Malɛ́kus 7 - Nomaande

Ne Yésus na Bafalisiɛ́ŋ ŋe bú súŋunyinyi

¹ Aáná na *Bafalisiɛ́ŋ ne *beékúnyi bikotí a bɔ́mɔtɛ́ e bé ŋe bú húlúkúne eé Yelúsalɛm ŋa bɔ́ bɛ́bándákáná hoóhi ne Yésus.

² Bá ŋa bɔ́ lɛ́cá anyía bááyɛ́ *baákɔ́nɛ́na a bɔ́mɔtɛ́ ŋaá bá bábɔ́ nyíáka ne bihíŋe a aabá, ɛ́cɛ anyía bé ti ceéce sua háyɛ nyɛbɛ́kɛ́lɛ́na nyí uubú olumitinine ŋó tóŋínyi.

³ Yááŋa anyía na Bafalisiɛ́ŋ ne *Besuif bé etémbí bekime ŋa bɔ́ látɛ́na bɛsana ebí cííbú sɔ́kɔ́nɔ́ ŋe bú beébe eékúnyíki : Bá tɛ ábɔ́ bá bá ɔnyíáka beébe tɛ́ka na ɔbɛ́sua aabá bɔmbányɛ bɔmbányɛ.

⁴ Ekúlú eyí bé ke bú eélúéke oó nyionyí, bá tɛ ábɔ́ kɛ́la bá ɔnyíáka beébe tɛ́ka na ɔ cáŋa bɛ́sua a nyíábɔ́ nyɛbɛ́kɛ́lɛ́na. Bá ŋa bɔ́ látɛ́na esúŋe a cɔ́mɔtɛ́ ceéŋí ecé bé ŋeé beébe eékúnyíkí : Ɔsua ne tundeŋé, na bɛtáyá, na tunaáná tú biléŋú, [na maaná].

⁵ Na Bafalisiɛ́ŋ ne beékúnyi bikotí ŋa bɔ́ bata Yésus báyɛ : « Anyíatɛ́ bɔ́ɔ́wɔ baákɔ́nɛ́na tɛ ŋa bɔ́ látɛ́na bɛsana bí bokóo e ? Bá ŋa bɔ́ nyíá ne bihíŋe a aabá. »

⁶ Mbá ɔsɛ : « Nua nɔ́ŋa na tɔbɛ́mbɛ túfendí ; ɔtáŋa ú *Ɛsayí ŋaá bá o ohónyí ekúlú ayɛ́ u ŋaá bá weé hémúkúnyi bɛsana a yáánɔ́ aháŋá anyía Bandɔ́mɛsɛ́ ɔsɛ : “Baacɔ eebe ŋe bú mi nyémi hú na bɛbábɛ ; cííbú ɛtɛ́má áŋa haaca na yaŋɔ́,

⁷ nyíábɔ́ nyinyemi áŋa etémbí anyía bé ŋe bú eékúnyi esúŋe cá baacɔ háyɛ anyía cááŋa cáámɛ.”

⁸ Nú ma nɔ́ bɛ́yúata *bikotí bɛ́ Bandɔ́mɛsɛ́ ɔ ɔlátɛ́na tííŋ tɔ́ɔ́ŋ bikotí bɛ́ baacɔ. »

⁹ Yésus ŋe túné a kɔ́ɔna ɔsɛ : « Nu ŋe nú ményi bɔmbányɛ bɔmbányɛ ɔbɛ́yúata bikotí bɛ́ Bandɔ́mɛsɛ́, nuó bíínjie ɔ ɔlátɛ́na bíánɔ́ bɛsana bí bokóo !

¹⁰ Aáná *Moyís ŋaá kɔɔ́na ɔsɛ : “Kékéke na ɔɔtɛ́ na ɔɔnyia”, yɔ́ kɔɔ́na tɔ́na ɔsɛ : “Bá ŋaá nyɛmána bá ɔwɔɔ́nɔ ɔɔcɔ okime awɔ́ u ŋɔ lɔ́mɔ síkíne ta anyía iinyí.”

¹¹ Mbá banɔ́, nu ŋe nú eékúnyi baacɔ nɔsɛ : “Ɔɔcɔ á laána te síkíne te iinyí anyía : Bɔkɔ abɔ́ yámɛ bá wɔ ɔ kuɔŋɔ́ ɔɔ́lɛ́ta ne buúbu á yáaŋa kíléke, búáŋa bɔ́ Bandɔ́mɛsɛ́,”

¹² aáná nu ŋe nú lumitine anyía u tɛ háná ɔɔ́lɛ́ta te síkíne te iinyí.

