Buólí 1 - Nomaande

Efúúménénú yí Elilé ayɛ́ Bandɔ́mɛsɛ́ ŋaá bɛ́tánɛ́ná

¹ Tiofil, ɛ ŋa mɛ́ ɔ wɔɔ́ŋɔ́kɛ́na eémi e nufule nú buúse na bɛsana bikime ebí Yésus ŋa kɛ́láka, ne ebí u ŋe yeékúnyíki o otúme e nyitúme nyɛ́ búáyɛ́ buólí

² ɔ ɔkɔɔ́háma buɔ́sɛ́ abɔ́ *Bandɔ́mɛsɛ́ ŋeé wuúci béétísí ɔ Ɔmuaná. Ekúlú ayɛ́ u ŋaá bá wá yánáŋa ɔ ɔmɛsɛ́, u ŋaá táfáká *baacɔ bá ɛndɔ́ma, yó beébe eékúnyíki bɛsana abɛ́ bábɔ́ nyɛmána bá ɔkɛlaka. U ŋaá kɛ́láka aáná a makɛ́nda me *Efúúménénú yí Elilé.

³ E elime ci muuyé amɔ́ ú ŋaá lɔ́kɔ́máká, u ŋé wé. Mbá u ŋa háányúá e biwéewé, yó bítóŋgínyi bɔmbányɛ bɔmbányɛ náábɔ́ a mɔɔ́sɛ́ etíne éfendí bikúlú biéŋí, anyía bébú ményi anyía wáŋa wɔɔ́sɔ ; u ŋeé beébe bíkétíkínyi bɛsana a bɛ́ ŋa lɛ́ca *Butéŋí bɔ́ Bandɔ́mɛsɛ́.

⁴ Búmɔtɛ́ buɔ́sɛ́, u ŋaá bá weé nyíékínyi ne beébe, u ŋé beébe laána ɔsɛ : « Nɔtɛ hatɔ́na e *Yelúsalɛm, mbá núá tátáka ɛndána acɛ́ ciamɛ́ Síkíne ŋaá banɔ́ bɛ́tánɛ́ná, ciíci ɛ ŋa mɛ́ cáŋa ɔ banɔ́ láakɛna.

⁵ Yááŋa anyía Sáaŋ ŋaá bá we yóotokine bu ootokine baacɔ ne menyífé, mbá banɔ́ Bandɔ́mɛsɛ́ káá banɔ́ óótokine ne Efúúménénú yí Elilé a tuɔ́sɛ́ɔ́sɛ́ a tɔ́ ŋá fáakɔna. »

Bandɔ́mɛsɛ́ me béétísi Yésus ɔ Ɔmuaná

⁶ Ekúlú ayɛ́ baacɔ bá ɛndɔ́ma ŋa bɔ́ bɛ́bándákána ne *Yésus, bé ŋe bú wuúci batá báyɛ : « Otéŋí a Waáŋá, mbá hí aámbáya aámbáya o ŋoó télímítúkúnyi Butéŋí bú Islayɛ́l e ? »

⁷ Yésus ɔsɛ : « Bu tɛ ŋá banɔ́ lɛ́ca anyía nuénu ményi bikúlú ta anyía onjéŋí, anyía bɛsana eébí ciamɛ́ Síkíne bímuócí ú ŋeé biíbi télímíkínyí aá maayɛ́ makɛ́nda ma bɛ́muátá.

⁸ Asana ɔ́mɔtɛ́, Bandɔ́mɛsɛ́ káá banɔ́ iínjie makɛ́nda ekúlú eyí *Efúúménénú yí Elilé ké yóofine náánɔ́, nu ká nɔ́ bámɔ́kɔ́nɛ́na báámɛ bambasɔ́mbásɔ, núo bíkétíkínyi baacɔ bɛsana ebí nú ŋe nú menyi aámɛ a asana, o otúme e Yelúsalɛm, ɔ ɔháma i iisí ne ci *Yuté ikime na cɛ *Samalí, ɔ ɔkɔɔ́háma ɔ mɔnɔŋɔ mekime me nyióndi ma ɔmɛsɛ́ ooci. »

⁹ Ekúlú ayɛ́ u ŋa máná ɔtáŋa oócí, Bandɔ́mɛsɛ́ nyi wuúci béétísi eényí ɔ Ɔmuaná, bé wuúci lɛcaka u báátáka ; bɛlɔndɔ́ ŋé wuúci bíhúéne, bá tɛ háná wuúci lɛca.

