Lúkas 15 - Nomaande

¹ Ne *betúé etéési bá kɔ́mɛ́na na bakɛla maabɛ́ bekime ŋaá bá bébú bíkósíti né Yésus anyía bábɔ́ lɔ́kɔ́máka bíáyɛ́ bɛsana.

² Na *Bafalisiɛ́ŋ ne *beékúnyi bikotí ŋa bɔ́ lɔ́kɔ́má bɔɔbɛ́, bé bícúcúléke báyɛ : « Ɔɔcɔ ooci ŋaá káha bɔmbányɛ bakɛla maabɛ́, u nyíékínyi ne beébe ! »

Ɛnjaba cɛ ɛtɔ́mbá e ci ŋeé nyímé

³ Yésus ŋeé beébe túmíne ɛnjaba ɔsɛ :

⁴ « Mbɔ́kɔ ɔɔcɔ a wɔmɔtɛ́ náánɔ́ áŋa na ɛtɔ́mbá etíne atáánɔ ; wée nyimisi ciíci ɛ́mɔtɛ́, tɛ́ka u káá nyɛ́ána etíne ényíse ne imbuke buunyi ne ínyíse a atúalɔ́ anyía wá caŋá ká yáambaka e cinyíménú ɔ ɔkɔɔ́háma ayɛ́ u ké ciíci bɔ́ŋɔ e ?

⁵ Ekúlú ayɛ́ u keé ciíci bɔ́ŋɔ, u ŋeé ciíci bɛ́tála a bɛfaka ne obíléne ɔ ɔtɛ́má, yó ciíci eélúéne ;

⁶ wá kaáháma o ooki, yɔ́ lɔ́ŋɔ́kɔ na baláayɛ́ na baacɔ a bá bɔ́ŋa hoóhi ne wuúci, mbá ɔsɛ náábɔ́ : “Ánɔ faákɔ́na, túé bílénéke anyía ɛ́ maá mɛ bɔ́ŋɔ cíámɛ́ ɛtɔ́mbá a cɛ ŋaá bá inyíménú !”

⁷ Ɛ ŋa mɛ́ banɔ́ láana anyía híáná obíléne weéŋí káá bá ɔ Ɔmuaná a asana na mɔkɛla maabɛ́ mɔmɔtɛ́ a mú á bɛ́kákálákɛ́na búáyɛ́ bɔɔbɛ́, mbá mu sɔ́mba ɔkɔlɔ́ eé buúbu ɔ ɔhɔla bɛtálɛ́mánánɔ́ bɛ́ baacɔ etíne ényíse ne imbuke buunyi ne ínyíse abɛ́ nyɛbɛ́kákálɛ́na nyɛ́ bɔɔbɛ́ ti ŋée beébe bɛ́ámbɛ́na. »

Ɛnjaba ci eléŋú yɛ́ mɔɔnyɛ́ e yí ŋee nyíme

⁸ « Ta anyía túá kɔɔ́na anyía oónjú a wɔmɔtɛ́ áŋa ne biléŋú bɛ́ mɔɔnyɛ́ bíɔ́hátá ; weé nyímísi yiíyi ɔ́mɔtɛ́, tɛ́ka u káá cia *lámba, u húle sɔ́ɔnɔkɔ ciíbe ikime ɔ ɔwaamba ɔ ɔkɔɔ́háma ayɛ́ u kéé yiíyi bɔ́ŋɔ e ?

⁹ Ekúlú eyí weé yiíyi bɔ́ŋɔ, mbá u lɔŋɔ́kɔ na baláayɛ́ na baacɔ a bá bɔ́ŋa hoóhi ne wuúci, mbá ɔsɛ náábɔ́ : “Ánɔ faákɔ́na, túé bílénéke anyía ɛ́ maá mɛ bɔ́ŋɔ eléŋú yɛ́ mɔɔnyɛ́ e yí ŋeé mi nyímíné !”