¹³ Ɛ́ɛhɛ́ nu ŋe nú cónyisi Bɛsana bɛ́ Bandɔ́mɛsɛ́ a bíánɔ́ bɛsana bí bokóo ebí nu ŋe nú húlinyinyi banɔ́ na banɔ́. Híáná nɔ ŋa háná anɔ́ kɛla bɛ́mɔtɛ́ bɛsana bí etémbí biéŋí. »

Bɛsana a bɛ́ ŋa caŋɛna olíhe ú ɔɔcɔ

¹⁴ Yésus ŋa háná ɔ́ lɔ́ŋɔ́kɔ baacɔ beéŋí, mbá ɔsɛ : « Ɛ́náʼo, banɔ́ bekime, énu menyí anyía :

¹⁵ Bɔkɔ a bú ŋa cáŋɛna olíhe ú ɔɔcɔ ti ŋé húle a bɔkɔ abɔ́ u ŋá nyíá, mbá buhúnyi a bɔ́ ŋá háma eeyé e nyuúté, bú húlúkúne e uúye ɔtɛ́má noómi, buúbu eébú bú ŋá cáŋɛna úúyé olíhe. [

¹⁶ Ɔɔcɔ a wáŋa ne eetú cá ɔlɔ́kɔ́máka bɛsana, wá lɔ́kɔ́máka ! »]

¹⁷ Ɛ́makɛ́la Yésus é síké baacɔ, yó wóofine eé ciíbe, bááyɛ́ *baákɔ́nɛ́na ŋe bú wuúci bícónyi a asana yí nyihembule nyɛ́ ɛnjaba eécí.

¹⁸ Mbá ɔsɛ : « Ta banɔ́ tɔ́na nua nɔ́ŋa bɛála e ? Énu menyi anyía bɔkɔ a bú ŋa caŋɛna olíhe ú ɔɔcɔ ti ŋé húle a bɔkɔ abɔ́ u ŋá nyíá,

¹⁹ anyía bɔkɔ abɔ́ u ŋaá nyíá ti ŋó yoófine ɔ ɔtɛ́má ú ɔɔcɔ, mbá aáyá a tɔɔna, búɔ́ háma ekúlú eyí wé súéte a afalɔ́. » Ɔ ɔtáŋa oócí, Yésus ŋe yoókísi baacɔ anyía ɔɔcɔ áŋa wu ɔnyíáka bɛnyɛ́ma bɛ́ ɔnyíá bikime.

²⁰ U kɔɔnaka ɔsɛ : « Ɔtáŋa ú ɔɔcɔ ewú ú ŋé húle e úúyé ɔtɛ́má, wuúci oócí ú ŋa cáŋɛna úúyé olíhe.

²¹ Yááŋa anyía ɔ ɔtɛ́má ú ɔɔcɔ noómi bɛɛbɛ́ bí ibíkéti ŋé húle. Biíbi bí ŋe wuúci tɔ́ma na ɛ ɛnjɔkɔ́nɔ́nɔ, ne eé buébi, na a muɔ́nɔ́nɔ,

²² na ɔ ɔkanda tusɔmɔ, na a hiɔkɔ ɔ ɔtɛ́má, na a nyɛŋána, ne e munéŋéne, na a aabɛ́ yí olíhe, na a yaáká yí eése, ne e muótóno, ne o obíbééti, na a buála.

²³ Ɔ ɔtɛ́má ú ɔɔcɔ noómi bɛɛbɛ́ bɛ́ bɛsana eébí ŋé húle, bɛ́ cáŋgɛ́na úúyé olíhe. »

Okenyí u oónjú maá háya mɔŋɔlɛ́ né Yésus

²⁴ E elime eécí, Yésus ŋa hátɔ́na aáhá, yó súéte e ekéki yí iisí acɛ́ bálɛ́ka ci Tíil ŋaá bá. U ŋo yóófíne aá cɛ́mɔtɛ́ ciíbe, u ti léne anyía baacɔ é menyí anyía wá yáaŋa hɔ́á, mbá wuúci ta ɔbá ne ohónyí wú ɔbɛ́námba.

²⁵ Aáná oónjú a wɔmɔtɛ́ ŋa lɔ́kɔ́má bá cámbáka nyiínyi nyí Yésus. Uuyé ɔɔ́nɔ́ o woónjú ŋaá bá na *aabɛ́ yí elilé. Oónjú oócí ŋa faáya ɔ ɔfaaya né Yésus, u ŋe wuúci túmíne eŋéndu.

