Buólí 7 - Nomaande

Itiene eé buúse bú Hitúlé a hiáŋá

¹ Aáná *mutéŋínyi beluli nyiínjie a muáŋá ŋeé bícónyi Itiene, ɔsɛ : « Ɔ́kɔ, bɛsana eebi abɛ́ baacɔ eebe ŋa bɔ́ ɔ kɔɔnɛna áŋa taaká e ? »

² Itiene ɔsɛ : « Banɔ́, na báámɛ benyíinyí ne cíími síkíne, ánɔ tákɛ́na eetú, ánɔ lɔ́kɔ́ma bɔmbányɛ ! Bandɔ́mɛsɛ́ Muómóomo ŋee bítóŋínyí ná ciasɔ́ sɔ́kɔ́nɔ́ *Abɛ́laham a bunɔŋɔ bú Mesobotamí ɛ́cɛ Abɛ́laham ti ŋge limékíne a bálɛ́ka cɛ́ Hálan.

³ U ŋeé wuúci laána ɔsɛ : “Hatɔ́na ɔɔ́wɔ a bunɔŋɔ, bɛ́álɔ́na na ciɔwɔ ciíbe cɛ baacɔ, mbá e ke limékíne a bunɔŋɔ ebú i ké mí o tóŋie.”

⁴ Abɛ́laham ŋaá hátɔ́na a bunɔŋɔ bú Kalɛtɛ́ɛ, u ŋgé límékíne a bálɛ́ka cɛ Hálan. Ɛ́makɛ́la ciayɛ́ síkíne é wé hɔ́á, Bandɔ́mɛsɛ́ ŋé létínyi Abɛ́laham aaha a bunɔŋɔ ebú tu ŋe sú límine aámbáya.

⁵ Bandɔ́mɛsɛ́ te o wuúci iínjie te ekéti yɛ́ haála eé buúbu anyía yɛ́ á bá hááyɛ́ haála há bɛ́muátá, mbá u ŋeé wuúci bɛ́tánɛ́na anyía u kéé wuúci iínjie bunɔŋɔ eebu, búé wuúci bɛ́lɔ́kɔ́mákɛ́na, te u tɛ á bá tɔ́na, bááyɛ́ banana bó buúbu lɔbɔnɔ. Ekúlú ayɛ́ Bandɔ́mɛsɛ́ ŋaá bɛ́táná aáná, Abɛ́laham ŋaá bá ɛ́cɛ u tɛ ŋaá bá na ɔɔ́nɔ́.

⁶ Bandɔ́mɛsɛ́ yó wuúci laána ɔsɛ : “Bɔ́ɔ́wɔ banana ké ke bú límekine a bunɔŋɔ bɔ́ baacɔ bé etémbí, hɔ́á bé kéé beébe ceŋisiki bɛɔ́lɛ́, bó beébe tekeseke tuɔŋɔ hɛɛcɔ hikimekime.

⁷ Mbá yaŋɔ́, i ké mí kélísíki baacɔ bá bunɔŋɔ e bé ké bú beébe ceŋisiki bɛɔ́lɛ́. E elime eécí, bá ká bɔ́ hátɔkɔna hɔ́á, bó kó mí nyemiki aaha aá haála eehe.”

⁸ Aáná Bandɔ́mɛsɛ́ ŋaá látána bumbénú na Abɛ́laham, hibílícínyínyí hɛ́ nyɛlata nyí bumbénú eéhí áŋa muacana. Aáná Abɛ́laham ŋeé bíéné *Isak, u ŋé wuúci aacá e metíndétú nɔ́mɔ ma nyíáyɛ́ nyibíbíéne ; Isak ŋaa kɛ́láka híáná ne uuyé ɔɔ́nɔ́ Yákɔb, Yákɔb yɔ́ kɛ́láka tɔ́na na bááyɛ́ baáná, cíísú sɔ́kɔ́nɔ́ cíɔ́hátá ne ífendí.

⁹ Cíísú sɔ́kɔ́nɔ́ ŋa bɔ́ bá bábɔ́ aákákɛ́na yáábɔ́ ekuke yí onyíinyí Yɔ́sɛb, ɛ́ɛhɛ́ bé ŋe bú wuúci túé e *Esíbit. Ta híáná, Bandɔ́mɛsɛ́ ŋaá bá ne wuúci.

