Matío 19 - Nomaande

A asana ne oweélúnyi nyɛtɔ́nɔ́

¹ Ɛ́makɛ́la Yésus aá máná oweékúnyi baacɔ aáná, u ŋá hatɔ́na a *Kalilé, u ŋé súéte i iisí ci Yuté e ecinyíé caányɛ́ ci nuúci nú Sulutɛ́ŋ.

² Bɛandándá bí bitúte bɛ́ baacɔ ŋeé wuúci látákɛ́ná, yó biíbi ééŋúnyísíki hɔ́á.

³ Aáná *Bafalisiɛ́ŋ ŋe bú bíkósíti nááyá o o wuúci kɔkɔ́na, báyɛ : « Ɔ́kɔ, *bikotí bɛ́ bunɔŋɔ ŋe yíinjie ɔnɔ́mɛ makɛ́nda me okine oónyí ta a hɛsanasáná hɛ́ buála e ? »

⁴ Mbá ɔsɛ : « Banɔ́ ta ɔfana Ciɔɔ́ŋɛ́ cɛ́ Bandɔ́mɛsɛ́ e ? Yááŋa yɔɔ́ŋɔ́kɔ́nɔ́ hɔ́á anyía, e nyitúme Muketi bɛnyɛ́ma bikime ŋe kétíki na ɔnɔ́mɔcɔ́ ne oónjú ;

⁵ yɔ́ kɔ́ɔna ɔsɛ : “Yaátɛ́ asana ɔnɔ́mɔcɔ́ káá hátɔna a maabána me ne iinyí ne síkíne, yɔ́ kɔ látana ne oónyí. Bífendí eébí bɛ́ɔ́ kɔ bámɔ́kɔ́na ɔɔcɔ ɔmɔtɛ́.”

⁶ Aáná bá tɛ abɔ́ bá tɔ́na baacɔ béfendí, mbá bá bɔ́áŋa hú ɔɔcɔ ɔmɔtɛ́. Ɛ́ɛhɛ́ ɔɔcɔ tɛ ɔ́mɔɔ́ nyɛmána aná wu oweélúnyi nyɛtɔ́nɔ́ nyɛ́ baacɔ abá Bandɔ́mɛsɛ́ á láta. »

⁷ Bafalisiɛ́ŋ ŋá háná bata báyɛ : « Anyíatɛ́ aná *Moyís ŋe yíínjie ɔnɔ́mɛ makɛ́nda me owiínjie nufule nɔ́ ɔwaálɔ́na nyɛtɔ́nɔ́ né oónyí anyía wé wuúci kine e ? »

⁸ Mbá ɔsɛ náábɔ́ : « Ɛ́ɛ, Moyís ŋaá banɔ́ íínjíé makɛ́nda me okineke báánɔ́ beényí aáná a asana na bíánɔ́ bɛnatákánɔ́ bɛ́ ɛtɛ́má ; bú tɛ́ ɔ́mɔɔ́ bá aáná buáyá e nyitúme.

⁹ Ɛ́ɛhɛ́ ɛ ŋa mɛ́ banɔ́ láana isíʼo : Ɔnɔ́mɛ okime ewú é kíné oónyí, mbá u bátɛ́na oónjú u etémbí, ɛ tɛ ŋáa bá hú anyía oónyí u buúse áŋa ɔkandákánɔ́ hɛsɔmɔ, ɔɔcɔ oócí ma kándaka hɛsɔmɔ. »

¹⁰ Aáná Baákɔ́nɛ́na ŋe bú wuúci láana báyɛ : « Mbɔ́kɔ aáná búáŋa ná ɔnɔ́mɔcɔ́ a asana na ɔbátɛ́na oónjú, búáŋa bɔmbányɛ anyía wɔ́ lɔ́bɔ ɛlɛmba. »

¹¹ Mbá ɔsɛ náábɔ́ : « Tɛ́ cáŋa baacɔ bekime bá bɔ́ŋa na makɛ́nda me olumitine nyiékúnyi eényí, ɛ tɛ ŋáa bá hú baacɔ abá Bandɔ́mɛsɛ́ ŋe yiínjíékíne makɛ́nda me olumitine aáná.

