Kalasi 3 - Nomaande

Olumitinine ŋa yáaŋia ɔɔcɔ a buɔ́lɛ́ bú bikotí

¹ Banɔ́ baacɔ bá Kalasi, anyána ! Nu tɛ anɔ́ bá na bɛɛtɔ́ e ? Aányɛ́ u ŋaá banɔ́ cáŋgɛ́na ɛtɛ́má e ? Yaŋɔ́ ɛsɛ bá ŋaá banɔ́ búlúnékíné bɔmbányɛ anyána Yésus *Kilís ŋeé wé waátákɛ́nánɔ́ ɔ ɔmbásá e ? Mbá anyána !

² Ánɔ mɛ́ bɛ́káma hú ɛmbataka eeci : Bandɔ́mɛsɛ́ ŋaá banɔ́ íínjíé yááyɛ́ Elilé anyía nyɛlátɛ́na nyí *bikotí ayɛ́ʼ, anyía nu ŋa nɔ́ lɔ́kɔ́máká Ambányɛ yɛ́ Ɛsɔ́ma, núó yiíyi lumitekinine e ?

³ Nu tɛ anɔ́ bá na bɛɛtɔ́ eenyi e ? Banɔ́ ebé nú ŋe nú túméké buáyá na makɛ́nda me Elilé, anyána nu ŋa nɔ́ áamba aná okuenyinyi na makɛ́nda ma nyɛbɛ́táá nyɛ́ baacɔ e ?

⁴ Ɛ́cɛ anyía anamánamá cá bɛsana acɛ́ nu na ma nɔ́ lɛ́caka tɛ ŋá banɔ́ ɔ́ɔ́lɔ buúse bukime e ? Aá taaká bɛ́áŋa etémbí e ?

⁵ Ɔ́kɔ Bandɔ́mɛsɛ́ ŋaá banɔ́ iínjíé yááyɛ́ Elilé, yɔ́ kɛlaka *bikéki bɛ́ bɛsana náánɔ́ anyía nyɛlátɛ́na nyí bikotí ayɛ́ʼ, anyía nu ŋa nɔ́ lɔ́kɔ́máká Ambányɛ yɛ́ Ɛsɔ́ma, nuó yiíyi lumitekinine e ?

⁶ Ánɔ bɛ́táá asana yɛ́ *Abɛ́laham : U ŋaá háyá mɔŋɔlɛ́ ná Bandɔ́mɛsɛ́, buátɛ́ bɔkɔ Bandɔ́mɛsɛ́ ŋeé wuúci lɛcá háyɛ atálɛ́mánánɔ́ yɛ́ ɔɔcɔ eeyé eé buúse.

⁷ Énu menyi bɔmbányɛ anyía hú baacɔ a bá ŋa bɔ́ hákɛ́ná mɔŋɔlɛ́ ná Bandɔ́mɛsɛ́ á bɔ́ŋa taaká cɛ́ baáná bá Abɛ́laham.

⁸ Ciɔɔ́ŋɛ́ cɛ́ Bandɔ́mɛsɛ́ ŋe bíkétíki buáyá anyía u káá kɛ́laka anyía baacɔ a bá tɛ ábɔ́ bá *Besuif á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse a asana ne úúbú olumitinine. Ɛ́ɛhɛ́ Bandɔ́mɛsɛ́ ŋaá laána Abɛ́laham ɔsɛ : « Ɛ ká mɛ́ hɔlɛna nɔ́ɔ́wɔ ɔ ɔsayabɛna baacɔ bekime bá ɔmɛsɛ́. »

⁹ Abɛ́laham ŋee lumítíníne, ɛ́ɛhɛ́ Bandɔ́mɛsɛ́ ŋeé wuúci sayábɛ́na. Aáná baacɔ bekime e bé ŋe bú lúmitinine, Bandɔ́mɛsɛ́ kéé beébe sáyábákɛ́na tɔ́na.

¹⁰ Yááŋa anyíaʼo, baacɔ bekime e bé me bú bíínjie a nyɛlátɛ́na nyí bikotí á búáŋa bɔlɔmɔ́kɔ́nɔ́, anyía yááŋa yɔɔ́ŋɔ́kɔ́nɔ́ anyía « Ɔɔcɔ okime ewú u ti ŋée bíínjie ekúlú ekime ɔ ɔlátɛ́na bɛsana bikime a bɛ́áŋa bɛɔ́ŋɔ́kɔ́nɔ́ e nufule nú bikotí áŋa na nyɛlɔmɔ. »

¹¹ Tu ŋe sú ményi bɔmbányɛ anyía ta ɔɔcɔ tɛ á bá wu ɔbá atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́ a asana na nyɛlátɛ́na nyí bikotí. Yááŋa aáná anyía : « Ɔɔcɔ a wáŋa atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́ anyía u ŋaá háya mɔŋɔlɛ́ nááyá kéé líhéke taaká ci olíhe. »