¹⁰ Ɛ ŋa mɛ́ banɔ́ láana anyía híáná obíléne weéŋí áŋa haála ahá *bililé bɛ́ masɔ́ma bɛ́ Bandɔ́mɛsɛ́ áŋa ekúlú ayɛ́ mɔkɛla maabɛ́ mɔmɔtɛ́ a mú á bɛ́kákálákɛ́na búáyɛ́ bɔɔbɛ́, mbá mu sɔ́mba ɔkɔlɔ́ eé buúbu. »

Ɛnjaba cɛ ɔɔ́nɔ́ ewú u ŋeé nyíme

¹¹ Mbá Yésus ŋa háná beébe laana ɔsɛ : « Ɔɔcɔ a wɔmɔtɛ́ ŋaá bá na baáná banɔ́mɔcɔ́ béfendí.

¹² Ekuke yɛ́ ɔɔ́nɔ́ ŋá laana síkíne eebu buɔ́sɛ́ ɔsɛ : “Taatá, mi iínjie núámɛ nuafa nɔ́ bɔnɔ́mɛ a nɔ́ á mɛ nyɛmána.” Síkíne ŋá aafákɛ́na bááyɛ́ baáná bɔnɔ́mɛ.

¹³ Mɔɔ́sɛ́ tɛ́ka ɔ ɔhɔla meéŋí, ekuke ŋá bándáka búáyɛ́ bɔnɔ́mɛ bukime, u ŋé súéte a bunɔŋɔ bɔ́ haaca. U ŋgeé buúbu cáŋgɛ́na a aabɛ́ yí olíhe.

¹⁴ Ɛ́makɛ́la wá mana ɔcaŋɛna, ɔmbɔ́ta ú ɛcaná ŋá háma a haála hekime etéehe ; ɔsɔ́ka ŋé wuúci hatɛ́na.

¹⁵ U ŋá cɔba ɔ ɔkɔnyíɔnɔ ɔɔcɔ a wɔmɔtɛ́ u bunɔŋɔ eébú ; ɔɔcɔ oócí ŋé wuúci tɔ́ma o okotétényi ɛŋɔnáfá a bíáyɛ́ bisíéné.

¹⁶ Ɛcaná ŋaá bá cíé wuúci nuakɛna buéŋí, a nyɛnamá anyía u ŋaá bá weé lénéke ɔnyíá bɛnyɛ́ma abɛ́ ɛŋɔnáfá ŋaá bá cíá nyíáka, mbá ta ɔɔcɔ ŋaá bá u ti é wuúci iínjie.

¹⁷ Ɛ́ɛhɛ́ ú ŋe túmé obílúmínyi mbá ɔsɛ : “Bɔnyiɔnɔ bekime bá ciamɛ́ síkíne á bɔ́ŋa na bɛnyɛ́ma biéŋí e bí ŋeé beébe yáka ɔnyíá, mbá yaŋɔ́ aáhá, i ŋeé mi wé ɛcaná !

¹⁸ Ɛ ŋa mɛ́ cɔba ɔ ɔhatɔna, míɔ hálɔ́mɔ́na ná ciamɛ́ síkíne, mío wuúci laana anyía : Taatá, ya mɛ́ŋa ɔkɛlákánɔ́ na Bandɔ́mɛsɛ́ na kuɔŋɔ́ bɔɔbɛ́ ;

¹⁹ ɛ tɛ ámɛ bá wu ɔ háná bɛ́lɔ́ŋɛ́ta anyía uuwe ɔɔ́nɔ́. Mi hiíte aná háyɛ munyiɔnɔ a mumɔtɛ́ a bɔ́ɔ́wɔ bɔnyiɔnɔ.”

²⁰ U ŋá hatɔ́na, u ŋá hálɔ́mɔ́na né síkíne. U ŋaá bá wa yánaŋa haaca ekúlú eyí síkíne ŋeé wuúci lɛcá, u ŋé wuúci bɛ́cáma mahana ; ɛ́ɛhɛ́ u ŋɔ sɔ́mɔ́ ɔtɛ́tá o okoó wuúci káha, u ŋé wuúci bɛ́áhɛ́nɛ́na a cɛɛ́tɔ, u ŋé wuúci bíémbi.

