Matío 17 - Nomaande

Yésus ma hɛ́ŋɛna nyɛlɛcana

¹ E elime cɛ mɔɔ́sɛ́ metíndétú, Yésus ŋá cɔ́bána ne Bíel, na Sáak, na Sáaŋ onyíinyí u Sáak a yaandándá yɛ́ nɔkɔndɔ ɔ ɔmuaná haaca na baacɔ.

² U ŋá hɛŋɛ́na nyɛlɛcana eébú eé buúse. Aáná búáyɛ́ buúse ŋeé túme ɔnɔma háyɛ ɔɔ́cɔ́, bíáyɛ́ bɛlaŋa muanyɛmuanyɛ háyɛ eese.

³ Hí e ekúlú eéyé, *baákɔ́nɛ́na bátátɔ́ eébé ŋa bɔ́ lɛ́cá ne *Moyís ne Éli ábɔ́ aásánáka ne wuúci.

⁴ Mbá Bíel ɔsɛ né Yésus : « Otéŋí a Waáŋá, yááŋa ambányɛ yɛ́ asana anyía túésú límíne aaha. Mbɔ́kɔ o ŋoó léne, míɔ cɔba ɔ ɔfalɛfaka bikule bɛ́ bɔlaka bɛ́tátɔ́ : Yɔ́ɔ́wɔ ɔ́mɔtɛ́, yí Moyís ɔ́mɔtɛ́, yí Éli ɔ́mɔtɛ́. »

⁵ U ŋaá bá wa yánáŋa ɔ ɔtáŋa aáná, bé ŋe síke ebú bítéme amuanyɛmuanyɛ yɛ́ ɔlɔndɔ́ meé beébe bíhuéne ; okelú ŋá lɔ́kɔ́máná ɔ ɔlɔndɔ́ noómi, ú kɔ́ɔnaka ɔ́sɛ : « Ooci áŋa uumi ɔɔ́nɔ́ u ɔtɛ́má, ɛ́ maá mɛ háya úúmi obíléne okime nááyá. Énu wuúci lɔ́kɔ́mákɛ́na. »

⁶ Ɛ́makɛ́la baákɔ́nɛ́na ábɔ́ lɔ́kɔ́má okelú oócí, bulíkílíki ŋé beébe timbie buéŋí, bá ŋa kuakɔ́náka, túábɔ́ tɔbɔlɔ bítíséke ɔmɛsɛ́.

⁷ Yésus ŋé bíkósíti náábɔ́, u ŋé beébe bítíséke, mbá ɔsɛ : « Ánɔ hatɔ́kɔ́na ɛndánáka, nuti líkíméke. »

⁸ Bé ŋe bú hétúkúnyi meése, nyíábɔ́ nyɛlɛca eényí hú Yésus bímuócí.

⁹ Ekúlú ayɛ́ bá ŋa bɔ́ bá bábɔ́ lɔ́ɔkɔ nɔkɔndɔ, Yésus ŋé beébe bɛ́ɔ́sɔ́kɛ́nɛ́na ɔsɛ : « Nɔtɛ bɛ́káná obíkétínyi ɔɔcɔ asana eeye ayɛ́ nú ma nɔ́ lɛ́caka ɔ ɔkɔɔ́háma ekúlú ayɛ́ Ɔɔ́nɔ́ u ɔɔcɔ káá háányua e biwéewé. »

¹⁰ Baákɔ́nɛ́na ŋe bú wuúci bata báyɛ : « Mbá anyíatɛ́ *beékúnyi bikotí naŋa bábɔ́ kɔ́ɔ́naka anyía Éli káá cáŋa ɔfaaya ne Mesíi e ? »

¹¹ Mbá ɔsɛ : « Yááŋa taaká anyía Éli wá nyɛmána wu ɔ cáŋa faaya o okocíkiliekene bɛsana bikime.

¹² Mbá yaŋɔ́, ɛ ŋa mɛ́ banɔ́ láana anyíaʼo : Éli na maa fáaya ; baacɔ te o wuúci menyutune, mbá bé ŋe bú wuúci bɛ́kɛ́lákɛ́na háyɛ bé ŋe bú lénéké. Híáná tɔ́na bé ké bú kélíki Ɔɔ́nɔ́ u ɔɔcɔ. »

¹³ Aáná baákɔ́nɛ́na ŋa bɔ́ lɔ́kɔ́ma bɔmbányɛ anyía u ŋaá bá waá táŋáka asana yɛ́ Sáaŋ Batis.

Yésus me héényi ɔɔ́nɔmbɔ́ a wáŋa ne yiíliíli

¹⁴ Ahɛ́ bá ŋga bɔ́ hámá hoóhi na nyɛkɔca nyɛ́ baacɔ, ɔɔcɔ a wɔmɔtɛ́ ŋá ka kúákɔ́nákɛ́na Yésus eé buúse, u ŋé wuúci túmíne eŋéndu ɔ ɔmɛsɛ́,

¹⁵ mbá ɔsɛ : « Otéŋí a Waáŋá, cɔ́kɔ́lɛ, ɔ́ɔ bɛ́cáma uumi ɔɔ́nɔ́ mahana. Wáŋa ne yiílíli. Yɛ́ naŋa yé wuúci hatɛ́na ; u kuakɔna te o oocó noómi, te e menyífé noómi.

