Lúkas 18 - Nomaande

Ɛnjaba ci ne esíké yí oónjú na musɔ́mbɔ́tɔ́na bɛsana

¹ Yésus ŋeé beébe túmíne ɛnjaba eeci anyía weé beébe tóŋínyi anyía bá ŋá bɔ nyɛmána bé o búle bɛ́cɔ́kɔ́lɛ́na Bandɔ́mɛsɛ́ bikúlú bikime, bá tɛ́ kasa ta buɔ́sɛ́,

² ɔsɛ : « Musɔ́mbɔ́tɔ́na bɛsana mɔmɔtɛ́ ŋaá bá a bunɔŋɔ a bɔ́mɔtɛ́ ; mu ŋaá bá mu ti eé líkíme Bandɔ́mɛsɛ́, mu ti kéké ta ɔɔcɔ.

³ Esíké yí oónjú a yɛ́mɔtɛ́ ŋaá bá tɔ́na aáhá a bunɔŋɔ eébú, yɛ́ cɔ́cɔbaka bikúlú bikime o ooki ú musɔ́mbɔ́tɔ́na bɛsana, yí muúmu laakɛna yɛ́sɛ : “Mɛ sɔ́mbɔ́tɔ́nɛ́na asana a yááŋa na yaŋɔ́ na muamɛ́ muliŋine”,

⁴ mbá bikúlú biéŋí musɔ́mbɔ́tɔ́na bɛsana eémú kíneke. Búmɔtɛ́ buɔ́sɛ́ mbá mú me bílúmúnyi mɔsɛ : “Ta yɛ́ ŋaá bá anyía i ti ŋé mí líkíme Bandɔ́mɛsɛ́, i ti kéké ta ɔɔcɔ,

⁵ mbá háyɛ esíké yí oónjú eéyé ŋeé mi yébi, míɔ cɔba ɔ ɔsɔ́mbɔ́tɔ́na yááyɛ́ asana háyɛ yá nyɛmána anyía u ti háná faáya o okoóyébi yáámɛ́ elilé.” »

⁶ Otéŋí a Waáŋá ŋó solínyi ɔsɛ : « Ánɔ lɔ́kɔ́ma bɔmbányɛ háyɛ aabɛ́ yɛ́ musɔ́mbɔ́tɔ́na bɛsana eéyí ŋáa kɔɔna.

⁷ Mbá anyána na Bandɔ́mɛsɛ́ ú tɛ káá sɔ́mbɔ́tɔ́kɔ́nɛ́na bɛsana a baacɔ bɔlɔtɔ́kɔ́nɔ́, beébe bé ŋe bú wuúci bɛ́cɔ́kɔ́lɛ́na na nabuɔ́sɛ́ ne nebutúé ; anyána u ti kéé beébe ɔ́ɔ́lɔ e ?

⁸ Ɛ ŋa mɛ́ banɔ́ laána anyía u ké tényí eé beébe sɔ́mbɔ́tɔ́kɔ́nɛ́na bɛsana háyɛ yá nyɛmána. Mbá ekúlú ayɛ́ Ɔɔ́nɔ́ u ɔɔcɔ káá fáaya, u káá kúana ɛ́cɛ baacɔ á bɔ́ánáŋa ne olumitinine e ? »

Ɛnjaba cɛ na ɔɔcɔ u Bafalisiɛ́ŋ ne mutúé etéési

⁹ Baacɔ a bɔ́mɔtɛ́ ŋa bɔ́ bá bébú bíkétíki anyía bá bɔ́ŋa bɛtálɛ́mánánɔ́ bɛ́ baacɔ, bá lɛ́caka anyía bɔsɔ́ɔ́kɔ́ tɛ ábɔ́ bá ta bɔkɔ ; Yésus ŋé beébe túmíne ɛnjaba eeci, ɔsɛ :

¹⁰ « Baacɔ béfendí ŋa bɔ́ cɔ́ba ɔ ɔkɔbɛ́cɔ́kɔ́lɛ́na e *Ciíbe cɛ Bandɔ́mɛsɛ́ ; a wɔmɔtɛ́ ŋaá bá ɔɔcɔ u *Bafalisiɛ́ŋ, ooci a wɔmɔtɛ́ *mutúé etéési yɛ́ kɔ́mɛ́na.

