Lúkas 3 - Nomaande

Asana yɛ́ Sáaŋ Batis

¹ Ekúlú eyí Sɛsáal Tibɛ́ɛl ŋaá bá ɛ́cɛ ú ma kɛ́laka tuɔŋɔ buunyi e butéŋí bú Lóom, ɛ́cɛ Bɔŋs Bílat áŋa kɔ́mɛ́na ci iisí ci Yuté, Elóot otéŋí u iisí ci Kalilé, Fílib onúséyé u Elóot, otéŋí u iisí ne ci Itulé na cɛ Tɛlakonite, Lisáníás otéŋí u iisí ci Abilɛnɛ.

² Eeye ekúlú na Ane na Kayífe ŋa bɔ́ bá betéŋínyi *beluli nyiínjie eé Ciíbe cɛ Bandɔ́mɛsɛ́ ; yaátɛ́ ekúlú Sáaŋ, ɔɔ́nɔ́ u Sakali, ŋaá bá i iisí cɛ ɔsɛ́bɛ́á. Bandɔ́mɛsɛ́ ŋeé wuúci iínjíé makɛ́nda me ohulikinyi baacɔ bíáyɛ́ Bɛsana.

³ Aáná Sáaŋ ŋeé túme o húlé kanda bɛhaála bɛhaála a aháŋá yí nuúci nú Sulutɛ́ŋ, u sobiki ɔsɛ : « Ánɔ bɛ́kákálákɛ́na máánɔ́ maabɛ́, mbá nɔ sɔ́mba ɔkɔlɔ́ eé meéme ; mbá nu bíótókíne, aáná Bandɔ́mɛsɛ́ káá banɔ́ nyɛ́ánakɛnɛna maanɔ́ maabɛ́. »

⁴ Hí a asana yɛ́ Sáaŋ *muhémúnyi bɛsana mɔ Bandɔ́mɛsɛ́, *Ɛsayí ŋɔ yɔ́ɔ́ŋɔ́kɔ eeyé e nufule ɔsɛ : « Ɔɔcɔ ŋo sóbi okelú ɔ ɔmuaná i iisí cɛ ɔsɛ́bɛ́á ɔsɛ : “Ánɔ tábɔ́náka ohónyí ú Otéŋí a Waáŋá, énu nyimíkínyi cííyí ihényí.

⁵ Ánɔ cúákɛ́na bifokó, ánɔ salɔ́náka na tɔkɔndɔ na tɔŋɔndɔ́ ; haála a hɔkɔtɛ́mánɔ́ énu heéhe télímínyi, ihényí a cɛɛbɛ́, núó ciíci salɔnaka.”

⁶ Aáná baacɔ bekime ká bɔ́ lɛ́ca háyɛ Bandɔ́mɛsɛ́ kéé beébe nohiki. »

⁷ Híáná baacɔ beéŋí ŋa bɔ́ bá bábɔ́ fáakɔna ná Sáaŋ anyía weé beébe ootókíne. Mbá ɔsɛ náábɔ́ : « Banɔ́ baáná bá ɛhɛ́nyɛ eebe, aányɛ́ ú ŋaá banɔ́ éékúnyi ɔcabɛna nyɛkála nyɛ́ Bandɔ́mɛsɛ́ a nyɛ́ ŋa fáakɔna e ? Tɛ́ cáŋa yaŋɔ́ʼo !

⁸ Mbá ánɔ caŋá kɛ́laka bɛsana e bí ŋo tóŋínyi anyía nú ma nɔ́ bɛ́kákálákɛ́na máánɔ́ maabɛ́, nuɔ́ sɔ́mba tɔ́na ɔkɔlɔ́ eé meéme. Nuti bíkétíki e cíínú ɛtɛ́má anyía nua nɔ́ŋa nú ɔkɔɔna hú anyía : “Abɛ́laham áŋa ciasɔ́ sɔ́kɔ́nɔ́.” Aá taaká ɛ ŋa mɛ́ banɔ́ láana ɛsɛ́ Bandɔ́mɛsɛ́ áŋa wu oceŋisi andányɛ́ eece baáná bá *Abɛ́laham.

⁹ Aámbáya eeci bá yáaŋa hoóhi ne okuusiki maatɛ́ hɛ́ a bɛkaŋá na hɛkɔtɔkɔ : Atɔ́kɔ́ ekime a yɛ́ tɛ ŋáá háá bɛmbányɛ bɛ́ bɛtámá, bé kéé yiíyi kuusi, bé o yiíyi lulíki. »

¹⁰ E elime eécí, nyɛkɔca nyɛ́ baacɔ ŋeé wuúci báta nyɛ́sɛ : « Tuasɔ́ kɛ́la anyána e ? »

¹¹ U ŋaá bɛ́kámá ɔsɛ : « Ɔɔcɔ a wáŋa na bɛháŋá namuaná bífendí, we iínjie ɔ́mɔtɛ́ né ooci awɔ́ u tɛ á bá ne yiíyi ; ooci a wáŋa na bɛnyɛ́ma bɛ́ ɔnyíá wá kɛláka híáná. »

