíne a maabána me ohónyí ŋa bɔ́ lɔ́kɔ́ma anyía Yésus u ŋá hɔ́la. Bé ŋe túme o wuúci baŋɛna báyɛ : « Kuɔŋɔ́, ɔɔ́nɔ́ u Táfit ! Cɔ́kɔ́lɛ, Otéŋí a Waáŋá, basɔ́ bɛ́cáma mahanaʼo ! »

³¹ Baacɔ bé etúte ŋaá bá bébú beébe kákálákɛ́na anyía bé lésíkínyi mbuumu ; ta híáná, bá ŋa bɔ́ cɔ́bá ne buúse o o wuúci baŋɛna na makɛ́nda ɔ ɔhɔla, báyɛ : « Kuɔŋɔ́, ɔɔ́nɔ́ u Táfit ! Cɔ́kɔ́lɛ, Otéŋí a Waáŋá, basɔ́ bɛ́cáma mahanaʼo ! »

³² Aáná Yésus ŋáa tálɛ́mɛ́ná, u ŋé beébe lɔ́ŋɛ́tá, mbá ɔsɛ : « Aátɛ́ nu ŋa nɔ́ áamba anyía yámɛ banɔ́ kɛ́la e ? »

³³ Mbá bendíméndíme eébé báyɛ : « Otéŋí a Waáŋá, tu ŋa sɔ́ áamba anyía túásɔ́ lɛcákána. »

³⁴ Nyíáyɛ́ nyi beébe bɛ́cáma mahana eényí, yó bítíséke cáábɔ́ eése ; hí a yaátɛ́ ekúlú bá ŋa háná ébú túme ɔlɛcana, bé ŋé wuúci látáka.