¹² Yááŋa anyía banɔ́mɔcɔ́ a bɔ́mɔtɛ́ á bɔ́ŋa ɛnjɛlɛ o otúme a nyíábɔ́ nyibíbíéne ; a bɔ́mɔtɛ́, bɔsɔ́ɔ́kɔ́ baacɔ bé ŋée beébe ceŋísíki beekí. A bɔ́mɔtɛ́ tɔ́na ŋa bɔ́ bɛ́cáŋáka ɛnjɛlɛ a asana ne *Butéŋí bɔ́ Ɔmuaná. Ɔɔcɔ a wáŋa wu olumitine asana eéyé ŋá nyɛmána wu olumitine. »

Yésus ŋa sáyábɛ́na banásɛ́

¹³ Baacɔ ŋa bɔ́ cɔ́bákána banásɛ́ né Yésus anyía wé beébe táláka aabá, mbá u beébe bɛ́cɔ́kɔ́lɔ́kɛ́nɛ́na Bandɔ́mɛsɛ́. Ta híáná, *baákɔ́nɛ́na ŋa bɔ́ kákálákɛ́na baacɔ eébé ɔkɛla aáná.

¹⁴ Mbá Yésus ɔsɛ : « Nuti beébe lekéke. Ánɔ nyɛanáka banásɛ́ á faakɔ́na náámɛ, anyía Bandɔ́mɛsɛ́ ŋe téŋínyi baacɔ a bá bɔ́ŋa a ciabɔ́ ihúényínyí. »

¹⁵ Ɛ́makɛ́la wa táláka banásɛ́ aabá, u ŋá hátɔ́na aáhá, u ŋé súéte.

Ɛnɔ́mɛ cɛ ɔɔcɔ

¹⁶ Ɔɔcɔ a wɔmɔtɛ́ ŋeé bíkósíti né Yésus, yó wuúci bata ɔsɛ : « Muékúnyi, aátɛ́ a yambányɛ yámɛ nyɛmána wu ɔkɛlaka anyía yámɛ bɔ́ŋɔ yɔɔ́sɔɔ́sɔ yí olíhe yí ekúlú ekime e ? »

¹⁷ Yésus ŋé wuúci bɛ́káma ɔsɛ : « Anyíatɛ́ ɔ ŋɔ mɛ bata asana a yambányɛ yɛ́ ɔkɛlaka e ? Ambányɛ yɛ́ ɔɔcɔ áŋa hú ɔmɔtɛ́. Mbɔ́kɔ ɔ ŋɔɔ́ waamba ɔbɔ́ŋɔ olíhe, látákɛ́na *bikotí. »

¹⁸ Ɔɔcɔ oócí ɔsɛ : « Bikotí bɛ́ háányɛ́ e ? » Yésus ɔsɛ : « Atɛ ɔ́ɔ́nɔ ɔɔcɔ ; atɛ kandáka tusɔmɔ ; eti éébe ; atɛ sɔ́mbɛ́na ɔɔcɔ asana ;

¹⁹ kékéke na ɔɔtɛ́ na ɔɔnyia ; lénéke sɔ́ɔ́kɔ́ háyɛ o ŋoó léne ciɔwɔ cɛɛ́tɔ cɛ bɛ́muátá. »

²⁰ Mbá ɔnɔ́kɔ́ yɛ́ ɔɔcɔ yɛ́sɛ né Yésus : « Ya mɛ́ŋa ɔlátákɛ́nánɔ́ bikotí eébí bikime ; aátɛ́ yí etémbí yɛ́ ŋaá mɛ bɛ́ámbɛ́na ɔkɛla e ? »

²¹ Mbá ɔsɛ ná ɔɔcɔ : « Mbɔ́kɔ ɔ ŋɔɔ́ waamba ɔbámɛ́na taaká cɛ ambányɛ yɛ́ ɔɔcɔ ɔ ɔhɔla, cɔbá ké ke túéke buɔ́wɔ bɔnɔ́mɛ bukime, mbá a aafakɛna mɔɔnyɛ́ ná basɔ́kásɔ́ka ; aáná ɔ kɔ́ɔ́ bá na bɔnɔ́mɛ a Bunɔŋɔ bɔ́ Ɔmuaná. Mbá a faaya, e búle mɛ látɛ́na. »