¹¹ Ɔɔcɔ u Bafalisiɛ́ŋ ŋaá tálɛ́mɛ́na ɛndánáka náányia, u bɛ́cɔ́kɔ́lɔ́kɛ́na ɔsɛ : “Kuɔŋɔ́ Bandɔ́mɛsɛ́, i ŋe mí o wiínjie bitéŋíti anyía ɛ tɛ ámɛ bá háyɛ baacɔ a bɔ́mɔtɛ́ e bé ŋe bú eebe, bá tɛ ábɔ́ bá bɛtálɛ́mánánɔ́ bɛ́ baacɔ, bá kándáka tusɔmɔ ; ɛ tɛ ámɛ bá háyɛ mutúé etéési eemu.

¹² I ŋe mí bíkíilie ɔnyíá mɔɔ́sɛ́ méfendí ɔ sɔ́ndɛ ɛ́mɔtɛ́, a tuafa túɔ́hátá tɔ́ búámɛ bɔnɔ́mɛ bukime, i ŋe mí o wiínjie nuafa númɔtɛ́.”

¹³ Mutúé etéési ŋaá bá tálɛ́mɛ́na enenyíé haaca, mu ti eéhínyínyi te obééti eése ɔ ɔmuaná ; mbá mu ŋaá bɛ́tálá aabá a aatɔ́, mu kɔɔnaka mɔsɛ : “Kuɔŋɔ́ Bandɔ́mɛsɛ́, mɛ bɛ́cáma mahana, yaŋɔ́ awɔ́ ya mɛ́ŋa aabɛ́ yɛ́ ɔɔcɔ.”

¹⁴ Ɛ ŋa mɛ́ banɔ́ láana anyía ɔɔcɔ oócí ŋaá hámá eé Ciíbe cɛ Bandɔ́mɛsɛ́ ɛ́cɛ wa yáaŋa atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́, mbá yɛ́ tɛ ɔ́mɔ bá aáná ná ɔɔcɔ u Bafalisiɛ́ŋ. Yááŋa anyía ɔɔcɔ okime ewú u ŋe bíbééti, Bandɔ́mɛsɛ́ kéé wuúci loosi, ɔɔcɔ okime ewú u ŋé bílóosi, Bandɔ́mɛsɛ́ kéé wuúci bééti. »

Yésus ŋa sáyábɛ́na iŋéné

¹⁵ Baacɔ ŋa bɔ́ cɔ́bákána te iŋéné né Yésus anyía weé ciíci bítíséke. Ekúlú ayɛ́ *baákɔ́nɛ́na ŋa bɔ́ lɛ́ca aáná, bé ŋé bu beébe kákálákɛ́na ɔkɛla aáná.

¹⁶ Yésus ŋá kɛla anyía bé wuúci kósítínyi banásɛ́ eébé, mbá ɔsɛ ná baákɔ́nɛ́na : « Ánɔ nyɛánáka banásɛ́ á faákɔ́na náámɛ ! Nuti beébe lekéke, anyía Bandɔ́mɛsɛ́ ŋe téŋínyi baacɔ bá ciabɔ́ ihúényínyí.

¹⁷ Aá taaká ɛ ŋa mɛ́ banɔ́ láana anyía ɔɔcɔ okime ewú u ti ŋéé lúmitinine *Butéŋí bɔ́ Bandɔ́mɛsɛ́ háyɛ ɔɔ́nɔmbɔ́ áŋa wu olumitinine, tɛ á bá wu ohiite Bandɔ́mɛsɛ́ háyɛ uuyé Otéŋí a Waáŋá. »

Ɛnɔ́mɛ cɛ ɔɔcɔ

¹⁸ Otéŋí a wɔmɔtɛ́ u *Besuif ŋa bátá Yésus ɔsɛ : « Ambányɛ yí muékúnyi, anyána yámɛ nyɛmána wu ɔkɛla anyía yámɛ bɔ́ŋɔ yɔɔ́sɔɔ́sɔ yí olíhe yí ekúlú ekime e ? »

¹⁹ Mbá Yésus ɔsɛ : « Anyíatɛ́ ɔ ŋɔɔ́ mɛ lɔ́ŋɔ anyía ambányɛ yɛ́ ɔɔcɔ e ? Ta ɔɔcɔ tɛ á bá ambányɛ yɛ́ ɔɔcɔ, ɛ tɛ ŋáa bá hú Bandɔ́mɛsɛ́ bímuócí.