¹² Betúé etéési yɛ́ kɔ́mɛ́na ŋa bɔ́ fáakɔna tɔ́na, bá aambaka anyía bébú bíótókíne, bé wuúci batá báyɛ : « Muékúnyi, tuasɔ́ kɛ́la anyána e ? »

¹³ Ɔsɛ náábɔ́ : « Énu hiitéke hú bitéési ebí *bikotí ŋó tóŋínyi. »

¹⁴ Bicénji tɔ́na ŋaá faáya, mbá bɛ́sɛ : « Basɔ́ʼo ? Tuasɔ́ kɛ́la anyána e ? » U ŋé biíbi bɛ́káma ɔsɛ : « Nɔtɛ hɔɔ́ bɔkɔ bɔ́ ɔɔcɔ a makɛ́nda, nɔtɛ sɔ́mbɛ́na ɔɔcɔ asana, énu hiítéke na ɔtɛ́má ɔmbányɛ bɛnamá abɛ́ bá ŋaá banɔ́ íínjie. »

¹⁵ Baacɔ a bá ŋa bɔ́ bá hɔ́á ŋa bɔ́ bá bábɔ́ tátáka *Kilís na mɔŋɔlɛ́ mekime, bé bíkétíki e cííbu ɛtɛ́má báyɛ : « Yáakɛlá Sáaŋ áŋa *Mesíi. »

¹⁶ Mbá ɔsɛ náábɔ́ : « Yaŋɔ́ ɛ ŋa mɛ́ banɔ́ óótine ne menyífé ; mbá ɔɔcɔ awɔ́ á mɛ hɔla a makɛ́nda kokóokó eémi e elime : Ɛ tɛ ŋa mɛ́ nyɛmána ooci a wáŋa wu ohembuleke tukolí tɔ́ bíáyɛ́ bɛkandɛ́na. Wuúci oócí u káá banɔ́ óotokine ne *Efúúménénú yí Elilé ne oocó.

¹⁷ Wáŋa ne bufúmíne ɔ ɔɔbɔ́ anyía wá yáálɔ́náka na bɛandá ne iŋeŋé. U káá bándáka iŋeŋé, yɔ́ hákɛ́na á nɔɔ́la, mbá yó lúliki bɛandá o oocó ewú ú ti kéé nyíme. »

¹⁸ Aáná Sáaŋ ŋaá bá we yeékúnyíki baacɔ bɛ́mɔtɛ́ bɛsana, u beébe hulikinyi Ambányɛ yɛ́ Ɛsɔ́ma.

¹⁹ U ŋaá kákálákɛ́ná Otéŋí *Elóot tɔ́na na a asana ayɛ́ ú ŋá bátɛ́na Elóotiat, oónyí u uuyé onúséyé, na bɛɛbɛ́ bɛ́ bɛsana bí etémbí bikime.

²⁰ Mbá Elóot ŋa háná kɛ́la aabɛ́ yɛ́ asana a yɛ́ á hɔ́la bɛɛbɛ́ bɛ́ bɛsana bikime abɛ́ ú ŋa kɛ́laka : U ŋá kɛlá anyía bá hatɛ́na Sáaŋ, bá háya eé ciíbe cɛ ɛcaná.

Nyibíótíne nyí Yésus

²¹ Yɛ́ ŋaá bá anyía, ekúlú ayɛ́ nyɛkɔca nyɛ́ baacɔ ŋaá bá nyíé bíótókíne, Yésus ŋe ke bíótíne tɔ́na. Ekúlú ayɛ́ ú ŋaá bá waá bɛ́cɔ́kɔ́lɔ́kɛ́na Bandɔ́mɛsɛ́, Ɔmuaná ŋé bíhúúné.

²² *Efúúménénú yí Elilé ŋá sɔ́ɔ́na nááyá i ihúényínyí cɛ cɛɛ́tɔ ci hibúbé. Okelú ŋá lɔ́kɔ́mána, ú húlúkúne ɔ Ɔmuaná, ú kɔ́ɔnaka ɔ́sɛ : « Ɔ ɔ́ŋa uumi ɔɔ́nɔ́ u ɔtɛ́má. Ya mɛ́ŋa ne obíléne weéŋí nɔ́ɔ́wɔ. »

Eénye cá baacɔ bá hɛnyɛ́nɔ́ hí Yésus

²³ Ekúlú eyí Yésus ŋeé túmé oweékúnyi baacɔ, u ŋaá bá wa yáaŋa na tuɔŋɔ hoóhi nyitíne na túɔ́hátá. U ŋaá bá, háyɛ baacɔ ŋaá bá bé bíkétíki, ɔɔ́nɔ́ u Yɔ́sɛb ; Yɔ́sɛb ŋaá bá ɔɔ́nɔ́ u Héli,

²⁴ Héli ŋaá bá ɔɔ́nɔ́ u Matat, Matat ɔɔ́nɔ́ u Léfi, Léfi ɔɔ́nɔ́ u Mɛliki, Mɛliki ɔɔ́nɔ́ u Sanayi, Sanayi ɔɔ́nɔ́ u Yɔ́sɛb,