²¹ Mbá ɔɔ́nɔ́ ɔsɛ : “Taatá, ya mɛ́ŋa ɔkɛlákánɔ́ na Bandɔ́mɛsɛ́ na kuɔŋɔ́ bɔɔbɛ́ ; ɛ tɛ ámɛ bá wu ɔ háná bɛ́lɔ́ŋɛ́ta anyía uuwe ɔɔ́nɔ́.”

²² Mbá síkíne ŋaá laana bááyɛ́ bɔnyiɔnɔ ɔsɛ : “Énu tényí héléne ambányɛ́kɛ́ yɛ́ bɔlaka, énu wuúci laŋá ; énu wuúci háya tɔ́na na nɔbánda a hɛnɔɔ́nɔ́ na bɛkandɛ́na a akɔlɔ́.

²³ Énu héléne ɔɔ́nɔ́ u káwɔ a wɔtɔ́lɔ́kɔ́nɔ́, ánɔ ɔ́ɔ́nɔ ; túé bílénéke, túá nyíáka,

²⁴ anyía uumí ɔɔ́nɔ́ ooci ŋeé wé, ú ma háányua ; u ŋeé nyímé, ú mɔɔ́ bɔ́ŋɛ́a.” Bé ŋé túme obíléne.

²⁵ Ekúlú eéyé, ɔɔ́nɔ́ a waáŋá ŋaá bá wa yánaŋa e esíéné. O okowéélúéke, wa yáaŋa hoóhi ne ooki, u ŋá lɔ́kɔ́ma bé súbéke bikembí, bé bínéke.

²⁶ U ŋɔ́ lɔ́ŋɛ́ta munyiɔnɔ a mumɔtɛ́, ɔsɛ nááyá : “Aátɛ́ yááŋa aáhá e ?”

²⁷ Mbá munyiɔnɔ ɔsɛ : “Ɔnɔ́ɔnyia mé ké yeélue, ɔɔtɛ́ mɔ yɔ́ɔnɔ ɔɔ́nɔ́ u káwɔ a wɔtɔ́lɔ́kɔ́nɔ́, anyía uuyé ɔɔ́nɔ́ maá ka hálɔ́mɔ́na ɔmbányɛ aá cɛɛ́tɔ.”

²⁸ Hilóbi ŋé tímbíé ɔɔ́nɔ́ a waáŋá, u ŋé kine owoofine eé ciíbe. Aáná síkíne ŋaá hámá a nɔháatɛ́ o okoó wuúci bɛ́cɔ́kɔ́lɛ́na anyía wé oofíne.

²⁹ Mbá ɔɔ́nɔ́ ɔsɛ nááyá : “Ɔ́ɔ lɛcá ! Tuɔŋɔ a yáaŋa tuéŋí atɔ́ ɛ́ ŋɔ mɛ́ ɔ nyiɔnɔ buólí, ɛ kɛlaka bɔkɔ bukime abɔ́ ɔ ŋɔ mɛ́ laana anyía yámɛ́ kɛláka. Ta híáná, ó ti ŋóo mi iínjie te hibébíbébí anyía túésú bílénéke na baláamɛ.

³⁰ Mbá, ekúlú eyí uuwe ɔɔ́nɔ́ ooci maá ka hálɔ́mɔ́na, wuúci awɔ́ u ŋa cáŋgɛna búɔ́wɔ bɔnɔ́mɛ bukime o olíhe na bɛɛbɛ́ bí beénjú, ó moó wuúci ɔɔ́nɛ́na ɔɔ́nɔ́ u káwɔ a wɔtɔ́lɔ́kɔ́nɔ́ !”

³¹ Aáná síkíne ŋeé wuúci laána ɔsɛ : “Ɔɔ́nɔ́, tua sɔ́ŋa na kuɔŋɔ́ aaha bikúlú bikime, bíámɛ bɛnyɛ́ma bikime áŋa bíɔ́wɔ.

³² Mbá tu ŋá sɔ́ nyɛmána tú ɔlɔ́kɔ́máka bɔmbányɛ, tu bílénéke, anyía ɔnɔ́ɔnyia ooci awɔ́ ɔ ŋɔɔ́ lɛca ŋeé wé, ú ma háányua ; u ŋeé nyíme, ú mɔɔ́ bɔ́ŋɛ́a.” »