Malɛ́kus 3 - Nomaande

Yésus me yeéŋúnyísi ɔɔcɔ u asúákánɔ́ yɛ́ nyɛkátá

¹ E elime eécí, Yésus ŋe túné ke yóofine a *andaŋía yɛ́ ɔbɛ́cɔ́kɔ́lɛ́na. Ɔɔcɔ a wɔmɔtɛ́ ŋaá bá hɔ́á na asúákánɔ́ yɛ́ nyɛkátá.

² Baacɔ ŋa bɔ́ bá bábɔ́ áambaka ɔsɔ́mɛ́na Yésus. Buátɛ́ bɔkɔ bá ŋa bɔ́ bá bébú wuúci bísíémúkúnyi mbɔ́kɔ wáŋa wu oweéŋúnyísi ɔɔcɔ *buɔ́sɛ́ bú ehélúme.

³ Aáná Yésus ɔsɛ ná ɔɔcɔ : « Hatɔ́na, tálɛ́mɛ́na ɛndánáka eé buúse bɔ́ baacɔ bekime. »

⁴ Mbá ɔsɛ náábɔ́ : « Aátɛ́ yáásɔ́ okotí ŋa kɔ́ɔna e ? Ɔkɛla bɔmbányɛ buɔ́sɛ́ bú ehélúme ayɛ́ʼ ɔkɛla bɔɔbɛ́ e ? Onohi ɔɔcɔ ayɛ́ʼ o wuúci ɔ́ɔ́nɔ e ? » Mbá beébe, bé ŋe bú limíne mbuumu, ta ɔbɛ́káma.

⁵ Yésus ŋeé beébe lɛcáka ɔmɔtɛ́ ɔmɔtɛ́, u ŋé bíbúnúné, u beébe lɔ́kɔ́mákɛ́na ɔtɛ́má ɔnua buéŋí a asana ne cííbú ibíkéti a cɛɛbɛ́. Mbá ɔsɛ ná ɔɔcɔ : « Nandɔ́na nyɛkátá. » U ŋé nyiínyi nandɔ́na, nyɛ́ ŋa hálɔ́mɔ́na nyɛmbányɛ.

⁶ Aáná *Bafalisiɛ́ŋ ŋa bɔ́ hámɔ́kɔ́na, bá ŋá ka bɛ́bándána ɔ ɔbɛ́bándána na baacɔ bé hitúlé hí *Elóot, anyía bá aámbáka ohónyí wú ɔwɔɔ́nɔ Yésus.

Bitúte bɛ́ baacɔ ŋa fáaya né Yésus

⁷ Yésus ŋa bɛ́álɔ́ná baacɔ, yó súéte na bááyɛ́ *baákɔ́nɛ́na a asálá yɛ́ nuɔmɔ́ nɔ́ *Kalilé, mbá bitúte bɛ́ baacɔ ɔmbana weéŋí ŋaá bá bíé wuúci látáka. Bɛ́ ŋaá bá bébú húlúkúne na a Kalilé ne eé Yuté,

⁸ bí húlúkúne ne eé Yelúsalɛm ne i iisí ci Itumée, bí húlúkúne ne i iisí a cɛ́áŋa ecinyíé caányɛ́ ci nuúci nú Sulutɛ́ŋ ne e ekélékéti yí iisí a yɛ́áŋa hoóhi na bálɛ́ka cí ne Tíil ne cí Síton. Baacɔ eébé bekime ŋa bɔ́ bá bábɔ́ fáakɔna né Yésus, anyía bá ŋa bɔ́ bá bábɔ́ lɔ́kɔ́máka bɛsana bikime abɛ́ u ŋaá bá waá kɛlaka.

⁹ U ŋaá laána bááyɛ́ baákɔ́nɛ́na anyía bé wuúci tétényínyi ɔkɔkɔ́, bé yiíyi nyɛ́kɛ́tɛ́tɛ́na e menyífé anyía baacɔ ti wuúci sékítínyi.