¹⁰ Buátɛ́ bɔkɔ u ŋeé wuúci kétúnyíkí a múáyɛ́ muuyé mukime. Yɔ́sɛb ŋaá bá ne injiŋé ; Bandɔ́mɛsɛ́ ŋá kɛ́la anyía Falawɔ́ŋ, Otéŋí u Esíbit, é wuúci lénéke buéŋí. U ŋeé wuúci béétí kɔ́mɛ́na ne ci Esíbit na cɛ ciayɛ́ ciíbe cɛ baacɔ ikime.

¹¹ Aáná ɔmbɔ́ta ú ɛcaná ŋaá hámá na a bunɔŋɔ bú Esíbit bukime na bɔ́ *Kanaáŋ áyá ; muuyé ŋaá bá muéŋí ekúlú etéeyé, cíísú sɔ́kɔ́nɔ́ tɛ bɔ́ŋɔ bɔkɔ bɔ́ ɔnyíáka.

¹² Ekúlú ayɛ́ Yákɔb ŋaá lɔ́kɔ́má anyía bɛnyɛ́ma bɛ́ ɔnyíá áŋa e Esíbit, u ŋá tɔ́ma cíísú sɔ́kɔ́nɔ́ hɔ́á nyí buúsebuúse ɔ ɔkɔɔ́wɔɔ́ndɔ bɛnyɛ́ma bɛ́ ɔnyíá.

¹³ A nyɛcɔba nyɛ́ ɔláta, Yɔ́sɛb ŋá kɛlá anyía benyíinyí é wuúci menyútúne ; aáná Falawɔ́ŋ ŋe ményi ciíbe cɛ baacɔ cɛ Yɔ́sɛb.

¹⁴ Yɔ́sɛb nyɛtɔ́ma baacɔ eényí o okohíite na ciayɛ́ síkíne Yákɔb ne hííyé hɛnyɛ́nɔ́ hikime áyá ; bá ŋa bɔ́ bá baacɔ etíne átátɔ́ ne imbuke buunyi.

¹⁵ Na Yákɔb na bááyɛ́ baacɔ ŋa bɔ́ hátɔna, bé ŋge límékíne e Esíbit ; hɔ́á Yákɔb ŋeé wé, ne cíísú sɔ́kɔ́nɔ́ áyá.

¹⁶ Bá ŋaá bɛ́túáhákɛ́na cííbú imime, bá cɔ́cɔbakana a bálɛ́ka ci Síkɛm o okoó ciíci nyiéke e eenyie ayɛ́ Abɛ́laham ŋɔ yɔ́ɔ́ndɔ́kɔ́ ná baáná bá Hɛmɔ́ɔ.

¹⁷ Ekúlú ŋaá bá yé bíkósíki ayɛ́ Bandɔ́mɛsɛ́ ŋa nyɛ́mána wu onyíóyísínyi ciayɛ́ ɛndána acɛ́ u ŋaá bɛ́tánɛ́ná Abɛ́laham. Baacɔ bá búásɔ́ bunɔŋɔ a bá ŋa bɔ́ bá e Esíbit ŋaá bá bábɔ́ áátákánána, bé tékeke buéŋí

¹⁸ ɔ ɔkɔɔ́háma ekúlú eyí otéŋí u etémbí ewú u ti ómo ményi Yɔ́sɛb ŋaá báátá e butéŋí e Esíbit.

¹⁹ Otéŋí oócí ŋeé néŋéké baacɔ bá búásɔ́ bunɔŋɔ, u tekeseke buéŋí cíísú sɔ́kɔ́nɔ́, u beébe eékíkínyi anyía bá nyɛánáka cííbú iŋéné cɛ́ baáná a nɔháatɛ́, cíé wéékúne.

²⁰ A yaátɛ́ ekúlú eéyé *Moyís ŋeé bíbíéne ; u ŋaa hɛ́káka buéŋí, u bílénékíne Bandɔ́mɛsɛ́. Bíáyɛ́ bibíényi ŋe bú wuúci oolóbóko eé ciíbe noómi iílí ikimekime ɛ́tátɔ́.

²¹ Ɛ́makɛ́la bébú wuúci bɛ́yúata, ɔbɔ́la u Falawɔ́ŋ ŋá kɔcá Moyís, yó wuúci oolóbóko háyɛ uuyé ɔɔ́nɔ́ u bɛ́muátá.

²² Aáná baacɔ bé Esíbit ŋe bú eékúnyíki Moyís bɛsana bikime bɛ́ ɔmɛsɛ́ abɛ́ bá ŋa bɔ́ bá bébú ményukune ; nyíáyɛ́ nyɛbɛ́cáŋa eényí yaandándá yɛ́ ɔɔcɔ ne e uúyé ɔtáŋa na a nyíáyɛ́ nyɛkɛla nyɛ́ bɛmbányɛ bɛ́ bɛsana.