²⁵ Yɔ́sɛb ŋaá bá ɔɔ́nɔ́ u Matatias, Matatias ɔɔ́nɔ́ u Amɔs, Amɔs ɔɔ́nɔ́ u Nahum, Nahum ɔɔ́nɔ́ u Esli, Esli ɔɔ́nɔ́ u Nakayi,

²⁶ Nakayi ŋaá bá ɔɔ́nɔ́ u Maat, Maat ɔɔ́nɔ́ u Matatias, Matatias ɔɔ́nɔ́ u Semeyin, Semeyin ɔɔ́nɔ́ u Yɔsɛk, Yɔsɛk ɔɔ́nɔ́ u Yɔta,

²⁷ Yɔta ŋaá bá ɔɔ́nɔ́ u Yɔhanan, Yɔhanan ɔɔ́nɔ́ u Lɛ́sa, Lɛ́sa ɔɔ́nɔ́ u Sólóbabɛl, Sólóbabɛl ɔɔ́nɔ́ u Salatiɛl, Salatiɛl ɔɔ́nɔ́ u Neli,

²⁸ Neli ŋaá bá ɔɔ́nɔ́ u Mɛliki, Mɛliki ɔɔ́nɔ́ u Ati, Ati ɔɔ́nɔ́ u Kɔsam, Kɔsam ɔɔ́nɔ́ u Ɛlmatam, Ɛlmatam ɔɔ́nɔ́ u Ɛɛl,

²⁹ Ɛɛl ŋaá bá ɔɔ́nɔ́ u Sosué, Sosué ɔɔ́nɔ́ u Eliyesɛl, Eliyesɛl ɔɔ́nɔ́ u Yolim, Yolim ɔɔ́nɔ́ u Matat, Matat ɔɔ́nɔ́ u Léfi,

³⁰ Léfi ŋaá bá ɔɔ́nɔ́ u Simɛ́yɔŋ, Simɛ́yɔŋ ɔɔ́nɔ́ u Yúta, Yúta ɔɔ́nɔ́ u Yɔ́sɛb, Yɔ́sɛb ɔɔ́nɔ́ u Yɔnam, Yɔnam ɔɔ́nɔ́ u Eliákim,

³¹ Eliákim ɔɔ́nɔ́ u Mɛlɛ́ya, Mɛlɛ́ya ɔɔ́nɔ́ u Mɛna, Mɛna ɔɔ́nɔ́ u Matata, Matata ɔɔ́nɔ́ u Nátan, Nátan ɔɔ́nɔ́ u Táfit,

³² Táfit ŋaá bá ɔɔ́nɔ́ u Yésée, Yésée ɔɔ́nɔ́ u Ɔbɛt, Ɔbɛt ɔɔ́nɔ́ u Bɔ́as, Bɔ́as ɔɔ́nɔ́ u Sálamɔn, *Sálɔmɔn ɔɔ́nɔ́ u Naasɔn,

³³ Naasɔn ŋaá bá ɔɔ́nɔ́ u Aminatab, Aminatab ɔɔ́nɔ́ u Atimin, Atimin ɔɔ́nɔ́ u Alini, Alini ɔɔ́nɔ́ u Ɛslɔm, Ɛslɔm ɔɔ́nɔ́ u Falɛs, Falɛs ɔɔ́nɔ́ u Yúta,

³⁴ Yúta ŋaá bá ɔɔ́nɔ́ u *Yákɔb, Yákɔb ɔɔ́nɔ́ u *Isak, Isak ɔɔ́nɔ́ u *Abɛ́laham, Abɛ́laham ɔɔ́nɔ́ u Tala, Tala ɔɔ́nɔ́ u Nakɔ́ɔ,

³⁵ Nakɔ́ɔ ŋaá bá ɔɔ́nɔ́ u Sɛ́luk, Sɛ́luk ɔɔ́nɔ́ u Lakahu, Lakahu ɔɔ́nɔ́ u Fálɛk, Fálɛk ɔɔ́nɔ́ u Ɛbɛ́ɛ, Ɛbɛ́ɛ ɔɔ́nɔ́ u Sala,

³⁶ Sala ŋaá bá ɔɔ́nɔ́ u Kayinam, Kayinam ɔɔ́nɔ́ u Aafasat, Aafasat ɔɔ́nɔ́ u Sɛm, Sɛm ɔɔ́nɔ́ u Nɔ́a, Nɔ́a ɔɔ́nɔ́ u Lamɛk,

³⁷ Lamɛk ŋaá bá ɔɔ́nɔ́ u Matusala, Matusala ɔɔ́nɔ́ u Ɛnɔk, Ɛnɔk ɔɔ́nɔ́ u Yalɛt, Yalɛt ɔɔ́nɔ́ u Malɛlɛyɛl, Malɛlɛyɛl ɔɔ́nɔ́ u Kayinaŋ,

³⁸ Kayinaŋ ŋaá bá ɔɔ́nɔ́ u Ɛnɔs, Ɛnɔs ɔɔ́nɔ́ u Sɛt, Sɛt ɔɔ́nɔ́ u *Átam, Átam ɔɔ́nɔ́ u Bandɔ́mɛsɛ́. Aáná Yésus ŋé huleʼo.