²⁶ U tɛ ɔ́mɔ bá itónyi ci *Besuif ; bé ŋeé wuúci bíéne aáhá e Fenisí i iisí ci Silíi, u táŋáka *nɔkɛlɛ́k. U ŋaá bɛ́cɔ́kɔ́lɔ́kɛ́na Yésus anyía wé hémúnyi aabɛ́ yí elilé né úúyé ɔɔ́nɔ́ o woónjú oócí.

²⁷ Mbá Yésus ɔsɛ nááyá : « Caŋá nyɛ́ana banásɛ́ bá nyíáka, bé eéceke. Yááŋa anyía, bú tɛ á kɛ́la bɔmbányɛ anyía bé hiíte bɛnyɛ́ma bɛ́ ɔnyíá bɛ́ banásɛ́, bé biíbi iínjíékíne ná tɔbɔ́ɔ́bɔ́. »

²⁸ Mbá oónjú ɔsɛ : « Ɛ́ɛ, Taatá, yááŋa aáná taaká, mbá ɛ ɛmbana ci tébíli tɔbɔ́ɔ́bɔ́ ŋaá nyíá imbuumbú acɛ́ banásɛ́ ŋe bú kuusi. »

²⁹ Yésus ɔsɛ nááyá : « A asana ayɛ́ ɔ́ mɔɔ́ bɛ́káma bɔmbányɛ, hálɔ́mɔ́na o ooki ; aabɛ́ yí elilé má háma ne úúwu ɔɔ́nɔ́ o woónjú. »

³⁰ Ɛ́makɛ́la oónjú aá hálɔ́mɔ́ná e uúyé ooki, nyɛkuana eényí uuyé ɔɔ́nɔ́ ɔfiánɛ́nánɔ́ aá buaná, ɛ́cɛ aabɛ́ yí elilé maá háma aáyá a cɛɛ́tɔ.

Yésus me eéŋúnyísi ɔndɔ́kɔ́ndɔ́kɔ

³¹ Yésus ŋaá hatɔ́na i iisí acɛ́ bálɛ́ka ci Tíil ŋaá bá, u ŋá hɔlɛ́na e Síton. U ŋga hálɔ́mɔ́na a aháŋá yɛ́ nuɔmɔ́ nɔ́ *Kalilé. U ŋa hɔlákɛ́na i iisí cɛ Tɛkabólo.

³² Bé ŋe héléne ɔndɔ́kɔ́ndɔ́kɔ nááyá, u ŋaá bá ne muuyé ɔ ɔtáŋa. Aáná bá ŋa bɛ́cɔ́kɔ́lɔ́kɛ́na Yésus anyía wé wuúci tálɛna aabá aá cɛɛ́tɔ.

³³ Yésus ŋé wuúci cɔbana a mafákálɛ́ana wuúci bímuócí, haaca na nyɛkɔca nyɛ́ baacɔ. U ŋa háya túáyɛ́ tunɔɔ́nɔ́ e eetú cá ɔɔcɔ oócí, u ŋé túé maatá a tɔnɔ́ɔ́nɔ́, u ŋé wuúci bítíse nɔbɛ́mbɛ.

³⁴ E elime eécí, u ŋe bééti eése ɔ ɔmuaná, u ŋé hilíméténe, mbá ɔsɛ : « Ɛfááta ! », ɛ́cɛ anyía « Bíhúune ! »

³⁵ Hú aá yaátɛ́ ekúlú, eetú cá ɔɔcɔ oócí nyibíhúune eényí, núáyɛ́ nɔbɛ́mbɛ ŋé bíhémbúle, u ŋé túme ɔtáŋa bɔmbányɛ.

³⁶ Yésus ŋá bɛ́ɔ́sɔ́kɛ́nɛ́na baacɔ anyía bá tɛ́ bɛ́lɛ́áŋɔ́nɛ́na ta ɔɔcɔ asana eéyé. Mbá u ŋaá bá weé beébe bɛ́ɔ́sɔ́kɛ́nɛ́na aáná, beébe bábɔ́ cɔbaka ne buúse ɔ ɔbɛ́lɛ́áŋɔnɛna baacɔ.

³⁷ Aáná baacɔ ŋe bú kékéke buéŋí, bá kɔɔnaka báyɛ : « Bɛsana bikime abɛ́ u ŋa kɛ́la áŋa bɛmbányɛ : U ŋe lúkúmísi ta bɔndɔ́kɔ́ndɔ́kɔ, u téŋísíki te múkúmúku ! »