²³ Ɛŋakɛlá Moyís a yáaŋa na tuɔŋɔ etíne éfendí, bú ŋé wuúci bílénékíne anyía wá ka lɛ́ca nyɛnamá nyí olíhe anyɛ́ bááyɛ́ benyíinyí, baacɔ bé *Islayɛ́l, ŋe bú líhe.

²⁴ Ɛ́makɛ́la wáá cɔbá, u ŋá kuána ɔɔcɔ u Esíbit a wɔmɔtɛ́ é súbéke ɔɔcɔ ɔmɔtɛ́ u buayá. Moyís ŋa kɛlá wáá lɛ́cá, u ŋá bɛ́hɛ́ŋɛ́na onúséyé, u ŋé wuúci bífúné, yó wuúci ɔ́ɔ́nɔ́.

²⁵ U ŋaá bá waá bɛ́tááka, mbá ɔsɛ : “Báámɛ benyíinyí ŋa bɔ́ cɔ́ba ɔ ɔlɛca a nyɛbɛ́kɛ́lɛ́na eényí anyía yaŋɔ́ Bandɔ́mɛsɛ́ maá mɛ tɔ́ma o okoó beébe nohiki” ; mbá beébe ta ɔlɛca asana eéyé aáná.

²⁶ Ɔ ɔyá ɔyá, Moyís ŋa kuána tɔ́na baacɔ béfendí bá bunɔŋɔ bú Islayɛ́l ábɔ́ núaka ɛcálɛ. U ŋaá bá wá yáambaka o beébe eélúnyi, mbá ɔsɛ náábɔ́ : “Baláamɛ, yaŋɔ́ ɛsɛ nua nɔ́ŋa benyíinyí e ? Aátɛ́ yááŋa nu ŋe nú yébinyinyi banɔ́ na banɔ́ e ?”

²⁷ Mbá sɔ́ɔ́kɔ́ awɔ́ u ŋaá bá weé tékeseke onyíinyí ŋaá bɛ́kátɛ́tɛ́na Moyís, ɔsɛ nááyá : “Aányɛ́ ú mó yóo télímínyi ne uusú otéŋí na muasɔ́ mukélísi bɛsana e ?

²⁸ Ɔ ŋɔɔ́ waamba ɔ mɛ ɔ́ɔ́nɔ háyɛ ɔ́ ŋɔɔ́ wɔ́ɔ́nɔ́ ɔɔcɔ u Esíbit búocí e ?”

²⁹ Ɛ́makɛ́la wá lɔ́kɔ́ma aáná, nyɛcabakɛna eényí ɔ ɔkɔbɛ́námba a bunɔŋɔ bú Matiaŋ háyɛ eliminyi ; hɔ́á bé ŋe bú bíéné baáná a banɔ́mɔcɔ́ béfendí ne oónyí.

³⁰ Ɛŋakɛlá Moyís é límekine hɔ́á tuɔŋɔ etíne éfendí, *elilé yɛ́ bɔsɔ́ma yɛ́ Bandɔ́mɛsɛ́ ŋé wuúci hámɛ́na hú huasɛ i iisí cɛ ɔsɛ́bɛ́á cɛ nɔkɔndɔ nú Sinayi ; yɛ́ ŋaá bá háyɛ tɔbɛ́mbɛ tú oocó a tɔ́ ŋa lɔ́la e hibutebúté.

³¹ Moyís ŋeé kéké nyɛnamá nyí eseye anyɛ́ ú ŋa lɛ́cá ; u ŋa sɛ́ weé bíkósíti né yiíyi, u ŋá lɔ́kɔ́ma okelú ú Otéŋí a Waáŋá ma bɛ́átábɔ́tɔ́na ɔ́sɛ :

³² “Yaŋɔ́, ya mɛ́ŋa Bandɔ́mɛsɛ́ ewú cííwu sɔ́kɔ́nɔ́ na Abɛ́laham, ne Isak, na Yákɔb ŋa bɔ́ bá bébú nyemiki.” Aáná bulíkílíki ŋeé tímbíé Moyís, u ŋé túme ɔnakama, u tɛ háná eéhínyínyi ɔlɛca.

³³ Otéŋí a Waáŋá ɔsɛ : “Bɛ́sɔ́mɔ́kɔ bɛkandɛ́na a akɔlɔ́, anyía haála eehe ahá ɔ́ mɔɔ́ tálɛ́mɛ́na áŋa hefúúménénú.