¹⁰ Yááŋa anyía baacɔ beéŋí ŋa bɔ́ bá bébú wuúci látákɛ́na a asana ayɛ́ u ŋaá bá we yeéŋúnyísíki bɔkɔnɔ́kɔ́nɔ beéŋí. Buátɛ́ bɔkɔ baacɔ a bá ŋa bɔ́ bá bábɔ́ kɔ́nɔkɔ ŋa bɔ́ bá bábɔ́ cɔ́cɔbaka fiaŋɔ fiaŋɔ nááyá anyía bébú wuúci bítiseke.

¹¹ Ekúlú ayɛ́ *bɛɛbɛ́ bí bililé ŋaá bá bíé wuúci lɛcá, bí wuúci túmékíne eŋéndu, bɛ́ aánjáláka, bɛ́ kɔɔ́naka bɛ́sɛ : « Ɔ ɔ́ŋa Ɔɔ́nɔ́ u Bandɔ́mɛsɛ́ʼo ! »

¹² Mbá u ŋeé biíbi siséke buéŋí anyía bí ti wuúci núnéke.

Yésus maá táfáka baacɔ bá ɛndɔ́ma

¹³ E elime eécí, Yésus ŋaá báátáka nɔkɔndɔ, u ŋɔ́ lɔ́ŋɔ́kɔ baacɔ ebé u ŋeé lénéké ɔlɔ́ŋɔ, bá ŋá faákɔ́na nááyá.

¹⁴ Aáná u ŋaá táfáká baacɔ bɔ́ɔ́hátá ne béfendí, u ŋé beébe lɔa nyiínyi anyía *baacɔ bá ɛndɔ́ma, anyía bábɔ́ bámɔ́kɔ́na ne wuúci ; u beébe tɔ́mɔ́kɔ́na o o húle húlínyi baacɔ Ambányɛ yɛ́ Ɛsɔ́ma.

¹⁵ U ŋeé beébe iínjíé makɛ́nda me ohémúkúnyi *bɛɛbɛ́ bí bililé.

¹⁶ Baacɔ bɔ́ɔ́hátá ne béfendí ebé Yésus ŋaá táfáka ŋa bɔ́ bá anyía : Ne Símon awɔ́ u ŋaá lɔá anyía Bíel, ɛ́cɛ « nyɛndányɛ́ »,

¹⁷ na Sáak na Sáaŋ, baáná bé Sebeté (Yésus ŋeé beébe lɔá nyiínyi anyía Bɔánɛ́njɛs, ɛ́cɛ anyía « baáná bá ɛmanyɛmanyɛ »),

¹⁸ na *Andɛlɛ́, ne Fílib, na Baatelemí, na Matío, na Tɔ́mas, na Sáak ɔɔ́nɔ́ u Alɛfɛ, na Tatɛ́, ne Símon awɔ́ bɔ́ ŋɔ́ lɔ́ŋɔ báyɛ « Muléne ɔkátɔ́na bunɔŋɔ bú *Islayɛ́l »,

¹⁹ ne Yútas Iskaliót, ooci ewú u ŋe fiimbie Yésus, ɔmanɔ́ oócí.

Ciíbe cɛ baacɔ ci Yésus ŋa yáamba o wuúci hatɛna

²⁰ E elime eécí Yésus ŋa ka hálɔ́mɔ́na o ooki. Baacɔ ŋé túné ábɔ́ bɛ́bándákána hɔ́á ɔ ɔkɔɔ́háma ayɛ́ ne Yésus na bááyɛ́ *baákɔ́nɛ́na tɛ́ ɔ́mɔ́ bɔ́ bá ne ehélé yɛ́ ɔnyíáka bɛnyɛ́ma.

