Matío 18 - Nomaande

Aányɛ́ wáŋa waáŋá ɔ ɔhɔla e

¹ E ekúlú eéyé, *baákɔ́nɛ́na ŋe bú bíkósíti né Yésus, bé ŋe wuúci batá báyɛ : « Aányɛ́ wáŋa waáŋá ɔ ɔhɔla baacɔ bekime e Butéŋí bɔ́ Ɔmuaná e ? »

² Yésus ŋɔ́ lɔ́ŋɛ́ta ɔɔ́nɔmbɔ́, yó wuúci télímínyi aabɔ́ ɛ ɛkatɛ́katɛ́, mbá ɔsɛ :

³ « Ɛ ŋaá mɛ banɔ́ láana aá taaká taaká isíʼo : Mbɔ́kɔ nu tɛ ŋá nɔ́ bɛ́kɔ́ŋɔ́nákɛ́na ɛtɛ́má, núɔ bámɔ́kɔ́na na ɛtɛ́má cɛ́ banásɛ́, nu ti ké nú oofókíne e *Butéŋí bɔ́ Ɔmuaná.

⁴ Yaátɛ́ asana, ɔɔcɔ okime ewú u kéé bílóosi ɔ ɔmɛsɛ́, yɔ́ bámɔ́kɔ́nɛ́na na ɔtɛ́má ú ɔɔ́nɔmbɔ́, wuúci wáŋa waáŋá ɔ ɔhɔla baacɔ bekime e Butéŋí bɔ́ Ɔmuaná.

⁵ Híáná ɔɔcɔ okime awɔ́ á káha bɔmbányɛ ɔɔ́nɔmbɔ́ háyɛ ooci eémi e nyiínyi, ɛ́cɛ ú maá mɛ káha tɔ́na bɔmbányɛ.

⁶ Asana ɔ́mɔtɛ́, ɔɔcɔ é kúfítínyi ɔɔ́nɔmbɔ́ ɔmɔtɛ́ a banásɛ́ eebe a bá ŋa bɔ́ háya mɔŋɔlɛ́ náámɛ, yááŋa ambányɛ nááyá anyía bé wuúci ɔɔ́tɔ́kɔ́kɛ́na nɔsɔ́lɔ́ a amɛna, bé wuúci nyie i injibí cɛ nuɔmɔ́ noómi.

⁷ Mahana ná baacɔ bá ɔmɛsɛ́ a bɛsana e bí ŋe kúfítínyi bɔsɔ́ɔ́kɔ́ ɔ ɔkɛla bɔɔbɛ́. Ohónyí wú ɔfɛ́cáka bɛsana eébí tɛ a bá ; mbá mahana ná ɔɔcɔ ewú u ŋe kílisi baacɔ bɛsana eébí.

⁸ Mbɔ́kɔ a asana ne úúwu ɔɔbɔ́ ta anyía úúwu ɔkɔlɔ́ ɔ naŋa oó kúfétékéne o olumitinine, biíbi sɔ́mbáka é biíbi oombókóko haaca na kuɔŋɔ́. Yááŋa ambányɛ yɛ́ asana nɔ́ɔ́wɔ anyía óo woofíne a taaká ci olíhe ɔɔbɔ́ ɔmɔtɛ́, ta anyía ɔkɔlɔ́ ɔmɔtɛ́, ɔ ɔhɔla anyía ɔ́ɔ bá na cɔ́ɔ́wɔ aabá ekime, ta anyía cɔ́ɔ́wɔ akɔlɔ́ ekime, kuɔŋɔ́ ɔwaahɛ́nánɔ́ a nɔɔfia nú oocó noómi ewú ú ti ŋé nyíme ta buɔ́sɛ́.