¹² Mbá nyɛálɔ́nána áŋa hɔ́á ɛ ɛkatɛ́katɛ́ cɛ na ɔɔcɔ awɔ́ u ŋa látɛ́na bikotí ne ooci awɔ́ u ŋaá háya mɔŋɔlɛ́ ná Bandɔ́mɛsɛ́. Yááŋa yɔɔ́ŋɔ́kɔ́nɔ́ anyía : « Ɔɔcɔ okime awɔ́ u ŋa látɛ́na bɔmbányɛ bikotí bikime káá bá ne olíhe a asana ne biíbi. »

¹³ Bandɔ́mɛsɛ́ ŋaá basɔ́ lɔ́mɔ́kɔ basɔ́ bekime anyía tu tɛ ɔ́mɔ sɔ́ látɛ́na bikotí bikime. Mbá Kilís ŋaá faáya, yɔ́ basɔ́ háŋɔ́náka anyía mbá Bandɔ́mɛsɛ́ é wuúci lɔ́mɔ́kɔ a yáásɔ́ asana. Bú ŋo tóŋínyi anyía ú maá basɔ́ kétúnyíki a nyɛlɔmɔ eényí. Aáná yááŋa yɔɔ́ŋɔ́kɔ́nɔ́ anyía : « Ɔɔcɔ okime awɔ́ bá tɔ́ŋá a bɔɔtɛ́ ɔ ɔmuaná áŋa na nyɛlɔmɔ. »

¹⁴ Kilís ŋa kɛ́láka aáná anyía ɛndána acɛ́ Bandɔ́mɛsɛ́ ŋaá bɛ́tánɛ́na Abɛ́laham á bámɔ́kɔ́na tɔ́na ná baacɔ a bá tɛ ábɔ́ bá Besuif e elime ci Yésus Kilís, yɔ́ basɔ́ iínjíé tɔ́na, basɔ́ bekime, Elilé ayɛ́ u ŋaá basɔ́ bɛ́tánɛ́na owiínjie a asana ne olumitinine.

¹⁵ Baláamɛ, ɛ ŋa mɛ́ áamba ɔ banɔ́ tóŋínyi hibílícínyínyí a bɛsana a bɛ́ náŋa bɛ́ a bɛ́kɛ́láka : Mbɔ́kɔ ɔɔcɔ a wɔmɔtɛ́ ŋé síke nyɛlɛ́ha a nyɛ́mɔtɛ́ háyɛ yɛ́ ŋaá bɛ́ámba, ɔɔcɔ u etémbí tɛ á bá wu ɔwaáŋia mbá te osolinyi bɔkɔ a búmɔtɛ́ a nyɛlɛ́ha eényí.

¹⁶ Búáŋa híáná na Bandɔ́mɛsɛ́, anyía buáyá u ŋaá bɛ́tánɛ́na ɔkɛla Abɛ́laham bɔmbányɛ ne hííyé hɛnyɛ́nɔ́ áyá. Bu tɛ á bá anyía u ŋaá kɔɔ́na anyía « tɔnyɛ́nɔ́ » háyɛ anyía túáŋa tuéŋí, mbá hɛnyɛ́nɔ́ áŋa hú hɛ́mɔtɛ́ ; hííyé hɛnyɛ́nɔ́ ŋe hembule anyía Kilís.

¹⁷ Bɔkɔ abɔ́ ɛ ŋa mɛ́ áamba ɔkɔɔna áŋa anyía Bandɔ́mɛsɛ́ ŋaá látana bumbénú na Abɛ́laham, yɔ́ bɛ́tána anyía u ŋa cɔ́ba o o buúbu nyióyísínyi. Buátɛ́ bɔkɔ bikotí e bí ŋe síké á fáaya aaha e elime cɛ hɔ́ndɛ́tɛ cɛ́ tuɔŋɔ ínyíse na tuɔŋɔ nyitíne na túɔ́hátá tɛ á bá bɛ́ ɔnyɔ́kɔ́tɔ́na nyɛlatana eényí, mbá te onyietinyi ɛndána cɛ Bandɔ́mɛsɛ́.

¹⁸ Nu ŋe nú keti yáakɛlá anyía Bandɔ́mɛsɛ́ ŋa sáyabɛna ɔɔcɔ a asana na nyɛlátɛ́na nyí bikotí, tɛ́ cáŋa ɛ ɛndána acɛ́ u ŋaá bɛ́tánɛ́na ɔɔcɔ. Eéʼeé, yááŋa anyíaʼo, Bandɔ́mɛsɛ́ ŋa sáyábákɛ́ná Abɛ́laham ananyía u ŋeé wuúci bɛ́tánɛ́ná.