³⁴ Ɛ́ ma mɛ́ lɛcaka bɔmbányɛ muuyé mɔ́ báámɛ baacɔ a bá bɔ́ŋa e Esíbit, míɔ lɔ́kɔ́máka muabɔ́ mukéké ; buátɛ́ bɔkɔ ɛ́ ma mɛ́ lɔɔ anyía yémi beébe nohi. Aámbáya, cɔbá, ɛ́ ma mɛ́ ɔ tɔ́ma e Esíbit.” »

³⁵ Itiene ŋa cɔ́bána ɔtáŋa ne buúse ɔsɛ : « Waáta Moyís ooci baáná bá bunɔŋɔ bú Islayɛ́l ŋe bú kíné ɔlɔ́kɔ́mɛ́na, bá kɔ́ɔnaka báyɛ : “Aányɛ́ ú me yóo télímínyi ne úúsú otéŋí na muasɔ́ mukélísi bɛsana e ?” Wuúci oócí Bandɔ́mɛsɛ́ ŋeé beébe tɔ́mɛ́na anyía wé beébe téŋgínyi, mbá u beébe háŋɔ́náka a buɔ́lɛ́ ɛ́cɛ elilé yɛ́ bɔsɔ́ma yɛ́ Bandɔ́mɛsɛ́ yí meé wuúci lɔ́ŋɛ́ta. Elilé yɛ́ bɔsɔ́ma eéyí ŋa lɛ́cána né Moyís e hibutebúté.

³⁶ Moyís u ŋeé beébe kátɔ́na e Esíbit ɛ́cɛ ú ma kɛ́laka ne bikémése bɛ́ bɛsana ne bikéki bí tubílícínyínyí, o otúme e Esíbit ɔ ɔkɔɔ́háma na aá nuɔmɔ́ e Nubólótoto ne i iisí cɛ ɔsɛ́bɛ́á noómi a tuɔŋɔ etíne éfendí etú bé ŋe bú límékíne hɔ́á.

³⁷ Waáta Moyís oócí u ŋaá láána baáná bá bunɔŋɔ bú Islayɛ́l ɔsɛ : “Bandɔ́mɛsɛ́ káá banɔ́ tɔ́mɛ́na múáyɛ́ *muhémúnyi bɛsana mu etémbí. Mu káá bá háyɛ yaŋɔ́, muúmu ɔɔcɔ u búánɔ́ bunɔŋɔ.”

³⁸ Moyís tɔ́na u ŋaá bá ɛ ɛkatɛ́katɛ́ cɛ baacɔ bá bunɔŋɔ bú Islayɛ́l i iisí cɛ ɔsɛ́bɛ́á noómi. U ŋaá bá ɛ ɛkatɛ́katɛ́ ci ne cíísú sɔ́kɔ́nɔ́ ne elilé yɛ́ bɔsɔ́ma yɛ́ Bandɔ́mɛsɛ́ a yɛ́ ŋaá bá yɛ́á táŋáka ne wuúci a nɔkɔndɔ nú Sinayi. U ŋeé hiíte bɛsana e bí ŋe yíínjíéne olíhe, yɔ́ basɔ́ biíbi hulikinyi.

³⁹ Mbá cíísú sɔ́kɔ́nɔ́ ti ómo bú léne ɔlɔ́kɔ́mɛ́na Moyís ; buátɛ́ bɔkɔ bé ŋe bú wuúci bɛ́kátákɛ́ná, aáná ɔhálɔ́mɔ́na a bunɔŋɔ bú Esíbit ŋaá bá weé beébe hámɔ́kɔ́nɛ́na ɔ ɔtɛ́má.

⁴⁰ Bá ŋga bɔ́ laána *Aálɔn báyɛ : “Basɔ́ tábɔ́nákɛ́na bɛbandɔ́mɛsɛ́ a bɛ́ á nyɛmána bɛ́ ɔ basɔ́ súéke eé buúse ; tu ti ŋé sú ményi bɔkɔ a bɔ́ ma ka hámɛ́na Moyís, mu-basɔ́-kátɔ́na e Esíbit.”

⁴¹ Aáná bé ŋe bú túnéké hibílícínyínyí, hɛ́ hɔ́áka ɔɔ́nɔ́ u káwɔ. Bé ŋeé hiíhi sɔ́mbákɛ́na bitúké o onyemi hibílícínyínyí eéhí, bé bílénéke buéŋí a bɔkɔ ebú bé ŋe bú túnéke beébe bɛ́muátá.