⁹ Híáná tɔ́na, mbɔ́kɔ a asana na nyiɔ́wɔ nyiíse ɔ naŋa oó kúfétékéne o olumitinine, nyiínyi tasá, é nyiínyi oombóko haaca na kuɔŋɔ́. Yááŋa ambányɛ yɛ́ asana nɔ́ɔ́wɔ anyía óo woofíne a taaká ci olíhe nyiíse nyɛ́mɔtɛ́ ɔ ɔhɔla anyía ɔ́ɔ bá na cɔ́ɔ́wɔ eése ekime, mbá bá ɔ waahɛ́na a nɔɔfia nú oocó noómi ewú ú ti ŋé nyíme ta buɔ́sɛ́.

¹⁰ Énu bíkékényíki oféníne ta ɔɔ́nɔmbɔ́ ɔmɔtɛ́ a banásɛ́ eebe. Ɛ ŋa mɛ́ banɔ́ láana ɛsɛ́ : Ɔ Ɔmuaná *bililé bɛ́ masɔ́ma abɛ́ ciamɛ Síkíne cɛ Ɔmuaná ŋaá táfáka o o beébe ɔɔ́lɔ́kɔ á bɔ́ŋa ekúlú ekime eeyé eé buúse. [

¹¹ Yááŋa anyía Ɔɔ́nɔ́ u ɔɔcɔ ŋaá fááya ɔ ɔmɛsɛ́ ooci o okonóhiki baacɔ a bá ŋa bɔ́ bá ɛ́cɛ bé me bú nyímúkúne.]

¹² Aátɛ́ nu ŋa nɔ́ bɛ́táá e ? Túá kɔɔna anyía ɔɔcɔ a wɔmɔtɛ́ áŋa na ɛtɔ́mbá etíne atáánɔ. Ɛ́mɔtɛ́ é nyime, ɔ́kɔ, tɛ́ka ɔɔcɔ oócí káá nyɛ́ana etíne ényíse ne imbuke buunyi ne ínyíse bímuócí a nɔkɔndɔ ɔ ɔmuaná anyía wá caŋá ka yáambaka e cinyíménú e ?

¹³ Mbɔ́kɔ ú ŋgeé ciíci bɔ́ŋɔ, ɛ ŋa mɛ́ banɔ́ láana aá taaká isíʼo : U kéé bílénéke buéŋí a asana eéyé ɔ ɔhɔla asana yɛ́ ɛtɔ́mbá etíne ényíse ne imbuke buunyi ne ínyíse e cí ti ómo nyíme.

¹⁴ Híáná tɔ́na, cianɔ́ Síkíne cɛ Ɔmuaná tɛ ŋá yáamba anyía ta ɔɔ́nɔmbɔ́ ɔmɔtɛ́ a banásɛ́ eebe é nyímé. »

Onyíinyí u olumitinine awɔ́ u ŋá kɛla bɔkɔ a bɔɔbɛ́

¹⁵ « Mbɔ́kɔ ɔnɔ́ɔnyia a wɔmɔtɛ́ u olumitinine ŋá kɛla bɔkɔ a bɔɔbɛ́ a bɔ́mɔtɛ́, cɔba ké ké wuúci kákálákɛ́na hú banɔ́ béfendí. Mbɔ́kɔ u ŋa lɔ́kɔ́ma aáná, ó moó wuúci bísúétíne.

¹⁶ Mbá, mbɔ́kɔ u tɛ ŋáá lɔ́kɔ́ma aáná, ké ké wuúci laána eé buúse bɔ́ ɔɔcɔ u etémbí ta anyía eé buúse bɔ́ baacɔ béfendí. Yááŋa anyía Ciɔɔ́ŋɛ́ ŋa kɔɔna anyía asana ekime ŋá nyɛmána yí obícíkílíékéne eé buúse bɔ́ bambasɔ́mbásɔ béfendí ta anyía bátátɔ́.

¹⁷ Mbá wéé kíne tɔ́na ɔlɔ́kɔ́ma ilébé cɛ baacɔ eébé, cɔbána asana eéyé eé buúse bɔ́ hiɔ́bɔ hí belumitinine. Weé kíne tɔ́na ɔlɔ́kɔ́mɛ́na hiɔ́bɔ hí belumitinine, wuúci hiíte háyɛ mu-ti-menyí Bandɔ́mɛsɛ́ ta anyía háyɛ *mutúé etéési.