²⁰ O ŋoó menyi *bikotí bɛ́ Bandɔ́mɛsɛ́ a bɛ́áŋa anyía : Atɛ kandáka tusɔmɔ ; atɛ ɔ́ɔ́nɔ ɔɔcɔ ; eti éébe ; atɛ sɔ́mbɛ́na ɔɔcɔ asana ; mbá kékéke na ɔɔtɛ́ na ɔɔnyia. »

²¹ Mbá ɔɔcɔ ɔsɛ : « Ya mɛ́ŋa ɔlátákɛ́nánɔ́ bikotí eébí bikime o otúme aámɛ a bunɔ́sɛ́. »

²² Ɛ́makɛ́la Yésus á lɔ́kɔ́má aáná, mbá ɔsɛ : « Asana a yɛ́mɔtɛ́ áŋa hɔ́á a yɔ́ nyɛmána wu ɔkɛlaka tɔ́na : Túéke bɛnyɛ́ma bikime abɛ́ ɔ ɔ́ŋa ne biíbi, mbá aafakɛna mɔɔnyɛ́ ná basɔ́kásɔ́ka, aáná ɔ kɔ́ɔ́ bá na bɔnɔ́mɛ a Bunɔŋɔ bɔ́ Bandɔ́mɛsɛ́ ; mbá á faaya, e búle mɛ látɛ́na. »

²³ Ɛ́makɛ́la ɔɔcɔ á lɔ́kɔ́má aáná, u ŋa lɔ́kɔ́ma meliŋé ɔ ɔtɛ́má hú mbiɔ́kɛ, anyía u ŋaá bá na bɔnɔ́mɛ buéŋí.

²⁴ Ɛ́makɛ́la Yésus á lɛ́cá anyía ú me cúnje, mbá ɔsɛ : « Hmm ! Yááŋa anatákánɔ́ yɛ́ asana anyía ɛnɔ́mɛ cɛ́ baacɔ ébú oófókíne e *Butéŋí bɔ́ Bandɔ́mɛsɛ́.

²⁵ Yááŋa fiaŋɔ anyía samó á hɔ́lɛ́na o onue ú ɛndɔndɔkɔ na anyía ɛnɔ́mɛ cɛ ɔɔcɔ ó yóófíne e Butéŋí bɔ́ Bandɔ́mɛsɛ́. »

²⁶ Baacɔ a bá ŋa bɔ́ bá bébú wuúci lɔ́kɔ́máka, ŋa bɔ́ kɔɔ́na báyɛ : « Mbá aáháʼo, aányɛ́ wáŋa wu ɔnɔhɔ aná e ? »

²⁷ Mbá Yésus ɔsɛ : « Bɔkɔ bukime abɔ́ baacɔ tɛ abɔ́ bá bá ɔkɛlaka, Bandɔ́mɛsɛ́ áŋa wu o buúbu kɛlaka. »

²⁸ Mbá Bíel ɔsɛ : « Basɔ́ abá tu ŋa sɔ́ bɛ́yúátáka bíásɔ́ bɛnyɛ́ma bikime, túɔ́ kuɔŋɔ́ látákaʼoo ? »

²⁹ Mbá ɔsɛ : « Aá taaká ɛ ŋa mɛ́ banɔ́ láana anyía mbɔ́kɔ ɔɔcɔ ŋá bɛ́yuáta ne uúyé ooki, ne oónyí, ne benyíinyí, ne bibíényi, na baáná a asana ne Butéŋí bɔ́ Bandɔ́mɛsɛ́,

³⁰ u kɔ́ɔ́ bɔ́ŋɔ biéŋí ɔ ɔhɔla a hɛɛya eehi, yɔ́ bɔ́ŋɔ yɔɔ́sɔɔ́sɔ yí olíhe yí ekúlú ekime a hɛɛya a hɛ́ ŋa fáakɔna. »