⁴² Yaátɛ́ asana Bandɔ́mɛsɛ́ ŋeé beébe túme elime. U ŋé beébe nyɛána anyía bé nyemíki tunjoti tú ɛŋɔ́lɔ́muaná. *Híáná yááŋa yɔɔ́ŋɔ́kɔ́nɔ́ e nufule nú *behémúnyi bɛsana bá Bandɔ́mɛsɛ́ anyía : “Banɔ́ baacɔ bé Islayɛ́l, ɔ́kɔ, yaŋɔ́ nu ŋá nɔ́ sɔ́mbákɛ́ná bitúké, nuó mi iínjíékíne bɛnyɛ́ma bí etémbí o o mi nyeminyi i iisí cɛ ɔsɛ́bɛ́á a tuɔŋɔ etíne éfendí etú nu ŋe nú límékíne hɔ́á e ?

⁴³ Eéʼeé, tɛ́ cáŋa yaŋɔ́. Mbá nu ŋa nɔ́ bɛ́túáhɛ́na ekule yɛ́ bɔlaka yɛ́ *Mɔ́lɔk, ne hibílícínyínyí hí hinjoti hɛ́ cianɔ́ bandɔ́mɛsɛ́ *Lɛfan. Tuatɛ́ tubílícínyínyí eétú nú ŋa nɔ́ túáká o o tuútu nyemiki. Buátɛ́ bɔkɔ ɛ ká mɛ banɔ́ sélisi haaca ɔ ɔhɔla *Bábilon.” »

⁴⁴ Itiene ŋaá cɔ́bana ɔtáŋa eé buúse ɔsɛ : « Ekúlú eyí cíísú sɔ́kɔ́nɔ́ ŋa bɔ́ bá i iisí cɛ ɔsɛ́bɛ́á, bá ŋa bɔ́ bá ne ekule yɛ́ bɔlaka yɛ́ Bandɔ́mɛsɛ́. Yɛ́ ŋaá bá yó tóŋgínyi Bandɔ́mɛsɛ́ áŋa aabɔ́ ɛ ɛkatɛ́katɛ́. Bandɔ́mɛsɛ́ oócí u ŋaá táŋáká ne Moyís, u ŋé wuúci laána ɔsɛ wá falɛ́fáka ekule eéyé háyɛ u ŋeé wuúci tóŋgínyi.

⁴⁵ E elime eécí, cíísú sɔ́kɔ́nɔ́ ŋe bú síkíne báábɔ́ baáná ekule yɛ́ bɔlaka eéyé, bé ŋe bú yiíyi oofónóno i iisí acɛ́ bá ŋa bɔ́ hɔɔ́kɔ ná mɔnɔŋɔ amá ú ŋaá sánáká ekúlú eyí Sosué ŋaá bá weé beébe kendisiki. Ekule eéyé ŋeé limékíne hɔ́á ɔ ɔkɔɔ́háma ekúlú ekime eyí Otéŋí Táfit ŋeé líhéké.

⁴⁶ Waáta Táfit ŋeé bílénékíné Bandɔ́mɛsɛ́ a nyíáyɛ́ nyɛbɛ́kɛ́lɛ́na ; buátɛ́ bɔkɔ u ŋaá bátá Bandɔ́mɛsɛ́ u Yákɔb makɛ́nda me o wuúci falɛfakɛna ciíbe.

⁴⁷ Asana ɔ́mɔtɛ́, Sálɔmɔn u ŋa fálɛ́fákɛ́na Bandɔ́mɛsɛ́ Ciíbe.

⁴⁸ Mbá ta híáná, Bandɔ́mɛsɛ́ a wáŋa fáátɛ ɔ Ɔmuaná ti ŋé límine a anamá cé meébe ekime acɛ́ baacɔ ŋa bɔ́ fálɛfaka. Híáná muhémúnyi bɛsana mɔ Bandɔ́mɛsɛ́ ŋaá kɔ́ɔ́na mɔsɛ :

⁴⁹ “Ɔmuaná áŋa haála ehé i ŋeé mi téŋínyi, ɔmɛsɛ́ búámɛ bɔtálɛ́ná bɔ́ akɔlɔ́. Nyɛnamá nyí ciíbe nyɛ́ yaátɛ́ nua nɔ́ŋa nu ɔ mɛ falɛfakɛna e ? Ta anyía nyɛnamá nyɛ́ haála nyɛ́ háányɛ́ ya mɛ́ŋa wu ohélúméke hɔ́á e ?