¹⁸ Aá taaká ɛ ŋa mɛ́ banɔ́ laana anyía bɔkɔ bukime ebú nu ké nú koti aaha ɔ ɔmɛsɛ́, á yáa báka bukotínyí ɔ Ɔmuaná ; bɔkɔ bukime ebú nu ké nú lumitine anyía búá bɛ́kɛ́láka aaha ɔ ɔmɛsɛ́, á yáa báka bulumítínénú ɔbɛ́kɛ́la ɔ Ɔmuaná.

¹⁹ Aá taaká ɛ ŋa háná ámɛ́ banɔ́ laána anyía mbɔ́kɔ baacɔ béfendí aá banɔ́ aaha ɔ ɔmɛsɛ́ ŋa bɔ́ lɔ́kɔ́mána, bɔ́ báta Bandɔ́mɛsɛ́ ɔ ɔbɛ́cɔ́kɔ́lɛ́na noómi asana a yɛ́mɔtɛ́, ciamɛ́ Síkíne cɛ Ɔmuaná káá kɛlaka asana eéyé.

²⁰ Yááŋa anyía haála hekime ahá baacɔ béfendí ta anyía bátátɔ́ abɔ́ bɛ́bándána eémi e nyiínyi, ya mɛ́ŋa aabɔ́ ɛ ɛkatɛ́katɛ́. »

Ɛnjaba cɛ munyiɔnɔ a mɔ́ tɛ ŋáá nyɛanɛnɛna

²¹ Bíel ŋeé bíkósíti né Yésus, mbá ɔsɛ : « Taatá, bikúlú bínyie yámɛ nyɛmána wu ɔnyɛanakɛna uumi onyíinyí awɔ́ u ŋá mɛ kɛla bɛsana a bɛɛbɛ́ e ? Ɔ́kɔ, tɛ́ka ɔ ɔkɔɔ́háma bikúlú bítíndétú nɔ́mɔ e ? »

²² Mbá ɔsɛ : « Ɛ tɛ ŋá mɛ kɔɔna anyía ɔ ɔkɔɔ́háma bikúlú bítíndétú nɔ́mɔ, mbá ɛ ŋa mɛ́ ɔ laana anyía bikúlú etíne átátɔ́ ne imbuke cíɔ́hátá ɔ ɔkɔɔ́háma aáná bikúlú bítíndétú nɔ́mɔ.

²³ Ɛ ŋa mɛ́ banɔ́ láana aáná anyía *Butéŋí bɔ́ Ɔmuaná ŋaá hɔ́á otéŋí a wɔmɔtɛ́ awɔ́ u ŋaá bá weé lénéke ɔtákɛ́na mehíne mekime amá u ŋaá bá waá bátaka bááyɛ́ bɔnyiɔnɔ a *baáŋá.

²⁴ Aáná u ŋeé túme ɔfana ɔ ɔfana mehíne eémé. Bé ŋe wuúci héléníne munyiɔnɔ a mumɔtɛ́ amɔ́ u ŋaá bá waá bátaka yaandándá yí buhíné bú mɔɔnyɛ́ buáŋá ɔ ɔhɔla.

²⁵ Munyiɔnɔ eémú tɛ ɔ́mɔɔ́ bá ne ohónyí wú o wuúci tuana buhíné eébú. Uuyé waáŋá u buólí ŋá sɔ́mbɔ́tɔ́na anyía bé túéke na ɔɔcɔ oócí, ne oónyí, na baáná, na bɔkɔ bukime abɔ́ u ŋaá bá ne buúbu a asana ne buhíné eébú.

²⁶ Aáná munyiɔnɔ eémú ŋaá bɛ́áhɛ́nɛ́na uuyé waáŋá u buólí a akɔlɔ́, mbá ɔsɛ : “Cɔ́kɔ́lɛ, Taatá, cáŋa o mi eéhínyínyi, ɛ ká mɛ́ ɔ tuana buɔ́wɔ buhíné bukime.”