¹⁰ Ekúlú ayɛ́ bá ŋa bɔ́ bá batálánɔ́ eése ɔ Ɔmuaná, haála ehé Yésus ŋaá bá wá báátáka, bé ŋe síke ébú bítéme ɛ́cɛ baacɔ béfendí meé beébe tálɛ́mɛ́nɛ́na hú huasɛ eé buúse. Bá ŋa bɔ́ bá balaŋábákánɔ́ bɛlaŋa e bifúlúndúndúé,

¹¹ mbá báyɛ : « Banɔ́ baacɔ bá *Kalilé eebe, anyíatɛ́ nú ma nɔ́ yáánákɛ́na ɔ ɔlɛca ɔmuaná e ? Yésus ooci awɔ́ Bandɔ́mɛsɛ́ me wuúci béétísi ɔ Ɔmuaná, nu wuúci lɛcaka wá báátáka, wuúci u ká háná ka hálɔmɔna híáná háyɛ núánɔ́ lɛ́caka wá báátáka. »

Matias me hiíte nyiíse nyí buólí enyí Yútas ŋaá nyɛána

¹² Bá ŋa bɔ́ hálɔ́mɔ́kɔ́ná e Yelúsalɛm ɛ́cɛ bá ma bɔ́ hátɔna a nɔkɔndɔ anɔ́ bá ŋaá bá bɔ́ lɔ́ŋɔ́kɔ báyɛ nɔkɔndɔ nú Molifié ; núáŋa hoóhi ne Yelúsalɛm, ɔkanda áŋa wú ɔháma kilomɛ́ta ɛ́mɔtɛ́.

¹³ Ahɛ́ bá ŋga bɔ́ hálɔ́mɔ́ná eé Yelúsalɛm, bá ŋa bɔ́ báátáká e ekéti yɛ́ ɔnɔŋɔ ú ciíbe, haála ahá bá ŋa bɔ́ bá bébú límekine. Bá ŋa bɔ́ bá anyía ne Bíel na Sáaŋ, na Sáak na Andɛlɛ́, ɔláta ne Fílib na Tɔ́mas, na Baatelemí na Matío ɔ ɔkɔɔ́láta na Sáak ɔɔ́nɔ́ u Alafɛ, ne Símon awɔ́ bɔ́ ŋɔɔ́ lɔ́ŋɔ anyía Muléne ɔkátɔ́na bunɔŋɔ bú Islayɛ́l, ne Súute ɔɔ́nɔ́ u Sáak.

¹⁴ Bá ŋa bɔ́ bá bábɔ́ bɛ́bándákána bikúlú biéŋí, beébe bekime ɔtɛ́má ɔ́mɔtɛ́ ɔ ɔbɛ́cɔ́kɔ́lɛ́na Bandɔ́mɛsɛ́ ɔlɔŋɔ ne beénjú, na Malíi iinyí cí Yésus ne benyíinyí bé Yésus.

¹⁵ Buɔ́sɛ́ a búmɔtɛ́ ebú belumitinine ŋa bɔ́ bá babɛ́bándákánɔ́ hoóhi etíne étíndétú, Bíel ŋaá tálɛ́mɛ́ná aabɔ́ ɛ ɛkatɛ́katɛ́, ɔsɛ :

¹⁶ « Báámɛ benyíinyí é, Ciɔɔ́ŋɛ́ cɛ́ Bandɔ́mɛsɛ́ ŋá nyɛmána cí obínyíóyísíkínyi ; ciíci eécí *Efúúménénú yí Elilé ŋaá kɔ́ɔ́náka buáyá e nyuúté nyí Otéŋí *Táfit a asana ne Yútas, wuúci ú ŋeé tóŋgínyí bahatɛna Yésus ohónyí.