¹⁹ Mbɔ́kɔ aáná yááŋa, aátɛ́ bikotí abɛ́ Bandɔ́mɛsɛ́ ŋe yiínjíékíne baacɔ ŋɔ yɔɔ́lɔ e ? U ŋeé biíbi télímíkínyi anyía tuesú ményúkúne anyía tu ŋa sɔ́ nánaka ɔ ɔkɔɔ́háma anyía ɔɔcɔ u hɛnyɛ́nɔ́ hɛ́ Abɛ́laham a wáŋa ɛ́cɛ Kilís áa fáaya ; ná ɔɔcɔ oócí Bandɔ́mɛsɛ́ ŋe yiínjíé ɛndána eécí. Bililé bɛ́ masɔ́ma bɛ́ Bandɔ́mɛsɛ́ bí ŋe húlíkínyi baacɔ bikotí eébí, bɛ́ ɔhɔlakɛna né ohényíhényi. Mbá ohényíhényi naŋa wɔɔ́ nyíɔ́kɔ buólí ɛ ɛkatɛ́katɛ́ cɛ baacɔ béfendí.

²⁰ A aháŋá na Bandɔ́mɛsɛ́, wuúci bɛ́muátá u ŋaá bɛ́tánɛ́ná Abɛ́laham, u tɛ ɔ́mɔɔ́ tɔ́ma ohényíhényi.

²¹ Ɛ́cɛ bú ŋe hémbule anyía bikotí ŋe núusi ɛndána cɛ Bandɔ́mɛsɛ́ e ? Eéʼeé, buúse bukime. Yááŋa anyía, mbɔ́kɔ okotí a yɛ́mɔtɛ́ á bámɔ́kɔ́na hɔ́á a yááŋa yí owiínjíékíne baacɔ olíhe, keyé baacɔ e bé ŋe bú yiíyi latákɛ́ná ŋa bɔ́ bá bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́.

²² Mbá yááŋa yɔɔ́ŋɔ́kɔ́nɔ́ anyía baacɔ bekime bá ɔmɛsɛ́ á bɔ́ŋa bɛɔ́lɛ́ bɛ́ bɔɔbɛ́, ananyía mbá Bandɔ́mɛsɛ́ é beébe iínjíékíne bɛnyɛ́ma abɛ́ u ŋaá bɛ́tánákɛ́ná baacɔ a bá ŋa bɔ́ háya mɔŋɔlɛ́ né Yésus Kilís.

²³ Ekúlú ayɛ́ tu ŋa sɔ́ bá ɛ́cɛ tu tɛ ŋá sɔ́ háya mɔŋɔlɛ́ né Kilís, tu ŋa sɔ́ bá ɛ́cɛ tua sɔánáŋa a buɔ́lɛ́ bú bikotí ɔ ɔkɔɔ́háma ekúlú ayɛ́ tu ŋa sɔ́ hákɛ́na mɔŋɔlɛ́ né Kilís.

²⁴ Yááŋa anyía bikotí ŋaá bá háyɛ mutóŋínyi ohónyí ɔ ɔkɔɔ́háma a nyɛfaaya nyí Kilís, ananyía mbá túásɔ́ bámɔ́kɔ́na bɛtálɛ́mánánɔ́ bɛ́ baacɔ eé buúse bɔ́ Bandɔ́mɛsɛ́ anyía tu ŋe sú lumitinine.

²⁵ Mbá, aámbáya tua sɔáŋa o olumitinine Kilís, tu tɛ asɔ́ bá tɔ́na e butéŋí bú mutóŋínyi ohónyí eémú.

²⁶ Banɔ́ bekime nua nuáŋa baáná bá Bandɔ́mɛsɛ́ anyía nu ŋa nɔ́ hákɛ́ná mɔŋɔlɛ́ né Yésus Kilís ; bú tóŋgínyi anyía nua nɔ́ŋa e nyimónjóló ne Yésus Kilís.

²⁷ A asana eyí nu ŋe nú bíótókíne, nua nɔ́ŋa e nyimónjóló ne wuúci. Aámbáya nua nuáŋa o olíhe i iŋetí ci Kilís bɛ́muátá.

²⁸ Aáná tua sɔáŋa bɔkɔ búmɔtɛ́ eé buúse bɔ́ Bandɔ́mɛsɛ́ ; nyɛálɔ́nána tɛ á bá tɔ́na ɛ ɛkatɛ́katɛ́ ci ne Besuif na baacɔ a bá tɛ ábɔ́ bá Besuif, ta ɛ ɛkatɛ́katɛ́ cɛ na bɛɔ́lɛ́ na baacɔ a bá tɛ á bá bɛɔ́lɛ́, ta cɛ na banɔ́mɔcɔ́ ne beénjú. Banɔ́ bekime nua nuáŋa bɔkɔ búmɔtɛ́ e nyimónjóló ne Yésus Kilís.

²⁹ Banɔ́ abá nua nuáŋa baacɔ bé Kilís, nua nuáŋa aná bɔnyɛ Abɛ́laham ; nua nuáŋa nú ɔbɔ́ŋɔ nuafa a bɛnyɛ́ma bikime abɛ́ Bandɔ́mɛsɛ́ ŋaá bɛ́tánákɛ́ná o beébe iínjie.