²⁷ Waáŋá u buólí ŋe wuúci bɛ́cáma mahana, nyi wuúci nyɛanɛ́nɛ́na eényí buhíné eébú bukime, u ŋé wuúci nyɛána anyía wé súéte.

²⁸ Ɛŋakɛlá munyiɔnɔ eémú aá hámá o ooki ú waáŋá u buólí, bá ŋá ɔɔ́ndɛ́mánána na ciayɛ́ sɔ́ɔ́kɔ́ ci buólí ; u ŋaá bá waá bátaka ciayɛ́ sɔ́ɔ́kɔ́ eécí hú hihínéhíne hɛ́ mɔɔnyɛ́. U ŋeé wuúci mɛ́ɔ́mɛ́na ɔ ɔmɛ́ɔ́mɛ́na, u ŋé wuúci háya hɛtáá o okelú, mbá ɔsɛ : “Mɛ túána búámɛ buhíné bukime.”

²⁹ Aáná ciayɛ́ sɔ́ɔ́kɔ́ ŋeé wuúci bɛ́áhɛ́nɛ́na a akɔlɔ́, u wuúci bɛ́cɔ́kɔ́lɔ́kɛ́na ɔsɛ : “Cɔ́kɔ́lɛ, cáŋa o mi eéhínyínyi, ɛ ká mɛ́ ɔ tuana búɔ́wɔ buhíné bukime.”

³⁰ Mbá munyiɔnɔ ŋe kíne ɔlɔ́kɔ́ma nyɛkɔɔna nyɛ́ ciayɛ́ sɔ́ɔ́kɔ́ ɔ ɔkɔɔ́háma eyí u ŋgée wuúci háya eé ciíbe cɛ ɛcaná anyía wá cáŋa mana ɔtua búáyɛ́ buhíné.

³¹ Ɛ́makɛ́la bɔsɔ́ɔ́kɔ́ bɔnyiɔnɔ ábɔ́ lɛ́cáká aáná, cííbu ɛtɛ́má ŋé beébe nuáka buéŋí ; bá ŋgá láákɛ́na úúbú waáŋá u buólí bɛsana bikime a bɛ́ ŋa bɛ́kɛ́láka.

³² Aáná waáŋá u buólí ŋɔɔ́ lɔ́ŋɔ́kɔ́ munyiɔnɔ eémú, mbá ɔsɛ : “Huúúʼ ! Kuɔŋɔ́, munyiɔnɔ eemu asɛ ó bébéké. Ya mɛ́ŋa ɔ kuɔŋɔ́ nyɛánɛ́nánɔ́ búɔ́wɔ buhíné bukime, ekúlú ayɛ́ ɔ ŋɔ́ɔ mɛ bɛ́cɔ́kɔ́lɔ́kɛ́na anyía yámɛ ɔnyɛanɛ́nɛ́na.

³³ Kuɔŋɔ́ tɔ́na, ɔ tɛ ɔ́mɔɔ́ bá wu ɔbɛ́cáma ciɔ́wɔ sɔ́ɔ́kɔ́ mahana háyɛ ɛ ŋa mɛ́ ɔ bɛ́cáma e ?”

³⁴ Hilóbi ŋeé wuúci timbie, u ŋá kɛla anyía bicénji á hatɛ́na munyiɔnɔ eémú, bé wuúci háya eé ciíbe cɛ ɛcaná, wá lɔ́kɔ́máka indekese, mbá u caŋa mana ɔtua búáyɛ́ buhíné.

³⁵ Ɛ́ɛhɛ́ ɛ ŋa mɛ́ banɔ́ laána anyía ciamɛ Síkíne cɛ Ɔmuaná káá banɔ́ kɛlaka bɔkɔ búmɔtɛ́, mbɔ́kɔ ɔɔcɔ okime aá banɔ́ tɛ ŋáa nyɛ́ánɛnɛna na ɔtɛ́má okime uuyé onyíinyí. »