Bikúlú bɛ́tátɔ́ ebí Yésus ŋeé bíkétínyi baacɔ uúye owé

³¹ Yésus ŋé bísúétíne bááyɛ́ *baákɔ́nɛ́na bɔ́ɔ́hátá ne béfendí, mbá ɔsɛ : « Ánɔ lɔ́kɔ́ma bɔmbányɛ ! Tua suáŋa ɔ ɔbááta eé Yelúsalɛm, bɛsana bikime ebí *behémúnyi bɛsana bá Bandɔ́mɛsɛ́ ŋa bɔ́ ɔɔ́ŋɔ́kɔ aámɛ a asana, yaŋɔ́ Ɔɔ́nɔ́ u ɔɔcɔ, káá bɛ́kɛ́láka híáná.

³² Bé kéé wuúci fiimbie né be-ti-menyí Bandɔ́mɛsɛ́, beébe bá ká bɔ́ mɛ cɛ́cáka, bɔ́ mɛ ɔ́ɔ́mbɔ́náka, bó mi túékíne maatá.

³³ Ɛkákɛ́la bébú mi súbéke ne mesue, bɔ́ mɛ ɔ́ɔ́nɔ ; mbá a matátɔ́, míɔ haanyua e biwéewé. »

³⁴ Ta híáná, baákɔ́nɛ́na tɛ ɔ́mɔ bɔ́ lɔ́kɔ́ma ta bɔkɔ ɔ ɔtáŋa oócí awɔ́ ú ŋaá bá ɔnambánɔ́ náábɔ́, anyía bá tɛ lɔ́kɔ́ma bɔkɔ ebú Yésus ŋaá bá wa yáambaka ɔkɔɔna.

Yésus me yeéŋúnyísi ondíméndíme hoóhi ne Yéliko

³⁵ Ekúlú eyí Yésus ŋaá bá hoóhi na bálɛ́ka ci Yéliko, ondíméndíme a wɔmɔtɛ́ ŋaá bá limine a maabána me ohónyí, u lɛ́báka.

³⁶ U ŋá lɔ́kɔ́ma etúte yɛ́ baacɔ á hɔ́láka, u ŋá batá ɔsɛ : « Aátɛ́ yááŋa e ? »

³⁷ Bé ŋeé wuúci bɛ́káma anyía Yésus, ɔɔcɔ u *Násalɛt, wuúci ú ŋa hɔ́la.

³⁸ Aáná ú ŋé bééti okelú ɔ ɔmuaná ɔsɛ : « Yésus, ɔɔ́nɔ́ u Táfit, mɛ bɛ́cáma mahanaʼo ! »

³⁹ Baacɔ a bá ŋa bɔ́ bá bébú búekeke ŋa bɔ́ bá bébú wuúci kákálákɛ́na anyía wé lésíkínyi mbuumu ; ta híáná, u ŋa cɔ́ba ne buúse, u bɔ́mɔkɔ ɔsɛ : « Yésus, ɔɔ́nɔ́ u Táfit, mɛ bɛ́cáma mahanaʼo ! »

⁴⁰ Aáná Yésus ŋá tálɛ́mɛ́na, u ŋá laana baacɔ ɔsɛ : « Énu mi wuúci héléníne. » Ɛ́makɛ́la ondíméndíme é bíkósíti, Yésus ŋé wuúci batá ɔsɛ :

⁴¹ « Aátɛ́ ɔ ŋɔɔ́ waámba anyía yámɛ ɔ kɛla e ? » Mbá ɔsɛ : « Otéŋí a Waáŋá, kɛlá anyía yá háná ámɛ lɛcakana. »

⁴² Mbá Yésus ɔsɛ nááyá : « Háná lɛ́cakana ! Uúwú olumitinine mó yóo nohi. »

⁴³ Hí e ekúlú eéyé, u ŋá háná é túme ɔlɛcana, u ŋá látákɛ́na Yésus, u iínjíékine Bandɔ́mɛsɛ́ nuúmi. Ɛ́makɛ́la etúte ekime á lɛcá aáná, yí ŋé túme tɔ́na onyemi Bandɔ́mɛsɛ́.