¹⁷ U ŋaá bá e úúsú ɔlɔŋɔ, wuúci na nuafa a búásɔ́ buólí.

¹⁸ (Ɔɔcɔ oócí ŋa kɛ́láka aabɛ́ yɛ́ asana, bé ŋé wuúci náma mɔɔnyɛ́ ; u ŋe meéme ɔɔ́ndɛ́na esíéné. E esíéné eéyé ú ŋga kúákɔ́na ne buúse, buŋime ŋɔ́ bɔɔlia, túáyɛ́ tɔɔna ŋá hámɔ́kɔ́na, u ŋé wé.

¹⁹ Baacɔ bekime bé Yelúsalɛm ŋe bú ményí asana eéyé, ɛ́ɛhɛ́ bá ŋa bɔ́ lɔá esíéné eéyé e uúbú ɔtáŋa anyía “Akɛlɛtáma”, ɛ́cɛ “Esíéné yɛ́ ɛmbaka”.)

²⁰ Yááŋa yɔɔ́ŋɔ́kɔ́nɔ́ e nufule nú Maŋana anyía : “Yááyɛ́ ahátátá ɔ́ lɔbɔ́ etémbí ; ɔɔcɔ ti limíne hɔ́á.” Yááŋa tɔ́na yɔɔ́ŋɔ́kɔ́nɔ́ anyía : “Ɔɔcɔ u etémbí é hiíte búáyɛ́ buólí bú mukendisi belumitinine.”

^21-22 Yaátɛ́ asana, ɔɔcɔ á basɔ́ bɛ́láta a wáŋa wu ɔhákɛ́na ɛmbasɔ́ anyía Yésus ŋá háányúá e biwéewé. Waáta ɔɔcɔ ŋá nyɛmána wu ɔbá ɔmɔtɛ́ a baacɔ e bé ŋe bú kéndíkínyí na basɔ́ ekúlú ekime eyí Otéŋí a Waáŋá Yésus ŋeé líhéke na basɔ́, o otúme ekúlú ayɛ́ Sáaŋ Batis ŋeé wuúci ootíne, ɔ ɔkɔɔ́háma ekúlú ayɛ́ u ŋa hátɔ́na aasɔ́ ɛ ɛkatɛ́katɛ́, Bandɔ́mɛsɛ́ yó wuúci béétísi ɔ Ɔmuaná. »

²³ Ekúlú ayɛ́ bá ŋa bɔ́ lɔ́kɔ́máká ɔtáŋa ú Bíel oócí, bé ŋé bu télímínyi baacɔ béfendí : Na Yɔ́sɛb a wáŋa ne nyiínyi anyía Baasábas, bá háná wuúci lɔ́ŋɔ́kɔ anyía Yusítus, ne wuúci na Matias.

²⁴ Bá ŋá bɛ́cɔ́kɔ́lɔ́kɛ́na Bandɔ́mɛsɛ́ báyɛ : « Otéŋí a Waáŋá, kuɔŋɔ́ o ŋoó menyi ɛtɛ́má cɛ́ baacɔ bekime ; ɔ́ɔ basɔ́ tóŋínyi bɔmbányɛ aányɛ́ ɔ́ mɔɔ́ táfa e bífendí bɛ́ baacɔ eebe,

²⁵ anyía wéé hííte nyiíse nyí buólí nyɛ́ *ɔɔcɔ u ɛndɔ́ma anyɛ́ Yútas ŋaá nyɛána, yó ko híite nyiíse nyí buólí e nyí é wuúci nyɛmana. »

²⁶ Bá ŋa bɔ́ aáhákɛ́na ɔndɔŋɔ na cáábɔ́ eénye, ɔndɔŋɔ ŋá táfa Matias, nyi wuúci láta eényí ɔ ɔlɔŋɔ ú baacɔ bá ɛndɔ́ma bɔ́ɔ́hátá na ɔ́mɔtɛ́.