²¹ Ɛ́makɛ́la ciíbe cɛ baacɔ ci Yésus aá lɔ́kɔ́má asana eéyé, nyɛfaaya eényí o okoó wuúci hatɛna. Bá kɔ́ɔnaka báyɛ : « Ú ma fámɔnua ! »

²² Beékúnyi *bikotí e bé ŋe bú húlé eé Yelúsalɛm ŋaá bá hɔ́á tɔ́na ; bá kɔ́ɔnaka báyɛ : « Bɛlɛsɛbúl, mutéŋínyi bɛɛbɛ́ bí bililé, mó yóófinine ɔɔcɔ ooci. U ŋe hémúnyi bɛɛbɛ́ bí bililé a baacɔ na makɛ́nda me otéŋí oócí. »

²³ Yésus ŋé beébe lɔ́ŋɔ́kɔ, u ŋé beébe túmíne ɛnjaba ɔsɛ : « Anyána Sátan áŋa wu ɔbɛ́ɔ́ŋɔ́kɛ́na wuúci bɛ́muátá e ?

²⁴ Butéŋí bukime abɔ́ baacɔ bá hɔ́á ŋe bú nuusinyinyi áŋa bunyímé.

²⁵ Ciíbe cɛ baacɔ ikime acɛ́ baacɔ bá hɔ́á ŋe bú nuusinyinyi tɛ a kɛ́la cɛ ɔcɔcɔbaka ne buúse ta buɔ́sɛ́.

²⁶ Híáná mbɔ́kɔ Sátan ŋee bínúusi, keyé búáyɛ́ butéŋí ma sásia ; bú tɛ á bá bú ɔcɔcɔbaka ne buúse, bú ma mána. »

²⁷ « Ɔɔcɔ tɛ a bá wú owoofine eé ciíbe cɛ ɔkɛndákɛ́nda, yɔ́ hɔɔkɔ bíáyɛ́ bɛnyɛ́ma, tɛ́ka na ɔcaŋácáŋa o wuúci hatɛna, yó wuúci ɔɔ́tɔ́kɔ́kɔ, mbá u síke hɔ́lakana bɛnyɛ́ma bikime bí ciíbe.

²⁸ Aá taaká ɛ ŋa mɛ́ banɔ́ láana anyía Bandɔ́mɛsɛ́ káá nyɛ́anakɛnɛna baacɔ maabɛ́ mekime na túábɔ́ tuféne tukime.

²⁹ Mbá ɔɔcɔ ewú u ŋe féníne *Efúúménénú yí Elilé, Bandɔ́mɛsɛ́ ti kéé wuúci nyɛanɛnɛna búáyɛ́ bɔɔbɛ́ ta buɔ́sɛ́, anyía búáŋa bɔɔbɛ́ bú ekúlú ekime. »

³⁰ Yésus ŋaá bá weé beébe laakɛna aáná anyía, bá ŋa bɔ́ bá bábɔ́ kɔ́ɔnaka anyía wáŋa na *aabɛ́ yí elilé.

Ne iinyí ne benyíinyí bé Yésus

³¹ Ne iinyí ne benyíinyí bé Yésus ŋá ka bɔ́ hámá. Bá ŋa bɔ́ tálɛ́mákɛ́ná a nɔháatɛ́, bá ŋá tɔ́ma ɔɔcɔ ɔ ɔkɔlɔ́ŋɛ́ta Yésus.

³² Nyɛkɔca nyɛ́ baacɔ ŋaá bá limekine aáyá a maabána. Bé ŋé wuúci laána báyɛ : « Ɛ́náʼo, na ɔɔnyia na bɔnɔ́ɔnyia á bɔ́ŋa a nɔháatɛ́ ; bá ŋa bɔ́ ɔ bata. »

³³ Mbá ɔsɛ : « Aányɛ́ wáŋa ciamɛ iinyí, báányɛ́ bá bɔ́ŋa báámɛ benyíinyí e ? »

³⁴ U ŋé bísíémúkúnyi baacɔ a bá ŋa bɔ́ bá aáyá a maabána, ɔmɔtɛ́ ɔmɔtɛ́, mbá ɔsɛ : « Ɛ́ná, na ciamɛ iinyí na báámɛ benyíinyí eebe.

³⁵ Yááŋa anyíaʼo, ɔɔcɔ okime awɔ́ u ŋa lɔ́kɔ́mɛ́na Bɛsana bɛ́ Bandɔ́mɛsɛ́, wuúci wáŋa ɔɔ́nɔ́ u baabá, ta anyía ciamɛ iinyí. »