¹⁶ I ŋe mí wuúci cɔ́bána ná bɔ́ɔ́wɔ *baákɔ́nɛ́na, ú ŋé beébe yáka o oweéŋúnyísi. »

¹⁷ Mbá Yésus ɔsɛ : « Ééʼ, banɔ́ bɛɛbɛ́ bɛ́ baacɔ eebi, nu tɛ ŋá nɔ́ háya mɔŋɔlɛ́ ná Bandɔ́mɛsɛ́ ! Ɔ ɔkɔɔ́háma nyíényí ɛ ká mɛ́ bá ɔlɔŋɔ na banɔ́ e ? Ɔ ɔkɔɔ́háma nyíényí ɛ ká mɛ́ banɔ́ ééhíkínyínyi e ? Énu mi héléníne ɔɔ́nɔmbɔ́ oócí aaha. »

¹⁸ Aáná u ŋaá sásɛ́tɛna yiílíli ; yɛ́ ŋá háma aá cɛɛ́tɔ cɛ ɔɔ́nɔmbɔ́. Hú á yaátɛ́ ekúlú, nyɛaŋɔ́nua eényí.

¹⁹ Baákɔ́nɛ́na ŋe bú bíkósíti né Yésus, beébe hú wáábɔ́, bé ŋé wuúci batá báyɛ : « Anyíatɛ́ yiílíli eéyé á basɔ́ yáka ohémúnyi e ? »

²⁰ Mbá ɔsɛ : « Nu ti ómo nú yiíyi hémúnyi anyía úúnú olumitinine áŋa ɔcɔ́ɔ́cɔ́ buéŋí. Ɛ ŋa mɛ́ banɔ́ láana aá taaká isíʼo : Mbɔ́kɔ úúnú olumitinine á bá otíkítíki ta háyɛ ɔsámá ú hɛɛlɔ, nua nɔ́ŋa nu ɔlaana nɔkɔndɔ eenu anyía nɔ́ á hatɔ́na aaha, núá cɔbá ehenyíé, búɔ́ bɛ́kɛ́láka híáná ; ta bɔkɔ tɛ banɔ́ yáka ɔkɛla.

²¹ Asana ɔ́mɔtɛ́ áŋa anyía bé ŋe hémúnyi nyɛnamá nyɛ́ *aabɛ́ yí elilé eényí hú na ɔbɛ́cɔ́kɔ́lɛ́na ne *obíkíilie ɔnyíá. »

²² Ekúlú ayɛ́ bá ŋa bɔ́ bá bábɔ́ hálɔ́mɔ́kɔ́na i iisí cɛ *Kalilé, Yésus ŋá laana bááyɛ́ baákɔ́nɛ́na ɔsɛ : « Bá ŋá nyɛmána bé ofiimbie Ɔɔ́nɔ́ u ɔɔcɔ a baacɔ ;

²³ baacɔ eébé ké bú wuúci ɔ́ɔ́nɔ, mbá a matátɔ́ yɔ́ háányua o owé. » Asana eéyé ŋe yiínjie baákɔ́nɛ́na ɔtɛ́má ɔnua buéŋí.

Yésus mɔ yɔ́ɔ́ndɔ etéési yí Ciíbe cɛ Bandɔ́mɛsɛ́

²⁴ Ne Yésus na bááyɛ́ *baákɔ́nɛ́na ŋa ka bɔ́ hámá a Kabɛlnawum. Betúé etéési bé *Ciíbe cɛ Bandɔ́mɛsɛ́ ŋe bú bíkósíti né Bíel, bó wuúci batá báyɛ : « Ɔ́kɔ, muanɔ́ muékúnyi naŋa u tɛ ɔ yɔɔ́ndɔ́ etéési yí Ciíbe cɛ Bandɔ́mɛsɛ́ e ? »

²⁵ Bíel ŋaá bɛ́káma ɔsɛ : « Eéʼeé, u naŋa wɔ yɔɔ́ndɔ́kɔ. » Ekúlú ayɛ́ u ŋgá háma o ooki, Yésus ŋa cáŋa táŋɛ́ta ɔsɛ : « Símon, anyána ɔ ŋɔɔ́ lɛca e ? Baányɛ́ ábɔ́ nyɛmána bá ɔwɔɔ́ndɔ́kɔ etéési né betéŋí bá ɔmɛsɛ́ e ? Bɔnyɛ otéŋí ayɛ́ʼ baacɔ bé etémbí e ? »

²⁶ Bíel ɔsɛ : « Baacɔ bé etémbí bá naŋa bábɔ́ ɔ́ɔ́ndɔ́kɔ etéési. » Mbá Yésus ɔsɛ : « Ɛ́cɛ anyía bɔnyɛ otéŋí tɛ ŋɔ́ yɔɔ́ndɔ́ etéési e ?

²⁷ Ta híáná, anyía tu ti nuési baacɔ eébé ɛtɛ́má, cɔbá o olumbe aá nuɔmɔ́, aahɛ́na munɔ́bɔ́ e menyífé ; hiɔfɔ́ hí buúse ahɛ́ ɔ ŋɔɔ́ sɔ́mɔ, hiíhi aálɔ́na nyuúté, ɔ kɔɔ́ kuana eléŋú yɛ́ mɔɔnyɛ́ noómi ; yiíyi hiíte kɔ́ kɔ ɔ́ɔ́ndɔ́ etéési ná baacɔ eébé, na yɔ́ɔ́wɔ na yáámɛ. »