²² Mbá, ɛ́makɛ́la ɔnɔ́kɔ́ yɛ́ ɔɔcɔ eéyé á lɔ́kɔ́máká aáná, u ŋá hɔlá ne meliŋé ɔ ɔtɛ́má hú mbiɔ́kɛ, anyía u ŋaá bá na bɔnɔ́mɛ buéŋí.

²³ Mbá Yésus ɔsɛ ná bááyɛ́ *baákɔ́nɛ́na : « Hmm ! Ɛ ŋa mɛ́ banɔ́ láana aá taaká, isíʼo : Yááŋa anatákánɔ́ yɛ́ asana anyía ɛnɔ́mɛ cɛ ɔɔcɔ o yóofine e *Butéŋí bɔ́ Ɔmuaná.

²⁴ I ŋe túné ámɛ banɔ́ láana, isíʼo : Yááŋa fiaŋɔ anyía samó á hɔlɛ́na o onue ú ɛndɔndɔkɔ na anyía ɛnɔ́mɛ cɛ ɔɔcɔ ó yóófíne e Butéŋí bɔ́ Bandɔ́mɛsɛ́. »

²⁵ Ɛ́makɛ́la baákɔ́nɛ́na ábɔ́ lɔ́kɔ́máká aáná, bé ŋe kéké buéŋí, mbá báyɛ : « Mbá aáháʼo, aányɛ́ wáŋa wu ɔnɔhɔ aná e ? »

²⁶ U ŋeé beébe bísíémúkúnyí, mbá ɔsɛ náábɔ́ : « A aháŋá na baacɔ, bú tɛ á bá bú ɔbɛ́kɛ́láka buúse bukime, mbá Bandɔ́mɛsɛ́ áŋa wu ɔkɛla bɔkɔ bukime. »

²⁷ Aáná Bíel ŋa bátá Yésus ɔsɛ : « Ɛ́náʼo, basɔ́ abá tu ŋa sɔ́ bɛ́yuátáka bíásɔ́ bɛnyɛ́ma bikime, túɔ́ kuɔŋɔ́ látáka oóoʼ ; aátɛ́ tu ká sɔ́ bɔ́ŋgɔ́na e ? »

²⁸ Mbá ɔsɛ : « Ɛ ŋa mɛ́ banɔ́ láana aá taaká, isíʼo : Ekúlú ayɛ́ Ɔɔ́nɔ́ u ɔɔcɔ káá bá oliménénú aáyá a nɔkɔná nú nuúmi e nyikumbutune nyɛ́ bɛnyɛ́ma bikime, banɔ́ eebe abá nú ŋa nɔ́ mɛ látákɛ́na, nu ká nɔ́ bá tɔ́na limekine a tɔkɔná túɔ́hátá ne túfendí o okélísi baacɔ bá *tɔnyɛ́nɔ́ túɔ́hátá ne túfendí tú *Islayɛ́l.

²⁹ Aáná ɔɔcɔ okime awɔ́ u ká bɛ́yúáta bɔkɔ a búmɔtɛ́ aámɛ a asana, te cííyí iiki, te benyíinyí a banɔ́mɔcɔ́, te e beénjú, te iinyí te síkíne, ta baáná mbá ta ciayɛ́ iisí, é menyí anyía u kɔ́ɔ́ bɔ́ŋɔ ne etíne atáánɔ cá bɔkɔ bukime ebú u ŋeé síké na yɔɔ́sɔɔ́sɔ yí olíhe yí ekúlú ekime.

³⁰ Ɛ́ɛhɛ́ yááŋa anyía baacɔ beéŋí a bá bɔ́ŋa aámbáya eé buúse ká bɔ́ hálɔ́mɔ́kɔ́na e elime ; beéŋí a bá bɔ́ŋa e elime ká bɔ́ hɔ́laka eé buúse. »