⁵⁰ Tɛ́ka yaŋɔ́ ɛ ŋaá mɛ bɔ́táká bɛnyɛ́ma bikime eébí e ?” »

⁵¹ Itiene ná baacɔ bé Hitúlé ɔsɛ : « Banɔ́ baacɔ eebe, nua nɔ́ŋa na aatɔ́ ɔnata. Banɔ́ tɔ́na na ɛndɔ́kɔ́, nu tɛ háya cíínú ɛtɛ́má a Bɛsana bɛ́ Bandɔ́mɛsɛ́ noómi, nu náŋa nuénú núusiki *Efúúménénú yí Elilé, nu hɔ́áka cíínú sɔ́kɔ́nɔ́ a nyɛkɛla !

⁵² Muhémúnyi bɛsana mɔ Bandɔ́mɛsɛ́ amɔ́ háányɛ́ cíínú sɔ́kɔ́nɔ́ ti ómo tekese e ? Bá ŋa bɔ́ ɔ́ɔ́nɔ́kɔ́ behúli ɛsɔ́ma cɛ́ nyɛfaaya nyí ooci a wáŋa bímuócí atálɛ́mánánɔ́ yɛ́ ɔɔcɔ ; wuúci aámbáya nu ŋe nú túé, nuɔ́ wɔ́ɔ́nɔ́kɔ.

⁵³ Bandɔ́mɛsɛ́ ŋaá banɔ́ húlíkínyi bíáyɛ́ *bikotí ná bíáyɛ́ *bililé bɛ́ masɔ́ma, mbá banɔ́ te o biíbi lɔ́kɔ́mɛ́na. »

⁵⁴ Ɛ́makɛ́la baacɔ bé Hitúlé a hiáŋá ábɔ́ lɔ́kɔ́máka ɔtáŋa oócí, bá ŋá famɔ́núáka ne hilóbi, bé bíkótóko bɛkɛkɛ o olóbísínyi Itiene.

⁵⁵ Mbá Itiene u ŋaá bá onyíóyónó ne Efúúménénú yí Elilé hú mbiɔ́kɛ ; aáná u ŋaá tɔ́má eése ɔ ɔmuaná, u ŋá lɛcá ne eese a yaáŋá yɛ́ Bandɔ́mɛsɛ́ ne Yésus ɔtálɛ́mánánɔ́ a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́.

⁵⁶ Mbá Itiene ɔsɛ : « Ɛ́náka, ɛ ŋa mɛ́ lɛcá nyiofine nyɛ́ Ɔmuaná me bíkúune, *Ɔɔ́nɔ́ u ɔɔcɔ ma tálɛ́mɛ́na a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́ ! »

⁵⁷ Aáná beébe bekime ŋa bɔ́ bábálɛ́tá, bá ŋá bɛ́cúáka eetú na cáábɔ́ aabá, bé ŋé bísúkúníne Itiene a cɛɛ́tɔ.

⁵⁸ Bé ŋé wuúci hémúnyi a bálɛ́ka, nyi wuúci túméke andányɛ́ eényí o o wuúci ɔ́ɔ́nɔ. Bambasɔ́mbásɔ a bá ŋa bɔ́ lɛ́cáka asana eéyé ŋa bɔ́ bɛ́sɔ́mɔ́kɔ cííbú káaŋa, anyía bébú túméke Itiene andányɛ́. Bé ŋeé biíbi iínjíékíné ná ɔnɔ́kɔ́ yɛ́ ɔɔcɔ a yɛ́mɔtɛ́ anyía wé ciíci tétényíki ; ɔnɔ́kɔ́ yɛ́ ɔɔcɔ eéyé ŋaá bá nyiínyi anyía Sóol.

⁵⁹ Bá ŋa bɔ́ bá bébú túméke Itiene andányɛ́, waá bɛ́cɔ́kɔ́lɔ́kɛ́na Bandɔ́mɛsɛ́ ɔsɛ : « Cɔ́kɔ́lɛ, Yésus Otéŋí a Waáŋá, káha yáámɛ́ elilé. »

⁶⁰ U ŋeé túmé eŋéndu ɔ ɔmɛsɛ́, u ŋá bábálɛ́ta ɔsɛ : « Otéŋí a Waáŋá, beébe nyɛánɛ́nɛ́na bɔɔbɛ́ eebu ! » Ɛ́makɛ́la wá táŋɛ́ta aáná, nyíáyɛ́ nyiwé eényí.